Awˬ hkuiˉ puiˍ ve li‸ 26

Iˉcaˆ Geˍraˆ venˇ hkʼaw chehˇ ve

1Aˍbraˍhanˍ awˬ co-e htaˇ meu‸ lonˉ kaˆ lonˉ gaˬ la ve hkʼe, mvuhˇmiˬ oˇ ve hkʼaw meu‸ lonˉ kaˆ lonˉ teˇ pawˆ kʼaw‸ gaˬ la ve yoˬ. 2Oˇ htaˇ Gʼuiˬsha Iˉcaˆ geh laˬ leh kʼoˆ ve, Eˇjiˇtu‸ mvuhˇmiˬ lo taˇ kʼai. Ngaˬ kʼoˆ laˇ ve hkʼe, mvuhˇmiˬ chi hkʼaw chehˇ taˍ-o‸. 3Ngaˬ nawˬ geh chehˇ leh nawˬ hta‸ awˬ bon na‸ laˇ tuˬ yoˬ. Awˬ lawn kʼo, mvuhˇmiˬ chi ve teˇ hpaˍ, nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ piˇ laˇ tuˬ yoˬ. Nawˬ pa Aˍbraˍhanˍ hta‸ ngaˬ te piˇ taˍ ve ka ti‸ hta‸ ngaˬ te biˇ la piˇ tuˬ yoˬ. 4Ngaˬ lehˬ nawˬ ve awˬ ceuˬ awˬ hkʼaˇ teˇ hpaˍ hta‸ meu‸ keu shiˍ hkʼa shuˍ maˇ la piˇ leh, mvuhˇmiˬ chi hkʼa peu-eˬ ngaˬ yawˇ hui hta‸ piˇ tuˬ yoˬ. Nawˬ ve awˬ ceuˬ awˬ hkʼaˇ teˇ hpaˍ hta‸ pa taw, miˬguiˬ chaw ceuˬ hkʼa peu-eˬ awˬ bon gʼa tuˬ yoˬ. 5Aˍbraˍhanˍ lehˬ ngaˬ piˇ taˍ ve awˬliˇtawˇhkawˇ teˇ hpaˍ hta‸ na yuˬ leh te peuˬ ve pa taw, ngaˬ nawˬ hta‸ awˬ bon na‸ laˇ tuˬ yoˬ, teh‸ kʼoˆ piˇ ve yoˬ.

6Hkʼe te leh, Iˉcaˆ lehˬ Geˍraˆ venˇ hkʼaw chehˇ taˍ ve yoˬ. 7Oˇ htaˇ venˇ yaˇ oˇ ve teˇ hpaˍ lehˬ, yawˇ ve awˬ miˇ ma awˬ lawn ca na nyi la leh, yawˇ hta‸ yawˇ ve awˬ nyi ma hpeh‸ ve yoˬ, teh‸ kʼoˆ piˇ ve yoˬ. Awˬ lawn kʼo, Reˍbehˆka‸ lehˬ awˬ hkiˇ awˬ naˬ da‸ ve pa taw, yawˇ hta‸ yawˇ ve awˬ miˇ ma hpeh‸ ve yoˬ teh‸ kʼoˆ piˇ ve kʼo, yawˇ hui yawˇ hta‸ tiˇ pehˍ la ve hta‸ kawˆ ve pa taw yoˬ. 8Yawˇ hui oˇ kaˬ lo awˬ yanˇ a ciˉ maw chaweh chehˇ peuˬ ve teˇ yanˇ, jawˇmawˇ Aˍbiˆmaˍlehˆ lehˬ yawˇ ve yehˬ miˉ ehˉ hkʼaw nyi peu leh, Iˉcaˆ yawˇ ve awˬ miˇ ma Reˍbehˆka‸ hta‸ boˆ nu chehˇ ve hta‸ gʼa mawˬ ve yoˬ. 9Hkʼe te leh, yawˇ Iˉcaˆ hta‸ kuˬ yuˬ leh, Chi lehˬ nawˬ miˇ ma hpeh‸ ve yoˬ. A hto‸ ma pa taw, yawˇ hta‸ nawˬ ve awˬ nyi ma teh‸ kʼoˆ ve le, teh‸ na nyi ve yoˬ.

