Awˬ hkuiˉ puiˍ ve li‸ 30

1Raˍhkeˍlaˆ lehˬ yaˇ teˇ gʼaˇ ka‸ maˇ cawˬ ve pa taw, yawˇ ve awˬ viˉ ma hta‸ hkawehˉ ve nyi ma cawˬ la ve yoˬ. Hkʼe te leh yawˇ Yaˍkoˆ geh laˬ leh, Ngaˬ hta‸ yaˇ teˇ gʼaˇ pe‸ laˇ-oˆ. Oˇ hkʼe maˇ te laˇ ve kʼo, ngaˬ suh-e tuˬ yoˬ, teh‸ kʼoˆ piˇ ve yoˬ.

2Oˇ htaˇ Yaˍkoˆ lehˬ, Raˍhkeˍlaˆ hta‸ nyi ma zuhˆ leh, Ngaˬ Gʼuiˬsha awˬ tan te gʼa ve leh laˇ. Nawˬ hta‸ yaˇ paw la tuˬ a hkaw-anˬ maˇ pe‸ laˇ ve lehˬ Gʼuiˬsha yoˬ, teh‸ yawˇ hta‸ kʼoˆ piˇ ve yoˬ.

3Oˇ htaˇ Raˍhkeˍlaˆ kʼaw‸ kʼoˆ ve, Choˬ kaˬ ngaˬ ve awˬ ceˬ ma Biˇlaˍhaˍ chehˇ taˍ ve yoˬ. Yawˇ hta‸ pa taw ngaˬ yaˇ cawˬ la tuˬ leh ngaˬ awˬ e hpeh‸ la tuˬ, nawˬ yawˇ hta‸ heuˆ loˬ, teh‸ kʼoˆ piˇ ve yoˬ. 4Hkʼe te leh yawˇ ve awˬ ceˬ ma Biˇlaˍhaˍ hta‸ yuˬ leh Yaˍkoˆ hta‸ piˇ ve yoˬ. Yaˍkoˆ htawˇ yawˇ geh zuh‸ ve yoˬ. 5Biˇlaˍhaˍ yaˇ hu la leh yaˇ paˍ teˇ gʼaˇ paw la ve yoˬ. 6Oˇ htaˇ Raˍhkeˍlaˆ kʼoˆ ve, Gʼuiˬsha lehˬ ngaˬ hpawˇ lo chehˇ leh suhˉ jehˬ laˇ peuˬ. Yawˇ lehˬ, ngaˬ ve bon lawˬ hkawˇ hta‸ na yuˬ leh ngaˬ hta‸ yaˇ paˍ teˇ gʼaˇ piˇ laˇ peuˬ, teh‸ kʼoˆ leh yaˇ paˍ oˇ ve hta‸ Danˍ teh‸ meh piˇ ve yoˬ. 7Biˇlaˍhaˍ yaˇ teˇ gʼaˇ kʼaw‸ hu la leh, awˬ nu ve yaˇ paˍ teˇ gʼaˇ kʼaw‸ paw la ve yoˬ. 8Oˇ htaˇ Raˍhkeˍlaˆ kʼaw‸ kʼoˆ ve, Ngaˬ lehˬ ngaˬ viˉ ma hta‸ cuˇ yiˍ te da‸ leh chi beu‸ ngaˬ gʼaˇ peuˬ, teh‸ kʼoˆ leh, yaˇ paˍ oˇ ve hta‸ Naˍtaˍliˆ teh‸ meh piˇ ve yoˬ.

