MATIO 11

Pɔ́ pyə Yohane nu' pɔ shyə lə təm wap a

(Lk 7.18-35)

1Yeso lə́ miŋ nə siŋ pɑkhʉ̌ pyə shwɔppʉə́ mghǎm pa' wap gɔ nə fa' a, du gɔ ji'tə pɔ nthʉm mtisuŋ map, bɑ́ siŋ wap Cuŋ pɑpuŋ.

2A lə pɑ́ po'o Yohane tiŋnyə dyəcɛ̌ ju' mfa' Kristo, nthəm pɑkhʉ̌ pyə gɑ wap ghɔ́ həŋtə́ e gɑ: 3O bɑ́ mo yə e bɑ́wə gɔ sɔ' a, kɑ pyə gɔ piŋ pyap mu' mo? 4Yeso pa' bi pu gɑ: Po ghɔ siŋ Yohane ywə yə po ju' a, ba yə po jɔ a: 5Mfʉ̀ wə jɔ tsʉ', mkho'tə pɑwə gǐŋ dəŋdəŋ, mghɛ ka'pap pɑ́wə dɔ, mbu'mtəŋ piŋ bɑwə ju', mpfə́ pɔ pɑ́wə jam nə vʉ̌, pu piŋ bɑwə siŋ Cuŋ pɑpuŋ bi mpə̌ŋ. 6Buŋtsě bɑ mo yə ŋ tə gɔ pɑ ywə fa'tə yə e gɔ cyə m nə vʉsi a pə.

7Cwə yə pɑkhʉ̌ Yohane lə ghɔ a, Yeso ghɔmnwə bi pɔmnəŋ nə é gɔm gɑ: Pó lə gɔ m ghakgo le kɑ? Shʉɔ ka' yə fəfa wə ŋʉ'nyə a lə? 8Po lə gɔ m nə yɔ kɑ? Mo bɑ́ e kwa dzə mkwìŋ lə? Pɑ kwa dzə mkwìŋ shwə́ m dyə̌ mfo 9Tə po lə̀ gɔ m nə yɔ kɑ? Gɔm ghɔm Si lə? Əŋ gɑ siŋ wɔ gɑ e cyə gɔm ghɔm Si. 10A bɑ́ mo yə a bɑ pú və nə e gɑ: Po yɔ, gɑ̌ təm shwiŋkhʉɔ a dzə o; e gɔ nyaptə məjyə o dzə̌ o. 11Gɑ siŋ wɔ kwa' nyənyɔ gɑ̌, cəcɑ̌ pɔ pyə mjwǐ dzə a, sɔmmo ka təm nə tɑ shyə́ Yohane nu' pɔ shyə; da' gɑ́ mukəcɔk mò nthʉm Nəfo kɛbəŋ bɑ e cyə e. 12Tɑ́ fɑ nə cwə Yohane nu' pɔ shyə gɔ ŋkhəm tyɛ' ɔ, Nəfo kɛbəŋ bɑ a cʉ' nwə gʉ', mghɛ gʉ' nə́ pɑwə dɑ́. 13Nə pa' guŋ mghɔm ghɔm Si ba mco' lə ghɔ̌m tə ŋkhəm nə Yohane. 14Po pɑ gɔ yu' kwa' pɑpúŋ, po zhyə́ gɑ Yohane nə bɑ̀ Elia yə e gɔ piŋ sɔ' a. 15Mo yə e ghə mtəŋ a, e yu'! 16Gɑ gɔ fo' pɔ nə́ yəŋ wɔ̌ dzʉ́ nə kɑ? Bi a pɑ́ pú fo' pɔ nə́ yəŋ wɔ̌ dzʉ́ nə pɑkhʉ̌ bɑ wap cwə tətɔ bɑwə gɔm cəcɑ̌ pu gɑ:

17Pyə tuŋ duŋ bi po, po lə nəŋ!

Ŋkwa vʉ́, po lə tsɔp kəkɔp yɔ!

18Nə pa' Yohane kě sɔ̌', e lə pɑ dzʉ́ ywə, e lə nəŋ nwə́ ywə, pu ghɔm gɑ zhwenyə cwəpuŋ nə e. 19Mú mo sɔ', bɑ́ dzʉ́ ywə, biŋ bɑ́ nwə ywə pu ghɔm gɑ: E bɑ dzʉ́ ywə, bɑ nwə mlù', so pɑ kwishwɔp pu a mghɛ mhɔ̀. Da' gɑ́ mfa' myə́ le gə pú zhyə zhyənwə yə a fɑ bi Si a.

Mtisuŋ myə a kəŋnyə nə piŋ a

(Lk 10.13-15)

20A lə pɑ po' Yeso to' nə́ ghɔmtə mtisuŋ myə e lə́ té msya nə a, nə pa' wap lě tə pʉɔ tʉm tsap a gɑ: 21Ghəghʉɔ o Korazin! Ghəghʉɔ o Betsaida! Nə pa' msya myə pu lə ghə cəcɑ̌ po a, lə pe' bɑ́ m Tiro pu Sidon, bɑ wap lě da' shi' və́ ŋkwá mpʉə, bʉɔ tʉm tsap. 22Əŋ gɑ siŋ wɔ kwa' nyənyɔ gɑ́ tyɛ'dzʉ nə fyɛ', go' Tiro pu Sidon lə pɑ ywə nə yɔ.

23Sɔ' m nə o m Kapɛrnaum,

o kwɔ' tə ŋkho pɑ kɛbəŋ,

bɑ o gɔ sɔ' fi' tə ko guŋ a vʉ̌.

Nə pa' msya myə pu lə ghə ywə o a lə pé'e bɑ́ m Sodɔm,

bɑ Sodɔm jɑ pɑwə tyɛ' ɔ.

24A po' tə bɑwə siŋ o gɑ tyɛ' fyɛ',

go' Sodɔm lə pɑ́ ywə nə go' o.

Po sɔ' bəŋ m̀, jɔ hwitə

(Lk 10.21-22)

25A lə pɑ cwə o bɔ, Yeso lɑ ghɔm gɔm gɑ: Gɑ sé o m Ta, Cyəpɔ kɛbəŋ pu cǎ', nə pa'ǒ tʉm ywə bɔ bi mzhyə́ fʉ́ pu a mzhyənwə, da' gɑ biŋ da'tə bi pǒ mkəcɔk pó. 26Əŋ m Ta, o gə po'o pa' o yɔ a. 27Tá bɑ e hɑ guŋ ywə awɛ bəm. Sɔmmo ka zhyə́ Mú tə ně da' Tá, sɔmmo lə piŋ nə́ŋ jyə́ Tá tə́ ně da' Mú, biŋ gə mo yə Mú ghə gɑ́ e zhyə́ e a.

28Po sɔ' bəm guŋ yɔ awɛ pyə ŋkhəm bɑ́wə dzá wɔ a, hɑ hwitə bi po. 29Po kwa kəlo' á nə po, sɔ ji'tə nwə a, nə pa' gɑ bɑ gɑ ghə tʉm byányə́ ba nə fi'nɑ hɑ Si, po gɔ ghə hwitə nə tʉm tsɔ. 30Əŋ, kəlo' a bɑ a yɛ̀ nə kwa, ŋkhəm a piŋ jɛ́ gɑ fǎ.

Currently Selected:

MATIO 11: NTGomala

Highlight

Copy