YOHANE 9

Yeso yɛ̀ mu' fʉ̀

1Yeso lə́ nə́ cyə jɔ́ mu' mbɛ, e pɑ́ fʉ̀ tə́ fɑ́ nə tyɛ' nə tsə é. 2Pɑkhʉ̌ pyə həŋtə é gɑ: Rabi wɑ lə́ hɔnwə tə́ bɛ yəŋ pɑ́ fʉ̀? A lə́ bɑ pɑ yʉ kɑ pɑ tsə́ é? 3Yeso pa' bi pú gɑ: Kɑ yʉ kɑ pɑ tsə́ e lə, sɔmmo ka hɔnwə. A bɑ́ po'o m gɑ pu yɔ mfà' Si nə e! 4Pɑ fa' mfà' mo yə e nthəm á cwə yə dzʉ̌ yɑ̌ wə a; nə pa' mtsʉ̌' wə sɔ̌', cwə yə sɔmmo tə́ fa' a pɑ́. 5Ŋ shwə nthʉm dzʉ́ pɑ dəŋ gɑ kɑlə, bɑ gɑ̌ bɑ ŋkha' nthʉm dzʉ́.

6Yeso lə cwə tə́ gɔm po'o, nthətə́ mti si nə gə mtwətwɔp jáp nə mnyə́ fʉ̀, 7biŋ gɔm bi e gɑ: Ghɔ sɔk nɑ o nthʉm tam shyə Siloe, a la'tə gɑ́ gɛ̀ nthə̌m. Fʉ̀ lə́ ghɔ̌ tsʉ'u, sɔk nɑ e, biŋ nə pɑnyə, bɑwə jɔ tsʉ'.

8Pɑ giŋnyə tsʉ'u ba pɔ pyə wap lə́ bɑ jɔ é guŋ mcwə awɛ a, nə pa' e lə́ bɑ dǒ ywə a, pɑ́ gɔm gɑ: Yəŋ tə́ mo yə e kɑ́ bɑ ě cwə si tsɔ'ɔ bɑ do ywə a pɑ̀ lə́? 9Shɑ́ pɔ pɑ́ gɔm gɑ: A bɑ e. Pyə shɑ́ pɔ pɑ́ gɔm yap gɑ: Gɛ̌, a mu' mo hwə́ é hwə́. Tə́ fʉ̀ bɔ ghɔm gɑ: A bɑ́ kwa' myə̀. 10Wap ghɔm bi e gɑ: Tə́ mnyə mǔ gyɛ' m gɑ́ kɑ̀? 11E ghɔm bi pu gɑ: Bɛ yə pu ŋkhe e gɑ Yeso a ghə mtwətwɔp, nə shi'nyə mnyə mə̌, biŋ gɔm bəm gɑ: Ghɔ Siloe sɔk nɑ o. A pɑ́ po'o ŋ gɔ tsʉ'u, sɔk nɑ a, nəŋ jɔtsʉ'. 12Wap ghɔm bi e gɑ: Mo bɔ hɑ? E pa' bi pu gɑ: Ŋ khɑ zhyə sɔmywə nə́.

13Pu lə́ lɑ̌ fʉ̀ bɔ nə gɔ ywə́ pɑ Farisai. 14A lə́ nə pɑ̌ po'o bɑ Yeso lə́ nthaknyə mtwətwɔp nə gyɛ' mnyə bɛ bɔ po'o tyɛ' Sabat. 15Pɑ Farisai lə́ həŋtə é yap pa' a lə́ cyə tə́ e yɔ tsʉ' a. E pa' bi pú gɑ: E yap mtwətwɔp nə mnyə mə̌, sɔk nɑ a, jɔ tsʉ'. 16Shɑ pɔ cəcɑ̌ pɑ Farisai lə́ ghɔm gɑ: Mo bǎ tə́ mo Si pɑ́, nə pa' e tə̌ wə jyə Sabat pɑ̀. Da' gɑ̀ pyə shɑ pɔ pɑ gɔm gɑ: Bi a pɑ́ gɛ mhɔ lɑ gʉ' nə gə́ yəŋ nthi mtiŋ msya hɑ? A lə pɑ̌ po'o ŋkhyɛ'nyə ko cəcɑ̌ pu. 17Wap piŋ ŋkwi' gɔm bi fʉ̀ bɔ gɑ: Kwa' wə ghɔm yǔ gɑ kɑ́ nə mo yə e gyɛ' mnyə mu a?