9Leˇaˍ lehˬ, yawˇ yaˇ maˇ kʼaw‸ cawˬ ve hta‸ gʼa shiˍ ve teˇ yanˇ, yawˇ ve awˬ ceˬ ma Ziˇlaˍpaˆ hta‸ yuˬ leh Yaˍkoˆ hta‸ piˇ ve yoˬ. 10Hkʼe te leh Ziˇlaˍpaˆ lehˬ Yaˍkoˆ awˬ pon yaˇ paˍ teˇ gʼaˇ paw la piˇ ve yoˬ. 11Oˇ htaˇ Leˇaˍ kʼoˆ ve, Ngaˬ lehˬ awˬ bon da‸ jaˇ ve yoˬ, teh‸ kʼoˆ leh yaˇ paˍ oˇ ve hta‸ Gaˆ teh‸ meh piˇ ve yoˬ. 12Oˇ ve hkʼaw‸ nawˉ, Ziˇlaˍpaˆ awˬ nu ve yaˇ paˍ teˇ gʼaˇ kʼaw‸ paw la ve yoˬ. 13Oˇ htaˇ Leˇaˍ kʼoˆ ve, Ngaˬ hkʼaˬ ma ha lehˬ jaˇ ve le. Chi beu‸ yaˇ miˇ teˇ hpaˍ ngaˬ hta‸, Ha lehˬ shehˍ ma, teh‸ kʼoˆ tuˬ yoˬ, teh‸ kʼoˆ ve yoˬ. Hkʼe te leh yaˇ paˍ oˇ ve hta‸ yawˇ Aˍshaˍ teh‸ meh piˇ ve yoˬ.

14Oˇ ve hkʼaw‸ nawˉ, caˬ gʼeu‸ ve awˬ yanˇ gaˬ la ve yoˬ. Teˇ nyi htaˇ, Ruˉbenˍ lehˬ ti mi lo kʼai leh a tcuhˉ leh‸ shiˍ teˇ hpaˍ shaˉ veu laˇ leh yawˇ ve awˬ e Leˇaˍ hta‸ piˇ ve yoˬ. Oˇ htaˇ Raˍhkeˍlaˆ lehˬ, Leˇaˍ geh a tcuhˉ leh‸ shiˍ ca lawˬ caˇ ve yoˬ.

15Oˇ htaˇ Leˇaˍ kʼoˆ ve, Nawˬ lehˬ ngaˬ ve awˬ hpawˇ hta‸ yuˬ kʼai peuˬ ve ka‸ nyi hkʼaˇ maˇ suh sheˬ leh chi teˇ pawˆ ka‸ ngaˬ yaˇ paˍ ve a tcuhˉ leh‸ shiˍ hta‸ htawˇ kʼaw‸ yuˬ kʼai gaˇ sheˬ ve laˇ, teh‸ kʼoˆ piˇ ve yoˬ.

Oˇ htaˇ Raˍhkeˍlaˆ kʼaw‸ kʼoˆ ve, Nawˬ ngaˬ hta‸ a tcuhˉ leh‸ shiˍ caˍ laˇ ve kʼo, ya‸ puiˉ nawˬ Yaˍkoˆ geh zuh‸ hpeh‸ ve yoˬ, teh‸ kʼoˆ piˇ ve yoˬ. 16Oˇ ve teˇ haˉ Yaˍkoˆ ti mi lo kʼai kʼaw‸ la ve teˇ yanˇ, Leˇaˍ yawˇ hta‸ ca ha‸ yuˬ leh kʼoˆ ve, Nawˬ ya‸ puiˉ ngaˬ geh gʼa zuh‸ ve yoˬ. Awˬ lawn kʼo, ngaˬ yaˇ paˍ shaˉ veu laˇ ve a tcuhˉ leh‸ shiˍ hta‸ yuˬ leh nawˬ hta‸ pa taˍ ve yoˬ, teh‸ yawˇ hta‸ kʼoˆ piˇ ve yoˬ. Hkʼe te leh oˇ ve teˇ haˉ yawˇ Leˇaˍ geh zuh‸ ve yoˬ.

