MATIO 10

Nə́ təm pɑkhʉ̌ shwɔ̀ppʉ́ə mgham

(Mk 3.13-19; Lk 6.12-16)

1Yeso lə́ ke pɑkhʉ́ pyə shwɔppʉ́ə mghǎm hɑ tʉ̀ɔ bi pú nə́ nə jə́ŋ mzhwenyə cwəpuŋ, biŋ jɛ guŋ mgho awɛ ba mŋkho'tə. 2Mtsǒ mghɛ nthəm bɔ shwɔppʉə mgham bɑ́ gɑ: Dəŋdzə: Simon yə pú ŋkhe e gɑ Pɛtrɔ a, ba Andreya fɑ e. Yakop mú Zebede ba Yohane fɑ e; 3Filipo ba Bartelemi; Tomasi ba Matio gɛ kwishwɔp. Yakop mu Alfeo ba Tadeo. 4Simon mú e guŋ ba Yuda Iskariɔt yə e hɑ Yeso bi mghɛ bo pyə a.

Yeso lə təm pɔ shwɔppʉə mgham

(Mk 6.7-13; Lk 9.1-6)

5Yeso lə nə təm pɔ shwɔppʉə mghǎm gɔm bi pu gɑ: Po kɑ́ ghɔ nə mguŋ myə pɑ tə pɑ́ pɑ Yudea nə a, po kɑ́ nəŋ ŋkho nə tisuŋ pɑ Samaria. 6Po ghɔ m bəŋ jʉ̀jʉ̀ pyə wap lə la' bi nə tuŋdyə Israɛl a. 7Po ghiŋ məjyə bɑ shyanyə gɑ́ Nəfo kɛbəŋ ghɔptə. 8Po yɛ́ mghɛ ghɔ́, jám mpfə pɔ, dɔnyə mghɛ ka'pap, jəŋ mzhwenyə cwəpuŋ. Po kɑ kwǐ pɑ něné, po hɑ pɑ́ něné.

9Po kɑ́ lɑ gɔl, kɑ ŋkhap, kɑ bʉ̌m nthʉm pètə yɔ lə. 10Kɑ pʉə ghiŋ lə́, kɑ dzə ŋkwakwa tsɑ pʉə́ lə́, kɑ mthap, kɑ pəŋ lə́, nə pá' bǎ yá gɛfa' lə́ byap mcwɔ'fa' myə́ a. 11Po kò bǎ nə ya tisuŋ lə́, kɑ bǎ nə tsa la' lə, po cəŋ tə jɔ mo yə bi a pɑ́ e nyəŋ wɔ dyə a, shwə pɑ́ ywə e tə ŋkhəm cwə nə ghɔ. 12Po nə́ kǒ nə dyə̌ sha'tə é. 13Bi a pɑ gɑ́ dyə bɔ ŋkhu'nyə, bɑ hwitə yɔ gɔ wuŋ nə e bi a e ka nə́ŋ ŋkhu'nyə a, bɑ hwitə yɔ gɔ pɑnyə nə́ po. 14Pú ko bɑ tə lɑ wɔ, biŋ bɑ́ tə yu' ghɔm tsɔ, po nə təm dyə̌, kɑ nə tisuŋ bɔ lə, dzɔp vɔp nə mkwə mɔ. 15Gɑ siŋ wɔ kwa' nyənyɔ gɑ́ a gɔ la' pɑ́ nə tyɛ' fyɛ', go' Sodɔm pu Gomora lə pɑ ywə nə yə tisuŋ bɔ.

Nə cwɔ'mkwə cwəpuŋ yə a gɔ sɔ' a

(Mk 13.9-13; Lk 21.12-17)

16Po yɔ́, gɑ́ nthəm wɔ pa' mjʉ́jʉ́ a cəcɑ́ mbvʉ̌ gǒ. Po ghə fʉ́ pa' mnɔk a, biŋ dɛtə́ pa' msəŋgɔpfo a. 17Po pɔ́mtə́ pɔmnəŋ! Wap gɔ pɑ́ hɑ wɔ dyə fyɛ̀', pɑ́ lɑ mshɔm cwɔ wɔ dyə sinagogə 18pu gɔ sɔ' pɑ lɑ wɔ́ ghɔ dzə mgɔpna' pu a mfomfò nə tsǒ tsɑ̌. A gɔ sɔ' pɑ bi pu ba m bi pɑ tə pɑ́ pɑ Yudea pɑ́ mtiŋ nə ŋkwinthɛ̌. 19Pú sɔ' bɑ dɑ wɔ gɔ po'o, lam tsɔ kɑ sɔ nə ywə yə po gɔ ko ghɔm a ba pa' po gɔ nə ghɔm a. Po gɔ sɔ' kwi ywə yə pɔ gɔ ghɔm a pɑ́ cwə o bɔ. 20Nə pa' tə́ wɔ nə gɔ sɔ' pɑ ghɔm ǎ pɑ́, Zhwenyə Tá yɔ nə gɔ sɔ' pɑ ghɔm nə po. 21Fɑ́ gɔ sɔ' hɑ fɑ́ nə vʉ̌. A tá hɑ mú nə vʉ̌; pǒ gɔ sɔ' fɛ́jʉ́m pɑ tsə́ wap ghə pú zhwə wap. 22Guŋ pɔ awɛ gɔ sɔ' pɔ wɔ nə tso tsɑ̌; tə mo yə e tɔm tə́ nə miŋ a gɔ sɔ' vɔk. 23Cwə yə pu gɔ sɔ' zhəŋ wɔ nə mu' tisuŋ a, po ŋkhʉ́ gɔ nə yə mu'. Gɑ̌ siŋ wɔ kwa' nyənyɔ gɑ pǒ gɔ sɔ' nə kǎ nə mtisuŋ Israɛl tə miŋ bɑ Mú mo sɔ'. 24Mukhʉ̌ tə bɑ m dzə tap e pɑ́; ba gɛfa' lə pɑ m dzə ta fa'. 25Tə bi a múkhʉ̌ pɑ̌ pa' tap e, gɛfa' pɑ́ pa' ta fa' e. Pu ké gɛ dyə gɑ́ Beɛlzəbul bɑ mtsǒ pó gɔ piŋ pɔk tə cyə.

