Awˬ hkuiˉ puiˍ ve li‸ 28

Yaˍkoˆ hta‸ Laˍbanˍ geh kʼai tcuh ve

1Oˇ htaˇ, Iˉcaˆ yawˇ yaˇ paˍ Yaˍkoˆ hta‸ kuˬ leh chi hkʼe kʼoˆ piˇve yoˬ. Hkaˍnanˍ mvuhˇmiˬ hkʼaw chehˇ ve yaˇ miˇ hta‸ taˇ heuˆ. 2Nawˬ puˍ Beˍtuˍlaˆ chehˇ kuiˬ Meˍsoˇpoˇtaˍmiˆ mvuhˇmiˬ lo kʼai leh oˇ kaˬ lo nawˬ e ve awˬ nyi paˍ Laˍbanˍ ve yaˇ miˇ teˇ gʼaˇ gʼaˇ hta‸ ca nyi heuˆ-e loˬ. 3Gʼuiˬsha lehˬ nawˬ ve awˬ ceuˬ awˬ hkʼaˇ teˇ hpaˍ hta‸ maˇ la piˇ leh, chaw ceuˬ lonˉ teˇ ceuˬ hpeh‸ la htaˇ hkʼa gaˬ, nawˬ hta‸ awˬ bon na‸ laˇ piˇ-oˆ. 4Yawˇ lehˬ Aˍbraˍhanˍ hta‸ bon na‸ piˇ ve hkʼe, nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ htawˇ bon na‸ laˇ piˇ-oˆ. Gʼuiˬsha Aˍbraˍhanˍ hta‸ piˇ leh chi beu‸ nawˬ chehˇ taˍ ve mvuhˇmiˬ chi, nawˬ ve mvuhˇmiˬ hpeh‸ la piˇ-oˆ, teh‸ kʼoˆ piˇ ve yoˬ. 5Hkʼe te leh, Iˉcaˆ lehˬ Yaˍkoˆ hta‸ tawˆ kʼai tcuh leh, yawˇ lehˬ Meˍsoˇpoˇtaˍmiˆ hkʼaw chehˇ ve Laˍbanˍ geh kʼai ve yoˬ. Laˍbanˍ lehˬ, Aˍranˍ chaw Beˍtuˍlaˆ ve yaˇ hpeh‸ leh, Yaˍ koˆ leh Iˉsawˇ hui ve awˬ e Reˍbehˆka‸ ve awˬ nyi paˍ hpeh‸ ve yoˬ.

Iˉsawˇ awˬ miˇ ma teˇ gʼaˇ kʼaw‸ heuˆ ve

6Iˉcaˆ lehˬ, Yaˍkoˆ hta‸ Meˍsoˇpoˇtaˍmiˆ mvuhˇmiˬ lo awˬ miˇ ma ca-e tcuh ve awˬ lawn hta‸ maˇ kʼoˆ, Hkaˍnanˍ mvuhˇmiˬ hkʼaw chehˇ ve yaˇ miˇ hta‸ maˇ gʼa heuˆ, teh‸ yawˇ hta‸ awˬ bon na‸ piˇ htaˇ kʼoˆ piˇ ve tawˇ hta‸ maˇ kʼoˆ, yawˇ gʼa shiˍ ve yoˬ. 7Chi hkʼoˆ ka‸ Yaˍkoˆ lehˬ, yawˇ ve awˬ pa awˬ e ve tawˇ hta‸ na leh Meˍsoˇ poˇtaˍmiˆ mvuhˇmiˬ lo kʼai peuˬ ve hta‸ maˇ kʼoˆ, 8yawˇ ve awˬ pa Iˉcaˆ lehˬ Hkaˍnanˍ mvuhˇmiˬ hkʼaw chehˇ ve yaˇ miˇ teˇ hpaˍ hta‸ nyi ma maˇ cawˇ ve hta‸ maˇ kʼoˆ, Iˉsawˇ yawˇ gʼa shiˍ ve teˇ yanˇ, 9yawˇ Aˍbraˍhanˍ ve yaˇ Iˉshaˍmeˍlaˆ geh kʼai leh, yawˇ ve yaˇ miˇ Naˍbaˍyoˆ ve awˬ nyi ma Maˍhaˍlaˆ hta‸ heuˆ ve yoˬ.

