1 Saˍmo-eˍlaˆ li‸ 6
6
Ka ti‸ shaˉ caˆ ta kʼoˍ kʼaw‸ gaˬ la ve
1Gʼuiˬsha ve ka ti‸ shaˉ caˆ ta kʼoˍ oˇ ve lehˬ, Hpiˇliˇtiˆ chaw hui ve mvuhˇmiˬ hkʼaw ha pa suhˍ maˬ chehˇ peuˬ hkʼaw‸ nawˉ, 2Hpiˇliˇtiˆ chaw teˇ hpaˍ lehˬ, yawˇ hui ve paw hkuˇ teˇ hpaˍ leh mawˉ paˍ teˇ hpaˍ hta‸ kuˬ yuˬ leh, Gʼuiˬsha ve ka ti‸ shaˉ caˆ ta kʼoˍ chi hta‸ ngaˬ hui hkʼaˬ hkʼe gʼa te tuˬ le. Ta kʼoˍ chi hta‸ kʼaw‸ hkʼaw‸ feu ve kʼo, aˬ hto‸ ma gʼa piˇ kʼai tuˬ le, teh‸ yawˇ hui hta‸ na nyi ve yoˬ.
3Yawˇ hui kʼaw‸ yaw hkʼaw‸ leh kʼoˆ ve, Nawˬ hui lehˬ Iˉsaˍreˍlaˆ Gʼuiˬsha ve ka ti‸ shaˉ caˆ ta kʼoˍ chi ve hta‸ kʼaw‸ yuˬ hkʼaw‸ kʼoˬ piˇ ve teˇ yanˇ, nawˬ hui venˇbaˆ gʼa ponˬ tuˬ yawˇ hta‸ la‸ shawnˍ teˇ ceuˬ ceuˬ gʼa piˇ kʼai ve yoˬ. La‸ shawnˍ maˇ yuˬ kʼai ve kʼo, ka ti‸ shaˉ caˆ ta kʼoˍ chi hta‸ kʼaw‸ yuˬ hkʼaw‸ kʼoˬ piˇ maˇ hpeh‸. Chi hkʼe te ve kʼo, nawˬ hui kʼaw‸ na-e la leh aˬ hto‸ ma pa taw yawˇ nawˬ hui hta‸ ciˍ yanˍ laˇ chehˇ ve hta‸ nawˬ hui shiˍ la tuˬ yoˬ, teh‸ yawˇ hui hta‸ kʼoˆ piˇ ve yoˬ.
4Ngaˬ hui aˬ hto‸ ma la‸ shawnˍ gʼa piˇ kʼai tuˬ le, teh‸ yawˇ hui kʼaw‸ na nyi ve yoˬ.
Yawˇ hui kʼaw‸ yaw hkʼaw‸ leh kʼoˆ ve, Nawˬ hui Hpiˇliˇtiˆ jawˇmawˇ ngaˇ gʼaˇ cawˬ ve hkʼe, shi shaˉ chuˇ awˬ han teˇ gʼaˇ teˇ maˬ leh shi faˆ cha‸ awˬ han teˇ gʼaˇ teˇ maˬ gʼa te leh gʼa piˇ kʼai tuˬ yoˬ. Nawˬ hui leh Hpiˇliˇtiˆ jawˇmawˇ chi ve ngaˇ gʼaˇ awˬ hkʼoˆ lo gaˬ la ve naˬ beuˬ lehˬ teˇ ceuˬ ceh tiˉ hpeh‸ ve yoˬ. 5Nawˬ hui ve mvuhˇmiˬ hta‸ te luˬ te sheˆ laˇ chehˇ ve shaˉ chuˇ leh faˆ cha‸ chi ve nyiˇ ceuˬ ve awˬ ho‸ awˬ han hta‸ nawˬ hui te leh, nawˬ hui venˇbaˆ gʼa ponˬ tuˬ Iˉsaˍreˍlaˆ ve Gʼuiˬsha hta‸ lawˬ hkawˉ-oˆ. Oˇ hkʼe te ve kʼo, yawˇ nawˬ hui leh nawˬ hui ve gʼuiˬsha teˇ hpaˍ hta‸ maˇ kʼoˆ, nawˬ hui ve mvuhˇmiˬ hta‸ maˇ kʼoˆ, maˇ kʼaw‸ ciˍ yanˍ laˇ hehˉ. 6Aˬ hto‸ ma pa