YOHANE 18

Nə ghəm Yeso

(Mt 26.47-56; Mk 14.43-50; Lk 22.47-53)

1Yeso lə́ ghɔ̌m po'o, gɔ̌ pu a pɑkhʉ̌ pyə́ nə yəmu' jʉɔ cwɛ mcɑ Kedroŋ; mu' kà lə bɑ tsʉ'u yə e lə ko nə pu a pɑkhʉ̌ pyə́ a. 2A lə́ nə pɑ bɑ Yuda, yə e lə bɑ gɔ hɑ Yeso a zhyə́ tsʉ'u bɔ. Nə pa' Yeso pu a pɑkhʉ pyə lə́ bɑ wap lə cu'tə tsʉ'u mcʉm jɔmyɔ̌m. 3E lə tiŋnyə thə́dzə̀, msəŋwi pu a pɑ pyap pɑ́ jʉ̀m e, bɑ mkamsi gwyəgwyə pu a pɑ Farisai nə́ nthəm wap. Wap lə kǒ kà, bɑ wap wim mcu' khá' pu a mlǎmbù, ba tsə shù. 4Pa' Yeso lə́ bɑ ě zhyə́ ywə yə́ a wə gɔ sɔ' nə́ é a, e lə fʉ'tə nɑ́ e gɔ bəŋ pú, gɔm bi pú gɑ: Pǒ shəŋ wɑ̀? 5Wap pa' bi e gɑ: Yeso yə́ Nazarɛt. E ghɔm bi pú gɑ gɑ̌ bɑ́ é. A lə́ nə pɑ̌ po'o Yuda yə e lə bɑ gɔ hɑ Yeso a pɑ cəcɑ̌ pu. 6Yeso lə́ cwə tə́ gɔm bi pu gɑ́ gɑ̌ bɑ́ e, wap fʉ' jʉ̀mjʉ̀m bvʉtə́ si. 7Yeso lə kwi' həŋtə́ wap m sə gɑ: Pǒ shəŋ wɑ? Wap pa' gɑ: Yeso yə́ Nazarɛt. 8Yeso pa' bi pú gɑ: Gɑ̌ siŋ wɔ gɑ́ gɑ̌ bɑ e. A pɑ gɑ́ po shəŋ pɑ́ myə̀, po tak pɔ pɔ gɑ wap ghɔ.

9A lə pɑ̌ po'o, ghɔm tsyə Yeso lə ghɔm gɑ: Ŋ kha pi sɔmmo nə́ pɔ pyə o lə hɑ̌ wap bəm á, a pəmtə.

10A lə pɑ̌ po'o Simon Pɛtrɔ yə a lə bɑ ě tyəp nyə a té nyə bvɔ nə nɔk gɛ fá' ŋkhamsi gwyə́, ja' təŋ ě yə tʉɔ; tsǒ gɛ fà' bɔ lə́ bɑ Malkos. 11Yeso ghɔm bi Pɛtrɔ gɑ: Nyəŋ piŋ nyə́ o bvɔ! Ŋ tə́ gɔ nwə́ nthu' yə Tá hɑ bəm a pɑ a? 12Msə̌ŋwi pu a tadyə yap ba pɑ pyap pɑ Yudea lə ghəm Yeso cwəlɔ ŋkwɑ e.

Yeso dzə̌ Ana pu Kaifa, Pɛtrɔ kəŋnyə Yeso

(Mt 26.57-58; Mk 14.53-54; Lk 22.54)

13Wap lə́ ləŋdzə dɑ é gɔ dzə̌ Hana. Hana lə́ bɑ́ tá jwi Kaifa yə e lə́ bɑ́ ŋkhamsi gwyə gu' bɔ a. 14Kaifa bɔ nə lə gɔm bi pɑ Yudea gɑ́ dzə gɑ́ ta' mò pfʉ̀ nə thə́ pɔmnəŋ.

15Simon Pɛtrɔ pu mu' mukhʉ̌ lə yap jʉ̌m Yeso. Pa' a lə́ bɑ́ bɑ ŋkhamsi gwyə zhyə́ e a, pu Yeso lə pəmtə ŋkho shwədyə̌ e. 16Pɛtrɔ wuŋ dzʉ́, bə́ŋ jyədyə̌; mukhʉ̌ yə a lə bɑ ŋkhamsi gwyə zhyə́ e a lə tə̌m, jɔ gò yə́ e lə́ bɑwə byap jyədyə̌ a, gɔm é ghə Pɛtrɔ ko dyə. 17Múgò gɛ fà' yə e lə́ bɑwə byap jyədyə̌ a lə ghɔm bi Pɛtrɔ gɑ: Ba wə yǔ tə́ bɑ̀ múkhʉ̌ bɛ yəŋ á? Pɛtrɔ pa' gɑ: A tə a pɑ́. 18Mghɛ fà' pu a pɑ́ pyap tsʉ' lə bɑ wap sumɔ́k bɑ̀ bəŋ o bɑwə jwɔk, nə pá' fɔk lə́ bɑwə ŋkhú. Bà Pɛtrɔ lə bɑ yə́ tsʉ'u bɑwə jwɔk mɔk.

