2 Saˍmo-eˍlaˆ li‸ 22
22
Daˍviˆ ve kʼa muiˬ hkawˇ
1Gʼuiˬsha lehˬ, Daˍviˆ hta‸ Sawˉlu‸ leh awˬ nu ve canˇ paˍ teˇ hpaˍ ve la‸ sheh hkʼaw ponˬ piˇ peuˬ ve teˇ yanˇ, Daˍviˆ Gʼuiˬsha hta‸ chi hkʼe kʼa muiˬ chiˇ mvuh ve yoˬ.
2Gʼuiˬsha lehˬ, ngaˬ ve htaiˍ hkʼaw‸ shehˍ hpaˇ hpeh‸ leh
ngaˬ ve yeˬ jaˇ ve ta‸ yehˬ hpeh‸ ve yoˬ.
3Ngaˬ ve Gʼuiˬsha lehˬ, ngaˬ hta‸ ha‸ shaˉ shehˍ hpaˇ hpeh‸ leh,
yawˇ awˬ hkʼaw lo ngaˬ gawˬ lehˍ gʼa chehˇ ve yoˬ.
Yawˇ lehˬ, htaˬ tuˬ hkʼa shuˍ ngaˬ hta‸ hkʼa deh‸ ha‸ shaˉ laˇ ve yoˬ.
Yawˇ lehˬ, ngaˬ ve htaiˍ hkʼaw‸ shehˍ hpaˇ hpeh‸ leh
kawˆ kuiˬ hkʼaw ponˬ laˇ leh ha‸ shaˉ laˇ ve yoˬ. 4Ngaˬ Gʼuiˬsha hta‸ kuˬ leh,
yawˇ lehˬ ngaˬ ve canˇ paˍ teˇ hpaˍ ve la‸ sheh hkʼaw lo ngaˬ hta‸ ponˬ laˇ ve yoˬ.
Gʼuiˬsha hta‸ chiˇ mvuh-o.
5Suh ve teˇ ceuˬ lehˬ yawˇ ve aˉ caˆ hkeh ngaˬ hta‸ hkʼa caw zuhˇ hpeh taˍ ve yoˬ.
Luˬ ve sheˆ ve gʼuiˬ baˇ ngaˬ awˬ hkʼoˆ lo hoˆ beh taˍ ve yoˬ.
6Suh ve teˇ ceuˬ lehˬ, yawˇ ve aˉ caˆ hkeh ngaˬ hta‸ hkʼa caw zuhˇ hpeh taˍ ve yoˬ.
Tuˍ hpfuh htawˇ yawˇ ve va ngaˬ awˬ pon htaw taˍ ve yoˬ.
7Dawˇ haˍ chehˇ ve awˬ yanˇ hkʼaw ngaˬ Gʼuiˬsha hta‸ kuˬ ve yoˬ.
Ga laˇ tuˬ ngaˬ ve Gʼuiˬsha hta‸ ngaˬ kuˬ ve yoˬ.
Yawˇ ve bon yehˬ awˬ hkʼaw lo yawˇ lehˬ ngaˬ kuˬ ve awˬ hkawˇ hta‸ gʼa kaˇ ve yoˬ.
Ga laˇ tuˬ ngaˬ lawˬ ve awˬ hkawˇ yawˇ ve naˍ paw hkʼaw gaˬ peuˬ ve yoˬ.
8Oˇ htaˇ miˬ hiˆ la leh, hkʼaw teˇ hpaˍ hiˆ hiˆ naˇ naˇ hpeh‸ la ve yoˬ.
Awˬ lawn kʼo, Gʼuiˬsha nyi ma zuhˆ ve pa taw yoˬ.
9Yawˇ ve naˍ hkʼawˇ awˬ hkʼaw lo mvuhˇ hkʼawˇ tawˆ la leh
yawˇ ve maw‸ kʼaw hkʼaw aˬ miˍ ha leh aˬ miˍ to‸ chehˇ ve shiˉ gʼeu‸ tawˆ la ve yoˬ.
10Mvuhˇ naw ma hta‸ yehˬ baˬ leh, yawˇ ya‸ la ve yoˬ.
Yawˇ ve hkui sheh hawˉ lo naˆ ho‸ ve moˬ cawˬ taˍ ve yoˬ.
11Yawˇ lehˬ, Hkeˍruˆbenˍ ciˇ ya‸ la ve yoˬ.
Mvuhˇ haw ve toˍ la‸ kʼuˉ hkʼoˆ yawˇ juˇ kʼai ve yoˬ.
12Yawˇ lehˬ, naˆ ho‸ ve hkʼaw chehˇ taˍ leh
moˬ leh iˉ kaˆ yawˇ hta‸ hkʼa caw zuhˇ cawˬ taˍ ve yoˬ.
