Awˬ hkuiˉ puiˍ ve li‸ 27
27
Iˉcaˆ Yaˍkoˆ hta‸ bon na‸ piˇ ve
1Chi teˇ yanˇ Iˉcaˆ lehˬ mawˇ jaˇ peuˬ ve pa taw, mehˆ maˇ mawˬ-o. Hkʼe te leh, yawˇ yaˇ paˍ Iˉsawˇ hta‸ kuˬ yuˬ leh, Ngaˬ yaˇ paˍ-oˬ, teh‸ kʼoˆ piˇ htaˇ Iˉsawˇ htawˇ, Ngaˬ choˬ kaˬ chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.
2Oˇ htaˇ yawˇ Iˉsawˇ hta‸ kʼoˆ piˇ ve, Chi beu‸ ngaˬ lehˬ mawˇ la peuˬ. Maˇ maw maw gʼa suh tuˬ yoˬ. 3Ngaˬ maˇ suh sheˬ htaˇ, nawˬ hta‸ awˬ bon na‸ laˇ gaˇ ve yoˬ. Hkʼe te leh, nawˬ ve hkaˆ taˆ veu leh heh puiˉ hkʼaw lo shaˍ ca bawˆ hkʼa nyi. 4Shaˍ gʼa ve kʼo ngaˬ caˇ mehˬ ve awˍ chiˇ hkʼa deh‸ te leh, ngaˬ geh yuˬ veu laˇ-oˆ, teh‸ kʼoˆ piˇ ve yoˬ.
5Reˍbehˆka‸ lehˬ, Iˉcaˆ yawˇ ve yaˇ paˍ Iˉsawˇ hta‸ tawˇ yaw piˇ chehˇ ve hta‸ jaˆ na taˍ ve yoˬ. Iˉsawˇ heh puiˉ hkʼaw lo shaˍ ca bawˆ kʼai ve teˇ yanˇ, 6Reˍbehˆka‸ yawˇ ve yaˇ paˍ Yaˍkoˆ hta‸ kʼoˆ piˇ ve, Nawˬ pa nawˬ viˉ paˍ Iˉsawˇ hta‸ kuˬ yuˬ leh, 7Ngaˬ maˇ suh sheˬ htaˇ Gʼuiˬsha mehˆ gʼuˇ suhˍ lo ngaˬ nawˬ hta‸ awˬ bon na‸ laˇ gaˇ ve yoˬ. Hkʼe te leh, nawˬ heh puiˉ hkʼaw lo shaˍ ca bawˆ veu laˇ leh ngaˬ caˇ mehˬ ve awˍ chiˇ te veu laˇ-oˆ, teh‸ kʼoˆ piˇ ve awˬ hkawˇ hta‸ ngaˬ gʼa kaˇ taˉ peuˬ. 8Chi hta‸ pa taw yaˇ paˍ-oˬ, ngaˬ kʼoˆ ve hkʼe te-o. 9Chi beu‸ aˉ che‸ hpehˇ taˍ kuiˬ lo kʼai leh, da‸ ve aˉ che‸ ehˉ nyiˇ hkeh ngaˬ geh yuˬ veu laˇ-oˆ. Ngaˬ lehˬ nawˬ pa caˇ mehˬ puiˉ ve awˍ chiˇ hkʼa deh‸ te piˇ shaˍ. 10Oˇ hkʼe te peuˬ kʼo, yawˇ maˇ suh sheˬ htaˇ caˇ taˉ leh nawˬ hta‸ bon na‸ laˇ tuˬ, yawˇ geh yuˬ kʼai piˇ-oˆ, teh‸ kʼoˆ piˇ ve yoˬ.
11Oˇ htaˇ, Yaˍkoˆ yawˇ ve awˬ e Reˍbehˆka‸ hta‸ kʼoˆ piˇ ve, Ngaˬ e-oˬ, Iˉsawˇ lehˬ awˬ mvuh buiˇ-ehˍ cawˬ leh ngaˬ lehˬ awˬ shaˍ leˆ-ehˍ cawˬ ve yoˬ. 12Yawˇ ngaˬ hta‸ shoˆ nyi laˇ leh ngaˬ heˍ ve hta‸ gʼa shiˍ ve kʼo, awˬ bon na‸ laˇ ve hta‸ gʼa ve a‸ kehˉ hkeu ve hta‸ gʼa tuˬ yoˬ, teh‸ kʼoˆ piˇ ve yoˬ.
