2 Saˍmo-eˍlaˆ li‸ 21
21
Sawˉlu‸ ve awˬ ceuˬ awˬ hkʼaˇ teˇ hpaˍ hta‸ tiˇ pehˍ ve
1Jawˇmawˇ Daˍviˆ uˉ peunˍ chehˇ ve awˬ yanˇ hkʼaw, Iˉsaˍreˍlaˆ mvuhˇmiˬ lo hkʼa gaˬ meu‸ lonˉ kaˆ lonˉ gaˬ la ve yoˬ. Oˇ htaˇ, Daˍviˆ Gʼuiˬsha geh bon lawˬ leh, Gʼuiˬsha yawˇ hta‸ kʼoˆ piˇ ve, Sawˉlu‸ leh yawˇ ve yehˬ yaˇ kʼa yaˇ teˇ hpaˍ shu hta‸ tiˇ pehˍ ve pa taw venˇbaˆ uiˍ jaˇ ve yoˬ. Yawˇ lehˬ Giˇbonˍ chaw hui hta‸ tiˇ pehˍ piˇ ve yoˬ, teh‸ kʼoˆ ve yoˬ. 2(Giˇbonˍ chaw hui lehˬ, Iˉsaˍreˍlaˆ awˬ ceuˬ awˬ hkʼaˇ hpeh‸ ve maˇ heˆ. Yawˇ hui lehˬ, Aˍmawˇriˆ chaw hui awˬ hkʼaw lo ve chaw ceuˬ ehˉ teˇ ceuˬ hpeh‸ leh, Iˉsaˍreˍlaˆ chaw hui ha‸ shaˉ piˇ taˍ ve chaw teˇ hpaˍ hpeh‸ ve yoˬ. Ya‸ hkʼaˇ, Sawˉlu‸ lehˬ Iˉsaˍreˍlaˆ chaw leh Yuˇda‸ chaw hui awˬ pon kanˉ te tuˬ nyi ma pfuhˇ jaˇ ve pa taw, yawˇ hui hta‸ te luˬ te sheˆ piˇ ve yoˬ.) 3Hkʼe te leh, Daˍviˆ Giˇbonˍ chaw hui hta‸ kuˬ yuˬ leh, Nawˬ hui hta‸ ngaˬ hkʼaˬ hkʼe gʼa te laˇ tuˬ le. Nawˬ hui lehˬ, Gʼuiˬsha ve chaw teˇ hpaˍ hta‸ awˬ bon na‸ piˇ tuˬ, nawˬ hui hta‸ te ya‸ laˇ ve kanˉ hta‸ ngaˬ kʼaw‸ gu laˇ gaˇ ve yoˬ, teh‸ yawˇ hui hta‸ kʼoˆ piˇ ve yoˬ.
4Yawˇ hui kʼaw‸ yaw hkʼaw‸ leh kʼoˆ ve, Sawˉlu‸ leh yawˇ ve yehˬ yaˇ kʼa yaˇ teˇ hpaˍ ngaˬ hui hta‸ te laˇ ve kanˉ chi hta‸, hpu shi yuˬ leh kʼaw‸ gu laˇ maˇ hpeh‸ taˬ. Ngaˬ hui lehˬ, Iˉsaˍreˍlaˆ chaw teˇ gʼaˇ hta‸ ka‸ maˇ tiˇ pehˍ gaˇ, teh‸ yawˇ hta‸ kʼaw‸ kʼoˆ piˇ ve yoˬ.
Oˇ htaˇ Daˍviˆ lehˬ, Hkʼe te kʼo, nawˬ hui ngaˬ hta‸ hkʼaˬ hkʼe te tcuh laˇ gaˇ ve le, teh‸ yawˇ hui hta‸ kʼaw‸ na nyi ve yoˬ.
