1 Jawˇmawˇ li‸ 3
3
Cuˇ yiˍ gʼa tuˬ Sawˉla‸monˍ bon lawˬ ve
1Sawˉla‸monˍ lehˬ, Eˇjiˇtu‸ jawˇmawˇ hta‸ shaˉ caˆ caˇ leh, yawˇ ve yaˇ miˇ hta‸ heuˆ ve yoˬ. Yawˇ lehˬ yaˇ miˇ oˇ ve hta‸ Daˍviˆ ve venˇ lo shiˍ kʼai leh, yawˇ ve hawˉ yehˬ, bon yehˬ leh lanˇ venˇ kawˍ peuˬ htaˇ hkʼa gaˬ oˇ kaˬ lo chehˇ tcuh taˍ ve yoˬ. 2Gʼuiˬsha awˬ pon bon yehˬ maˇ gʼa te sheˍ. Chi hta‸ pa taw, chaw yaˇ teˇ hpaˍ tuˉ tanˇ kuiˬ laiˉ kaˬ te leh, Gʼuiˬsha hta‸ tuˉ tanˇ piˇ chehˇ ve yoˬ. 3Sawˉla‸monˍ lehˬ Gʼuiˬsha hta‸ ha‸ leh, yawˇ awˬ pa Daˍviˆ maˍ piˇ taˍ ve tawˇ teˇ hpaˍ hta‸ hkʼa deh‸ na yuˬ ve yoˬ. Ya‸ hkʼaˇ, yawˇ lehˬ tuˉ tanˇ kuiˬ laiˉ kaˬ hkʼoˆ lo to nuˇ to shaˆ teˇ hpaˍ tiˇ pehˍ leh tuˉ tanˇ piˇ chehˇ ve yoˬ.
4Teˇ pawˆ htaˇ, yawˇ lehˬ Giˇbonˍ venˇ lo kʼai leh, oˇ kaˬ lo cawˬ ve awˬ meh bvuhˬ jaˇ ve tuˉ tanˇ kuiˬ hkʼoˆ lo ca tuˉ tanˇ kʼai ve yoˬ. Ponˬ laˬ htaˇ ka‸ yawˇ oˇ kaˬ lo kʼai leh, laiˉ pawˆ tuˉ tanˇ jaw peuˬ ve yoˬ. 5Oˇ ve teˇ haˉ zuh‸ maˆ ve awˬ hkʼaw lo Gʼuiˬsha yawˇ geh laˬ leh, Nawˬ ngaˬ geh aˬ hto‸ ma lawˬ gaˇ ve le, teh‸ yawˇ hta‸ kʼoˆ piˇ ve yoˬ.
6Sawˉla‸monˍ kʼaw‸ yaw hkʼaw‸ leh kʼoˆ ve, Nawˬ lehˬ ngaˬ pa Daˍviˆ hta‸ hkʼaˬ htaˆ ka‸ ha‸ jaˇ ve yoˬ. Hkʼe te leh, yawˇ nawˬ hta‸ ka ti‸ yeˬ leh hteˇ ve cawˇ ve kanˉ hta‸ tiˉ te ve yoˬ. Nawˬ lehˬ yawˇ hta‸ ha‸ jaˇ ve pa taw, yawˇ awˬ tan jawˇmawˇ te tuˬ, ya‸ nyi yaˇ paˍ teˇ gʼaˇ piˇ taˍ ve yoˬ. 7Jawˇmawˇ Gʼuiˬsha-oˬ, ngaˬ lehˬ a sha‸ i jaˇ sheˍ leh, mvuhˇmiˬ hta‸ uˉ peunˍ maˇ puiˉ sheˍ ve htawˇ, nawˬ lehˬ ngaˬ pa awˬ tan chi beu‸ ngaˬ hta‸ jawˇmawˇ te tcuh laˇ taˍ ve yoˬ. 8Chi beu‸ ngaˬ lehˬ gʼaw maˇ peuˬ htaˇ hkʼa gaˬ maˇ jaˇ ve nawˬ leuˆ yuˬ taˍ ve chaw hui geh chehˇ taˍ ve yoˬ. 9Chi hta‸ pa taw, nawˬ ve chaw teˇ hpaˍ hta‸ hteˇ ve cawˇ ve hkʼaw uˉ peunˍ gʼa tuˬ, leh da‸ ve leh maˇ da‸ ve hta‸ fuiˍ da‸ pehˬ da‸ puiˉ ve cuˇ yiˍ pe‸ laˇ-oˆ. Oˇ hkʼe maˇ te laˇ ve kʼo, hkʼaˬ hkʼe te leh nawˬ ve chaw chi teˇ hpaˍ hta‸ ngaˬ uˉ peunˍ gʼa tuˬ ve le, teh‸ Gʼuiˬsha hta‸ kʼoˆ piˇ ve yoˬ.
