YOHANE 13

Yeso sɔk mkwə pɑkhʉ̌ pyə

1Ŋwɛnyə Paska lə nə ku' Yeso zhyə gɑ yə cwə wə bɑ ǎ ku', cwə yə e gɔ təm nə yəŋ dzʉ̌ ghɔ bəŋ Ta a, yʉ́ yə e lə́ bɑ e kuŋ pɔ pyə́ pyə wap bɑ nthʉm dzʉ a, e piŋ ŋkhuŋ wap tə́ miŋ. 2Pu a pu lə́ nə pɑ tsʉ̌ ywə, bɑ Sata tsə́ nyəŋ mkwɛnyə nə hɑ Yeso bi mghɛ bó pyə nthʉm tʉm Yuda Iskariɔt mu Simon. 3Yeso zhyə́ gɑ Tá nyəŋ guŋ ywə awɛ tuŋ pú e; jyə́ gɑ e nthəm nə Si, biŋ bɑ gɔ m bi yʉ Si, 4dusi dəm tɑpe, nthɔk dzə e jap si, shəŋ mu' kamdzə vʉ' e. 5Biŋ nyəŋ shyə nthʉm kɛ́, ntho' nə́ nə sɔk mkwə pɑkhʉ̌ pyə́, biŋ bɑ dɑ kamdzə yə a vʉ' e a nə shi'.

6E lə́ kəm nə Simon Pɛtrɔ, e ghɔm bi e gɑ: Wə Cyəpɔ sɔk mkwə mə̌ lə?

7Yeso pa' bi e gɑ: Ywə yə gɑ̌ wə gə a, bi a pɑ o lə zhyə́ cwəlɔ, da' gɑ́ o gɔ sɔ' yu' m jʉ̀m.

8Pɛtrɔ ghɔm gɑ: Tə o sɔk mkwə mə lə́! Gɛ̌, gɛ̌!

Yeso ghɔm bi e gɑ: Bɑ tə sɔk o bɑ pu tə́ yɑ̌ nə sɔmywə pɑ́.

9Simon Pɛtrɔ ghɔm bi e gɑ: A pɑ́ pa' m Cyəpɔ, o kə́ sɔk da' mkwə mə̌, o sɔk ba bú mə̌ ba thə́ a.

10Yeso ghɔm bi e gɑ: Mo yə a bɑ e sɔk nɑ e a tə́ biŋ shəŋ gɑ́ pu sɔk e pɑ́, nə pa' a bɑ ě lɔ: Sɔ' m nə wɔ, a bɑ pǒ lɔ da' gɑ tə guŋ yɔ awɛ pɑ́. 11Yeso lə́ bɑwə jyə́ mo yə́ e lə́ bɑwə gɔ hɑ e a; a cyə m po'o tə́ e ghɔm gɑ: Tə́ guŋ yɔ awɛ pɑ.

12Yeso lə́ miŋ nə sɔk mkwə máp, ŋkwa dzə e, biŋ shwə dəm tɑpe, gɔm bi pu gɑ: Pǒ yu' ywə yə gɑ̌ gə nə po a lə́? 13Pǒ ŋkhe a gɑ Tá, ba m gɑ́ Cyəpɔ, bɑ̀ po ka hɔ, nə pa' gɑ̌ bɑ e. 14Bi a pɑ gɑ myə̀ Cyəpɔ, bíŋ bɑ́ Tá, gɑ̌ sɔk mkwə mɔ, bɑ pǒ gɔ pɑ́ sɔk mkwə mɔ cəcɑ̌ po, 15nə pa' a fo' yə gɑ hɑ́ bi po a: Ywə yə gɑ gə bi po a, po ghə po'o bi pyəshɑ pɔ. 16Kwa' nyənyɔ nyənyɔ, gɑ̌ siŋ wɔ gɑ gɛfa' tə́ bɑ ě cyə tá fa' e pɑ́, kɑ mo yə pu nthəm e nə cyə mo yə é nthəm e a lə. 17Po zhyə po'o, bɑ pǒ bɑ mpuŋtsé, bi a pǒ ghiŋ po'o a. 18Ŋ tə gɔm nə guŋ yɔ awɛ pɑ́; gɑ̌ bɑ gɑ̌ zhyə́ pɔ pyə́ gɑ shwɔ' wap a. Da' gɑ́ ywə yə pu lə və a, a pəmtə́ gɑ:

Mo yə pyə é lə́ pəmtə́ dzʉ̌ ywə a lě fɛ jʉm a.

19Gɑ̌ siŋ wɔ cwəlɔ po'o tə́ nwə tə́m, po'o gɑ a cwə tə́ nthəm po piŋ gɑ́ Gɑ̌ bɑ. 20Kwa' nyənyɔ nyənyɔ gɑ̌ ghɔm bi po gɑ nə lɑ mo yə gɑ̌ gɔ sɔ' təm é a bɑ nə lɑ kwa' myə̀. Nə nəŋ dɑ́ a pɑ nə lɑ Mo yə e nthəm a lə́.