5Yawˇ hui kʼaw‸ yaw hkʼaw‸ leh kʼoˆ ve, Sawˉluˬ lehˬ ngaˬ hui teˇ gʼaˇ hta‸ ka‸ Iˉsaˍreˍlaˆ mvuhˇmiˬ hkʼaw maˇ te‸ chehˇ piˇ lawˬ gaˇ ve yoˬ. 6Chi hta‸ pa taw, yawˇ ve awˬ ceuˬ awˬ hkʼaˇ hawˉ hkʼaˆ paˍ 7 gʼaˇ ngaˬ hui hta‸ chiˇ a‸ laˇ-oˆ. Ngaˬ hui lehˬ, chaw oˇ ve teˇ hpaˍ hta‸ Gʼuiˬsha mehˆ gʼuˇ suhˍ Giˇbonˍ venˇ hkʼaw hpeh chiˇ taˍ gaˇ ve yoˬ, teh‸ kʼaw‸ kʼoˆ piˇ ve yoˬ.
Oˇ htaˇ jawˇmawˇ lehˬ, Chaw oˇ ve teˇ hpaˍ ngaˬ nawˬ hui ve la‸ sheh hkʼaw lo chiˇ a‸ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.
7Ya‸ hkʼaˇ, Daˍviˆ lehˬ Yawˇnaˆtanˍ hta‸ ka ti‸ te da‸ taˍ ve hkʼe, Sawˉlu‸ ve awˬ hawehˍ, Yawˇnaˆtanˍ ve yaˇ Meˍfiˆboˍshehˆ hta‸ ponˬ piˇ ve yoˬ. 8Yawˇ lehˬ, Aˍyaˆ ve yaˇ miˇ Riˆsaˍpaˍ geh paw la ve Sawˉlu‸ ve yaˇ paˍ Aˍmawˇniˆ leh Meˍfiˆboˍshehˆ hta‸ yuˬ ve yoˬ. Chi awˬ hkʼoˆ, yawˇ lehˬ Sawˉlu‸ ve yaˇ miˇ Meˍraˆ geh paw la ve Maˍhawˉlaˆ venˇ yaˇ Beˍziˆlehˇ awˬ hawehˍ Aˍdreˍlaˆ ve yaˇ paˍ ngaˇ gʼaˇ hta‸ htawˇ yuˬ ve yoˬ. 9Daˍviˆ lehˬ chaw chi ve suhˍ gʼaˇ hta‸ yuˬ leh Giˇbon chaw hui hta‸ a‸ piˇ ve yoˬ. Yawˇ hui lehˬ chaw chi ve suhˍ gʼaˇ hta‸ Gʼuiˬsha mehˆ gʼuˇ suhˍ hkʼaw pui hkʼoˆ lo hpeh chiˇ taˍ leh, yawˇ hui hkʼa peu-eˬ teˇ geh suh-e ve yoˬ. Yawˇ hui lehˬ, caˬ gʼeu‸ ve awˬ yanˇ htaˇ tiˇ pehˍ ve hta‸ gʼa hkanˍ ve yoˬ.
10Oˇ htaˇ, Sawˉlu‸ ve awˬ miˇ ma i Aˍyaˆ ve yaˇ miˇ Riˆsaˍpaˍ lehˬ, meh htuˉ pui hpa yuˬ leh haˉ pui shiˍ hkʼoˆ lo aˉ po kʼo ehˉ teˇ maˬ te peuˬ hkʼaw‸ nawˉ, mvuhˇ yeˬ tawˆ la htaˇ hkʼa gaˬ oˇ kaˬ lo chehˇ taˍ ve yoˬ. Mvuhˇ law‸ kʼaw htaˇ, ngaˆ teˇ hpaˍ leh mvuhˇ hpeu‸ htaˇ haiˬ ve to nuˇ to shaˆ teˇ hpaˍ, suh taˍ ve chaw oˇ ve teˇ hpaˍ ve awˬ shaˍ hta‸ maˇ gʼa ca caˇ la tuˬ, yawˇ hkʼa deh‸ shaw taˍ ve yoˬ.
