1 Saˍmo-eˍlaˆ li‸ 7
7
1Hkʼe te leh, Yaˍrenˍ venˇ yaˇ teˇ hpaˍ laˬ leh, Gʼuiˬsha ve ka ti‸ shaˉ caˆ ta kʼoˍ hta‸ yuˬ kʼai ve yoˬ. Yawˇ hui lehˬ, ta kʼoˍ oˇ ve hta‸ hkʼaw hkʼoˆ lo cawˬ ve Aˍbiˆnaˍdaˆ ve yehˬ lo yuˬ kʼai ve yoˬ. Yawˇ hui lehˬ Aˍbiˆnaˍdaˆ ve yaˇ paˍ Eˇlaˍsaˍ hta‸ paw hkuˇ te tcuh leh, ta kʼoˍ oˇ ve hta‸ ha‸ shaˉ tcuh taˍ ve yoˬ.
Iˉsaˍreˍlaˆ chaw hta‸ Saˍmo-eˍlaˆ uˉ peunˍ ve
2Gʼuiˬsha ve ka ti‸ shaˉ caˆ ta kʼoˍ lehˬ, Yaˍrenˍ venˇ hkʼaw nyiˇ chi hkʼaw‸ hkʼe chehˇ taˍ ve yoˬ. Awˬ yanˇ oˇ ve hkʼaw Iˉsaˍreˍlaˆ chaw teˇ hpaˍ Gʼuiˬsha hta‸ kuˬ chehˇ ve yoˬ.
3Oˇ htaˇ, Saˍmo-eˍlaˆ Iˉsaˍreˍlaˆ chaw hui hta‸ kʼoˆ piˇ ve, Nawˬ hui lehˬ nyi ma awˬ tawˬ hkʼa gaˬ Gʼuiˬsha geh kʼaw‸ hpfuhˆ kʼaw‸ la gaˇ ve kʼo, awˬ kaˍ awˬ nu ve gʼuiˬsha leh, Aˍshaˆ taˍrehˆ gʼuiˬsha ma ve shaˉ ho‸ teˇ hpaˍ hta‸ gʼa baˬ taˉ ve yoˬ. Nawˬ hui ve awˬ to Gʼuiˬsha hta‸ chiˇ a‸ piˇ leh, yawˇ hta‸ ceh tiˉ oˉ kʼoˍ pui-o. Oˇ hkʼe te ve kʼo, Gʼuiˬsha nawˬ hui hta‸ Hpiˇliˇtiˆ chaw hui ve la‸ sheh hkʼaw ponˬ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ. 4Oˇ htaˇ, Iˉsaˍreˍlaˆ chaw teˇ hpaˍ lehˬ Baˍlaˆ gʼuiˬsha leh Aˍshaˆtaˍrehˆ gʼuiˬsha ve shaˉ ho‸ teˇ hpaˍ hta‸ baˬ taˉ leh, Gʼuiˬsha hta‸ ceh tiˉ oˉ kʼoˍ kʼaw‸ pui ve yoˬ.
5Oˇ htaˇ, Saˍmo-eˍlaˆ lehˬ Iˉsaˍreˍlaˆ chaw hkʼa peu-eˬ ve hta‸ Miˆsaˍpaˍ venˇ lo kuˬ hpawnˬ leh, Oˇ kaˬ lo nawˬ hui awˬ pon ngaˬ Gʼuiˬsha geh bon lawˬ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ. 6Hkʼe te leh, yawˇ hui hkʼa peu-eˬ Miˆsaˍpaˍ venˇ lo hpawnˬ laˬ ve yoˬ. Yawˇ hui iˉ kaˆ nyiˉ yuˬ leh tanˇ tuˬ hkʼa shuˍ Gʼuiˬsha mehˆ gʼuˇ suhˍ ngeuˍ baˬ peuˬ hkʼaw‸ nawˉ, teˇ nyi tanˇ vanˇ caˇ tuˬ ce leh, Ngaˬ hui lehˬ Gʼuiˬsha hta‸ te ya‸ jaˇ peuˬ, teh‸ kʼoˆ ve yoˬ. (Saˍmo-eˍlaˆ lehˬ Miˆsaˍpaˍ venˇ hkʼaw chehˇ taˍ leh, Iˉsaˍreˍlaˆ chaw hui hta‸ suhˉ jehˬ piˇ chehˇ ve yoˬ)