13Yawˇ gʼuˇ suhˍ mvuhˇ tawˍ mvuhˇ htehˆ ve awˬ hkʼaw lo, aˬ miˍ to‸ chehˇ ve shiˉ gʼeu‸ leh vaˇ shiˍ teˇ hpaˍ ce la ve yoˬ.
14Oˇ ve hkʼaw‸ nawˉ, Gʼuiˬsha mvuhˇ naw ma hkʼoˆ tawˇ yaw leh
mvuh jaˇ shehˍ hpaˇ ve tawˇ hkawˇ hta‸ gʼa kaˇ ve yoˬ.
15Yawˇ hkaˆ ce teˇ hpaˍ hta‸ bawˆ peu leh,
canˇ paˍ teˇ hpaˍ hta‸ hpaˆ da‸ kʼai piˇ lawˬ ve yoˬ.
Mvuhˇ tiˉ po-e‸ ba ve awˬ hkʼaw lo yawˇ hui hta‸ gʼuiˇ hpaw-e piˇ lawˬ ve yoˬ.
16Gʼuiˬsha-oˬ, nawˬ nyi ma zuhˆ ve hkʼaw,
yawˇ hui hta‸ deˇ leh nawˬ ve canˇ paˍ teˇ hpaˍ tawˍ taˍ ve teˇ yanˇ,
laˇ tsuhˇ gʼuiˬ tawˬ leh
miˬguiˬ ve aw hkuiˉ puiˍ teˇ hpaˍ hta‸ hpeu‸ tawˆ la piˇ ve yoˬ.
17Gʼuiˬsha lehˬ mvuhˇ naw ma lo ya‸ la leh, ngaˬ hta‸ vawˆ tiˍ taˍ ve yoˬ.
Naˉ jaˇ ve iˉ kaˆ teˇ hpaˍ awˬ hkʼaw lo yawˇ ngaˬ hta‸ gʼawˬ tawˆ laˇ ve yoˬ.
18Kanˇ paˆ uiˍ ve ngaˬ ve canˇ paˍ teˇ hpaˍ leh,
ngaˬhta‸ canˇ ve chaw teˇ hpaˍ ve la‸ sheh hkʼaw yawˇ ngaˬ hta‸ htaiˍ hkʼaw‸ laˇ ve yoˬ.
Yawˇ hui lehˬ ngaˬ a‸ kehˉ awˬ gʼaˇ uiˍ jaˇ ve yoˬ.
19Ngaˬ tu‸ hkanˍ dawˇ haˍ chehˇ htaˇ yawˇ hui ngaˬ hta‸ ca bawˆ la ve yoˬ.
Ya‸ hkʼaˇ, Gʼuiˬsha ngaˬ hta‸ ha‸ shaˉ laˇ ve yoˬ.
20Dawˇ haˍ kuiˬ hkʼaw yawˇ ngaˬ hta‸ ga laˇ ve yoˬ.
Awˬ lawn kʼo, yawˇ ngaˬ hta‸ nyi ma cawˇ ve pa taw, ngaˬ hta‸ ponˬ laˇ ve yoˬ.
21Ngaˬ hteˇ ve cawˇ ve hta‸ pa taw Gʼuiˬsha ngaˬ hta‸ awˬ bon te laˇ ve yoˬ.
Ngaˬ te‸ chiˉ venˇbaˆ maˇ cawˬ ve pa taw, yawˇ ngaˬ hta‸ awˬ bon na‸ laˇ ve yoˬ.
22Ngaˬ lehˬ, Gʼuiˬsha ve awˬliˇtawˇhkawˇ hta‸ na yuˬ peuˬ.
Ngaˬ ve Gʼuiˬsha hta‸ ngaˬ maˇ hpfuhˆ.
23Yawˇ ve awˬ liˇ tawˇ hkʼawˇ hkʼa peu-eˬ hta‸ ngaˬ na yuˬ leh te peuˬ.
Yawˇ ve awˬliˇtawˇhkawˇ hta‸ ngaˬ baˬ taˉ tuˬ ve maˇ heˆ.
24Ngaˬ te‸ chiˉ venˇbaˆ maˇ cawˬ leh,
haiˬ ve kanˉ maˇ te ve hta‸ yawˇ shiˍ chehˇ ve yoˬ.
25Ngaˬ hteˇ ve cawˇ ve hta‸ pa taw, yawˇ ngaˬ hta‸ awˬ bon te laˇ ve yoˬ.
Awˬ lawn kʼo, ngaˬ lehˬ te‸ chiˉ venˇbaˆ maˇ cawˬ ve hta‸ yawˇ shiˍ ve pa taw yoˬ.
26Gʼuiˬsha-oˬ, nawˬ lehˬ ka ti‸ yeˬ ve chaw teˇ hpaˍ hta‸ ka ti‸ yeˬ leh,
da‸ ve chaw teˇ hpaˍ hta‸ da‸ ve awˬ ceuˬ te piˇ ve yoˬ.
