YOHANE 19

1A lə́ pɑ̌ po' Pilato lɑ Yeso bɑnyə, gə pu lɑ shɔm shwɔ e. 2Msəŋwi lə sǔ co' thə́ e, bɑ wap lɑ júŋ nə bá', ŋkwa sʉəsʉə pɛ dzə́ fɔk nə e. 3Wap lə́ bɑwə gɔ bəŋ e lə́ bɑ gɔm gɑ: Ca'tə, m fo pɑ Yudea! Biŋ bɑ shwɔ mshɔm nə e. 4Pilato lə pǐŋ ŋkwi' nthəm dzʉ́ gɔm bi pɑ Yudea gɑ: Po yɔ, gɑ̌ lɑ e nthəm dzʉ́ dzə po. Po zhyə gɑ́ ŋ kha yɔ sɔmywə yə pu butə e nə a. 5Yeso lə́ nə tə̌m dzʉ́ cwəlɔ, bɑ pu su co' júŋ thə́ e biŋ ŋkwa pɛ dzə́ nə e. Pilato ghɔm bi pu gɑ: Mbɛ yəŋ. 6Da' gɑ́ mkamsi gwyə pu a pɔ pap lə́ cwə̌ tə jɔ e, guŋ bɑ shwe gɑ: Kwe e bɛnyəpɛnyə! Kwe e bɛnyəpɛnyə! Pilato ghɔm bi pu gɑ: Pɑ kwa' wɔ ŋkwe e thə bɛnyəpɛnyə nə pa' myə̀, ŋ kha yɔ sɔmywə yə bi a pɑ́ pú putə e nə a.

7Pɑ Yudea pa' bi e gɑ: Pyə bɑ pyə ghə mu' tɑ̀' mcò', a pɑ gɔ cyə m nə́ mcó' bɔ pu zhwə e, nə pa' a bɑ ě ke nɑ e gɑ Mú Si. 8Pilato lə cwə̌ tə ju' ghɔm tsɔ, bwɔk nə gɔ dzə. 9E lə pɑnyə dyə e, gɔm bi Yeso gɑ: Kwa' wə nthəm hɑ? Da' gɑ́ Yeso lə ghɔm sɔm nwə bi e.

10A pɑ po'o Pilato ghɔm bi e gɑ: O ŋkhəŋnyə pa' nə ghɔmnwə bəm. O ka zhyə gɑ́ gɑ̌ bɑ gɑ̌ ghə tʉɔ nə gə pu tak o nəŋ kɑ nə ghə pu kwe o bɛnyəpɛnyə a? 11Da' gɑ Yeso pa' bi e gɑ: O kě tə ku' nə ghə sɔm tʉɔ nə m̀ tə a bɑ gɑ kɛbəŋ nə hɑ bu; a shyə m po'o tə́ mo yə e hɑ a bu a pɑ́ bɑ e kwà kwa' mɑ mhɔnwə myə ǎ cyə a! 12Tə́ fɑ po'o, Pilato pɑ shəŋ nə tak e nəŋ, da' gɑ́ pɑ Yudea to' nə pɑ́ shwe biŋ bɑ gɔm bi Pilato gɑ́: O tak e nəŋ bɑ o tə̌ wə giŋ pa' so Kasa a pɑ́! Nə pa' mo ghɔm gɑ e fo bɑ e gɛ bo Kasa.

13Pilato lə cwə̌ tə́ ju' po'o dɑ Yeso nthəm jap e dəm kwɔ' shɛ́, tsʉ' yə pu ŋkhe gɑ́ Litostrotos, a pɑ nə Ebraika bɑ gɑ Gabata. 14A lə́ bɑ tyɛ' nyaptə̀ mnɑ́ nə Paska, gwɛ́ a nə mɔkcʉ́. Pilato ghɔm bi pɑ Yudea gɑ: Yɔ́ fo yɔ̌ yə̌ŋ. 15Da' gɑ wap to' nə pɑ shwe gɑ: E pfʉ́! E pfʉ́! Kwe e bɛnyəpɛnyə! Pilato piŋ gɔm gɑ: Gɑ̌ gɔ kwé fo yɔ bɛnyəpɛnyə lə́? Mkamsi gwyəgwyə pa' bi e gɑ: Pyə ka ghə mu' fo tə ně Kasa. 16A lə pɑ̌ po'o e hɑ Yeso bi pú gɑ pú kwé e bɛnyəpɛnyə. Wap fɔm e cwəlɔ.

