YOHANE 20

Pɑkhʉ̌ Yeso ghɔ̀ thəsì

(Mt 28.1-10; Mk 16.1-8; Lk 24.1-12)

1A lə pɑ̌ nə dəŋdzə̀ tyɛ'dzʉ́ nə gap dzʉ́, kwa' mɑ́ mpʉmdzʉ̀, tə tsʉ́' yɑwə sonyə, Maria yə Makdala ghɔ thəsì, jɔ bɑ̀ pú cʉɔ gwɔ' nə thəsì. 2E khʉdʉ̌ ŋkwyatə́ Simon Pɛtrɔ pu yəmu' mukhʉ̌ yə́ Yeso lə ŋkhuŋ e a gɔm bi pu gɑ: Pú té Cyəpɔ thəsì, la' pyə zhyə tsʉ' yə pú yap é nə a. 3A lə́ pɑ̌ po' Pɛtrɔ pu yəmu' mukhʉ̌ tə́m gɔ thəsì. 4Pa' wap pɑpʉə lə bɑwə́ bəmtə́ khʉdʉ a, yəmu' mo lə ŋkhʉdʉ̌ shyə Pɛtrɔ dəŋdzə ŋwak thəsì, 5bɔnyə, jɔ mbak dzə́ bɑ pu yap tsʉ'u. Da' gɑ́ e lə ko nthʉm sì. 6Simon Pɛtrɔ yə e lə bɑ jʉ̀m e a, lə ŋwak yə thəsì ŋkho nthʉm sì, jɔ mbak dzə bɑ pu yap. 7Ba dzə yə pu lə nə hwyə thə e a, bɑ pu ka yap bəŋ mbak dzə, bɑ pu tsʉmtə jap pɑ nə yə́ tsʉ'. 8A lə pɑ̌ po'o tə́ yəmu mukhʉ̌ yə e lə ləŋdzə ŋwak a piŋ ŋkho yə́ nthʉm sì; jɔ́ biŋ bíŋ. 9A lə nə pɑ̌ po'o bɑ wap ka wuŋ ju' ywə yə a bɑ pu lé bvə gɑ́ Yeso gɔ la' yam nə vʉ̌ a. 10A pɑ́ po'o pɑkhʉ̌ pɑnyə mla' map.

Maria yə Makdala yɔ Cyəpɔ

(Mk 16.9-11)

11Maria lə́ bɑ ě wuŋ bəŋ thəsì m dzʉ̌ bɑwə dɔ̌. E lə pɑ̌ dɔ, bɔnyə bɑ de thəsì 12biŋ jɔ pɑ aŋgəle pɑpʉə, bɑ wap kwa dzə fə́fə́, shwə tsʉ' yə pu lə yap pfə Yeso nə a, mu' pɑ nə thə́ e, yə mu' pɑ nə mkwə myə́.

13Wap lə ghɔ̌m bi e gɑ: Mɑmjwi o dɔ kɑ? E pa' bi pu gɑ: Wáp bɑ wáp té Cyəpɔ à, la' jyə́ tsʉ' yə wap yap e nə a. 14E lə pɑ gɔm po'o, fɛ nɑ e jɔ Yeso bɑ ě tiŋnyə tsʉ'u, da' gɑ̀ e la tə bɑwə jyə gɑ e Yeso pɑ̀.

15Yeso ghɔm bi e gɑ: Mɑmjwi, o dɔ kɑ? O shəŋ wɑ? Pa' e lə́ bɑwə ŋkwɛ gɑ pɑ byap kà nə lə́ bɑwə gɔm a, e lə pǎ' bi e gɑ: Cyəpɔ a pɑ́ bɑ wə nə nthé é, o siŋ a tsʉ' yə́ o jap e nə a gɔ dɑ e. 16Yeso ghɔm bi e gɑ: Maria. E wuŋ fɛ nɑ e gɔm bi e nə ghɔm Ebraika gɑ: Rabuni, a pɑ́ da'tə gɑ: Tá gɛ zhi'tə. 17Yeso ghɔm bi e gɑ: Kɑ̀ kyəp á! Nə pa' ŋ kha wuŋ ŋkwɔ' bəŋ Tá ǎ. Sɔ' m nə wə, ghɔ jɔ mfɑ pɑ̌ gɔm bi pú gɑ gɑ̌ kwɔ' m bə̌ŋ Tá ǎ yə e bɑ Tá yɔ a, bəŋ Si a yə e bɑ Si yɔ a. 18Maria yə Makdala lə sɔ' cwəlɔ siŋ pɑkhʉ̌ gɑ: Gɑ̌ yɔ Cyəpɔ, e ghɔm bəm po'o.

