YOHANE 10

Ghɔ̀m tə tútə byap dzə́

1Kwa' nyənyɔ nyənyɔ gɑ̌ siŋ wɔ gɑ mo yə e nthak jyə̀ ka dzə́ nəŋ ja' m nə mu' ghəŋ pé tə́ ŋkho ka dzə a, mo bɔ bɑ́ shuŋ biŋ bɑ́ samshwə. 2Tə́ mo yə e shyə m jyədyə̌ tə́ ŋkho ka a, mo bɔ bɑ́ byap dzə. 3Mo yə é dé jyədyə̌ a, gyɛ' jyədyə̌ bi e. Mjʉ̀jʉ̀ jyə́ gi e; mjʉ̀jʉ̀ pyə wap bɑ tsyə a, e ŋkhe bǎ ya lə pɑ mtsǒ, biŋ dɑ wap nthəm pé. 4E shwə tə́ nthe wap awɛ, bɑ dzə̀, wap yap jʉm e, nə pa' a bɑ wap zhyə gi é. 5Bi a pɑ́ wap lə yap jʉm gʉɔ pɑ̀; wap gɔ khʉ é khʉ, nə pa' wap tə jyə gi mghʉɔ pɑ.

6Yeso lə́ ghɔ̌m tsɔ ghɔ̀m tə tútə̀ bi pú, da' gɑ́ la' wap yu' kwa' ywə yə e lə́ bɑwə gɔm a.

7Yeso piŋ ŋkwi' gɔm gɑ: Kwa' nyənyɔ nyənyɔ gɑ̌ siŋ wɔ gɑ́ gɑ̌ bɑ́ jyədyə̌ mjʉ̀jʉ̀. 8Guŋ pɔ awɛ pyə wap lə sɔ' m dzə̌ m̀ a bɑ mcúŋ, biŋ bɑ msamshwə, da' gɑ́ mjʉ̀jʉ̀ lě tə́ yu' gi yap pɑ̀. 9Gɑ̌ bɑ́ jyədyə̌, mo yə e cyə m nə m̀ a, bɑ e gɔ sɔ' vɔk, e gɔ pɑ̀ kə́ká, yɔ ywətsʉ. 10Shwǔŋ sɔ' yə pɑ̀ nə zhʉ̀, nə zhwə, kɑ nə ghə a pi lə; tə́ gɑ̌ sɔ' po'o gɑ́ pɔmnəŋ ghə vɔ̀k, biŋ shəŋtə gə a yɔm.

11Gɑ̌ bɑ́ byap dzə́ pɑpúŋ: Byap dzə́ pɑpùŋ hɑ vɔk e nə thə́ jʉ̀jʉ̀ tsyə́. 12Mo yə e fa' yə pɑ́ ŋkhap e, la' e pɑ kwa' byap dzə, la' mjʉ̀jʉ̀ pɑ́ tsyə a, shwə tə́ jɔ bvʉ́ gǒ, gwa' mjʉ̀jʉ̀, ŋkhʉ; bvʉ́ gǒ lɑ́ tsʉ' sɛtə mjʉ̀jʉ̀. 13A bɑ gɑ́ e fa' yə pɑ ŋkhǎp, bɑ mjʉ̀jʉ̀ ka ghə də̀ŋ bi e. 14Gɑ̌ bɑ byap dzə pɑpuŋ. Gɑ̌ bɑ gɑ̌ zhyə́ jʉ̀jʉ̀ tsɑ̌, jʉ̀jʉ̀ tsɑ̌ piŋ jyə́ a, 15dəŋdəŋ pa' Tá a bɑ ě zhyə́ a, biŋ jyə́ Tá a á, biŋ bɑ́ hɑ vɔ̀k á nə mjʉ̀jʉ̀. 16Gɑ̌ bɑ gɑ̌ ghə shɑ́ mjʉ̀jʉ̀ pyə wap tə́ wuŋ bɑ nthʉm ka dzə yəŋ a pɑ̀, ba pyə bɔ yap, bɑ́ gɔ cya wap yap; wap gɔ sɔ' yu' gi a, á ka dzə piŋ bɑ pɑ yɑmu', ba byap dzə piŋ bɑ pɑ yɑmu'. 17Tá ŋkhuŋ a nə pa' gɑ̌ hɑ vɔk a tə́ biŋ ŋkwi. 18Tə́ sɔmmo nə́ ŋkwi bəm pɑ̀, pɑ́ myə̀ nə hɑ. Gɑ̌ bɑ gɑ̌ ghə tʉ̀ɔ nə nthak, biŋ gə tʉɔ nə biŋ ŋkwi: A pɑ́ mco' myə gɑ ŋkwi bi Tá a lə.