taw, nawˬ hui lehˬ jawˇmawˇ Hpaˍrawˇ leh Eˇjiˇtu‸ chaw hui hkʼa shuˍ kʼaˍ jaˇ ve le. Gʼuiˬsha lehˬ Iˉsaˍreˍlaˆ chaw teˇ hpaˍ Eˇjiˇtu‸ mvuhˇmiˬ hkʼaw gʼa tawˆ-e htaˇ hkʼa gaˬ, Eˇjiˇtu‸ chaw hui hta‸ hkʼa mvuhˇ hkʼa na te piˇ ve hta‸ dawˇ nawˇ-oˆ. 7Chi hta‸ pa taw, teˇ pawˆ ka‸ nuˇ lawˬ maˇ gʼawˬ jaw sheˍ ve nuˇ ma peuˍ nyiˇ hkeh leh, nuˇ lawˬ teˇ maˬ hta‸ hkʼa deh‸ gu taˍ-o‸. Nuˇ ma peuˍ oˇ ve nyiˇ hkeh hta‸ nuˇ lawˬ gʼawˬ tcuh leh, awˬ yehˇ ehˉ teˇ hpaˍ hta‸ nuˇ hkawˆ hkʼaw gʼa‸ haw taˍ-o‸. 8Gʼuiˬsha ve ka ti‸ shaˉ caˆ ta kʼoˍ hta‸ nuˇ lawˬ oˇ ve hkʼaw keu leh, nawˬ hui venˇbaˆ gʼa ponˬ tuˬ yawˇ hta‸ piˇ tuˬ ve la‸ shawnˍ teˇ hpaˍ, ta kʼoˍ teˇ maˬ hkʼaw keu peuˬ hkʼaw‸ nawˉ, ka ti‸ shaˉ caˆ ta kʼoˍ awˬ paˇ lo teh taˍ-o‸. Oˇ hkʼe te peuˬ kʼo, nuˇ lawˬ oˇ ve hta‸ gʼa‸ peu-o. 9Nuˇ lawˬ oˇ ve hkʼaˬ hpawˇ kʼai ve hta‸ hkʼa deh‸ nyi taˍ-o‸. Nuˇ lawˬ oˇ ve Behˆseˍmehˆ venˇ hpawˇ lo kʼai ve kʼo, Iˉsaˍreˍlaˆ ve Gʼuiˬsha lehˬ ngaˬ hui hta‸ ciˍ yanˍ laˇ chehˇ ve hta‸ hpeu‸ maˍ laˇ chehˇ ve yoˬ. Nuˇ lawˬ oˇ ve Behˆseˍ mehˆ venˇ hpawˇ lo maˇ kʼai ve kʼo, ngaˬ hui hkʼoˆ gaˬ la chehˇ ve naˬ beuˬ chi lehˬ Gʼuiˬsha geh laˬ ve maˇ heˆ. Yawˇ hkʼaˇ yawˇ hpeh‸ tawˆ la ve naˬ beuˬ hpeh‸ ve hta‸ ngaˬ hui gʼa shiˍ tuˬ yoˬ, teh‸ kʼoˆ ve yoˬ.
10Chaw oˇ ve teˇ hpaˍ lehˬ, yawˇ hui kʼoˆ ve hkʼe te ve yoˬ. Yawˇ hui lehˬ, nuˇ ma peuˍ nyiˇ hkeh yuˬ leh, nuˇ lawˬ hta‸ gʼawˬ tcuh peuˬ hkʼaw‸ nawˉ, awˬ yehˇ teˇ hpaˍ hta‸ nuˇ hkawˆ hkʼaw gʼa‸ haw taˍ ve yoˬ. 11Ka ti‸ shaˉ caˆ ta kʼoˍ leh shi faˆ cha‸, shi shaˉ chuˇ awˬ han keu taˍ ve ta kʼoˍ hta‸ yawˇ hui nuˇ lawˬ oˇ ve hkʼaw keu taˍ ve yoˬ. 12Nuˇ ma oˇ ve nyiˇ hkeh lehˬ Behˆseˍmehˆ venˇ hpawˇ lo hteˇ lehˍ kʼai leh, kuˬ toˇ chehˇ ve yoˬ. Hpiˇliˇtiˆ jawˇmawˇ oˇ ve ngaˇ gʼaˇ lehˬ, Behˆseˍmehˆ miˬ tcuhˉ lo hkʼa gaˬ gʼa‸ kʼai ve yoˬ.