Pɑkhʉ̌ yɔ Cyəpɔ

(Mt 28.16-20; Mk 16.14-18; Lk 24.36-49)

19A lə pɑ̌ pɑ́ bwadzʉ̌ bɔ yə a lə bɑ́ dəŋdzə̀ tyɛ'dzʉ nə gap dzʉ́ a, jyədyə̌ nə pa' yə pɑkhʉ̌ Yeso lə bɑ́ nthʉ́m o a pɑ́ bɑ pu yo', bɑ bwɔk pɑ Yudea. Yeso lə ŋwak cəcɑ̌ pú gɔm bi pú gɑ: Hwitə̀ pɑ́ bi po. 20E lə́ nə ghɔm bɑ́ da'tə wap bú myə́ ba be é. Pɑkhʉ̌ lə nə yɔ Cyəpɔ ŋwɛnyə̀ ló nə́ pú. 21Yeso piŋ gɔm bi pu m sə́ gɑ: Hwitə̀ pɑ́ bi po. Dəŋdəŋ pa' Tá nthəm a, ba myə̀ yɑ̌ gɑ̌ təm wɔ. 22E lə ghɔm po'o fɔk zhwenyə e nə́ pu biŋ gɔm bi pu gɑ: Po kwi Zhwenyə Dɔlɔ̌. 23Pɔ pyə pǒ lɑ mhɔ map shwyɛ' wap a bɑ pu gɔ lɑ mhɔ map cwyɛ' wap. Pɔ pyə́ pǒ sɛ́ mhɔ map a, bɑ pú gɔ sɔ' sɛ mhɔ map.

Yeso pu Tomasi

24A lə́ nə pɑ̌ po'o Tomasi, mu' mo nə pɔ shwɔppʉə mghǎm, mo yə pú ŋkhe e gɑ Didimə a lə pɑ́ pu a pú nə cwə yə Yeso lə́ ŋwak a. 25Pyə shɑ́ pɑkhʉ̌ lə ghɔm bi e gɑ: Pyə̌ yɔ Cyəpɔ. E pa' bi pu gɑ: Ŋ bɑ́ tə yɔ mfa mtʉɔ nə bú myə́, bɑ́ tə twɔk nthə́ pu a nə tsʉ' mtʉɔ, biŋ bɑ́ tə́ twɔk pú a nə be é, bɑ ŋ tə́ gɔ piŋ pɑ́.

26A lə pɑ́ po'o, a nə cyə tyɛ'dzʉ hɔ̌m, pɑkhʉ̌ kwi' shu'tə dyə, pu a Tomasi nə pɑ́ dyə́, Yeso lə ŋwǎk, nə ŋwak bɑ pu yo' guŋ mjyədyə̌ awɛ. E lə tiŋnyə cəcɑ̌ pú, gɔm bi pu gɑ: Hwitə́ pɑ́ bi po. 27Biŋ gɔm bi Tomasi gɑ: Lɑ nthə pu o nə sɔ' tsɔ'ɔ biŋ dé bu mə̌ tə́ jɔ; lɑ pú o nə sɔ' nyəŋ bě m̀; tak nə zhʉ'nyə nə́ŋ, ji mbɛ gɛ piŋnthʉm. 28Tomasi pa' bi e gɑ: Cyəpɔ a biŋ bɑ́ Si a. 29Yeso ghɔm bi e gɑ: A cyə m pa' o jɔ a á o piŋ: Mpùŋtse bɑ́ pɔ pyə wap piŋ tə yɔ a.

Ywə yə yəŋ ŋwa'nyə byap bi pɑ a

30Yeso lə piŋ gə shɑ mtiŋ msya dzə̌ pɑkhʉ̌ pyə, myə a bɑ pú ka və́ nthʉm ŋwa'nyə yəŋ a. 31Mɔ myə pú lə və a, pú lə́ bvə po'o gɑ po nə biŋ gɑ Yeso bɑ Kristo, Mu Si, cwə yə́ po piŋ po'o a, pó cyə m nə tso tsyə gə́ vɔk.

Currently Selected:

YOHANE 20: NTGomala

Highlight

Copy