19Mghɔm mɔ gɑ lə piŋ ŋkwi' gaptə pɑ Yudea. 20Bo'gwyə pɔ pɑ̀ gɔm gɑ: Zhwenyə cwəpuŋ bɑ̀ nə e, zhyənwə e tə yɑ̌wə pɑ́, nwə kɑ́ po pɑ̀wə jú' ywə yə e gɔm a. 21Da' gɑ̀ shɑ́ pɔ pɑ́ gɔm yap m gɑ: Ghɔm tsɔ tə́ ghɔm mo yə zhwenyə cwəpuŋ nə e a pɑ̀; zhwenyə cwəpuŋ tə́ gyɛ' mnyə mo pɑ̀.

Pɑ Yudea kwi' ŋkhəŋnyə́ Yeso

22Pú lə pɑ̌ ŋkhap ŋʉm, bɑ Yerusalɛm bɑwə ŋwɛnyə nə ŋkhamtə́ pa' pu lə cwɔ' Dyə Si a. 23Yeso lə bɑ Dyə Si, bɑwə giŋtə nthʉm pəŋ Salomoŋ. 24Pɑ Yudea lə́ tsam e nyəŋ tùŋ gɔm bi e gɑ: O gɔ kyə wɔk thə́ po'o tə kəm sǒ? O pɑ Kristo, o siŋ wɔk sɔsɔ̌! 25Yeso pa' bi pu gɑ: Gɑ̌ siŋ wɔ, la' po piŋ. Mfa' myə gɑ̌ gə nə tsǒ Tá a a bɑwə ŋkwinthɛ̌ a; 26da' gɑ́ po ka piŋ a, nə pa' po tə bɑ nə́ mjʉ̀jʉ̀ tsɑ̌ pɑ́. 27Mjʉ̀jʉ̀ tsɑ̌ ju' gi a, biŋ bɑ jyə wap. Wap pɑ̀ jap jʉ̌m m̀. 28Biŋ bɑ hɑ vɔk mama bi pú; wap tə́ gɔ la' pfʉ pɑ́, a sɔmmo lə nəŋ ŋkwi wap nə bu mə̌. 29Tá a yə e hɑ wap bəm a bɑ e ghu' shyə guŋ ywə awɛ, a piŋ bɑ bi a pɑ́ sɔmmo lə kwi ywə pu e. 30Pyə Tá a bɑ pɑ́ yɑmu'.

31Pɑ Yudea lə pǐŋ ŋkwi' bé mwɔ' nə tamtə́ é. 32Da' gɑ́ Yeso piŋ gɔm gɑ: Gɑ̌ ghə po yɔ vəŋ mfa' pɑpuŋ myə a fɑ bi Tá a. Pǒ gɔ lɑ mwɔ' tamtə́ a nə ma nə mfa' bɔ? 33Pɑ Yudea pa' bi e gɑ: Pyə tə́ dɑ mwɔ' nthamtə́ o nə fa' pɑpuŋ pɑ́. Pyə dɑ mwɔ' nthamtə́ o nə́ nə yəmtə Si; nə pá' wə yə o bɑ pɑ̀ monəŋ a, o bɑwə dɑ nɑ o gə́ Si. 34Yeso pa' bi pu gɑ: A tə́ bɑ pú lě bvə nə mco' mɔ gɑ: Gɑ̌ ghɔm gɑ: Po bɑ msi a? 35Mco' ŋkhe pɔ pyə Si lə́ shyə m nə́ pu gɔmnwə a gɑ msǐ. A nəŋ bɑ po'o bi a pɑ sɔmmo lə kwyəpnyə ywə yə pu lě bvə a. 36Po gɔm bi mo yə Si jwɔ' é biŋ nthəm é nthʉm dzʉ́ a gɑ: O yəmtə Si, nə pa' gɑ̌ piŋ gɑ́ gɑ̌ bɑ Mú Si a. 37A pɑ gɑ́ ŋ tə̌ wə fa' mfà' Tá a pɑ́, po pɑ ŋkhəŋnyə a kəŋnyə́. 38Da' gɑ́ a pɑ gɑ́ gɑ̌ wə fa' mfà' bɔ, bɑ̀ po pɑ́ tə piŋ a piŋ, po piŋ mfa' bɔ; a cyə m po'o tə po zhyə́, biŋ shəŋtə jyə́ gɑ́ Tá bɑ bəm dəŋdəŋ pa' gɑ̌ bɑ bi Tá a.

39A lə pɑ̌ po'o, wap kwi' shəŋ nə ghəm é, da' gɑ e təm nə bu map. 40Bɑnyə nə yə mu' jʉɔ Yurdɛŋ, tsʉ' yə Yohane lə to' nə nu' pɔ shyə nə a, bɑ shwə tsʉ'u. 41Pɔ tə jɔm pɑ sɔ' bi e, biŋ bɑ gɔm gɑ: A nyənyɔ gɑ Yohane la tə́ té sɔm mtiŋ msya, da' gɑ́ guŋ ywə awɛ yə e lə ghɔm nə bɛ yəŋ á lə́ bɑ nyənyɔ. 42Wap lə piŋ bɑ vəŋ é nə piŋ é.

Currently Selected:

YOHANE 10: NTGomala

Highlight

Copy