17Gʼuiˬsha lehˬ Leˇaˍ ve bon lawˬ hkawˇ hta‸ na yuˬ leh, yawˇ hta‸ yaˇ paˍ ngaˇ gʼaˇ teˇ gʼaˇ kʼaw‸ cawˬ la piˇ ve yoˬ. 18Oˇ htaˇ Leˇaˍ kʼoˆ ve, Ngaˬ ve awˬ ceˬ ma hta‸ yuˬ leh ngaˬ ve awˬ hpawˇ hta‸ piˇ ve pa taw, Gʼuiˬsha ngaˬ hta‸ awˬ bon na‸ laˇ peuˬ, teh‸ kʼoˆ leh yaˇ paˍ oˇ ve hta‸ Iˉsaˍhkaˍ teh‸ meh piˇ ve yoˬ. 19Oˇ ve hkʼaw‸ nawˉ Leˇaˍ yaˇ teˇ pawˆ kʼaw‸ hu la leh, yaˇ paˍ hkaw‸ gʼaˇ teˇ gʼaˇ kʼaw‸ paw la ve yoˬ. 20Oˇ htaˇ Leˇaˍ kʼoˆ ve, Gʼuiˬsha ngaˬ hta‸ da‸ ve la‸ shawnˍ piˇ laˇ peuˬ. Chi beu‸ ngaˬ lehˬ yaˇ paˍ hkaw‸ gʼaˇ paw la taˍ peuˬ ve pa taw, ngaˬ ve awˬ hpawˇ ngaˬ hta‸ ha‸ yuˬ laˇ tuˬ yoˬ, teh‸ kʼoˆ ve yoˬ. Hkʼe te leh, yaˇ paˍ oˇ ve hta‸ yawˇ Zaˍbuˆlonˍ teh‸ meh piˇ ve yoˬ. 21Oˇ ve hkʼaw‸ nawˉ, yawˇ yaˇ miˇ teˇ gʼaˇ kʼaw‸ paw la leh yawˇ hta‸ Diˉnaˆ teh‸ meh piˇ ve yoˬ.

22Gʼuiˬsha lehˬ, Raˍhkeˍlaˆ hta‸ htawˇ dawˇ nawˇ chehˇ ve yoˬ. Yawˇ lehˬ Raˍhkeˍlaˆ ve bon lawˬ hkawˇ hta‸ na yuˬ leh, yawˇ hta‸ yaˇ paˍ teˇ gʼaˇ cawˬ la piˇ ve yoˬ. 23Oˇ htaˇ yawˇ kʼoˆ ve, Gʼuiˬsha ngaˬ hta‸ awˬ me‸ awˬ hponˇ cawˬ la piˇ leh, yaˇ paˍ teˇ gʼaˇ pe‸ laˇ peuˬ. 24Yawˇ ngaˬ hta‸ awˬ nu ve yaˇ paˍ teˇ gʼaˇ kʼaw‸ pe‸ laˇ piˇ-oˆ, teh‸ kʼoˆ leh yaˇ paˍ oˇ ve hta‸ Yoˇseh‸ teh‸ meh piˇ ve yoˬ.

Yaˍkoˆ Laˍbanˍ geh tawˇ gʼawˬ da‸ ve

25Yoˇseh‸ paw la peuˬ hkʼaw‸ nawˉ, Yaˍkoˆ Laˍbanˍ hta‸ kʼoˆ piˇ ve, Ngaˬ ve mvuhˇmiˬ lo ngaˬ hta‸ kʼaw‸ kʼo‸-e tcuh laˇ-oˆ. 26Ngaˬ maˉ muiˬ leh gʼa taˍ ve ngaˬ miˇ ma teˇ hpaˍ leh ngaˬ yaˇ teˇ hpaˍ ngaˬ hta‸ pe‸ laˇ-oˆ. Ngaˬ shiˍ kʼo‸-e yoˬ. Ngaˬ nawˬ awˬ pon kanˉ hkʼaˬ ma te taˍ peuˬ ve hta‸ nawˬ shiˍ taˍ ve yoˬ, teh‸ yawˇ hta‸ kʼoˆ piˇ ve yoˬ.

27Laˍbanˍ yawˇ hta‸ kʼoˆ piˇ ve, Ngaˬ kʼoˆ laˇ tuˬ ve tawˇ hta‸ a ciˉ na taˍ sheˬ. Nawˬ hta‸ pa taw, Gʼuiˬsha ngaˬ hta‸ awˬ bon na‸ laˇ leh, chi beu‸ ngaˬ paw sha la peuˬ. 28Chi hta‸ pa taw, ngaˬ nawˬ hta‸ aˬ hto‸ ma gʼa piˇ laˇ tuˬ ve le. Ngaˬ hta‸ kʼoˆ laˇ-oˆ. Ngaˬ nawˬ hta‸ piˇ laˇ tuˬ yoˬ, teh‸ kʼoˆ piˇ ve yoˬ.

