YOHANE 21

Yeso la'tə nɑ e kə́ŋ mʉ'nyə

1Mnwə́ bɔ lə cyə̌, Yeso kwi' da'tə nɑ e bi pɑkhʉ̌ pyə́ kə́ŋ shyə́ lɑpʉə Tiberia. Pá' a lə́ nə shyə́ a bɑ gɑ́: 2Simon Pɛtrɔ ba Tomasi yə́ pú ŋkhe e gɑ Didimə ba Natanaɛl mú e Kana m Galilea pu a pǒ Zebede ba shɑ́ pɑkhʉ̌ pɑpʉə lə tǎmtə sí. 3Simon Pɛtrɔ ghɔm bi pú gɑ: Gɑ gɔ m nə ghəm bapgu. Wap ghɔm bi e gɑ: Pɑ̀ gɔ pəmtə́ ghɔ. Wap lə təm cwəlɔ, ŋkho kənu', da' gɑ wap la tə́ ghəm sɔmywə mtsʉ́' bɔ. 4A lə pɑ̌ fɔkdzʉ̌, Yeso sɔ' nthiŋnyə kəŋ shyə, da' gɑ la' pɑkhʉ̌ pyə pɑwə jyə gɑ a yʉ́ Yeso. 5E ghɔm bi pú gɑ: Pɑkhʉ, pó ka ghə múywə bapgu a? Wap pa' bi e gɑ: gɛ̌. 6E ghɔm bi pu gɑ: Po ma' nthənthɔm yɔ m nə́ ghə̌ŋ tʉɔ nə kənu' tə́ jɔ! Wap lə́ mǎ', gəm bapgu tə la' wap piŋ fəŋ nthənthɔm yap jyə nə́ nə nthəm shyə pɑ̀. 7Mukhʉ̌ yə Yeso lə ŋkhuŋ é a ghɔm bi Pɛtrɔ gɑ: A bɑ́ Cyəpɔ! Pɛtrɔ lə cwətə ju' gɑ a Cyəpɔ, pa' dzə la tə́ bɑ nə e a pɑ, e wuŋ jwe tap e, ja' bvʉ́ shyə. 8Pyə shɑ pɑkhʉ̌ lə lɑ̌ kənu' sɔ' kəŋ shyə, bɑwə fəŋ nthənthɔm bɑ bapgu lo nə́, nə pa' wap la tə́ bɑ́ gʉə sʉəsʉə nə kə̌ŋ shyə pɑ́, wap lə bɑ̀ gwɛ a nə meta ŋkhə. 9Wap cwə̌ tə́ fi' si kəŋ shyə cwəlɔ, jɔ mɔ́k bɑ pu sù, jap bapgu ba pu' msɛ nə́. 10Yeso ghɔm bi pu gɑ: Po lɑ bapgu yə po gəm cwəlɔ a nə sɔ̌'. 11Simon Pɛtrɔ lə ko nthʉm kənu' cwəlɔ, fi' nthənthɔm, mmʉəmmʉ́ə bapgu duŋ shwɔptá m potɔ mŋkhə pɑ́ bɑ ǎ lo nthʉm o; tə́ ba tə pa' bapgu lə bɑ́ nthʉm o dəŋ po'o a, nthənthɔm lə hʉə pɑ̀. 12Yeso ghɔm bi pu gɑ: Pó sɔ' dzʉ́ywə; la' sɔm mukhʉ̌ ghə kaktʉɔ nə həŋtə́ é gɑ: O bɑ́ wɑ? Da' gɑ wap lə bɑwə shəŋtə jyə́ gɑ e lə́ bɑ Cyəpɔ. 13A lə pɑ̌ po'o Yeso sɔ'; bé msɛ́ hɑ bi pú; biŋ ŋkwi' hɑ ba bapgu bi pú. 14A lə́ bɑ́ po'o bɑ́ batə mcʉ̌m mnthá pa' Yeso da'tə nɑ e bi pɑkhʉ́ pyə a, tə fɑ pa' e lə yǎm nə vʉ̌ a.