7Hpiˇliˇtiˆ chaw hui lehˬ Iˉsaˍreˍlaˆ chaw teˇ hpaˍ Miˆsaˍpaˍ venˇ hkʼaw hpawnˬ da‸ chehˇ ve awˬ hkawˇ gʼa kaˇ ve yoˬ. Oˇ htaˇ, Hpiˇliˇtiˆ jawˇmawˇ oˇ ve 5 gʼaˇ lehˬ yawˇ hui ve ma‸ yaˇ shiˍ veu laˇ leh yawˇ hui hta‸ ca bawˆ la ve yoˬ. 8Hkʼe te leh, yawˇ hui Saˍmo-eˍlaˆ geh laˬ leh, Hpiˇliˇtiˆ chaw hui ve la‸ sheh hkʼaw lo Yawˇ ngaˬ hui hta‸ ponˬ laˇ tuˬ, ngaˬ hui ve Jawˇmawˇ Gʼuiˬsha geh bon ga lawˬ laˇ-oˆ, teh‸ yawˇ hta‸ kʼoˆ piˇ ve yoˬ. 9Oˇ htaˇ Saˍmo-eˍlaˆ yawˬ ehˉ teˇ hkeh yuˬ leh, Gʼuiˬsha hta‸ tuˉ tanˇ piˇ ve yoˬ. Peuˬ hkʼaw‸ nawˉ, Gʼuiˬsha Iˉsaˍreˍlaˆ chaw hui hta‸ ponˬ piˇ tuˬ bon lawˬ ve yoˬ. Gʼuiˬsha htawˇ yawˇ ve bon lawˬ hkawˇ hta‸ na yuˬ ve yoˬ. 10Saˍmo-eˍlaˆ Gʼuiˬsha hta‸ tuˉ tanˇ chehˇ ve teˇ hkui, Hpiˇliˇtiˆ chaw teˇ hpaˍ yawˇ hui hta‸ ca bawˆ la tuˬ gaˬ la ve yoˬ. Oˇ htaˇ, Gʼuiˬsha lehˬ yawˇ hui awˬ hkʼoˆ lo mvuhˇ tawˍ mvuhˇ htehˆ la piˇ ve yoˬ. Hkʼe te leh, yawˇ hui kawˆ jaˇ leh gʼuiˇ hpaw-e ve yoˬ. 11Oˇ htaˇ, Iˉsaˍreˍlaˆ chaw teˇ hpaˍ Miˆsaˍpaˍ venˇ hkʼaw tawˆ la leh, Behˆkaˍ venˇ lo hkʼa gaˬ yawˇ hui hta‸ gʼa‸ yuˬ leh tiˇ pehˍ piˇ ve yoˬ.
12Oˇ ve hkʼaw‸ nawˉ, Saˍmo-eˍlaˆ lehˬ Miˆsaˍpaˍ venˇ leh Shenˍ venˇ awˬ kaˍ lo haˉ pui shiˍ teˇ maˇ duˇ ti leh, Gʼuiˬsha ngaˬ hui hta‸ ga laˇ tcuhˉ taˍ ve yoˬ, teh‸ kʼoˆ leh chehˇ kuiˬ oˇ ve hta‸ Eˇbaˍneˍzaˍ teh‸ meh piˇ ve yoˬ. 13Hkʼe te leh, Hpiˇliˇtiˆ chaw hui shonˇ kʼai leh, Saˍmo-eˍlaˆ a sha‸ te‸ chehˇ ve teˇ co-e, yawˇ hui Iˉsaˍreˍlaˆ chaw hta‸ maˇ ca kʼaw‸ bawˆ la ve yoˬ. 14Hpiˇliˇtiˆ chaw hui bawˆ yuˬ taˍ ve Eˇkaˍronˍ venˇ hta‸ te leh Gaˍtaˆ venˇ lo hkʼa gaˬ, awˬ kaˍ lo cawˬ ve venˇ hkʼa peu-eˬ hta‸ Iˉsaˍreˍlaˆ chaw kʼaw‸ gʼa hkʼaw‸ ve yoˬ. Chi hkʼoˆ ka‸, Iˉsaˍreˍlaˆ chaw leh Hkaˍnaˍniˆ chaw awˬ kaˍ lo htawˇ gawˬ lehˍ cawˬ ve yoˬ.
15Saˍmo-eˍlaˆ lehˬ, yawˇ te‸ chehˇ ve teˇ co-e Iˉsaˍreˍlaˆ chaw hui hta‸ uˉ peunˍ chehˇ ve yoˬ. 16Teˇ hkʼaw‸ teˇ pawˆ yawˇ lehˬ Beˍteˍlaˆ venˇ, Giˇlaˍgaˍ venˇ, Miˆsaˍpaˍ venˇ chi teˇ hpaˍ lo kʼai leh, yawˇ ve chaw teˇ hpaˍ hta‸ suhˉ ca jehˬ piˇ chehˇ ve yoˬ. 17Oˇ hkʼe te peuˬ hkʼaw‸ nawˉ, yawˇ chehˇ taˍ ve Raˍmaˆ venˇ lo kʼaw‸ kʼo‸-e leh, oˇ kaˬ lo htawˇ chaw yaˇ teˇ hpaˍ hta‸ suhˉ jehˬ piˇ ve yoˬ. Raˍmaˆ venˇ hkʼaw yawˇ Gʼuiˬsha hta‸ tuˉ tanˇ kuiˬ teˇ maˬ te taˍ ve yoˬ.
Currently Selected:
1 Saˍmo-eˍlaˆ li‸ 7: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