29Yaˍkoˆ kʼaw‸ yaw hkʼaw‸ leh kʼoˆ ve, Ngaˬ nawˬ awˬ pon hkʼaˬ ma te piˇ taˍ ve hta‸ maˇ kʼoˆ, ngaˬ hta‸ pa taw nawˬ ve ceˇ maˇ la peuˬ ve hta‸ maˇ kʼoˆ, nawˬ shiˍ taˍ ve yoˬ. 30Ngaˬ nawˬ geh gaˬ la htaˇ, nawˬ geh ceˇ a ciˉ ceh tiˉ cawˬ ve yoˬ. Ya‸ hkʼaˇ, chi beu‸ lehˬ nawˬ ve ceˇ maˇ la peuˬ. Ngaˬ hkʼa kʼai kuiˬ teˇ kaˬ le le awˬ hkʼaw lo, Gʼuiˬsha nawˬ hta‸ awˬ bon na‸ piˇ chehˇ ve yoˬ. Chi beu‸ lehˬ, ngaˬ hkʼaˇ ngaˬ yehˬ tanˬ yanˇ gaˬ peuˬ, teh‸ kʼoˆ piˇ ve yoˬ.

31Oˇ htaˇ Laˍbanˍ lehˬ, Hkʼe te kʼo, ngaˬ nawˬ hta‸ aˬ hto‸ ma gʼa piˇ laˇ tuˬ le, teh‸ kʼoˆ piˇ ve yoˬ.

Yaˍkoˆ kʼaw‸ kʼoˆ ve, Ngaˬ hta‸ te‸ chiˉ piˇ laˇ tuˬ maˇ loˬ. Ngaˬ kʼoˆ ve hkʼe nawˬ te ve kʼo, nawˬ ve ceˇ teˇ hpaˍ hta‸ ngaˬ kʼaw‸ caˉ leh nyi ha‸ shaˉ laˇ tuˬ yoˬ. 32Ya‸ nyi ngaˬ nawˬ ve ceˇ teˇ hpaˍ chehˇ taˍ kuiˬ lo kʼai leh naˆ-ehˍ ve yawˬ ehˉ teˇ hpaˍ leh ga‸-ehˍ ve aˉ che‸ teˇ hpaˍ hta‸ teˇ kaˬ lo leuˆ teh taˍ laˇ tuˬ yoˬ. Chi teˇ hpaˍ lehˬ, ngaˬ gʼa cawˇ ve ceˇ hpeh‸ ve yoˬ. 33Chi hkʼe te taˍ ve pa taw, awˬ hkʼaw‸ nawˉ nawˬ ngaˬ geh laˬ leh, ngaˬ gʼa cawˇ ve ceˇ teˇ hpaˍ hta‸ ca nyi la ve teˇ yanˇ, ngaˬ lehˬ hteˇ ve cawˇ ve awˬ hkʼaw lo kanˉ te taˍ ve hta‸ nawˬ gʼa mawˬ tuˬ yoˬ. Ga‸-ehˍ maˇ cawˬ ve aˉ che‸ leh naˆ-ehˍ maˇ cawˬ ve yawˬ ehˉ teˇ hpaˍ hta‸ nawˬ ngaˬ geh lo gʼa mawˬ ve kʼo, oˇ ve teˇ hpaˍ hta‸ ngaˬ hkʼawˇ yuˬ taˍ ve yoˬ, teh‸ nawˬ shawˍ hpeh‸ ve yoˬ, teh‸ kʼoˆ piˇ ve yoˬ.

34Laˍbanˍ htawˇ, Ngaˬ nyi hkʼaˇ suh ve yoˬ. Nawˬ kʼoˆ ve hkʼe te-o, teh‸ kʼoˆ ve yoˬ. 35Hkʼe te leh, oˇ ve teˇ nyi yawˇ lehˬ ga‸-ehˍ ve aˉ che‸ awˬ paˍ awˬ ma teˇ hpaˍ leh, naˆ-ehˍ ve yawˬ teˇ hpaˍ hta‸ leuˆ tawˆ leh yawˇ ve yaˇ paˍ teˇ hpaˍ hta‸ ha‸ shaˉ tcuh ve yoˬ. 36Yaˍkoˆ chehˇ kuiˬ hta‸ shehˆ nyi vuiˇ da‸ kuiˬ lo ceˇ oˇ ve teˇ hpaˍ hta‸ gʼa‸ kʼai ve yoˬ. Yaˍkoˆ lehˬ, cawˬ taˉ ve Laˍbanˍ ve ceˇ teˇ hpaˍ hta‸ ha‸ shaˉ chehˇ taˍ ve yoˬ.

