Romans 15

1Aman nga, man wuƋi nga a zhè, sèi nga takaha ta ndohi man wuƋi ta azɓai te skwi man ta slaha ɓai, a nga nzi ara man ambaba nga genè ka ɓai. 2Ndo staƋ staƋ te ndev nga da nza ara man ambaba nslamagi na, a ngrè a ma ma. 3Aman Kristi ba a n'nza, ara man ambaha genè ka ɓai, aman ara man ƌèlèwèr Zhiklè a gaƌa:

Ma nderƌe ndo man ndohi ta derƌe ka a vna, kalka a géƌ ga.

4Aman ma man ta windo hala'a ta windo man a njè nga, aman nga zhèr skwia dai. A ƌèlèwèr Zhiklè a bid nga, aman nga nzi te nzhèrè te ndav. 5Aman Zhiklè nzhèr skwia dai, Zhiklè mbid ndo, da va kinè, aman kin hér skwi te ndav kinè, lèmèlèmè ara Yèsu Kristi. 6A kin slébèrdè Zhiklè, Bab Bi nga Yèsu Kristi, a ma staƋ, a ndav staƋ.

7Gar haha ngiƋè da co ngiƋè, lèmèlèmè ara Kristi a ce nga a n'njèl Zhiklè. 8Aman i gaƋa: Kristi a gu a ndo ntakaha ta ndohi Juif a géƋ ma nzura'a man a Zhiklè, aman a da na va a ma mpesl ri man babhi ta ta ngotso. 9Aman ndohi nte deɓa sèi ta slébèrdè Zhiklè a géƋ man ta sia te va, ara man Ƌèlèwèr Zhiklè a gaƋa:

Gar haha i woy a i ngrede ka te ndev ndohi nte deɓa, a i sli dimèsh a nzlembaƋ ngaya.

10A va za'a:

Vawuffa, kin ndohi nte deɓa, a nda ndohi nenga'a.

11A va za'a:

Voslubordo Bi Zhiklè, kin ndohi nte deɓa, vashüd gèƋ a nenga'a, kin ndohi herkeda tèlèba!

12A va za'a: Esaie a gaƌa:

Zluzlor Isai a di a tsai, a nenga'a man a di a slèmbèƌè, man a gi bai a gèƌ ndohi nte deɓa tèlèba, nenga'a ndohi nte deɓa ta zhèrè te ndav.

13Aman Bi Zhiklè nzhèrè te ndav, da ndha ndav kinè a mwuffè tèlèba, a gumai te ncè-a-ndav, aman kin ngots nzhèrè te ndav tèlèba a wuƋi Mèzhèɓ nkezîa'a.

14Aman i suna a vava, kinè dalahimam ga, kin woy skwi man amba a vava a ri kinè, a ndav kinè n'ndha a nshin skwi tèlèba. Kin slaha kin slebi a va kinè, ngiƋè a ngiƋè. 15Aman ko arsa i ga zlau ɓai, a i winda kinè ma tsaƋ tsaƋ kumba, aman i fa kinè ma a gèƋ te pombi man Zhiklè a mvayè. 16Pombi nenga'a a ngyè a ndo mizlinè Yèsu Kristi te ndev ndohi nte deɓa, a i gi mizlinè Zhiklè te ma mbela'a, aman ndohi nte deɓa ta ndi a skwi mvi a Zhiklè, man ambaba Zhiklè, ndohi nkezla'a te Mèzhèɓ Zhiklè nkezla'a.

17Anai i slaha a i jégér va te Yèsu Kristi a sam di Zhiklè. 18I woy a i gèƋè ma azɓai a géƋ skwi man Kristi a gu a iyè. Aman ndohi nte deɓa ta jèjèrè'a, te ma, te skwi man ta gia'a, 19te wuƋai, te skwi man a ngreda auda ara nrkedai, te wuƋi Mèzhèɓ Zhiklè. A hinè te Jérusalem a sam tèlèba, ha ndikè kokwar Illyrie, i njè ta ma mbela'a te Kristi teleba.

20I gu maya man i njè ma mbela'a a sam man ta tsena nzlembaƋ Kristi di ɓai, aman i Ƌizlè gi a verzi gi ndo ngiƋè azɓai. 21Aman n'nga'a ara man Ƌèlèwèr Zhiklè a gaƋa:

Ndohi man ta njè ta di ɓai, a di ta rka'a, a ndohi man ta tsena di ɓai, ta da cinè'a.

22A géƋ nasa i ngatsa ri ndè a sam kinè di ɓai. 23Aman antanta mizlinè ga te kokwar haha klèng, a mpataka kinè a keƋyè kumba, mvi a zhè a vata. 24Antanta i woy a i Ƌè a sam kinè, aman i Ƌè a kokwar Espagne. Aman i hur i dè, a i bizhè a sam kinè, a i rka kinè, a kin feday ma. Aman sèi man ndav ga a wuffè a gèƋ kinè nshèlèkura'a dai, ga i Ƌè a ma ma.

25Aman antanta i Ƌè a kokwar Jèrusalem, a i takaha ta ndohi Zhiklè. 26Aman ndohi Macèdoine a Achaie tèlèba ta ɓüco skwi man ta woy a ta va ta ndohi ntawassa'a te ndev ndohi Zhiklè te kokwar Jèrusalem. 27Ta gau a ndav amba, te man goƋèrè Jèrusalem ba a zhè a gèƋ tenga'a. Aman ndohi nte deɓa ta ngots skwi ndohi Juif te Mèzhèɓ, amba aman tenga'a ba ta takaha ta ndohi Juif a skwi man ta ngotso t'herkeda.

28Aman i gau arsa, a i va ta skwi man ta tsakala ma, i woy a i jèke kinè, a i Ƌè a ma ma a kokwar Espagne. 29Aman i suna, a i Ƌè a sam kinè, a mpshè ma Kristi tèlèba.

30Dalahimam ga, i fa kinè ma a gèƋ, te Bi nga Yèsu Kristi, te mwoy-ndo te Mèzhèɓ, vatakahayè a ngi var te ntsi ri a sam Zhiklè a gèƋ ga, 31a i mbèl ga te ri ndohi man ta nca a ndav ɓai te kokwar Judée, a mizlinè man i gia a géƌ Jérusalem a gi ambaba ta ndohi Zhiklè, 32a i slaha a i Ƌè a sam kinè a mwuffè ara Zhiklè man a woya'a, a ndav ga ntila langlanga'a a nda kinè. 33Bi Zhiklè gumai da zhè a nda kinè tèlèba! Amen!

Currently Selected:

Romans 15: MAFNT

Highlight

Copy