Pu kwe Yeso bɛnyəpɛnyə e pfʉ́

(Mt 27.32-44; Mk 15.21-32; Lk 23.26-43)

17Yeso lə kwa bɛnyəpɛnyə e pɑ́ kwa' yʉ́ nə nthəm gɔ tsʉ' yə pu ŋkhe gɑ́ tsʉ' kwé thə mó a, a pɑ nə Ebraika bɑ gɑ Gɔlgota a. 18Pu lə́ kwe é nə bɛnyəpɛnyə tsʉ'u bɔ, biŋ ŋkwe ba shɑ pɔ pɑpʉə; Yeso pɑ cəcɑ̌ pú. 19Pilato lə́ ba e və mu' ŋwa'nyə gə pu yap thə bɛnyəpɛnyə; a lə bɑ̀ pu və nə́ gɑ́:

Yeso yə Nazarɛt, fo pɑ Yudea.

20Bo'gwyə pɑ Yudea lə kě ŋwa'nyə bɔ, nə pá' tsʉ' yə pu lə kwe Yeso nə a lə́ bɑ bəŋ tisuŋ. Ŋwa'nyə piŋ bɑ́ bɑ pu və nə́ ghɔm Ebraika ba nə ghɔm Roma, ba nə Grikia. 21Mkamsi gwyə pɑ Yudea ghɔm bi Pilato gɑ: Pu ka bɑ́ gɔ və gɑ́ fo pɑ Yudea pɑ̀. Pu kɑ̀ bɑ̀ gɔ və m gɑ: Mo yə̌ŋ bɑ e ghɔm gɑ e bɑ́ fo pɑ Yudea. 22Pilato pa' bi pu gɑ:

Ywə yə gɑ̌ və a, gɑ é da' bvə́!

23Msəŋwi lə mǐŋ nə kwe Yeso nə bɛnyəpɛnyə, dɑ dzə́ tsyə́ nə gap jyə́ pfʉə, tá' jyə̀ pɑ́ bi tà' mo. A cʉ' sʉəsʉə dzə é yə a lə bɑ pu pá' la' pu ya' sɔmtsʉ' nə tə fɑ thə́ a. 24Msə̌ŋwi lə ghɔm cəcɑ̌ pu gɑ: Ka pɑ khitə, pɑ tam nthuŋ nə jɔ mo yə ě tsʉ a: A pɑ̀ po'o ywə yə pu lə və a pəmtə gɑ́: Wap ghaptə dzə tsɑ̌, dɑ sʉəsʉə dzə a ntham nthuŋ. Yəŋ bɑ ywə yə msəŋwi lə ghə a.

25A lə bɑ bəŋ bɛnyəpɛnyə Yeso map e pɑ tsʉ'u bɑ ě tiŋnyə ba Maria fɑ map e, jwi Clopas ba Maria yə Makdala. 26Yeso lə nə́ yɔ̌ map e ba mukhʉ e yə e lə ŋkhuŋ e a bəŋ e gɔm bi map e gɑ: Mɑmjwi yɔ mú o yə̌ŋ. 27Biŋ gɔm bi mukhʉ e gɑ: Yo mɔ yə̌ŋ. Tə́ fɑ cwə o bɔ mukhʉ e lɑ e dyə e.