37Oˇ ve hkʼaw‸ nawˉ, Yaˍkoˆ lehˬ nawˉ lehˍ cawˬ ve Liˆbaˍnaˍ cehˬ, luˇzaˆ cehˬ leh pfuhˇ cehˬ awˬ kʼaˉ teˇ hpaˍ ca tawˆ veu laˇ leh, awˬ guiˬ kʼuˉ hkʼeh‸ baˬ ve yoˬ. 38Peuˬ leh suhˆ taˬ oˇ ve teˇ hpaˍ hta‸ yawˬ ehˉ, aˉ che‸ ehˉ teˇ hpaˍ iˉ kaˆ ca dawˬ la kuiˬ lawˇ kʼoˍ awˬ paˇ lo choˆ taˍ ve yoˬ. 39Yawˬ ehˉ leh aˉ che‸ ehˉ teˇ hpaˍ iˉ kaˆ ca dawˬ la ve teˇ yanˇ, awˬ shawˍ ca puiˉ ve pa taw yawˇ hui lehˬ oˇ kaˬ lo choˆ taˍ ve suhˆ taˬ teˇ hpaˍ gʼuˇ suhˍ lo awˬ shawˍ chaw ve yoˬ. Hkʼe te leh, yawˇ hui lehˬ ga‸ lehˍ ve awˬ yehˇ teˇ hpaˍ paw la ve yoˬ.

40Yaˍkoˆ lehˬ yawˬ ehˉ teˇ hpaˍ hta‸ pehˬ da‸ leh, yawˬ awˬ ma teˇ hpaˍ hta‸ ga‸ lehˍ cawˬ ve yawˬ awˬ paˍ teˇ hpaˍ hpawˇ lo ceh tiˉ gʼa‸ peu ve yoˬ. Oˇ hkʼe te leh yawˇ ve yawˬ ehˉ teˇ hpaˍ hta‸ teˇ kaˬ lo fuiˍ teh taˍ ve yoˬ.

41Awˬ gʼaˇ uiˬ ve aˉ che‸ teˇ hpaˍ awˬ shawˍ chaw ve teˇ yanˇ, choˆ taˍ ve suhˆ taˬ teˇ hpaˍ awˬ kʼaw ji lo awˬ shawˍ chaw hpeh‸ tuˬ, Yaˍkoˆ lehˬ suhˆ taˬ oˇ ve teˇ hpaˍ hta‸ yawˇ hui iˉ kaˆ dawˬ kuiˬ lawˇ kʼoˍ awˬ paˇ lo choˆ piˇ taˍ ve yoˬ. 42Awˬ gʼaˇ maˇ cawˬ ve aˉ che‸ teˇ hpaˍ mehˆ gʼuˇ suhˍ lo suhˆ taˬ oˇ ve teˇ hpaˍ hta‸ yawˇ maˇ choˆ piˇ taˍ. Hkʼe te leh, awˬ gʼaˇ maˇ cawˬ ve aˉ che‸ teˇ hpaˍ lehˬ, Laˍbanˍ ve ceˇ hpeh‸ la leh, awˬ gʼaˇ cawˬ ve ceˇ teˇ hpaˍ lehˬ Yaˍkoˆ ve ceˇ hpeh‸ la ve yoˬ. 43Hkʼe te leh, Yaˍkoˆ lehˬ mawˇ jeˬ maˇ maˇ cawˬ la ve yoˬ. Yawˇ geh lo yawˬ ehˉ aˉ che‸ ehˉ teˇ hpaˍ, awˬ ceˬ teˇ hpaˍ, kaˍlaˍoˆ teˇ hpaˍ leh piˉ laˬ teˇ hpaˍ maˇ maˇ cawˬ la ve yoˬ.

Currently Selected:

Awˬ hkuiˉ puiˍ ve li‸ 30: LHBE

Highlight

Copy