Iˉcaˆ lehˬ, Yawˇ hta‸ ngaˬ miˇ ma yoˬ teh‸ kʼoˆ ve kʼo, ngaˬ gʼa suh la ve hta‸ dawˇ haˍ ve pa taw chi hkʼe te ve yoˬ, teh‸ kʼaw‸ kʼoˆ piˇ ve yoˬ.

10Aˍbiˆmaˍlehˆ kʼaw‸ kʼoˆ ve, Aˬ hto‸ ma pa taw nawˬ ngaˬ hui hta‸ chi hkʼe te laˇ ve le. Ngaˬ hui ve chaw teˇ gʼaˇ gʼaˇ, yawˇ geh ca zuh‸-e ve hkʼe kʼo, ngaˬ hui awˬ hkʼoˆ lo venˇbaˆ gaˬ la tuˬ ve maˇ heˆ laˇ, teh‸ kʼoˆ piˇ ve yoˬ. 11Oˇ ve hkʼaw‸ nawˉ Aˍbiˆmaˍlehˆ yawˇ ve chaw teˇ hpaˍ hta‸ shaˍ ti‸ piˇ leh kʼoˆ ve, Chaw chi hpaˇ leh yawˇ ve awˬ miˇ ma hta‸ ca htawˇ ve chaw hkʼa ve teˇ gʼaˇ maˇ kʼoˆ tiˇ pehˍ ve hta‸ gʼa hkanˍ tuˬ yoˬ, teh‸ kʼoˆ piˇ ve yoˬ.

12Iˉcaˆ lehˬ mvuhˇmiˬ oˇ ve hkʼaw muiˬ caˇ leh, oˇ ve teˇ hkʼaw‸ awˬ shiˍ awˬ nu teˇ ha pun gʼa gʼeu‸ ve yoˬ. Awˬ lawn kʼo, Gʼuiˬsha yawˇ hta‸ awˬ bon na‸ piˇ ve pa taw yoˬ. 13Yawˇ lehˬ shaˬ te shaˬ paw sha la ve yoˬ. 14Yawˇ geh lo yawˬ, nuˇ leh awˬ ceˬ maˇ maˇ cawˬ la ve pa taw Hpiˇliˇtiˆ chaw teˇ hpaˍ yawˇ hta‸ hkawehˉ ve nyi ma cawˬ la ve yoˬ. 15Hkʼe te leh, yawˇ hui lehˬ yawˇ ve awˬ pa Aˍbraˍhanˍ ve awˬ ceˬ teˇ hpaˍ duˇ taˉ ve nanˬ bawˍ hkʼa peu-eˬ ve hta‸ je‸ kʼaw‸ yaˆ keu leh te luˬ piˇ ve yoˬ.

16Oˇ ve hkʼaw‸ nawˉ, Aˍbiˆmaˍlehˆ yawˇ hta‸ kʼoˆ piˇ ve, Nawˬ choˬ kaˬ lo tawˆ kʼai loˬ. Awˬ lawn kʼo, nawˬ lehˬ ngaˬ hui a‸ kehˉ awˬ me‸ awˬ hponˇ cawˬ la peuˬ, teh‸ kʼoˆ piˇ ve yoˬ. 17Hkʼe te leh Iˉcaˆ oˇ kaˬ lo tawˆ kʼai leh, Geˍraˆ miˬ tawˬ kuiˬ lo ca hpaw chehˇ kʼai ve yoˬ. 18Oˇ htaˇ, Iˉcaˆ lehˬ yawˇ awˬ pa suh peuˬ hkʼaw‸ nawˉ Hpiˇliˇtiˆ chaw hui je‸ duˇ keu leh te luˬ taˍ ve nanˬ bawˍ teˇ hpaˍ hta‸ kʼaw‸ gu ve yoˬ. Peuˬ leh ponˬ laˬ htaˇ yawˇ awˬ pa awˬ meh piˇ taˍ ve hkʼe, nanˬ bawˍ oˇ ve teˇ hpaˍ hta‸ awˬ meh kʼaw‸ meh piˇ ve yoˬ.