28A lə pɑ po'o, Yeso zhyə gɑ guŋ ywə awɛ mi, po'o gɑ ywə yə pu lə və a pəmtə́ tə́ ŋkhəm cwiŋ, gɔm gɑ: Ghak a wə ŋkhə. 29Mu' ghʉɔ lə bɑ tsʉ'u bɑ pu nyəŋ mcyə́ nə tə a ló. Pu lə sǔ cu' ywə nə mcyə́ bɔ, nthə́ŋ nə́ thə́ kam ywə yə pu ŋkhe gɑ izopə a, nya bəŋ shwə e. 30Yeso lə cwə̌ tə́ nwə mcyə, gɔm gɑ: Guŋ ywə awɛ mì; biŋ shiŋ thə e, hɑ zhwenyə.

Mcyə ba shyə

31Pa' a lə́ bɑ tyɛ' nə nyaptə nɑ a, pɑ Yudea lə pɑ bwɔk gɑ pfə mo kɑ cwə̌ nə bɛnyəpɛnyə nə cwə sabat nə pa' tyɛ' sabat bɔ lə bɑ m dəŋ, wap ghɔ jɔ Pilato gɔm gɑ e ghə pu po'tə mkwə map, gə pu cʉɔ wap. 32Msə̌ŋwi lə sɔ' cwəlɔ bo'tə mkwə dəŋdzə ba batə mo yə pu lə kwe wap pu a pu a. 33Wap lə nə kəm nə Yeso jɔ gɑ́ ě da' pfʉ́; a pɑ́ po'o la' wap po'tə mkwə myə́. 34Da' gɑ́ mu' ta' səŋwi lə lɑ kuŋ swɔp be é, mcyə ba shyə wuŋ nthəm.

35Mo yə e lə yɔ a ŋkwinthɛ̌ nə ywə yə e lə yɔ a, kwǐnthɛ e piŋ bɑ nyənyɔ, ba po'o mo bɔ jyə gɑ e gɔm ywə yə ǎ pɑ nyənyɔ a, po'o gɑ́ ba wɔ yɔ piŋ. 36Guŋ ywə bɔ awɛ nthəm po'o tə ywə yə pu lə və a a pəmtə;

bɑ pu lě bvə gɑ:

Pu tə́ gɔ la' po' sɔm kwé ě pɑ́.

37Ba mu' tsʉ' ŋwa'nyə ŋkwi' bɑ́ gɔm gɑ:

Wap gɔ sɔ' yɔ mo yə wap swɔp e a.

Nə nyəŋ Yeso sì

(Mt 27.57-61; Mk 15.42-47; Lk 23.50-56)

38Mnwə bɔ lə cyə̌, Yosɛp yə Arimatea, yə e lə bɑ mukhʉ Yeso, da' gɑ́ bɑ dʉmnyətʉmnyə, bɑ bwɔk pɑ Yudea, lo bi Pilato gɑ́ e piŋ gɑ e cʉɔ pfə́ Yeso. Pilato piŋ, Yosɛp sɔ' shʉɔ pfə Yeso. 39Ba Nikodemo yə e lə́ ghɔ jɔ Yeso mtsʉ́' a lə sɔ' yə; nə sɔ' gwim mu' ŋi'nyə mwɑ mira pu aloɛs gwɛ a nə kilo shwɔpta mgham tha. 40Wap lə́ lɑ pfə Yeso cwəlɔ gɔ dɑ mbak dzə dzʉm pu a mwɑ damnyəlamnyə pa' a bɑ nə ma pɑ Yudea nə lə nthəŋ mo a. 41A lə bɑ́ nə́ tsʉ' yə pu lə kwe Yeso nə bɛnyəpɛnyə nə a, kà pɑ tsʉ'u, mu' thəsì pɑ nthʉm kà bɔ tə pu guŋ nyəŋ sɔmmo nə́. 42A lə cyə m pa' pɑ Yudea lə bɑwə nyaptə nɑ tsap a, ba pa' ghʉ̌m bɔ lə bɑ̀ pɑ́ tsʉ' u a pu nyəŋ Yeso nthʉ́m o.

Currently Selected:

YOHANE 19: NTGomala

Highlight

Copy