10Gʼuiˬsha lehˬ, Sawˉla‸monˍ ve bon lawˬ hkawˇ hta‸ nyi ma cawˇ jaˇ ve yoˬ. 11Hkʼe te leh, yawˇ hta‸ chi hkʼe kʼaw‸ kʼoˆ piˇ ve yoˬ. Nawˬ lehˬ co zuhˬ ha zuhˬ cawˬ tuˬ, paw sha la tuˬ, nawˬ ve canˇ paˍ hkʼa peu-eˬ suh peuˬ tuˬ awˬ pon bon maˇ lawˬ. Mvuhˇmiˬ hta‸ hteˇ ve cawˇ ve hkʼaw uˉ peunˍ gʼa tuˬ ve cuˇ yiˍ hta‸ lawˬ ve pa taw, 12nawˬ lawˬ ve hkʼe ngaˬ piˇ laˇ tuˬ yoˬ. Ponˬ taˉ ve awˬ yanˇ hkʼaw te‸ chehˇ ve chaw leh, laˬ tuˬ ve awˬ yanˇ hkʼaw te‸ chehˇ tuˬ ve chaw teˇ hpaˍ a‸ kehˉ shiˍ puiˉ ve cuˇ yiˍ ngaˬ nawˬ hta‸ piˇ laˇ tuˬ yoˬ. 13Chi hkʼoˆ ka‸, nawˬ maˇ lawˬ ve awˬ ceuˬ teˇ hpaˍ htawˇ ngaˬ nawˬ hta‸ piˇ laˇ tuˬ yoˬ. Nawˬ a sha‸ te‸ chehˇ ve teˇ co-e nawˬ lehˬ awˬ nu ve jawˇmawˇ teˇ hpaˍ a‸ kehˉ paw sha leh awˬ me‸ awˬ hponˇ uiˍ jaˇ tuˬ yoˬ. 14Nawˬ lehˬ nawˬ pa Daˍviˆ hkʼa shuˍ ngaˬ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ chehˇ ve kʼo, ngaˬ nawˬ hta‸ co zuhˬ ha zuhˬ cawˬ la piˇ tuˬ yoˬ, teh‸ yawˇ hta‸ kʼoˆ piˇ ve yoˬ.
15Sawˉla‸monˍ zuh‸ nawˇ la leh, Gʼuiˬsha yawˇ hta‸ zuh‸ maˆ ve hkʼaw tawˇ yaw laˇ taˍ peuˬ ve hta‸ shiˍ la ve yoˬ. Oˇ ve hkʼaw‸ nawˉ, yawˇ Yeˍruˆsaˍlehnˍ venˇ lo kʼaw‸ kʼo‸-e ve yoˬ. Yawˇ Gʼuiˬsha ve bon yehˬ hkʼaw teh taˍ ve ka ti‸ shaˉ caˆ ta kʼoˍ gʼuˇ suhˍ lo huˉ taˍ leh, Gʼuiˬsha hta‸ tuˉ tanˇ piˇ ve yoˬ. Oˇ hkʼe te peuˬ hkʼaw‸ nawˉ, yawˇ ve a ma‸ lonˉ teˇ hpaˍ awˬ pon hti caˇ hti dawˬ ve pawehˇ teˇ maˬ te piˇ ve yoˬ.
Sawˉla‸monˍ haˍ ve kanˉ hta‸ suhˉ jehˬ piˇ ve
16Teˇ nyi htaˇ, meh maˬ lanˉ nyiˇ gʼaˇ suhˉ te da‸ leh jawˇmawˇ Sawˉla‸monˍ geh gaˬ la ve yoˬ. 17Teˇ gʼaˇ kʼoˆ ve, Jawˇmawˇ-oˬ, yaˇ miˇ chi ve ngaˬ huiˉ maˬ teˇ yehˬ hkʼaw tiˉ chehˇ ve yoˬ. Teˇ haˉ htaˇ, ngaˬ yaˇ paˍ teˇ gʼaˇ paw la ve yoˬ. 18Awˬ hkʼaw‸ nawˉ nyiˇ nyi hkʼe kʼaw‸ gaˬ leh, yawˇ htawˇ yaˇ paˍ teˇ gʼaˇ paw la ve yoˬ. Yehˬ oˇ ve hkʼaw ngaˬ huiˉ maˬ nyiˇ gʼaˇ ceh tiˉ chehˇ taˍ ve yoˬ. 19Teˇ haˉ htaˇ, yaˇ miˇ chi lehˬ yawˇ ve yaˇ ehˉ hta‸ gʼa nyiˉ heuˆ leh, nyiˉ pehˍ sheˬ ve yoˬ. 20Hkʼe te leh, tanˇ hkuinˇ htaˇ ngaˬ zuh‸ muiˉ kʼa peuˬ hkʼaw‸ nawˉ, yawˇ tu la leh ngaˬ ve yaˇ paˍ hta‸ yawˇ ve zuh‸ hpui hkʼaw lo yuˬ kʼai ve yoˬ. Suh taˍ ve yawˇ ve yaˇ paˍ hta‸ ngaˬ paˇ lo iˉ piˇ taˉ ve yoˬ. 21Shawˉ pawˍ mvuhˇ htiˇ la leh, ngaˬ ve yaˇ hta‸ cuˉ taw piˇ-a teh‸ te htaˇ, yaˇ chi suh taˍ peuˬ ve hta‸ ngaˬ gʼa mawˬ ve yoˬ. Yaˇ chi hta‸ ngaˬ hkʼa deh‸ nyi htaˇ, ngaˬ ve yaˇ maˇ heˆ ve hta‸ gʼa shiˍ ve yoˬ, teh‸ jawˇmawˇ hta‸ kʼoˆ piˇ ve yoˬ.
