YOHANE 14

Yeso bɑ məjyə nə gɔ́ bəŋ Tá

1A lam tsɔ kɑ sɔ; po piŋ Si, po piŋ ba myə̀ yɑ̌. 2Mtsʉ' bɑ dyə Tá a tə́ jɔ́m; ka po'o a bɑ gɑ̌ ghɔm bi po gɑ́ gɑ̌ gɔ ghɔ nyaptə tsʉ' bi po yə po gɔ sɔ' pɑ́ nə á lə? 3Cwə yə gɑ̌ gɔ ghɔ tə nyaptə tsʉ' bi po a, a biŋ sɔ' dɑ wɔ pɑ ghɔ̌, po'o gɑ́ tsʉ' yə gɑ̌ nə a, ba wɔ yɔ sɔ' bɑ́ tsʉ'u. 4Sɔ' m nə tsʉ' yə gɑ̌ gɔ m nə́ a, a bɑ po zhyə məjyə.

5Tomasi ghɔm bi e gɑ: Cyəpɔ, pyə bɑ pyə ka zhyə́ bǎ tsʉ yə o gɔ m nə a, tə̀ pyə gɔ zhyə́ məjyə m gɑ́ kɑ?

6Yeso ghɔm bi e gɑ: Gɑ̌ bɑ məjyə, bíŋ bɑ́ nyənyɔ, bíŋ bɑ vɔk. Sɔmmo tə́ gɔ bi Tá tə cyə pɑ m nə m̀ pɑ. 7Po la' pé'e jyə́ a, bɑ po zhyə ba Tá a. Tə fɑ cwəlɔ pǒ bɑ pǒ zhyə e, biŋ bɑ́ bɑ pǒ yɔ e.

8Filipo ghɔm bi e gɑ: Cyəpɔ, la'tə wɔk Tá, a ku' bi pyə.

9Yeso ghɔm bi e gɑ: Myə, gɑ̌ bɑ́ cəcɑ̌ po tə fɑ tə tyɛ̌', ba tə po'o wə Filipo o lə piŋ jyə a lə? Mo yɔ a, bɑ ě yɔ Tá: Nwə kɑ o ghɔm gɑ: La'tə wɔk Tá a? 10O tə́ biŋ gɑ́ gɑ̌ bɑ nə́ Tá, Ta piŋ bɑ nə m̀ a? Mghɔm myə gɑ̌ gɔm bi po a, ŋ tə gɔm nə́ yɑ thə́ pɑ́. Tá yə e bɑ nə m̀ a nə fá' mfà' myə́. 11Po piŋ gɑ́ gɑ̌ bɑ nə Tá, Tá pɑ nə m̀; bi a pɑ pɑ́ gɑ́ po tə gɔ piŋ ghɔm tsɑ̌ pɑ́, po piŋ shyə m nə mfa' myə́ mɔ gɑ. 12Kwa' nyənyɔ nyənyɔ, gɑ̌ siŋ wɔ gɑ́ mo yə ě piŋ a bɑ ba yʉ́ gɔ fa' mfá' myə gɑ̌ fa' a. E gɔ fa' a cyə ba m po'o, nə pa' gɑ̌ gɔ m bi Tá. 13Gúŋ ywə awɛ yə po gɔ lɑ tsó tsɑ̌ lo a, bɑ gɑ̌ gɔ ghə, po'o gɑ a cyə m nə Mú pu ghu'tə Tà. 14Po lo ywə bəm m nə tso tsɑ̌ bɑ gɑ̌ gɔ ghə po'o.

