YOHANE 16

1Gɑ̌ gɔm guŋ mnwə bǎ awɛ po'o gɑ po kɑ̀ vʉ̀ nə mləŋtə̀. 2Pú gɔ sɔ' pɑ́ té wɔ msinagogə. Cwə nəŋ bɑwə sɔ̌' yə mo yə e gɔ zhwə wɔ́ a gɔ pɑ kwɛ m̀ gɑ e pa' a bɑwə nuŋpwɔ' bi Si a. 3Wap gɔ sɔ' pɑ ghətə po'o nə pa' a bɑ wap ka zhyə́ Tá, wap lə́ nəŋ jyə ba myə̀. 4Tə́ gɑ̌ siŋ wɔ po'o gɑ cwə bɔ cwə tə sɔ̌', po kamtə gɑ́ ŋ dě siŋ wɔ.

Mfa' Zhwenyə

Ŋ dě tə siŋ wɔ́ tə fɑ cwə nə́ to', nə pa' pɑ lə bəmtə bɑ́. 5Tə́ cwəlɔ gɑ̌ gɔ m̀ bə̌ŋ mo yə e lə təm a á, la' sɔmmo yɔ nəŋ həŋtə a gɑ́: O gɔ m hɑ? 6Cwəlɔ yə gɑ̌ siŋ wɔ a, nə zhwíŋ lo nthʉm tʉm po. 7Tə́ a bɑ́ po'o bɑ gɑ̌ siŋ wɔ nwə nyənyɔ; dzə̀ bɑ bi po bɑ gɑ ŋ gɔ̌, nə pa' bɑ́ tə ghɔ bɑ Parakle tə́ gɔ sɔ' bi po pɑ́; tə́ da gɔ̌ bɑ gɑ gɔ təm e bi po. 8Sɔ' m nə e, nə yə nə sɔ', e gɔ ghə dzʉ̌ zhyə́ mhɔ, jyə́ nwə dəŋdəŋ ba nə fyɛ': 9Nə mhɔnwə. Wap tə́ biŋ a pɑ; 10nə nwə dəŋdəŋ nə pa' gɑ̌ gɔ̀ m bəŋ Tá, po lə ghɔ piŋ pɑ́ yɔ a. 11Nə nə́ fyɛ' nə pa' a bɑ pu tsə fyɛ' mu fo yəŋ dzʉ̌. 12Shɑ mnwə yɑ̌ si myə gɑ̌ gɔ siŋ wɔ a, da' gɑ cwəlɔ po ka wuŋ ŋkhu' nə yu'; 13cwə yə́ Zhwenyə nwə nyənyɔ gɔ sɔ' sɔ' bi po a, e ghə po zhyə guŋ nwə nyənyɔ awɛ, nə pa' e tə́ gɔ sɔ' pɑ́ ghɔmnwə pɑ́ nə yə́ thə́ pɑ. E gɔ sɔ' pɑ́ ghɔmnwə yə e yu' a, pɑ siŋ wɔ guŋ ywə awɛ yə a gɔ sɔ' a. 14E gɔ sɔ' ghu'tə a nə pa' e gɔ sɔ' pɑ́ kwi ywə yə á bɑ bəm a tə́ siŋ wɔ. 15Guŋ tsə́ tsyə Tá a bɑ é ghə a bɑ pɑ bəm; á shyə m po'o tə́ bɑ gɔm gɑ́ e gɔ sɔ' ghə po zhyə ywə yə é ŋkwi bəm a.

Nə zhwiŋ gɔ sɔ' cʉ' ŋwɛ́nyə

16A cʉ' muywə́ po lə piŋ jɔ a, biŋ shʉ' muywə po piŋ jɔ a.

17Shɑ pɑkhʉ̌ pyə lə bɑ gɔm cəcɑ̌ pú gɑ: E shəŋ nə ghɔm bí pɑ̀ gɑ́ kɑ tə́ gɔm gɑ: A cʉ' muywə po lə piŋ jɔ a, biŋ shʉ' múywə po yɔ a? Kɑ nə ghɔm gɑ́: Gɑ gɔ m bi Tá á? 18Wap lə bɑwə gɔm gɑ: Muywə bɔ da'tə gɑ kɑ̀? Pyə tə̌ wə ju' ywə yə é bɑwə shəŋ nə ghɔm a pɑ́.