13Yawˇ ve awˬ e kʼaw‸ kʼoˆ ve, Ngaˬ yaˇ paˍ-oˬ, hkeu ve oˇ ve ngaˬ awˬ hkʼoˆ gaˬ la piˇ-oˆ. Ya‸ hkʼaˇ, nawˬ lehˬ chi beu‸ ngaˬ kʼoˆ ve hkʼe te leh, aˉ che‸ ehˉ teˇ hpaˍ hta‸ ca yuˬ veu laˇ-oˆ, teh‸ kʼoˆ piˇ ve yoˬ. 14Hkʼe te leh, yawˇ lehˬ aˉ che‸ ehˉ teˇ hpaˍ yawˇ ve awˬ e geh yuˬ veu laˇ piˇ leh, yawˇ awˬ pa caˇ mehˬ puiˉ ve awˍ chiˇ hkʼa deh‸ te ve yoˬ. 15Oˇ hkʼe te peuˬ hkʼaw‸ nawˉ, Reˍbehˆka‸ lehˬ yawˇ geh lo teh taˍ ve Iˉsawˇ ve da‸ jaˇ ve veu‸ kʼaˇ yawˇ yaˇ paˍ Yaˍkoˆ hta‸ feuˉ piˇ ve yoˬ. 16Peuˬ leh, yawˇ lehˬ aˉ che‸ awˬ gʼuiˬ kʼuˉ hta‸ yuˬ leh Yaˍkoˆ ve la‸ sheh leh kʼawˍ peˍ hta‸ caw hawˆ piˇ ve yoˬ. 17Chi hkʼe te peuˬ leh, yawˇ te taˍ ve mehˬ jaˇ ve awˬ chiˇ leh hkaoˍmonˇ yawˇ yaˇ paˍ Yaˍkoˆ hta‸ chiˇ piˇ ve yoˬ.
18Oˇ htaˇ, Yaˍkoˆ lehˬ yawˇ ve awˬ pa geh laˬ leh, A pa-oˬ, teh‸ kʼoˆ piˇ ve yoˬ.
Awˬ pa htawˇ, Nawˬ a shu le, teh‸ na nyi ve yoˬ.
19Yaˍkoˆ yawˇ ve awˬ pa hta‸ kʼaw‸ kʼoˆ piˇ ve, Ngaˬ lehˬ nawˬ yaˇ paˍ uiˍ Iˉsawˇ hpeh‸ ve yoˬ. Nawˬ kʼoˆ laˇ ve hkʼe ngaˬ te taˍ peuˬ. Tu mui leh ngaˬ gu taˍ ve caˇ tuˬ hta‸ caˇ leh, ngaˬ hta‸ bon na‸ laˇ-oˆ, teh‸ kʼoˆ piˇ ve yoˬ.
20Oˇ htaˇ Iˉcaˆ lehˬ, Hkʼaˬ hkʼe te leh nawˬ chi ve hta‸ teˇ hkui tiˉ ca mawˬ ve le, teh‸ na nyi ve yoˬ. Yaˍkoˆ kʼaw‸ kʼoˆ ve, Nawˬ ve Gʼuiˬsha ngaˬ hta‸ ga laˇ leh chi ve hta‸ ngaˬ ca mawˬ ve yoˬ, teh‸ kʼaw‸ kʼoˆ piˇ ve yoˬ.