13Behˆseˍmehˆ venˇ yaˇ teˇ hpaˍ lehˬ, lawˬ hkʼo‸ hkʼaw caˬ gʼeu‸ chehˇ ve yoˬ. Yawˇ hui chiˇ nyi leh ka ti‸ shaˉ caˆ ta kʼoˍ hta‸ gʼa mawˬ ve teˇ yanˇ, ha lehˬ jaˇ ve yoˬ. 14Nuˇ lawˬ oˇ ve lehˬ, Behˆseˍmehˆ venˇ yaˇ Yawˇsuˆ ve ti mi lo gaˬ htaˇ, haˉ pui shiˍ lonˉ teˇ maˬ awˬ paˇ lo jehˇ sheˬ ve yoˬ. Hkʼe te leh, chaw oˇ ve teˇ hpaˍ nuˇ lawˬ hta‸ dawˆpaˆ peuˬ hkʼaw‸ nawˉ, nuˇ oˇ ve nyiˇ hkeh hta‸ tiˇ pehˍ leh, oˇ kaˬ lo yawˇ hui Gʼuiˬsha hta‸ tuˉ tanˇ piˇ ve yoˬ. 15Leˍviˆ chaw teˇ hpaˍ lehˬ, Gʼuiˬsha ve ka ti‸ shaˉ caˆ ta kʼoˍ leh la‸ shawnˍ keu taˍ ve ta kʼoˍ hta‸ chiˇ tawˆ leh, haˉ pui shiˍ lonˉ oˇ ve awˬ hkʼoˆ lo teh taˍ ve yoˬ. Oˇ ve teˇ nyi tiˉ awˬ hkʼaw lo Behˆseˍmehˆ venˇ yaˇ teˇ hpaˍ tuˉ tanˇ tuˬ teˇ hpaˍ yuˬ laˬ leh Gʼuiˬsha hta‸ tuˉ tanˇ piˇ ve yoˬ. 16Hpiˇliˇtiˆ jawˇmawˇ oˇ ve 5 gʼaˇ lehˬ, yawˇ hui te chehˇ ve kanˉ hkʼa peu-eˬ hta‸ nyi taˉ leh Eˇkaˍronˍ venˇ lo kʼaw‸ kʼo‸-e ve yoˬ.
17Hpiˇliˇtiˆ chaw hui lehˬ yawˇ hui venˇbaˆ gʼa ponˬ tuˬ awˬ pon shi shaˉ chuˇ awˬ han ngaˇ maˬ te leh, Aˍshoˆ venˇ, Gaˍsaˍ venˇ, Aˍshaˆkeˍlonˍ venˇ, Gaˍtaˆ venˇ leh Eˇkaˍronˍ venˇ awˬ tan Gʼuiˬsha hta‸ tanˇ feu piˇ ve yoˬ. 18Yawˇ hui lehˬ shi faˆ cha‸ awˬ han htawˇ te leh, Hpiˇliˇtiˆ jawˇmawˇ ngaˬ gʼaˇ uˉ peunˍ chehˇ ve venˇ leh awˬ paˇ awˬ kui lo cawˬ ve hkʼaˆ teˇ hpaˍ awˬ tan, tanˇ feu piˇ ve yoˬ. Gʼuiˬsha ve ka ti‸ shaˉ caˆ ta kʼoˍ teh taˍ kuiˬ Behˆseˍmehˆ venˇ yaˇ Yawˇsuˆ ve ti mi hkʼaw cawˬ ve haˉ pui shiˍ lonˉ oˇ ve lehˬ, ya‸ nyi hkʼa gaˬ oˇ kaˬ lo cawˬ taˍ sheˍ leh, hpeh‸ la peuˬ ve awˬ lawn hkʼa peu-eˬ ve shaˉ hkiˆ hpeh‸ ve yoˬ.
19Behˆseˍmehˆ venˇ yaˇ teˇ hpaˍ ka ti‸ shaˉ caˆ ta kʼoˍ oˇ ve hta‸ ca hpaw nyi ve pa taw, Gʼuiˬsha lehˬ oˇ hkʼe te ve chaw 70 gʼaˇ hta‸ tiˇ pehˍ piˇ ve yoˬ. Gʼuiˬsha chaw oˇ ve teˇ hpaˍ hta‸ tiˇ pehˍ piˇ ve pa taw, venˇ yaˇ teˇ hpaˍ dawˇ haˍ jaˇ leh paˆ hawˬ chehˇ ve yoˬ.
20Oˇ htaˇ Behˆseˍmehˆ venˇ yaˇ teˇ hpaˍ kʼoˆ ve, Da‸ kehˬ jaˇ ve Gʼuiˬsha mehˆ gʼuˇ suhˍ a shu huˉ chehˇ hpeh‸ ve le. Yawˇ ngaˬ hui geh maˇ gʼa chehˇ taˍ tuˬ, ngaˬ hui yawˇ hta‸ hkʼaˬ lo gʼa ca yuˬ kʼoˬ piˇ tuˬ le, teh‸ kʼoˆ ve yoˬ. 21Hkʼe te leh, yawˇ hui Yeˍrenˍ venˇ lo chaw hta‸ hpehˇ peu leh, Hpiˇliˇtiˆ chaw hui lehˬ Gʼuiˬsha ve ka ti‸ shaˉ caˆ ta kʼoˍ hta‸ kʼaw‸ hkʼaw‸ feu laˇ taˍ peuˬ. Nawˬ hui ca yuˬ la-o, teh‸ tawˇ shanˍ feu piˇ ve yoˬ.
Currently Selected:
1 Saˍmo-eˍlaˆ li‸ 6: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