Pa' Yuda gɔ tɛ́ mnɛ nə Yeso

(Mt 26.20-25; Mk 14.17-21; Lk 22.21-23)

21Yeso lə́ ghɔm po'o, lam tsyə sɔ, e piŋ gɔm sɔsɔ̌ gɑ: Kwa' nyənyɔ nyənyɔ mu' mo nə po gɔ hɑ a. 22Pɑkhʉ̌ pyə cʉnyə́, bɑ́ həŋtə́ cəcɑ̌ pú mo yə e gɔm é a. 23Mu' mukhʉ̌ yə Yeso lə́ ŋkhuŋ e a lə bɑ bəŋ e. 24Simon Pɛtrɔ nwɔ'tsə bi gɑ: Tsɑtə e gɑ e gɔm wɑ́lə? 25Mukhʉ̌ bɔ lə pɔ̌ nɑ e nə́ kəkɔp Yeso, gɔm bi e gɑ: Cyəpɔ, a bɑ wɑ́?

26Yeso pa' gɑ: A mo yə́ gɑ gɔ co' bo'ywə hɑ bi a. E lə ghɔm po'o sho' bo' ywə hɑ bi Yuda Iskariɔt, mu Simon. 27Tə́ fɑ cwə yə Yeso lə hɑ̌ bo'ywə bɔ bi Yuda á, Sata ko nə e. Yeso ghɔm bi e gɑ: Ywə yə o gɔ ghə a, lo'nyə gə̌. 28Sɔmmo nə pɔ pyə wap lə bɑ tsʉ'u a la tə yu' ywə yə a gə tə́ Yeso ghɔm po'o a pɑ́. 29Pa' Yuda lə́ gwim peté a, shɑ pɔ lə́ kwɛ m gɑ Yeso gɔm bi e gɑ́ e yó ywə yə a gɔ kwitə nə ŋwɛnyə, kɑ m gɑ e hɑ ywə bi mpə̌ŋ lə. 30Da' gɑ sɔ' m nə Yuda, e lə cwə tə ŋkwi bó' ywə bɔ, guŋ nthəm: A lə́ bɑ mtsʉ'.

Mco' sə́

31Yuda lə́ cwə tə́ nthəm, Yeso ghɔm gɑ: Pu e da' gu'tə Mu mo a piŋ bɑ́ bɑ pu lě shyə m nə e gu'tə Si. 32Si gɔ ghu'tə e cyə pɑ m nə yʉ Si. Ǎ cʉ' muywə Si ghu'tə e. 33Pǒ mkəcɔk po pɑ̌, jɑ̌ cəcɑ̌ po pɑ́ nə muywə cwədzʉ̌. Pó gɔ sɔ' cəŋ a; dəŋdəŋ pa' ŋ də ghɔm bi pɑ Yudea gɑ: Tsʉ' yə gɑ gɔ m nə a, bi a pɑ́ po lə sɔ' tsʉ'u a, ba m bi po yɔ gɑ̌ wə gɔm po'o cwəlɔ.

34Gǎ wə hɑ ta' mco' sə bi po: Po kuŋnyə wɔ wɔ. Dəŋdəŋ pa' dɑ kuŋ wɔ a, po pɑ ŋkhuŋnyə wɔ wɔ. 35A pɑ gɑ̀ po ghə ŋkhuŋnyə cəcɑ̌ po, bɑ guŋ yap awɛ gɔ zhyə́ gɑ́ po bɑ pɑkhʉ̌ pɑ̌.

Yeso ghɔ̀m gɑ Pɛtrɔ gɔ kəŋnyə e

(Mt 26.31-35; Mk 14.27-31; Lk 22.31-34)

36Simon Pɛtrɔ ghɔm gɑ: Cyəpɔ o gɔ m hɑ́? Yeso pa' bi e gɑ tsʉ' yə gɑ̌ gɔ m nə a, bi a pɑ́ o lə yap jʉ̀m m̀ cwəlɔ, da' gɑ o gɔ lá' yap jʉ̀m m̀. 37Pɛtrɔ ghɔm gɑ: Cyəpɔ, nwə kɑ́ tə́ bi a pɑ ŋ də yap jʉm o cwəlɔ? Gɑ̌ gɔ sɔ' wa' vɔk a nə o. 38Yeso pa' bi e gɑ: Wa' vɔk o nə m̀! Kwa' nyənyɔ nyənyɔ gɑ̌ siŋ o gɑ: O gɔ kəŋnyə a mcʉm ntha tə́ ko' túŋ.

Currently Selected:

YOHANE 13: NTGomala

Highlight

Copy