19Yeso lə́ zhyə́ gɑ́ wap wə́ shəŋ nə həŋtə e nwə, gɔm bi pu gɑ: Po wə shəŋ cəcɑ̌ po nə zhyə ywə yə́ ghɔm tsɑ̌ gɑ́: A cʉ' muywə po lə piŋ jɔ a, biŋ shʉ' muywə po piŋ jɔ a da'tə a. 20Kwa' nyənyɔ nyənyɔ gɑ̌ siŋ wɔ gɑ́ po gɔ pɑ zhwíŋ piŋ pɑ lɔ̀, a dzʉ̌ pɑ ŋwɛnyə; po gɔ sɔ' pɑ zhwiŋ, da' gɑ zhwìŋ yɔ gɔ sɔ' pʉɔ cʉ' ŋwɛnyə̀. 21Cwə yə mjwǐ bɑ dzə́ a, jwiŋ nə pa' yə cwə bɑ ǎ ku'; da' gɑ́ e shwə tə́ dzə́ mú, e lə piŋ ŋkhamtə́ ghəghʉɔ e, e ŋwɛnyə ŋwɛnyə nə pa' e tsə mo a. 22A bɑ po'o tə́ pǒ cwəlɔ̀ bɑwə jwiŋ; da' gɑ gɑ̌ gɔ sɔ' piŋ yɔ wɔ m sə, tʉm tsɔ ŋwɛnyə, ŋwɛnyə yə bi a pɑ́ sɔmmo lə kwi bi po a. 23A po'o tə́ a gɔ sɔ' pɑ́ nə tyɛ'dzʉ́ bɔ, po lə piŋ həŋtə a sɔmywə. Kwa' nyənyɔ nyənyɔ gɑ̌ siŋ wɔ gɑ̀ po ló bǎ kɑ̀ lə bi Tá a m nə tso tsɑ̌ bɑ e gɔ hɑ bi po. 24Tə́ ŋkhəm cwəlɔ po ka lo sɔmywə bi Ta a m nə tso tsɑ̌: Po ló, pu gɔ hɑ bi po tə́ ŋwɛnyə yɔ pɑ tə dzə.

Nə lo' shyə dzʉ́

25Gɑ̌ lɑ pɑ̀ mghɔm tə tútə nə siŋ wɔ guŋ mnwə bɔ awɛ, da' gɑ́ cwə wə sɔ̌' yə ŋ tə́ gɔ piŋ ghɔmnwə bi po m nə nthi bɔ a pɑ́, yə gɑ̌ gɔ siŋ wɔ nwə nə́ Tá sɔsɔ̌ a. 26A gɔ sɔ' pɑ nə tyɛ'dzʉ́ bɔ po ló ywə bi Tá nə tsó tsɑ̌, da' gɑ ŋ tə́ gɔm bi po gɑ́ gɑ̌ gɔ sɔ' cwyɛ'nyə Tá nə po pɑ́, 27nə pa' kwa' yʉ Tá ŋkhuŋ wɔ, shyə́ m nə pa' a bɑ pǒ kuŋ a, biŋ bíŋ gɑ́ gɑ̌ nthəm m̀ nə́ Si. 28Gɑ̌ nthəm m nə́ Tá sɔ' nthʉm dzʉ́, biŋ bɑwə cwəlɔ nthəm nthʉm dzʉ́ gɔ m bi Tá. 29Pɑkhʉ̌ pyə́ ghɔm bi e gɑ: Cwəlɔ ǒ wə gɔmnwə sɔsɔ̌, o lə piŋ bɑwə gɔm ghɔm tə tútə́ pɑ; 30Cwəlɔ pyə̌ zhyə́ gɑ́ o bɑ o zhyə́ guŋ ywə awɛ, pyə̌ zhyə gɑ́ o tə́ yɑ̌ wə byap ga pu həŋtə́ o sɔmywə pɑ́. A ywə́ yə a gə tə́ pyə piŋ gɑ́ o nthəm m nə Si a. 31Yeso pa' bi pú gɑ: Pǒ piŋ cwəlɔ a? 32Po yɔ́, cwə̌ wə́ sɔ̌', cwə bɔ tsə pɑ̀ yə̌ŋ, yə́ po gɔ sɛtə, bǎ yà mo lə́ ghɔ nə yə məjyə, po tak á do m̀ a. Da' gɑ ŋ tə́ bɑ́ dǒ m̀ pɑ. Pyə́ Tá nə bɑ. 33Gɑ̌ siŋ wɔ nwə bɔ po'o gɑ́ po cyə m nə m̀ gə hwitə̀. Nthʉm yəŋ dzʉ̌ po bɑwə jɔ ghəghʉɔ. Tə́ po kaktʉɔ, gɑ̌ bɑ gɑ̌ ló' shyə́ dzʉ́.

Currently Selected:

YOHANE 16: NTGomala

Highlight

Copy