19Oˇ kaˬ lo Iˉ caˆ ve awˬ ceˬ paˍ teˇ hpaˍ nanˬ bawˍ kʼaw‸ duˇ leh iˉ kaˆ tawˆ la ve yoˬ. 20Ya‸ hkʼaˇ, Geˍraˆ chaw yawˬ hawˉ paˍ teˇ hpaˍ laˬ leh, Nanˬbawˍ chi ngaˬ hui ve yoˬ, teh‸ kʼoˆ leh Iˉcaˆ ve yawˬ hawˉ paˍ teˇ hpaˍ hta‸ ca ya‸ la ve yoˬ. Hkʼe te leh, Iˉcaˆ lehˬ nanˬbawˍ oˇ ve hta‸, Ya‸ da‸ ve nanˬbawˍ, teh‸ kʼaw‸ meh piˇ ve yoˬ.

21Iˉcaˆ ve chaw teˇ hpaˍ awˬ nu ve nanˬbawˍ teˇ maˬ kʼaw‸ duˇ ve yoˬ. Ya‸ hkʼaˇ, chaw oˇ ve teˇ hpaˍ yawˇ hui hta‸ ca kʼaw‸ ya‸ la ve pa taw, nanˬbawˍ oˇ ve hta‸ Canˇ paˍ nanˬbawˍ teh‸ kʼaw‸ meh piˇ ve yoˬ. 22Yawˇ oˇ kaˬ lo tawˆ kʼai leh awˬ nu ve nanˬbawˍ teˇ maˬ kʼaw‸ duˇ ve yoˬ. Chi teˇ pawˆ yawˇ hui yawˇ hta‸ maˇ ca kʼaw‸ ya‸ la ve pa taw, nanˬbawˍ oˇ ve hta‸ Ponˬ ve nanˬbawˍ, teh‸ kʼaw‸ meh piˇ ve yoˬ. Oˇ htaˇ yawˇ lehˬ, Chi teˇ pawˆ Gʼuiˬsha ngaˬ hui hta‸ gawˬ lehˍ chehˇ tcuh laˇ peuˬ. Choˬ ka‸ lo ngaˬ hui uiˍ la maˇ la tuˬ yoˬ, teh‸ kʼoˆ ve yoˬ.

23Iˉcaˆ oˇ kaˬ lo kʼaw‸ tawˆ kʼai leh, Beˍraˍsheˍbaˆ lo kʼai ve yoˬ. 24Oˇ ve teˇ haˉ Gʼuiˬsha yawˇ geh laˬ leh kʼoˆ ve, Ngaˬ lehˬ nawˬ pa Aˍbraˍhanˍ ve Gʼuiˬsha hpeh‸ ve yoˬ. Taˇ kawˆ. Ngaˬ nawˬ geh chehˇ taˍ ve yoˬ. Ngaˬ ve awˬ ceˬ paˍ Aˍbraˍhanˍ hta‸ ka ti‸ te piˇ taˍ ve hkʼe, ngaˬ nawˬ hta‸ awˬ bon na‸ laˇ leh awˬ ceuˬ awˬ hkʼaˇ maˇ maˇ cawˬ la piˇ tuˬ yoˬ, teh‸ kʼoˆ piˇ ve yoˬ. 25Hkʼe te leh, Iˉcaˆ oˇ kaˬ lo tuˉ tanˇ kuiˬ teˇ maˬ te leh Gʼuiˬsha hta‸ oˉ kʼoˍ pui ve yoˬ. Yawˇ oˇ kaˬ lo aˉ po kʼo te leh, yawˇ ve awˬ ceˬ paˍ teˇ hpaˍ htawˇ nanˬ bawˍ teˇ maˬ kʼaw‸ duˇ ve yoˬ.