27Da‸ kehˬ ve chaw hui hta‸ nawˬ awˬ bon na‸ piˇ leh,
haiˬ ve chaw hui hta‸ nawˬ nyi ma zuhˆ ve yoˬ.
28Nyi ma nuˇ nehˬ ve chaw hui hta‸ nawˬ ponˬ piˇ leh,
caˆ muiˬ ve chaw hui hta‸ nawˬ nyiˉ ya‸ piˇ ve yoˬ.
29Gʼuiˬsha ngaˬ hta‸ awˬ gʼeuˆ piˇ laˇ leh,
ngaˬ ve naˆ ho‸ ve hta‸ gʼa‸ kʼoˬ piˇ ve yoˬ.
30Ngaˬ ve canˇ paˍ teˇ hpaˍ hta‸ tawˍ da‸ hpeh‸ tuˬ leh, yawˇ hui hta‸ gʼaˇ hpeh‸ tuˬ,
ngaˬ hta‸ awˬ gʼaˇ awˬ shaˉ leh kanˇ paˆ piˇ laˇ ve yoˬ.
31Gʼuiˬsha te taˍ ve kanˉ teˇ hpaˍ hkʼaˬ ma da‸ jaˇ ve le.
Yawˇ ve tawˇ hkawˇ teˇ hpaˍ hta‸ hkʼaˬ ma gʼaˇ va hpeh‸ ve le.
Yawˇ hta‸ ca ve chaw hkʼa peu-eˬ awˬ pon,
yawˇ lehˬ htanˬ tuˬ hkʼa shuˍ hpeh‸ ve yoˬ.
32Gʼuiˬsha yawˇ teˇ gʼaˇ ceh tiˉ jawˇmawˇ hpeh‸ ve yoˬ.
Gʼuiˬsha yawˇ teˇ gʼaˇ ceh tiˉ ngaˬ hui ve gʼaˇ va kuiˬ hpeh‸ ve yoˬ.
33Gʼuiˬsha lehˬ ngaˬ hta‸ awˬ gʼaˇ cawˬ la piˇ shehˍ hpaˇ leh,
ngaˬ ve ya‸ kʼaw hta‸ gawˬ lehˍ cawˬ la piˇ shehˍ hpaˇ hpeh‸ ve yoˬ.
34Yawˇ lehˬ, ngaˬ hta‸ gʼuiˇ gehˬ jaˇ ve hkuiˉ zuhˬ hkʼa shuˍ hpeh‸ la piˇ leh
hkʼaw teˇ hpaˍ awˬ hkʼoˆ lo ngaˬ hta‸ gawˬ lehˍ chehˇ tcuh laˇ ve yoˬ.
35Heh jaˇ ve hkaˆ hta‸ ngaˬ yehˇ gʼa tuˬ
yawˇ ngaˬ hta‸ ma‸ bawˆ ve awˬ hkʼaˇ maˍ laˇ ve yoˬ.
36Gʼuiˬsha-oˬ, nawˬ ngaˬ hta‸ ha‸ shaˉ leh ngaˬ hta‸ ponˬ laˇ ve yoˬ.
Nawˬ ngaˬ hta‸ ha‸ shaˉ leh, ngaˬ hta‸ uiˍ la piˇ ve yoˬ.
Nawˬ ve kanˇ paˆ awˬ hkʼaw lo, ngaˬ hta‸ gawˬ lehˍ chehˇ tcuh laˇ ve yoˬ.
37Shu ngaˬ hta‸ hpeh maˇ gʼa tuˬ nawˬ ngaˬ hta‸ ha‸ shaˉ laˇ ve yoˬ.
Chi hta‸ pa taw, ngaˬ teˇ pawˆ ka‸ maˇ paiˍ.
38Ngaˬ ve canˇ paˍ teˇ hpaˍ hta‸ bawˆ gʼaˇ htaˇ hkʼa gaˬ,
ngaˬ maˇ jehˇ leh yawˇ hui hkʼaˇ suh gʼa‸ yuˬ ve yoˬ.
39Ngaˬ yawˇ hui hta‸ dawˆ baˬ piˇ leh yawˇ hui kʼaw‸ tu la maˇ gʼa.
Yawˇ hui ngaˬ ve hkui sheh paˇ lo paiˍ taˍ ve yoˬ.
40Ma‸ bawˆ tuˬ awˬ pon nawˬ ngaˬ hta‸ awˬ gʼaˇ awˬ shaˉ piˇ laˇ leh,
ngaˬ ve canˇ paˍ teˇ hpaˍ hta‸ gʼaˇ tuˬ nawˬ te laˇ ve yoˬ.
