Romans 2

1Gar haha ka ndo, ko wawa man ka bèzlè mali a gèƋ ndohi ngiƋè, ka slaha ka tsoko gèƋ ngaya auda a sam kita azɓai. Aman te skwi man ka bazla na mali a gèƋ ndo ngiƋè, ka phomde va ngaya a ri ngaya, te man ka ba, ka gia lèmèlèmè ara man ka ga na ma a gèƌ.

2Aman nga suna, kita Zhiklè nzura'a a vava a géƌ tenga'a man ta gi mali arsa. 3Ka ndo, man ka bèzlè mali a gèƌ ndo ngiƌè, a ka gi lèmèlèmè ara nenga'a: ka hur ka da mbèl ngaya a sam kita Zhiklè ƌè? 4Pombi nenga'a mbia'a, nzhèr skwi nenga'a dai, a ndav nenga'a man a slèmbèƌè tsam tsam azɓai, ka kwola ka ɓi ƌè? Ka sun ɓi ƌè, pombi Zhiklè a zhèr ka, aman ka da ngwèdè ndav.

5Aman ka sassaya ndav ngaya, a ka ngwèdè ndav ngaya azɓai, ka hèy ndzoan a géƌ ngaya, ha pats ndzoan, aman kita nzura'a man a Zhiklè a da gudko va a dai, 6aman a da va na ndo staƌ staƌ ara skwi nenga'a man a gau:

7Nshèffè a mèdèp a sam ndohi man ta nza tara'a te mizlinè man amba, a ta zhèr nslébèrdè, a n'njèlè, a skwi man a géƌèshè azɓai. 8Aman ndohi man ta sala na va a gèƌ, man ta fa na gèƌ a ma nzura'a azɓai, aman ta jèjèr ma man az zura ɓai, a phomde ta, a ga ta ndzoan. 9Matakwan a zlau a sam ndohi tèlèba, man ta gi skwi man ambaɓai: nshèlèkura'a a sam ndohi Juif, te deɓa'a a sam ndohi man Juif ka ɓi ba. 10Nslèbèrdè a n'njèlè a gumai a sam ndohi man ta gi skwi man amba: nshèlèkura'a a sam ndohi Juif, te deɓa'a a sam ndohi man Juif ka ɓi ba. 11Aman Zhiklè a pèr ndo mpèrè azɓai.

12Ndohi man ma kita Zhiklè az a sam ta ɓai, a ta gu malai, ta gedas ta genè, a ta ngècè kita, ko ma kita Zhikfè az a sam ta ɓai. A ndohi man ma kita Zhiklè a zhè a sam ta, a ta gu malai, ta ngècè kita a ma kita Zhiklè. 13Ndohi ta ndi a ndohi nzura'a a sam di Zhiklè, a géƋ man ta cinè ma kita Zhiklè ka ɓai, aman a géƋ man ta fi gèƋè'a.

14Aman ndohi herkeda, man ta ngatsa ma kita Zhiklè ɓai, a ta dzodzor ma kita Zhiklè, ara man ndav tenga'a a ngra ta, ko ta ngatsa ma kita Zhiklè ɓai, ndav tenga'a kala ma kita tenga'a; 15ta ngreda mizlinè ma kita auda, man mwindèa te ndav ta. Ndav tenga'a, a nhér gèƌ tenga'a, a ngreda ta arsa; a sam ngiƌè a pin ta, a sam ngiƌè a jèke ta, 16a pats man Zhiklè a gi kita te Yèsu Kristi, a géƌ skwi n'ngheda'a te ndav ndohai, ara ma mbela'a man i njè'a.

17Aman ka, ka ndo Juif, a ka gshè va a ma kita Zhiklè, a ka jégèr va a géƋ Bi Zhiklè. 18Ka sun skwi man a woya'a, te man ta slebda ka ma kita Zhiklè, a ka slaha ka ƌèl skwi tèlèba, a ka wèr skwi man amba a skwi man ambaɓai. 19Ka fi va, a ka gaƌa, i ndo ncè ta ma ndohi mandazlai, skwi nhél sam ndohi nte ruva, 20ka ndo nslebda ta ndohi man ta sun skwi di ɓai, ka ndo njènga ta ndohi man ta sun maya di ɓai, a géƌ man te ma kita ka rka skwi man a shindè maya a ma nzura'a.

21Anai ka slebda ta a ndohi ngiƌè, a ka slebi ar ka azɓi ƌè? Ka njè ta ndohi ngiƌè: kin gu metsar ɓai! — a ka gia ar ka ƌè? 22Ka gaƌa: kin gu mphömè ɓai, a ka gi mphömè ar ka ƌè? Vrai a ndara ka, a ka gi vri a metsar genè ƌè? 23Ka jégèr va a géƌ ma kita Zhiklè, ka tawaƌaha ma kita, a ka derƌe Bi Zhiklè. 24Ara man ƌèlèwèr Zhiklè a gaƌa:

Ndohi ngiƌè te va ndohi herkeda ta derƌe nzlembaƌ Zhiklè a géƌ kinè.

25N'ngél ngwon amba, aman ka jèjèr ma kita Zhiklè. Aman ka jèjèr ma kita Zhiklè azɓai, ka ndo man ngwon n'ngela, ka lèmèlèmè ara ndo man ngwon n'ngel ɓi ma. 26Ndo man ngwon n'ngel ɓai, a jèjèr ma kita Zhiklè, a sam di Zhiklè lèmèlèmè ara ndo man ngwon n'ngela ka ɓi Ƌè? 27A nenga'a man daga nyakaƋ na ngwon n'ngel ɓai, aman a jèjèr ma kita Zhiklè tèlèba, a ndi a ndo mbèzlè kita a géƋ ngaya, ka man ka ngots ma kita a ma n'ngél ngwon, a ka gi malai ara ma kita Zhiklè a gaƋa.

28Nenga'a ndo Juif man ta rka a deɓa'a genè ka ɓai. Nenga'a n'ngél ngwon man ndohi ta ngu genè ka ɓai. 29Aman nenga'a ndo Juif nzura'a, man ndo Juif te ndav. Nenga'a n'ngél ngwon nzura'a, man ndav ntila, man ndo a ngoƋ ka ɓai, aman Mèzhèɓ Zhiklè a ngau. Ndo arsa a ngècè n'njèlè a sam ndohi ka ɓai, aman a sam Zhiklè.

Currently Selected:

Romans 2: MAFNT

Highlight

Copy