Mo yə́ pɑ́ pu pwɔk e a

(Lk 12.2-7)

26Ká po pwɔk! Sɔmywə yə pu hwyətə́ tə la' pu ghɔ sɔ' ghyɛ' a tə wə pɑ, sɔmywə yə pu tʉm tə́ la' pu ghɔ sɔ' zhyə a lə pɑ́wə. 27Ywə yə gɑ̌ siŋ wɔ cwə jʉ́m a, po ghɔm yá dɔdzʉ̌. Ywə yə po ju' bhə tə̌ŋ po a, po ghɔm ya do dyə̌. 28Ka po pwɔk pɔ pyə bi a pɑ́ wap zhwə nɑ mo, tə bi a pɑ wap lə zhwə lam tsu a; po pwɔk pɑ́ mo yə bi a pɑ e zhwə lam tsɔ mo ba nɑ e nthʉm mɔk tə mi a. 29Pu tə́ fiŋ mcici pɑpʉə nə bɛ́ ywə á lə? A nəŋ bɑ po'o, bi a pɑ́ bǎ yɑ́mu' lə vʉ́ si nə pu tə a ba gɑ Ta yɔ piŋ. 30Sɔ' m nə po, a bɑ pú sɛ mnəŋ thə mɔ awɛ. 31Ka po pwɔk, a bɑ po cyə guŋ mcici awɛ.

32Mo yə e piŋ a dzə pɔmnəŋ á bɑ gɑ̌ gɔ sɔ' piŋ e dzə Ta a thə kɛbəŋ. 33Da' gɑ́ mo yə e kəŋnyə a dzə pɔmnəŋ a, bɑ gɑ̌ gɔ sɔ' kəŋnyə e dzə Tá a thə kɛbəŋ.

Tə́ hwitə pɑ, pɑ́ nyə́

(Lk 12.51-53; 14.26-27)

34Ka po kwɛ gɑ́ gɑ sɔ' nə hɑ hwitə dəmcǎ', ŋ tə́ sɔ' m nə hɑ hwitə pɑ, gɑ̌ sɔ' m nə hɑ nyə. 35Əŋ, gɑ̌ sɔ' hapnyə mo pu tap e, hap mú mjwǐ pu map e, hap jwi mu nə má dhə́. 36Mghɛ bò gɔ sɔ' pɑ́ pɑ̀ pǒ dyə. 37Mo yə́ e ŋkhuŋ tap e kɑ map e tə shyə a bɑ e ka ku'nyə nə m̀. Mo yə́ e ŋkhuŋ mú e yə mbɛ kɑ yə mjwǐ lə tə shyə a, bɑ e ka ku'nyə nə m̀. 38Mo yə e ka kwa yə bɛnyəpɛnyə nə jap jʉ̌m m̀ a ba e ka ku'nyə nə m̀. 39Mo yə e lwɔ' vɔk e a gɔ sɔ' pi, tɑ́ mo yə e pi vɔk e nə m̀ a gɔ sɔ' vɔk.

Mcwɔ'fa'

(Mk 9.41)

40Mo yə e lɑ wɔ dyə a dɑ pa' pɑ myə̀. Mo yə e nəŋ dɑ a, bɑ e dɑ pa' mo yə e nthəm a. 41Mo yə e lɑ gɔm ghɔm Si pa' gɔm ghɔm Si a gɔ sɔ' ŋkwi mcwɔ'fa' bi gɔm ghɔm Si. Mo yə e nəŋ dɑ mo dəŋdəŋ pa' mo dəŋdəŋ a sɔ' ŋkwi mcwɔ'fa' mo dəŋdəŋ. 42Mo yə e hɑ bǎ nthu' shyə nə nwə bi mu' mú nə pǒ pɔ́ gɑ m nə pa' e mukhʉ ǎ, bɑ gɑ siŋ wɔ kwa' nyənyɔ gɑ́ e tə gɔ sɔ' pi myə́ mcwɔ'fa' pɑ̀.

Currently Selected:

MATIO 10: NTGomala

Highlight

Copy