Aˍbiˆmaˍlehˆ leh Iˉcaˆ shaˉ caˆ caˇ ve

26Aˍbiˆmaˍlehˆ lehˬ, yawˇ ve awˬ chawˇ Aˍhuˇzaˆ leh yawˇ ve ma‸ poˍ lonˉ Hpiˇkawˇlaˆ hta‸ shiˍ leh Iˉcaˆ geh laˬ ve yoˬ. 27Iˉcaˆ yawˇ hui hta‸ kʼoˆ piˇ ve, Aˬ hto‸ ma pa taw nawˬ hui choˬ kaˬ laˬ ve le. Nawˬ hui ngaˬ hta‸ nyi bawˬ leh gʼa‸ kʼoˬ laˇ taˍ ve maˇ heˆ laˇ, teh‸ kʼoˆ piˇ ve yoˬ.

28Yawˇ hui kʼaw‸ kʼoˆ ve, Nawˬ geh Gʼuiˬsha chehˇ ve hta‸ ngaˬ hui gʼa shiˍ ve yoˬ. Ngaˬ hui teˇ hpaˍ ka ti‸ shaˉ caˆ te da‸ taˍ cawˇ hehˉ teh‸ dawˇ ve yoˬ. 29Ngaˬ hui nawˬ hta‸ maˇ ya‸. Nawˬ hta‸ gawˬ lehˍ ve hkʼaw tawˆ kʼai tcuh taˍ ve yoˬ. Chi beu‸ Gʼuiˬsha nawˬ hta‸ awˬ bon na‸ piˇ taˍ peuˬ ve pa taw, nawˬ htawˇ ngaˬ hui hta‸ maˇ ca ya‸ la tuˬ ka ti‸ te laˇ sheˬ, teh‸ kʼoˆ ve yoˬ. 30Oˇ htaˇ, Iˉcaˆ lehˬ yawˇ hui awˬ pon hti caˇ hti dawˬ ve pawehˇ teˇ maˬ te piˇ ve yoˬ. 31Yawˇ hui shawˉ pawˍ mvuhˇ shawˉ teˇ na‸ tu leh, teˇ gʼaˇ hta‸ teˇ gʼaˇ ka ti‸ te da‸ ve yoˬ. Oˇ hkʼe te peuˬ hkʼaw‸ nawˉ, yawˇ hui gawˬ lehˍ kʼo‸-e ve yoˬ.

32Oˇ ve teˇ nyi Iˉcaˆ ve awˬ ceˬ paˍ teˇ hpaˍ yawˇ geh laˬ leh, Ngaˬ hui iˉ kaˆ tawˆ ve nanˬ bawˍ awˬ suhˉ teˇ maˬ duˇ gʼa taˍ peuˬ, teh‸ ca kʼoˆ piˇ la ve yoˬ. 33Yawˇ lehˬ nanˬbawˍ oˇ ve hta‸, Shaˉ caˆ nanˬbawˍ, teh‸ meh piˇ ve yoˬ. Hkʼe te leh, ya‸ nyi hkʼa gaˬ oˇ kaˬ lo cawˬ ve venˇ hta‸ Beˍraˍsheˍbaˆ teh‸ kʼoˆ ve yoˬ.

34Iˉsawˇ lehˬ a sha‸ 40 hkʼaw‸ gaˬ htaˇ, Hiˇtiˆ chaw Beˍriˆ ve yaˇ miˇ Juˇdiˆ leh Eˇlonˍ ve yaˇ miˇ Baˍseˍmaˆ hta‸ heuˆ ve yoˬ. 35Yawˇ chi hkʼe te ve pa taw, Iˉcaˆ leh Reˍbehˆka‸ hpeh‸ bawˬ jaˇ ve yoˬ.

Currently Selected:

Awˬ hkuiˉ puiˍ ve li‸ 26: LHBE

Highlight

Copy