11Riˆsaˍpaˍ oˇ hkʼe te chehˇ ve awˬ lawn hta‸ Daˍviˆ gʼa kaˇ ve teˇ yanˇ, 12yawˇ Giˇlaˆ mvuhˇmiˬ lo kʼai leh, Yaˍbehˆ chaw hui geh Sawˉlu‸ leh Yawˇnaˆtanˍ ve awˬ mu‸ ku ca kʼaw‸ yuˬ hkʼaw‸-e ve yoˬ. (Hpiˇliˇtiˆ chaw hui lehˬ, Giˇ laˍbawˇ hkʼaw hkʼoˆ lo Sawˍlu‸ hta‸ tiˇ pehˍ peuˬ hkʼaw‸ nawˉ, yawˇ leh yawˇ ve yaˇ paˍ Yawˇnaˆtanˍ hta‸ Behˆshanˍ venˇ hkʼaw lo hpeh chiˇ taˍ ve yoˬ. Yaˍbehˇ venˇ yaˇ teˇ hpaˍ yawˇ huiˉ maˬ ve awˬ to hta‸ ca hkʼawˇ yuˬ taˍ ve yoˬ) 13Daˍviˆ lehˬ, Sawˉlu‸ leh Yawˇnaˆtanˍ ve awˬ mu‸ ku teˇ hpaˍ leh, shu tiˇ pehˍ ve hta‸ gʼa hkanˍ ve chaw oˇ ve suhˍ gʼaˇ ve awˬ mu‸ ku teˇ hpaˍ hta‸ gʼawˆ yuˬ ve yoˬ. 14Yawˇ hui lehˬ, Sawˉlu‸ leh Yawˇnaˆtanˍ ve awˬ mu‸ ku hta‸ Beˍyaˍmenˍ mvuhˇmiˬ Zeˍlaˆ venˇ hkʼaw, Sawˉlu‸ awˬ pa Kiˇshaˆ ve tuˍ hpfuh paˇ lo tuˍ piˇ ve yoˬ. Jawˇmawˇ kʼoˆ ve tawˇ hkʼa peu-eˬ hta‸ yawˇ hui na yuˬ leh te ve yoˬ. Oˇ ve hkʼaw‸ nawˇ, Gʼuiˬsha yawˇ hui ve bon lawˬ hkawˇ hta‸ kʼaw‸ na yuˬ piˇ ve yoˬ.
Hpiˇliˇtiˆ chaw hui hta‸ ma‸ bawˆ ve
15Hpiˇliˇtiˆ chaw lehˬ Iˉsaˍreˍlaˆ chaw ma‸ teˇ pawˆ kʼaw‸ hpeh‸ la ve yoˬ. Hkʼe te leh, Daˍviˆ leh yawˇ ve ma‸ yaˇ teˇ hpaˍ, Hpiˇliˇtiˆ chaw hta‸ ca bawˆ-e ve yoˬ. Ma‸ bawˆ da‸ chehˇ ve teˇ yanˇ, Daˍviˆ heuˬ jaˇ la ve yoˬ. 16Oˇ htaˇ Iˉsaˍbiˍbeˍnoˍbaˆ teh‸ kʼoˆ ve Hpiˇliˇtiˆ chaw teˇ gʼaˇ aˉhtaw awˬ suhˉ teˇ taˬ pfuhˇ taˍ leh yawˇ geh laˬ ve yoˬ. Yawˇ ve gehˇ lehˬ kuiˇ te taˍ leh, 3 cawehˬ hkʼe hawˇ ve yoˬ. Yawˇ lehˬ chi teˇ pawˆ Daˍviˆ hta‸ tiˇ pehˍ gʼa tuˬ yoˬ, teh‸ dawˇ taˍ ve yoˬ. 17Ya‸ hkʼaˇ, Zeˍruˆyaˍ ve yaˇ Aˍbiˆshehˇ Daˍviˆ geh gʼuiˇ gaˬ la leh, Hpiˇliˇtiˆ chaw oˇ ve hta‸ tiˇ pehˍ piˇ ve yoˬ. Oˇ ve hkʼaw‸ nawˉ, Daˍviˆ ve chaw teˇ hpaˍ lehˬ, Daˍviˆ hta‸ yawˇ hui geh ma‸ bawˆ kuiˬ lo maˇ gʼa kʼaw‸ laˬ tuˬ hto piˇ ve yoˬ. Yawˇ hui kʼoˆ ve, Nawˬ lehˬ, Iˉsaˍreˍlaˆ chaw hui ve dawˇ law kuiˬ hpeh‸ ve yoˬ. Chi hta‸ pa taw, ngaˬ hui nawˬ hta‸ maˇ luˬ kʼai piˇ gaˇ, teh‸ yawˇ hta‸ kʼoˆ piˇ ve yoˬ.