21Oˇ htaˇ Iˉcaˆ Yaˍkoˆ hta‸ kʼoˆ piˇ ve, Ngaˬ yaˇ paˍ-oˬ, ngaˬ paˇ neˇ lo jiˆ laˬ-o‸. Nawˬ lehˬ awˬ tehˬ awˬ na ngaˬ yaˇ paˍ Iˉsawˇ hpeh‸ ve leh naˍ, a ciˉ shoˆ nyi shaˍ, teh‸ kʼoˆ piˇ ve yoˬ. 22Yaˍkoˆ yawˇ awˬ paˇ lo jiˆ kʼai ve teˇ yanˇ, Iˉcaˆ yawˇ hta‸ shoˆ nyi leh kʼoˆ ve, Tawˇ yaw tawˆ la ve awˬ hkawˇ lehˬ, Yaˍkoˆ ve awˬ hkawˇ hta‸ shuˍ ve yoˬ. Ya‸ hkʼaˇ, la‸ sheh lehˬ Iˉsawˇ ve la‸ sheh hta‸ shuˍ ve yoˬ, teh‸ kʼoˆ ve yoˬ. 23Yawˇ ve la‸ sheh lehˬ, Iˉsawˇ ve la‸ sheh hkʼa shuˍ awˬ mvuh buiˇ-ehˍ cawˬ ve pa taw, yawˇ Yaˍkoˆ hpeh‸ ve hta‸ awˬ pa maˇ shiˍ. 24Hkʼe te leh yawˇ Yaˍkoˆ hta‸ awˬ bon na‸ piˇ-a teh‸ te htaˇ yawˇ lehˬ, Nawˬ Iˉsawˇ hpeh‸ tehˬ ve yoˬ laˇ, teh‸ na nyi ve yoˬ. Oˇ htaˇ Yaˍkoˆ lehˬ, Yoˬ, teh‸ kʼaw‸ hkʼaw‸ piˇ ve yoˬ.
25Oˇ htaˇ Iˉcaˆ lehˬ, Ngaˬ yaˇ paˍ-oˬ, nawˬ hta‸ awˬ bon na‸ laˇ tuˬ nawˬ gu taˍ ve caˇ tuˬ ngaˬ geh yuˬ laˬ-o‸, teh‸ kʼoˆ piˇ ve yoˬ. Yaˍkoˆ lehˬ caˇ tuˬ oˇ ve leh a pehˉ meuˇ gʼuiˬ yawˇ geh yuˬ veu laˇ piˇ ve yoˬ. 26Oˇ ve hkʼaw‸ nawˉ yawˇ ve awˬ pa yawˇ hta‸ kʼoˆ piˇ ve, Ngaˬ paˇ lo jiˆ laˬ leh ngaˬ hta‸ boˆ nu laˇ-oˆ, teh‸ kʼoˆ piˇ ve yoˬ. 27Hkʼe te leh, Yaˍkoˆ yawˇ awˬ paˇ lo jiˆ kʼai leh, yawˇ hta‸ boˆ nu piˇ ve yoˬ. Iˉcaˆ lehˬ yawˇ ve veu‸ kʼaˇ awˬ pe‸ hta‸ nuˬ nyi peuˬ hkʼaw‸ nawˉ, yawˇ hta‸ bon na‸ piˇ leh kʼoˆ ve, Ngaˬ yaˇ paˍ ve awˬ pe‸ lehˬ Gʼuiˬsha bon na‸ piˇ ve ti mi awˬ pe‸ hkʼa shuˍ hpeh‸ ve yoˬ. 28Gʼuiˬsha lehˬ nawˬ hta‸ mvuhˇ naw ma ve ciˍ gʼuiˬ leh, hkuiˇ jaˇ ve miˬguiˬ maˇ kʼoˆ, caˬ shiˍ caˬ hkʼa leh a pehˉ meuˇ gʼuiˬ maˇ kʼoˆ, maˇ maˇ pe‸ laˇ piˇ-oˆ. 29Chaw yaˇ teˇ hpaˍ nawˬ ve awˬ ceˬ te leh, chaw ceuˬ teˇ hpaˍ nawˬ mehˆ gʼuˇ suhˍ lo hkui tcuhˉ teh piˇ lawˬ-o‸. Nawˬ lehˬ, nawˬ viˉ nawˬ nyi hkʼa peu-eˬ hta‸ gʼa uˉ peunˍ leh, nawˬ e ve awˬ ceuˬ awˬ hkʼaˇ teˇ hpaˍ nawˬ mehˆ gʼuˇ suhˍ lo hkui tcuhˉ teh piˇ lawˬ-o‸. Nawˬ hta‸ hkeu ve chaw teˇ hpaˍ, hkeu ve hta‸ gʼa kʼaw‸ hkanˍ leh nawˬ hta‸ bon na‸ laˇ ve chaw teˇ hpaˍ, bon na‸ piˇ ve hta‸ gʼa hkanˍ piˇ-oˆ, teh‸ kʼoˆ ve yoˬ.