22Oˇ htaˇ awˬ nu ve yaˇ miˇ teˇ gʼaˇ lehˬ, Maˇ heˆ. Te‸ chehˇ ve yaˇ lehˬ ngaˬ ve yaˇ yoˬ. Suh taˍ ve yaˇ chi lehˬ nawˬ ve yaˇ yoˬ, teh‸ kʼoˆ ve yoˬ.
Awˉ lawˉ peuˇ ve yaˇ miˇ teˇ gʼaˇ kʼaw‸ kʼoˆ ve, Maˇ heˆ. Suh taˍ ve yaˇ lehˬ nawˬ ve yaˇ yoˬ. Te‸ chehˇ ve yaˇ lehˬ ngaˬ ve yaˇ yoˬ, teh‸ kʼoˆ ve yoˬ.
Hkʼe te leh, yawˇ huiˉ maˬ jawˇmawˇ gʼuˇ suhˍ lo tawˇ gʼawˬ da‸ chehˇ ve yoˬ.
23Oˇ htaˇ, jawˇmawˇ Sawˉla‸monˍ kʼoˆ ve, Nawˬ huiˉ maˬ nyiˇ gʼaˇ gʼaˇ ka‸, te‸ chehˇ ve yaˇ lehˬ ngaˬ ve yaˇ yoˬ. Suh peuˬ ve yaˇ lehˬ nawˬ ve yaˇ yoˬ, teh‸ kʼoˆ da‸ chehˇ ve yoˬ. 24Ngaˬ hta‸ aˉhtaw teˇ maˬ pe‸ laˇ-oˆ, teh‸ kʼoˆ ve yoˬ. Hkʼe te leh, aˉhtaw teˇ maˬ shu yawˇ geh yuˬ laˬ ve yoˬ. 25Te‸ chehˇ ve yaˇ ehˉ chi hta‸ jeˆ hkoˇ leh, yawˇ huiˉ maˬ hta‸ teˇ gʼaˇ teˇ hkoˇ piˇ-oˆ, teh‸ jawˇmawˇ tawˇ piˇ ve yoˬ.
26Oˇ htaˇ awˬ tehˬ awˬ na ve awˬ e teˇ gʼaˇ lehˬ, yawˇ ve yaˇ hta‸ ha‸ jaˇ ve pa taw, Jawˇmawˇ-oˬ, yaˇ ehˉ hta‸ taˇ tiˇ pehˍ loˬ. Yaˇ miˇ chi ve hta‸ piˇ-oˆ, teh‸ kʼoˆ ve yoˬ.
Ya‸ hkʼaˇ, awˬ nu ve yaˇ miˇ teˇ gʼaˇ kʼoˆ ve, Yaˇ ehˉ chi ve ngaˬ huiˉ maˬ nyiˇ gʼaˇ gʼaˇ hta‸ taˇ pe‸ laˇ. Yaˇ ehˉ hta‸ nyiˇ hkoˇ jeˆ hkoˇ loˬ, teh‸ kʼoˆ ve yoˬ.
27Oˇ htaˇ Sawˉla‸monˍ kʼoˆ ve, Yaˇ ehˉ chi hta‸ taˇ tiˇ pehˍ. Yaˇ ehˉ chi awˉ lawˉ peuˇ ve yaˇ miˇ hta‸ piˇ-oˆ. Awˬ lawn kʼo, yawˇ lehˬ awˬ tehˬ awˬ na ve awˬ e hpeh‸ve yoˬ, teh‸ kʼoˆ ve yoˬ.
28Awˬ lawn chi hta‸ hkʼa gʼa kaˇ ve Iˉsaˍreˍlaˆ chaw hkʼa peu-eˬ anˇ jaˇ leh, hteˇ ve cawˇ ve hkʼaw suhˉ jehˬ puiˉ tuˬ Gʼuiˬsha yawˇ hta‸ cuˇ yiˍ piˇ taˍ ve hta‸ yawˇ hui shiˍ la ve yoˬ.
Currently Selected:
1 Jawˇmawˇ li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.