MATIO 14

Vʉ́ Yohane nu' pɔ shyə́

(Mk 6.14-29; Lk 9.7-9)

1A lə́ pɑ́ cwə o bɔ, fo Herode yu' dəŋ pa' pu lə bɑwə gu'tə́ tsó Yeso a, 2biŋ gɔm bi pɔ pyə gɑ: Bɛ bǎ bɑ́ Yohane nu' pɔ shyə́! A bɑ́ e yam nə vʉ̌; a ywə yə a gə tɑ e pɑwə nthé msya a.

3Nə pa' a lə́ bɑ Herode lě gə̀ pu ghəm Yohane dɑ́ gwɑ́ mtʉɔ shəŋ é, nyəŋ e dyəcɛ̌, po'o dú nə nwə Herodia jwi fɑ Herode yə tso tsyə bɑ Filipo a. 4Nə pa' Yohane lə bɑ́ gɔm bi Herode gɑ́, pú ká piŋ gɑ́ o lɑ jwi fɑ o. 5A lə bɑ́ po'o Herode pɑ shəŋ nə zhwə Yohane, da' gɑ́ bɑwə bwɔk pɔmnəŋ, nə pa' wap lə́ bɑwə dɑ Yohane gə gɔm ghɔm Si a. 6Da' gɑ́ a ti bɑ nə ŋwɛ́nyə tyɛ' tsə Herode, mú gò Herodia nə̀ŋ ywə dzə̌ msǒ Herode, a puŋ e te'te'. 7A lə pɑ̌ po'o, Herode kɔ́ mkɔ nə gɔm bi mú mjwǐ bɔ gɑ́ e həŋtə́ pɑ kɑ bi lə́ bɑ e gɔ hɑ bi e. 8Map e lə thənyə e, e ghɔm bi Herode gɑ́: Hɑ́ thə́ Yohane nu' pɔ shyə bəm tsɔ'ɔ nthʉm pak kɛ́. 9Nwə lə pɔk fo Herode. Da' gɑ a cyə́ m nə mkɔ myə e lə kɔ a, ba m nə mso pyə́, e ghɔm gɑ pu hɑ́ bi e. 10Tə́ nthəm pu ghɔ dyə́ cɛ̌ ja' thə Yohane. 11Pú lə lɑ̌ thə́ e nə sɔ' nthʉm pak kɛ hɑ bi mǔ mjwǐ, e lɑ nɑ gɔ hɑ bi map e. 12Pɑkhʉ̌ Yohane lə sɔ' ŋkwa pfə e nə gɔ nthəŋ; biŋ gɔ siŋ Yeso.

Yeso ŋkhim pɔ sha'tɔ

(Mk 6.30-44; Lk 9.10-17; Yhn 6.1-14)

13Yeso lə nə yu' mcuŋ bɔ, dɑ kənu' nə gɔ nə mu' ghakgo, tsʉ' tsiŋ, pɔmnəŋ lə nə yu', nthəm nə mtisuŋ jyəjyə̀ jap jʉ̀m e, giŋ mkwə̀. 14E lə̀ nə təm kənu', jɔ mɑ du pɔ mtsò map kú e, e piŋ bɑ jɛ́ mŋkho'tə. 15A lə kú' bwadzʉ̌, pɑkhʉ̌ Yeso ghɔ bəŋ e, gɔm bi e gɑ: Tsɔ'ɔ yəŋ yə pɑ nɑ a wə bɑ ghakghak tsʉ', ya'dzʉ̌ piŋ bɑ́ bà ǎ cyə̀; zhəŋ pɔmnəŋ wap ghɔ nthʉm la' jó ywətsʉ. 16Da' gɑ Yeso ghɔm bi pu gɑ: A ka kwitə̀ gɑ̀ wap ghɔ tsʉ'u. Kwa' wɔ hɑ ywətsʉ bi pú. 17Wap ghɔm bi Yeso gɑ: Pyə ghə da' msɛ́ mta' tɔ biŋ gə bapgu duŋ pʉə tsɔ'ɔ. 18Yeso ghɔm gɑ: Po hɑ bəm. 19E lə ghɔm gɑ́ pɔmnəŋ cwə́tə́ dəm mghě, biŋ kwi msɛ́ mta' tɔ ba bapgu duŋ pʉə, bʉ' mnyə myə́ de thə́ nyəŋ byanyə nə́. Bo' msɛ cwəlɔ, hɑ bi pɑkhʉ̌ pyə, wap hɑ bi pɔmnəŋ. 20Guŋ yap awɛ lə pfɑ, jwyə. Pu piŋ daktə bo' myə́ a lo nə msap shwɔppʉə mghǎm. 21Pɔ̀ pyə́ wap lə pfɑ a, lə́ bɑ́ gwɛ a pɔ̀ sha'tɔ, tə̀ sɛ pɑ jwǐ pu a pǒ mkəcɔk pó.