Iˉsawˇ awˬ pa hta‸ lawˬ hkawˉ ve
30Iˉcaˆ Yaˍkoˆ hta‸ bon na‸ piˇ peuˬ leh Yaˍkoˆ tawˆ kʼai peuˬ hkʼaw‸ nawˉ, Iˉsawˇ shaˍ ca bawˆ kʼaw‸ la ve yoˬ. 31Yawˇ lehˬ mehˬ jaˇ ve caˇ tuˬ gu peuˬ hkʼaw‸ nawˉ, yawˇ ve awˬ pa geh yuˬ laˬ leh kʼoˆ ve, Ngaˬ pa-oˬ, chi beu‸ ngaˬ gu veu laˇ ve caˇ tuˬ hta‸ caˇ leh ngaˬ hta‸ bon na‸ laˇ-oˆ, teh‸ kʼoˆ piˇ ve yoˬ. 32Yawˇ ve awˬ pa Iˉcaˆ lehˬ, Nawˬ a shu le, teh‸ na nyi htaˇ yawˇ lehˬ,
Ngaˬ nawˬ ve yaˇ paˍ uiˍ Iˉsawˇ hpeh‸ ve yoˬ, teh‸ kʼaw‸ kʼoˆ piˇ ve yoˬ.
33Oˇ htaˇ Iˉcaˆ cheˇ cheˇ veˆ veˆ hpeh‸ leh kʼoˆ ve, Hkʼe te kʼo, ya‸ sheh htaˇ ngaˬ geh lo caˇ tuˬ gu veu laˇ ve chaw oˇ ve a shu le. Nawˬ maˇ laˬ sheˬ gʼuˇ suhˍ ngaˬ lehˬ caˇ tuˬ oˇ ve hta‸ caˇ leh yawˇ hta‸ awˬ bon na‸ piˇ peuˬ. Awˬ bon oˇ ve yawˇ geh co co cawˬ chehˇ tuˬ yoˬ, teh‸ kʼoˆ ve yoˬ.
34Iˉsawˇ lehˬ tawˇ oˇ ve hta‸ gʼa kaˇ htaˇ gʼaˇ hte‸ kuˬ hawˬ leh, Ngaˬ pa-oˬ, ngaˬ hta‸ htawˇ awˬ bon na‸ laˇ-oˆ, teh‸ kʼoˆ ve yoˬ.
35Ya‸ hkʼaˇ Iˉ caˆ kʼoˆ ve, Nawˬ nyi paˍ ngaˬ hta‸ heˍ laˇ leh nawˬ ve awˬ shinˉ hkʼa peu-eˬ yuˬ kʼai peuˬ, teh‸ kʼoˆ piˇ ve yoˬ.
36Oˇ htaˇ Iˉsawˇ kʼaw‸ kʼoˆ ve, Yawˇ hta‸ Yaˍkoˆ#27:36 Chi lehˬ hiˉ yuˬ ve teh‸ kʼoˆ gaˇ ve yoˬ teh‸ meh piˇ taˍ ve lehˬ cawˇ ve yoˬ. Chi lehˬ, yawˇ ngaˬ hta‸ heˍ caˇ laˇ ve nyiˇ pawˆ teˇ pawˆ hpeh‸ ve yoˬ. Awˉ lawˉ teˇ pawˆ yawˇ ngaˬ ve yaˇ paˍ uiˍ aˉ yaˇ hta‸ yuˬ kʼai leh chi teˇ pawˆ yawˇ ngaˬ ve awˬ shinˉ hta‸ yuˬ kʼai ve yoˬ. Nawˬ ngaˬ hta‸ piˇ laˇ tuˬ ve awˬ shinˉ a ciˉ ka‸ maˇ cawˬ-o laˇ, teh‸ kʼoˆ ve yoˬ.
37Iˉcaˆ kʼaw‸ kʼoˆ ve, Ngaˬ lehˬ yawˇ hta‸ nawˬ ve jawˇmawˇ te tcuh peuˬ. Yawˇ ve awˬ viˉ awˬ nyi hkʼa peu-eˬ hta‸ htawˇ, yawˇ ve awˬ ceˬ hpeh‸ la piˇ taˍ peuˬ. Ngaˬ yawˇ hta‸ caˬ shiˍ caˬ hkʼa leh a pehˉ meuˇ gʼuiˬ teˇ hpaˍ piˇ taˍ peuˬ. Hkʼe te leh ngaˬ yaˇ paˍ-oˬ, ngaˬ nawˬ hta‸ te‸ chiˉ te laˇ maˇ hpeh‸-o, teh‸ kʼoˆ piˇ ve yoˬ.