18Oˇ ve hkʼaw‸ nawˉ, Iˉsaˍreˍlaˆ chaw teˇ hpaˍ Gawˉbaˆ teh‸ kʼoˆ ve chehˇ kuiˬ lo Hpiˇliˇtiˆ chaw hui hta‸ kʼaw‸ bawˆ da‸ ve yoˬ. Oˇ htaˇ, Huˇshaˆ venˇ yaˇ Diˆbeˍkaˍ lehˬ, Hpiˇliˇtiˆ chaw hui ve ma‸ poˍ lonˉ Shaˍhpaˆ hta‸ tiˇ pehˍ ve yoˬ. 19Oˇ ve hkʼaw‸ nawˉ maˇ maw maw, Iˉsaˍreˍlaˆ chaw lehˬ Gawˇbaˆ teh‸ kʼoˆ ve chehˇ kuiˬ lo Hpiˇliˇtiˆ chaw hui hta‸ ma‸ teˇ pawˆ kʼaw‸ bawˆ da‸ ve yoˬ. Oˇ htaˇ, Behˍlehˍhehnˍ venˇ yaˇ Yaˍiˇraˆ ve yaˇ Eˇlaˍhaˍnanˍ lehˬ, Hpiˇliˇtiˆ chaw hui ve ma‸ poˍ lonˉ Gawˇliˇya‸ ve awˬ nyi paˍ Laˍhkaˍmiˆ hta‸ tiˇ pehˍ piˇ ve yoˬ. Yawˇ ve gehˇ tuˇ lehˬ, hpa chiˇ ve caˉ behˆ hkʼe hui cawˬ ve yoˬ.
20Oˇ ve hkʼaw‸ nawˉ, Iˉsaˍreˍlaˆ chaw teˇ hpaˍ, Gaˍtaˆ venˇ lo Hpiˇliˇtiˆ chaw hui hta‸ ma‸ teˇ pawˆ kʼaw‸ bawˆ ve yoˬ. Venˇ oˇ ve hkʼaw lo ma‸ bawˆ ve hta‸ nyi ma pfuhˇ jaˇ ve Hpiˇliˇtiˆ chaw teˇ gʼaˇ chehˇ taˍ ve yoˬ. Yawˇ lehˬ hkui sheh la‸ sheh teˇ paˉ le le hkui naw la‸ naw 6 maˬ cawˬ ve yoˬ. 21Yawˇ lehˬ Iˉsaˍreˍlaˆ chaw hui hta‸ hkʼa mvuhˇ hkʼa na kʼoˆ ve yoˬ. Hkʼe te leh, Daˍviˆ awˬ viˉ paˍ Shaˍmaˍ ve yaˇ Yawˇnaˆtanˍ yawˇ hta‸ tiˇ pehˍ piˇ ve yoˬ.
22Ma‸ poˍ lonˉ chi ve awˇ gʼaˇ lehˬ Gaˍtaˆ venˇ hkʼaw chehˇ ve Hpiˇliˇtiˆ chaw teˇ hpaˍ hpeh‸ ve yoˬ. Yawˇ hui hta‸ Daˍviˆ leh yawˇ ve ma‸ yaˇ teˇ hpaˍ tiˇ pehˍ piˇ ve yoˬ.
Currently Selected:
2 Saˍmo-eˍlaˆ li‸ 21: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.