Yeso ghiŋ dəm shyə́

(Mk 6.45-52; Yhn 6.15-21)

22Yeso lə́ wuŋ nthənyə pɑkhʉ̌ pyə gɑ́ wap ko nthʉm kənu', bɑ́ sa' gɔ nə́ yə mu' jʉɔ, e cʉ' bɑ da'nyə pɔmnəŋ. 23E lə́ miŋ nə́ la'nyə pɔmnəŋ, bʉɔ gɔ dəm kúŋ, tsʉ' tsiŋ shwyɛ'nyə Si. A lə pɑ̌ bwadzʉ̌, e pɑ tsʉ'u do é. 24Kənu' tsə́ pɑ̀ tə gʉə sʉəsʉə dəm shyə. Fa shyə́ pɑ́wə mɛnyə, fəfa pɑwə ŋkwa é nə biŋ m jʉ̀m. 25A lə nə pɑ́ gwɛ a ŋkwɔ'dzʉ̌, Yeso ghiŋ dəm shyə pɑpʉə bɑ sɔ' m bəŋ pú. 26Pɑkhʉ̌ pyə lə́ nə yɔ pa' e wə giŋ dəm shyə, səŋ te', wap ghɔm gɑ: A ghɛnyə́ mo, bwɔk, shwé tə thə́. 27Da' gɑ́ Yeso wuŋ gɔm bi pu gɑ: Po kyəp tʉm tsɔ, a bɑ́ myə̀, ka po pwɔk. 28Pɛtrɔ ghɔm bi e gɑ: Cyəpɔ a pɑ́ gɑ́ a bɑ kwa' wə, o ghɔm gɑ́ giŋ dəm shyə sɔ̌' bəŋ o. 29Yeso ghɔm bi e gɑ: Sɔ̌'.

Pɛtrɔ tə̀m kənu' giŋ dəm shyə́ bɑ gɔ m bəŋ Yeso, 30da' gɑ gʉ' fəfa ghə̀ e pwɔk, ntho' nə nuŋtə m shyə, shwé gɑ: Cyəpɔ, vɔk a!

31Yeso wuŋ nya pu e, ŋkhyəp e, gɔm gɑ Mo mu ywə piŋnthʉm, nwə kɑ́ bɑ o zhʉ'nyə́?

32Wap pu e lə̀ ko nthʉm kənu' cwəlɔ, fəfa mǐ. 33Pɔ pyə́ wap lə bɑ́ nthʉm kənu' a kam mkwi'tə dzə é gɔm bi e gɑ: Kwa' nyənyɔ, o bɑ́ Mǔ Si.

34Wap lə sa' shyə, ŋkhəm nə cǎ' guŋ Genezarɛt. 35Pɑ́ tsʉ'u bɔ zhyə́ Yeso, siŋ guŋ pɑ́ ghəŋ tsʉ'u awɛ, pu pɑ dɑ guŋ mghɛ gho awɛ sɔ' bi e. 36Bɑ shwyɛ'nyə e da' gɑ́ e piŋ nə tak gɑ wap kwak mcwǐŋ dzə e, a piŋ bɑ po'o guŋ pɔ pyə wap lə́ bɑwə́ ŋkwak a pɑ́ jɛ́.

Currently Selected:

MATIO 14: NTGomala

Highlight

Copy