38Iˉsawˇ yawˇ awˬ pa hta‸ kʼaw‸ kʼoˆ piˇ ve, Ngaˬ pa-oˬ, nawˬ geh awˬ bon teˇ maˬ ceh tiˉ cawˬ ve laˇ. Ngaˬ hta‸ htawˇ awˬ bon na‸ laˇ-oˆ, teh‸ kʼoˆ leh gʼaˇ hte‸ kuˬ hawˬ ve yoˬ.
39Oˇ htaˇ yawˇ ve awˬ pa Iˉcaˆ kʼoˆ ve,
Nawˬ awˬ pon mvuhˇ naw ma ve ciˍ gʼuiˬ maˇ cawˬ.
Nawˬ awˬ pon miˬ hkuiˇ da‸ ve ti mi ka‸ maˇ cawˬ.
40Aˉhtaw hta‸ yehˇ leh nawˬ ve a sha‸ hta‸ nawˬ gʼa hu tuˬ yoˬ.
Nawˬ lehˬ, nawˬ nyi paˍ ve awˬ ceˬ gʼa te tuˬ yoˬ.
Ya‸ hkʼaˇ, nawˬ yawˇ hta‸ kʼaw‸ hpfuhˆ ve kʼo,
yawˇ uˉ peunˍ ve awˬ hawˉ lo gʼa ponˬ tuˬ yoˬ, teh‸ kʼoˆpiˇ ve yoˬ.
41Yawˇ ve awˬ pa lehˬ, Yaˍkoˆ hta‸ awˬ bon na‸ piˇ taˍ peuˬ ve pa taw, Iˉsawˇ lehˬ Yaˍkoˆ hta‸ canˇ jaˇ ve yoˬ. Hkʼe te leh yawˇ kʼoˆ ve, Ngaˬ pa lehˬ suh-e la paˇ neˇ ve yoˬ. Oˇ htaˇ ngaˬ Yaˍkoˆ hta‸ tiˇ pehˍ tuˬ yoˬ, teh‸ kʼoˆ ve yoˬ.
42Iˉsawˇ oˇ hkʼe kʼoˆ ve hta‸ Reˍbehˆka‸ gʼa kaˇ ve teˇ yanˇ, Yawˇ Yaˬkoˆ hta‸ kuˬ leh kʼoˆ piˇ ve, Nawˬ viˉ paˍ Iˉsawˇ nawˬ hta‸ tiˇ pehˍ tuˬ kʼoˆ chehˇ ve yoˬ. 43Chi hta‸ pa taw ngaˬ yaˇ paˍ-oˬ, ngaˬ kʼoˆ ve hkʼe te-o. Chi beu‸ tu leh ngaˬ nyi paˍ Laˍbanˍ chehˇ kuiˬ Haˍranˍ venˇ lo hpaw-e loˬ. 44Nawˬ viˉ paˍ nyi ma zuhˆ ve mehˉ kʼai htaˇ hkʼa gaˬ, teˇ tcuhˉ teˇ jaw ca hpaw chehˇ taˍ-o‸. 45Nawˬ yawˇ hta‸ te piˇ taˍ ve hta‸ yawˇ leunˇ kʼai peuˬ ve teˇ yanˇ, ngaˬ nawˬ hta‸ ca kʼaw‸ shiˍ hkʼaw‸ peu laˇ tuˬ yoˬ. Nawˬ huiˉ maˬ nyiˇ gʼaˇ gʼaˇ hta‸ teˇ nyi tiˉ awˬ hkʼaw lo ngaˬ hkʼaˬ hkʼe te mehˉ kʼai piˇ hpeh‸ tuˬ le, teh‸ kʼoˆ piˇ ve yoˬ.
46Oˇ ve hkʼaw‸ nawˉ, Reˍbehˆka‸ Iˉcaˆ geh kʼai leh kʼoˆ ve, Ngaˬ lehˬ Iˉsawˇ miˇ ma Hiˇtiˆ chaw hta‸ nyi bawˬ jaˇ ve yoˬ. Chi hkʼe ve Hiˇtiˆ yaˇ miˇ hta‸ Yaˍkoˆ kʼaw‸ heuˆ ve kʼo, ngaˬ ka‸ suh tuˬ yoˬ, teh‸ kʼoˆ piˇ ve yoˬ.
Currently Selected:
Awˬ hkuiˉ puiˍ ve li‸ 27: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