Yaˍkoˆ zuh‸ maˆ mawˬ ve

10Yaˍkoˆ lehˬ, Beˍraˍsheˍbaˆ hkʼaw tawˆ kʼai leh, Haˍranˍ venˇ lo kʼai ve yoˬ. 11Mvuhˇ hpeu‸ la htaˇ yawˇ lehˬ da‸ kehˬ ve chehˇ kuiˬ teˇ kaˬ lo gaˬ leh, oˇ kaˬ lo haˉ ve yoˬ. Yawˇ lehˬ haˉ pui shiˍ teˇ shiˍ gʼawˆ leh uˉ gehˇ te zuh‸ ve yoˬ. 12Yawˇ zuh‸ maˆ ve awˬ hkʼaw lo, miˬguiˬ hta‸ te leh mvuhˇ naw ma hta‸ daw‸ taˍ ve go lonˉ teˇ maˬ hta‸ gʼa mawˬ ve yoˬ. Mvuhˇ naw ma tcuh yaˇ teˇ hpaˍ, go lonˉ oˇ ve awˬ hkʼoˆ lo taˆ taˆ ya‸ ya‸ te chehˇ ve yoˬ. 13Gʼuiˬsha yawˇ awˬ paˇ lo huˉ taˍ leh kʼoˆ ve, Ngaˬ lehˬ Aˍbraˍhanˍ leh Iˉcaˆ ve Gʼuiˬsha hpeh‸ ve yoˬ. Chi beu‸ nawˬ zuh‸ chehˇ ve chehˇ kuiˬ chi, nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ piˇ laˇ tuˬ yoˬ. 14Yawˇ hui lehˬ, miˬguiˬ hkʼoˆ lo cawˬ ve je‸ meu-e hkʼa shuˍ maˇ jaˇ leh, miˬguiˬ chi hkʼaˬ hpawˇ chi hpawˇ lo biˇ kʼai tuˬ yoˬ. Nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ cuˇ leh, miˬguiˬ chaw ceuˬ hkʼa peu-eˬ ve hta‸ ngaˬ bon na‸ piˇ tuˬ yoˬ. 15Ngaˬ lehˬ nawˬ geh chehˇ taˍ leh, nawˬ mvuhˇmiˬ chi ve lo kʼaw‸ gaˬ la htaˇ hkʼa gaˬ, nawˬ kʼai kuiˬ teˇ kaˬ le le hkʼaw ngaˬ nawˬ hta‸ ha‸ shaˉ laˇ tuˬ yoˬ. Ngaˬ nawˬ hta‸ te taˍ ve ka ti‸ maˇ biˇ la sheˬ ve ceh ceh, ngaˬ nawˬ hta‸ maˇ chiˇ baˬ, teh‸ kʼoˆ ve yoˬ.

16Yaˍkoˆ zuh‸ nawˇ la leh kʼoˆ ve, Gʼuiˬsha lehˬ awˬ tehˬ awˬ na choˬ kaˬ lo chehˇ taˍ ve yoˬ. Ya‸ hkʼaˇ, Yawˇ chehˇ taˍ ve hta‸ ngaˬ maˇ shiˍ, teh‸ kʼoˆ ve yoˬ. 17Oˇ htaˇ yawˇ kawˆ jaˇ leh kʼoˆ ve, Chehˇ kuiˬ chi lehˬ hkʼaˬ ma kawˆ tuˬ cawˬ ve le. Chi lehˬ Gʼuiˬsha ve yehˬ hpeh‸ leh, mvuhˇ naw ma mvuhˇmiˬ ve yehˬ miˉ hpeh‸ ve yoˬ, teh‸ kʼoˆ ve yoˬ.

18Yaˍkoˆ mvuhˇ shawˉ teˇ na‸ tu leh, yawˇ uˉ gehˇ te zuh‸ chehˇ ve haˉ pui shiˍ oˇ ve awˬ hkʼoˆ lo naˍ manˇ ngeuˍ pfuhˍ leh, Gʼuiˬsha hta‸ chiˇ a‸ piˇ ve yoˬ. 19Hkʼe te leh chehˇ kuiˬ oˇ ve hta‸ yawˇ Beˍteˍlaˆ #28:19 Chi lehˬ Gʼuiˬsha ve yehˬ teh‸ kʼoˆ gaˇ ve yoˬ teh‸ meh piˇ ve yoˬ. (Awˉ lawˉ htaˇ venˇ oˇ ve hta‸ Luˇzaˆ teh‸ meh taˍ ve yoˬ) 20Oˇ ve hkʼaw‸ nawˉ, Yaˍkoˆ yawˇ ka ti‸ chi hkʼe te ve yoˬ. Gʼuiˬsha-oˬ, nawˬ ngaˬ geh chehˇ leh, ngaˬ pa ve yehˬ lo kʼaw‸ gaˬ la htaˇ hkʼa gaˬ, 21ngaˬ hta‸ ha‸ shaˉ leh caˍ laˇ taw laˇ, feuˉ laˇ deh laˇ ve kʼo, nawˬ lehˬ ngaˬ ve Gʼuiˬsha hpeh‸ ve yoˬ. 22Chi hkʼoˆ, chi beu‸ ngaˬ haˉ pui shiˍ duˇ ti taˍ ve chehˇ kuiˬ chi ve htawˇ, nawˬ hta‸ oˉ kʼoˍ pui kuiˬ hpeh‸ la tuˬ yoˬ. Nawˬ ngaˬ hta‸ piˇ laˇ ve awˬ bon hkʼa peu-eˬ awˬ hkʼaw lo, nawˬ hta‸ teˇ chi pun teˇ pun kʼaw‸ tanˇ laˇ tuˬ yoˬ, teh‸ kʼoˆ ve yoˬ.

Currently Selected:

Awˬ hkuiˉ puiˍ ve li‸ 28: LHBE

Highlight

Copy