19Ŋkhamsi gwyə lə to' nə́ tə́ŋtə Yeso nwə̀ nə pɑkhʉ̌ pyə ba nə ywə yə e ji'tə wap a. 20Yeso pa' bi e gɑ: Ŋ də gɔmnwə bi guŋ pɔ awɛ pɑ́ sɔsɔ̌, ŋ də ji'tə ywə guŋ mcwə awɛ dyə́ sinagogə ba m Dyə Si, tsʉ' yə guŋ pɑ Yudea awɛ lə shu'tə nə a, la' gɔm sɔmywə m càm. 21Nwə̀ kɑ́ o həŋtə pɑ́ myə̀ nwə̀ nə ywə yə ŋ də ghɔm a? Ywə yə́ ŋ də ghɔm a, həŋtə bi pɔ pyə wap lə́ yu' a. Wap zhyə ywə yə ŋ də ghɔm a kwa' pɑpúŋ. 22Yeso lə cwə̌ tə́ gɔm po'o, mu' səŋwì gɛ pyap yə e lə bɑ tsʉ'u a cwɔ pǔ təŋ é gɔm gɑ: A pa' o gɔmnwə bi ŋkhamsi gwyə a lə́? 23Yeso pa' bi é gɑ: A pɑ́ gɑ́ gɑ̌ ghɔm a pɔk, o la'tə a yə ǎ pɔk nə́ a; nəŋ bɑ́ gɑ́ gɑ̌ ghɔm a puŋ, bɑ o nəŋ shwɔ a gɑ́ kɑ̀? 24A lə́ pɑ̌ po'o pu kwɑ̀ Yeso, Hana cya é bi Kaifa, ŋkhamsi gwyə.

25A lə́ nə pɑ̌ po'o Pɛtrɔ pɑwə jwɔk pɑ́ mɔ̌k. Pú ghɔm bi e gɑ: Ba wə yǔ tə́ bɑ mu' mukhʉ̌ é a lə́? Pɛtrɔ pa' gɑ: Ŋ tə́ bɑ e pɑ́. 26Mu' mo nə mghɛ fa' ŋkhamsi gwyə, fɑ́ mo yə Pɛtrɔ lə́ yá' təŋ e a lə ghɔm bi Pɛtrɔ gɑ: Ŋ khě tə́ yɔ wɔ pò é nthʉm kà lə̀? 27Pɛtrɔ lə̀ pǐŋ ŋkwi' ŋkhəŋnyə é m nə́ kəŋnyə sə́, a wuŋ bɑ pɑ̀ cwə o bɔ, ko' túŋ.

Yeso dzə̌ Pilato

(Mt 27.1-2,11-14; Mk 15.1-5; Lk 23.1-5)

28A lə́ nə́ pɑ̌ po'o bɑ pu lɑ Yeso fɑ wə Kaifa gɔ m wə gɔpna'. A lə́ bɑ mɑfɔkdzʉ̌. Pɔ pyə wap lə lɑ e nə gɔ a lə ko la' wap ko wə gɔpna', bɑ bwɔk pa' wap gɔ viŋ nɑ tsap tə ghɔ tsʉ́ paska a. 29Pilato lə tə̌m dzʉ́ jɔ wap, gɔm bi pú gɑ: Pǒ butə bɛ yəŋ nə kɑ? 30Wap pa' gɑ: Mo yəŋ la' pe' bɑ́ bɑ e ka ghə nwə bɔkpɔ̌k bɑ pɑ́ pyə hɑ é bu a? 31Pilato ghɔm bi pú gɑ: Pɑ́ kwa' wɔ nə lɑ e gɔ fyɛ' e nə mco' mɔ. A tə́ bɑ́ bɑ pu piŋ gɑ̀ bi a pɑ́ pyə ghə mo pfʉ́ pɑ́. 32A lə́ bɑ̀ po' tə́ ghɔm tsyə́ Yeso lə́ ghɔm nə́ nthi vʉ̌ yə e lə bɑ̀ gɔ la' pfʉ́ a pəmtə̀.

33Pilato lə́ pɑ̌nyə́ ŋkhó wə e, ŋkhe Yeso, gɔm bi gɑ: O bɑ fò pɑ Yudea? 34Yeso pa' bi e gɑ: Pɑ́ kwa' wə̀ nə gɔm kɑ shɑ́ pɔ nə gɔm bu nə m̀? 35Pilato pa' bi e gɑ: Gɑ̌ bɑ yə Yudea a? Guŋ o pu a mkamsi gwyə hɑ́ o bəm! A bɑ o ghə la? 36Yeso pa' gɑ: Nəfo tsɑ̌ tə́ bɑ nə yəŋ dzʉ̌ pɑ́. Nəfo tsɑ̌ la' bɑ́ nə yəŋ dzʉ̌ bɑ pɑ pyap a lo'shù gɑ pu kɑ hɑ̌ a bi pɑ Yudea. Da' gɑ́ cwəlɔ Nəfo tsɑ̌ tə̌ nə yəŋ dzʉ̌ pɑ. 37A pɑ́ po'o Pilato ghɔm bi é gɑ: O bɑ fo a? Yeso pa' bi é gɑ: Wə nə gɔm gɑ́ gɑ̌ bɑ̀ fo. Pu lə dzə́ a, sɔ' nthʉm yəŋ dzʉ̌ pɑ ŋkwinthɛ̌ nyənyɔ. Mo yə e bɑ nə nyənyɔ a ju' gi a. 38Pilato ghɔm bi e gɑ: Nyənyɔ bɑ́ kɑ?

E lə ghɔm po'o gɔ dzʉ́ jɔ pɑ Yudea gɔm bi pu gɑ: Sɔ' m nə m̀ ŋ khɑ yɔ́ sɔmywə yə po butə é nə a. 39Da' gɑ́ pa' a bɑ́ mà gɑ a pɑ nə paska a ŋthak ta' mo nəŋ bi po a, pǒ kùŋ gɑ ŋthak fo pɑ Yudea nəŋ bi po a? 40Wap lə to' nə cwe gɑ: Tə́ mo bǎ pɑ, tak pɑ́ Barabas. A lə nə pɑ̌ po'o Barabas pɑ̀ Samshwə.

Currently Selected:

YOHANE 18: NTGomala

Highlight

Copy