Yeso ka'nyə Zhwenyə

15Po kuŋ a bɑ po gɔ kaktʉɔ nə ghiŋ nə́ mco' mə̌; 16a shwyɛ'nyə Tá, e hɑ mu' Parakle yə pu a pu gɔ pɑ́ guŋ mcwə awɛ a bi po. 17Yú nə bɑ Zhwenyə nyənyɔ, mo yə dzʉ̌ bɑ e ka ku' nə kwi e a, nə pa' dzʉ̌ tə́ jɔ e pɑ́, e lə nəŋ jyə́ e. Po bɑ pǒ zhyə e nə pa' e shwə bəŋ po, biŋ bɑ nə po. 18Ŋ tə gɔ tak wɔ pa' pǒmcyə a pɑ́, gɑ̌ wə sɔ' m bi po. 19Ǎ cʉ' muywə dzʉ̌ lə piŋ jɔ a; tə́ po gɔ pɑ yɔ a, bɑ pɑ wə́, ba wɔ yɔ pɑ́ pɑ wə́. 20A gɔ sɔ' pɑ́ tyɛ'dzʉ́ bɔ, po zhyə gɑ́ gɑ̌ bɑ nə Tá a, po pɑ nə m̀, bɑ nə po. 21Mo yə ě tɔm mco' mə̌, biŋ bɑ giŋ nə a, mo bɔ ŋkhuŋ a: Mo yə ě nəŋ ŋkhuŋ a, bɑ Tá a gɔ kuŋ e, ba myə̀ yɑ̌ piŋ ŋkhuŋ e, Ta piŋ gə e zhyə a.

22Yuda yə e tə bɑ yə Iskariɔt a pɑ́ ghɔm bi e gɑ: Cyəpɔ kɑ gə o ghɔ ghə pyə zhyə o, tə́ o lə ghə dzʉ̌ zhyə o?

23Yeso pa' bi e gɑ: Mo kùŋ á, bɑ e gɔ zhyə̀ ghɔm tsɑ̌, a Tá a kuŋ é; A pyə sɔ̌' bi e, gə tsʉ' shwə yɔk ywə e. 24Mo yə e tə́ ŋkhuŋ a a pɑ́ tə jyə̀ ghɔm tsɑ̌ pɑ́. A nəŋ nə́ pɑ̌ po'o, ghɔm bɔ tsyə po jú' a lə pɑ́ ghɔm tsɑ̌, a bɑ́ tsyə Tá a yə e nthəm a. 25Dě siŋ wɔ mnwə bǎ nə cwə yə ŋ də bɑ́ bəŋ po a. 26Tə́ Parakle, Zhwenyə Dɔlɔ̌ yə Tá gɔ təm bi po cyə m nə́ tso tsɑ̌ a gɔ sɔ' zhi'tə wɔ guŋ mnwə awɛ, piŋ ghə po kamtə myə də ghɔm a awɛ. 27Gɑ wə nthak hwitə bi po; gɑ̌ hɑ hwitə a bi po. Ŋ tə hɑ m nthi pa' dzʉ̌ hɑ a pɑ́. Lam tsɔ kɑ kwi' sɔ, po kɑ kwi' bwɔk. 28Po yu' nwə bɔ, gɑ ghɔm bi po gɑ: Gɑ̌ gɔ ghɔ, piŋ sɔ' bi po. Po la' pe' e bɑ ŋkhuŋ a bɑ po gɔ ŋwɛnyə pa' gɑ gɔ m bi Tá a, nə pa' Tá bɑ é cyə a. 29Gɑ̌ gɔm bi po cwəlɔ tə́ nwə bɔ cwə́ sɔ̌', po'o gɑ a cwə́ tə sɔ́' po piŋ. 30Tə́ fɑ cwəlɔ, pɑ̀ tə gɔ kwi' pəmtə cɔm nwə pɑ, nə pá' fo yəŋ dzʉ̌ wə sɔ̌'. A nyənyɔ gɑ e ka ghə sɔm gʉ' nə m̀; 31Tə́ e bɑwə sɔ' po'o tə́ dzʉ̌ zhyə gɑ gɑ̌ ŋkhuŋ Tá a, biŋ bɑ gə bǎ kɑ lə pɑ pa' Tá jap a. Po lusi, pɑ fɑ tsɔ̌' gɔ̌!

Currently Selected:

YOHANE 14: NTGomala

Highlight

Copy