YOHANE 15

Yeso bɑ thə́ mlù' nyənyɔ

1Gɑ̌ bɑ thə́ mlù' nyənyɔ, Tá a pɑ mo yə é dé thə́ bɔ a. 2Bǎ ya pú thə́ lə́ yə a la nə m̀, tə́ la' á pɑ jam nthɔm a, e nthé é; tə́ yə pǔ thə yə a jam nthɔm a, é pɑ só tə́ a cəŋtə́ jam. 3Ghɔm tsyə gɑ gɔm a bɑ a e da' só wɔ. 4Po cwə nə m̀ pá' gɑ̌ shwə nə po a! Dəŋdəŋ pa' pǔ thə pɑ tə la nə to thə ba a tə́ gɔ yam nthɔm do e a pɑ̀, a bɑ dəŋdəŋ po'o nə po bi a pɑ gɑ po ka cwə nə m̀. 5Gɑ̌ bɑ thə́ mlù', po pɑ́ bǔ thə́. Mo yə ě cwə nə m̀ biŋ shwə nə e a, mo bɔ gɔ yam nthɔm jɔmyɔ̌m, nə pa' po cyə tə́ pɑ̌ nə m̀ bɑ po tə́ gɔ ku' nə ghə sɔmywə pɑ́. 6Mo pɑ tə́ cwə nə m̀ bɑ pú gɔ ma' e pé pa' bǔ mthə́ a, e yə́m, pú lak ma' mɔk, é khə́. 7Po cwə nə m̀, ghɔm tsɑ̌ piŋ shwə nə po, bɑ po gɔ ló ywə yə po wə shəŋ a, a sɔ' bi po. 8Ywə yə a gu'tə Tá a bɑ gɑ́ po yam nthɔm a yɔ́m, biŋ bɑ pɑkhʉ̌ pɑ̌. 9Dəŋdəŋ pa' Ta nə̀ ŋkhuŋ á, a dəŋdəŋ po' tə́ gɑ̌ ŋkhuŋ wɔ: Po cwə nthʉm kuŋnyə a. 10Po zhyə̀ mco' mə̌, bɑ po gɔ cwə nthʉm kuŋnyə a, dəŋdəŋ pa' gɑ̌ jyə́ mco' Tá a shwə nthʉm kuŋnyə e a.

11Gɑ̌ siŋ wɔ mnwə bɔ awɛ po'o gɑ́ yɑ̀ nə ŋwɛnyə pɑ́ yɔ, a yɔ nə ŋwɛnyə pɑ́ yɑ̀. 12Mco' mə̌ bɑ gɑ: Po pɑ́ ŋkhuŋnyə wɔ wɔ pa' ŋ də ŋkhuŋ wɔ a. 13Bi a pɑ sɔmmo lə́ ghə kuŋnyə tə́ shyə́ mo yə e hɑ vɔk e nə thə́ pɔ pyə é ŋkhuŋ wap a. 14Po ghə̀ ywə yə́ gɑ̌ gɔm bi po a bɑ po bɑ mso pɑ̌. 15Bi a pɑ́ dɑ́ piŋ ŋkhe wɔ gɑ mghɛ fa', nə pa' gɛfa' tə́ jyə́ ywə yə́ tap e gə a pɑ; gɑ̌ ŋkhe wɔ gɑ́ mso pɑ̌ nə pa' guŋ ywə awɛ yə gɑ jú' bəŋ Tá ǎ gɑ̌ ghə po zhyə́ yá. 16Tə wɔ nə lə́ shwɔ' a pɑ́, myə̀ nə lə́ shwɔ' wɔ, biŋ jap wɔ gɑ po ghɔ jam nthɔm, a nthɔm mɔ pɑ pɑ́wə tə bi a po lò pɑ́ kɑ́ lɑ́ bi Tá shyə m nə́ tso tsɑ̌ bɑ e gɔ hɑ bi po. 17Ywə yə gɑ̌ gɔm bi po a bɑ́ gɑ́ po kuŋnyə wɔ wɔ.

Bò dzʉ̌

18A pɑ gɑ̀ dzʉ̌ pɔ wɔ́, po zhyə́ gɑ e lə́ də́ŋdzə bɔ a. 19Po lə́ pe' bɑ́ pɔ̀ dzʉ́, bɑ dzʉ̌ ŋkhuŋ ywə yə a bɑ́ yə́ a; da' gɑ po tə́ bɑ́ pɔ̀ dzʉ́ pɑ́: Myə̀ nə lə́ nthé wɔ nə dzʉ̌, a ywə yə a gə tə́ dzʉ̌ pɔ wɔ a. 20Po kamtə ghɔm tsyə ŋ də ghɔm bi po a gɑ: Gɛfa' tə́ bɑ ě cyə tá fà' pɑ̀; a pɑ́ gɑ́ wap lě shwɔ' mkwə mə̌, bɑ wap gɔ cwɔ' ba mɔ mkwə; a pɑ̀ gɑ́ wap lé ghɔm tsɑ̌ cwəpuŋ, bɑ wap gɔ le ba tsɔ ghɔm cwəpuŋ. 21Wap gɔ ghə guŋ yá awɛ nə po po'o cyə́ m nə́ tso tsɑ̌, nə pa' a bɑ wap ka zhyə mo yə e nthəm a. 22Ŋ də́ pe' bɑ́ tə sɔ', ŋ də pe' bɑ́ tə ghɔmnwə bi pú, bɑ mhɔ tə́ bɑ́ nə pu pɑ́; tə cwəlɔ pɑ́ pu lə́ lɑ mhɔ map shwyɛ' wap pɑ́. 23Mo yə e bɔ ǎ, bɔ ba Tá ǎ. 24Ŋ də́ pe' bɑ́ tə́ fa' mfa' mɔ gɑ́ myə sɔmmo lɑ̌ m fa' á cəcɑ̌ pu, bɑ mhɔ tə́ bɑ́ nə pú pɑ́; da' gɑ cwəlɔ yə wap yɔ a á, wap jɑwə́ bɔ wɔk pɔ, wɔk pyə̀ Tá ǎ; 25po'o gɑ ghɔm tsyə a bɑ pu lé bvə nthʉm mco' a pəmtə́ gɑ:

Wap bɔ a pɑ́ něné.

26Cwə yə Parakle yə gɑ̌ gɔ təm é bi po e fɑ bəŋ Tá a gɔ sɔ' sɔ' a, a Zhwenyə nyənyɔ yə a fɑ nə Tá, e gɔ sɔ' pɑ́ ŋkwinthɛ̌ a. 27A ba wɔ yɔ pɑ́ ŋkwinthɛ̌ a, nə pa' pɑ̀ nə́ bəmtə́ bɑ́ tə fɑ nə to'.

Currently Selected:

YOHANE 15: NTGomala

Highlight

Copy