41Ngaˬ ve canˇ paˍ teˇ hpaˍ ngaˬ mehˆ gʼuˇ suhˍ gʼuiˇ hpaw-e tuˬ nawˬ te laˇ ve yoˬ.
Ngaˬ hta‸ canˇ ve chaw hui hta‸ ngaˬ te luˬ piˇ ve yoˬ.
42Yawˇ hui gʼaˇ hte‸ kuˬ ve htawˇ, chaw teˇ gʼaˇ ka‸ yawˇ hui hta‸ ponˬ piˇ maˇ gʼa.
Yawˇ hui Gʼuiˬsha hta‸ kuˬ ve htawˇ, yawˇ yawˇ hui hta‸ maˇ kʼaw‸ yaw hkʼaw‸ piˇ. 43Mvuhˇ haw meuˆ baˬ ve je‸ meu-e hkʼa shuˍ hpeh‸ la tuˬ, ngaˬ yawˇ hui hta‸ teˍ meu-e piˇ ve yoˬ.
Ya‸ kʼaw hkʼoˆ lo cawˬ ve je‸ nehˆ hkʼa shuˍ ngaˬ yawˇ hui hkʼoˆ naˆ toˇ ve yoˬ.
44Chaw hpfuhˆ teˇ hpaˍ ve la‸ sheh hkʼaw nawˬ ngaˬ hta‸ pon laˇ leh
mvuhˇmiˬ teˇ hpaˍ awˬ hkʼoˆ nawˬ ngaˬ hta‸ uˉ peunˍ tcuh laˇ ve yoˬ.
Ngaˬ maˇ shiˍ jaw ve chaw teˇ hpaˍ chi beu‸ ngaˬ ve awˬ ceˬ hpeh‸ la peuˬ.
45Yawˇ hui ngaˬ ve tawˇ hkawˇ hta‸ kaˇ htaˇ na yuˬ ve yoˬ.
Awˬ nu ve mvuhˇmiˬ yaˇ teˇ hpaˍ htawˇ, ngaˬ mehˆ gʼuˇ suhˍ boˆ taˍ ve yoˬ.
46Yawˇ hui awˬ gʼaˇ maˇ kʼaw‸ cawˬ leh,
yawˇ hui va‸ taˍ kuiˬ ta‸ yehˬ teˇ hpaˍ hkʼaw, kawˆ cheˇ tawˆ la ve yoˬ.
47Gʼuiˬsha lehˬ te‸ chehˇ ve yoˬ.
Ngaˬ hta‸ ha‸ shaˉ laˇ shehˍ hpaˇ hta‸ chiˇ mvuh-o.
Gʼuiˬsha lehˬ ngaˬ ve htaiˍ hkʼaw‸ shehˍ hpaˇ hpeh‸ ve yoˬ. Yawˇ hkʼaˬ ma uiˍ jaˇ mvuh jaˇ ve awˬ lawn, shu hta‸ kʼaoˍ maˍ piˇ-oˆ.
48Ngaˬ ve canˇ paˍ teˇ hpaˍ hta‸ gʼaˇ tuˬ yawˇ te laˇ peuˬ.
Chaw yaˇ teˇ hpaˍ ngaˬ hawˉ lo chehˇ tuˬ yawˇ te laˇ peuˬ.
49Ngaˬ ve canˇ paˍ teˇ hpaˍ ve la‸ sheh hkʼaw yawˇ ngaˬ hta‸ ponˬ laˇ peuˬ.
Gʼuiˬsha-oˬ, ngaˬ ve canˇ paˍ teˇ hpaˍ hta‸ gʼaˇ tuˬ nawˬ te laˇ peuˬ.
Haiˬ ve chaw teˇ hpaˍ ve la‸ sheh hkʼaw lo maˇ gʼa gaˬ tuˬ, nawˬ ngaˬ hta‸ ha‸ shaˉ laˇ ve yoˬ.
50Chi hta‸ pa taw, awˬ nu ve chaw ceuˬ teˇ hpaˍ awˬ kaˍ lo,
ngaˬ nawˬ hta‸ kʼa muiˬ hkawˇ kʼa leh chiˇ mvuh tuˬ yoˬ.
51Gʼuiˬsha lehˬ, yawˇ ve jawˇmawˇ hta‸ gʼaˇ shehˍ hpaˇ hpeh‸ piˇ lawˬ ve yoˬ.
Yawˇ leuˆ yuˬ taˍ ve Daˍviˆ leh yawˇ ve awˬ ceuˬ awˬ hkʼaˇ teˇ hpaˍ hta‸
yawˇ ve ha‸ pehnˇ ve teˇ ceuˬ co co taiˍ taiˍ hpeu‸ maˍ piˇ ve yoˬ.
Currently Selected:
2 Saˍmo-eˍlaˆ li‸ 22: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.