Yeso hɑ fa' bi Pɛtrɔ

15Nə tsʉ́ ywə lə nə mì, Yeso ghɔm bi Simon Pɛtrɔ gɑ: Simon mú Yohane tə́ o ŋkhùŋ a tə shyə́ pɔ pɔŋ gɑ́ lə? E pa' bi e gɑ: Əŋ m Cyəpɔ, o bɑ ǒ zhyə́ gɑ́ gɑ̌ ŋkhùŋ o. Yeso piŋ gɔm bi e gɑ: Khim pó jʉ̀jʉ̀ pɑ̌. 16Yeso lə kwi' gɔm bi e batə mcʉ̌m bʉ́ə gɑ: Simon mú Yohane tə́ o ŋkhúŋ a lə́? E pa' bi e gɑ: Əŋ m Cyəpɔ, ǒ bɑ ǒ zhyə gɑ́ gɑ̌ ŋkhùŋ o. Yeso ghɔm bi e gɑ: Pɑ́ gɛ pyap jʉ̀jʉ̀ tsɑ̌. 17E lə kwi' gɔm bi e batə mcʉ̌m nthá gɑ Simon mú Yohane tə́ o ŋkhùŋ a lə́? Simon lə́ yɛ̌lúŋ pa' e həŋtə e batə mcʉ̌m nthá gɑ o ŋkhùŋ a lə́? Biŋ gɔm bi e gɑ: Cyəpɔ, wə yə́ ó bɑ ǒ zhyə́ guŋ ywə awɛ a, ǒ zhyə́ pɑpuŋ gɑ́ gɑ̌ ŋkhùŋ o. Yeso piŋ gɔm bi e gɑ: Khim jʉ̀jʉ̀ tsɑ̌.

18Kwa' nyənyɔ nyənyɔ gɑ̌ ghɔm bu, cwə yə́ o lə́ bɑ mú səm a, o pɑ́ jwé tap o, bɑ gɔ tsʉ' yə o kuŋ a; cwə yə o gɔ sɔ' vo a, o pɑ ŋkhá' bú mǔ, mu' mo nə zhwe tap o, bɑ dɑ o gɔ tsʉ' yə o ka kuŋ a. 19Yeso lə́ gɔm po'o bɑ nə da'tə nthi vʉ̌ yə Pɛtrɔ lə bɑ gɔ sɔ' nə ghu'tə Si a; e lə ghɔ́m ghɔm bɔ biŋ ŋkwi' gɔm bi Pɛtrɔ gɑ: Yap jʉ̌m m̀.

Mukhʉ̌ ŋkhuŋnyə Yeso

20Pɛtrɔ lə fɛ̌ nɑ́ e jɔ mukhʉ̌ yə́ Yeso lə ŋkhuŋ e a jʉm e. Mo yə e lə pɔ nɑ e nə kəkɔp e cwə yə́ wap lə́ bɑwə dzʉ́ywə a gɔm bi e gɑ́: Cyəpɔ mo yə e bɑwə gɔ hɑ o bɑ wɑ? 21Pɛtrɔ lə yɔ e, gɔm bi Yeso gɑ: Sɔ' m nə e, e gɔ sɔ' pɑ m gɑ́ kɑ? 22Yeso pa' bi e gɑ́: Ŋ ŋkhuŋ gɑ e pɑ́ pɑwə tə̌ ŋ da' sɔ̌', bɑ a gɔ ghə la m wə̀? Sɔ' m nə wə, yap jʉ̌m m̀. 23A lə́ fɑ nə́ ghɔm tsɔ gɑ tə pu pɑ gɔm cəcɑ̌ mfɑ mfɑ́ gɑ mukhʉ̌ bɔ tə́ gɔ la' pfʉ́ pɑ́. Tə a pɑ́ nyənyɔ gɑ Yeso la tə ghɔm bi e gɑ́ e tə́ gɔ la' pfʉ́ pɑ́; da' gɑ́ e lə shəŋtə gɔm m gɑ́: Ŋ da ŋkhuŋ gɑ e pɑ́ pɑwə tə̌ ŋ da' sɔ̌' bɑ a gɔ ghə la m wə̀?

24Mukhʉ̌ bɔ nə ŋkwinthɛ̌ nə mɔ mnwə, biŋ bvə má; bɑ pyə̌ nəŋ jyə́ gɑ mkwinthɛ myə́ bɑ pa' nyənyɔ shəŋ a.

25Yeso lə́ ghə̌ shɑ mnwə tə ǎ yɔ́m: tə bi a pɑ́ pu lə pé'e bɑ gɔ və pɑ yɑmu' yɑmu' bɑ guŋ dzʉ̌ awɛ gɔ kɔk nə pa' bi a ŋwa'nyə yə pu gɔ və nə á gɔ ko nə a.

Currently Selected:

YOHANE 21: NTGomala

Highlight

Copy