E pa' bi pu gɑ: E gɔm ghɔm Si.

18Pɑ Yudea la tə piŋ gɑ bɛ bɔ lə bɑ fʉ̀ tə́ biŋ jɔ tsʉ', tə́ ŋkhəm cwə yə wap lə ké pɑ tsə e a. 19Wap lə həŋtə pɑ tsə e gɑ: Bɛ yə̌ŋ bɑ mú yɔ yə po gɔm gɑ̀ po lə nə tsə é e pɑ́ fʉ̀ a lə́? Tə é jɔ tsʉ' cwəlɔ m gɑ́ kɑ? 20Wap pa' bi pɑ Yudea gɑ: Pyə̌ zhyə́ nyənyɔ gɑ e shəŋtə bɑ́ mu yɔk, bɑ pyə lə nə tsə́ é e pɑ fʉ̀. 21Tə́ sɔ' m cwəlɔ pa' e wə jɔ tsʉ' a, pyə ka zhyə sɔmywə nə́. Sɔ' m nə mo yə e gyɛ' mnyə myə́ a, bɑ pyə ka zhyə e. Po həŋtə e, e bɑ pɑ́ gətso. Kwa' yʉ siŋ wɔ nwə̀ nə.

22Pɑ tsə é lə́ gɔm po'o nə pa' wap lə bɑwə bwɔk pɑ Yudea. Nə pa' pɑ Yudea lə́ bɑ wap tsə́ yap gɑ́ bǎ wɑlə́ yə e piŋ gɑ́ Yeso bɑ Kristo a bɑ wap gɔ té é dyə Sinagogə. 23A ywə yə a lə gə tə́ pɑ tsə́ é ghɔm gɑ́ po həŋtə é, e bɑ gətso a.

24Pɑ Farisai lə́ piŋ ŋkwi' ŋkhe mo bɔ̌ yə e lə́ bɑ fʉ̀ a, gɔm bi e gɑ: Ghú'tə́ Si! Wɔk, pyə̌ zhyə gɑ mo bǎ bɑ́ hɔnwə. 25E pa' bi pu gɑ: Ŋ kha zhyə bi a e bɑ́ hɔnwə a, gɑ̌ zhyə da' gɑ́ ŋ khɑ́ bɑ́ fʉ̀, nəŋ bɑ cwəlɔ bɑwə jɔ tsʉ'. 26Wap ghɔm bi e gɑ: E gə nə o m gɑ́ kɑ? E gyɛ' mnyə mǔ m gɑ́ kɑ? 27E pa' bi pú gɑ: Gɑ̌ é da' siŋ wɔ, da' gɑ́ la' po yu'! Nwə kɑ̀ po piŋ bɑwə shəŋ nə piŋ ŋkwi' ju' mu' cʉm é? Pɑ́tyɛ' ba wɔ yɔ pɑwə shəŋ nə zhi pɑkhʉ pyə́ a? 28Pɑ Farisai lə tó' nə yəmtə é bɑ gɔm gɑ: O bɑ mukhʉ é! Wɔk, pyə bɑ pɑkhʉ̌ Mosɛ. 29Pyə zhyə́ gɑ Si bɑ e lé gɔmnwə bi Mosɛ, tə́ sɔ' m nə mo yəŋ gɑ, bɑ pyə ka zhyə́ tsʉ' yə e fɑ m nə a. 30Mbɛ bɔ pa' bi pu gɑ: Msya nwə bɑ́ gɑ po ka zhyə́ e, bɑ é nəŋ gyɛ' mnyə mə̌! 31Pɑ zhyə gɑ́ Si tə́ ju' gi mghɛ mhɔ pɑ, da' gɑ bɑ ju' mcwyɛ'nyə mo yə e dɑ mku' biŋ e biŋ bɑ gə ywə e shəŋ a. 32Pú la m ju' pá' pu gɔm gɑ́ mo ghyɛ' mnyə mo bɑ pu lə nə tsə́ é e pɑ fʉ̀ a pɑ́. 33Bɛ yəŋ la' pe' e lɑ pɑ m nə́ Si pɑ, bɑ e ka ghə sɔmywə. 34Pɑ Farisai lə pa' bi e gɑ: Wə yə o bɑ gɛ mhɔ tə́ fɑ tyɛ' nə tsə o a, o gɔ la'tə kɑ? Wap lə ghɔm po'o nthé é ma' pé.

35Yeso lə́ nə yu' gɑ wap zhəŋ é, sɔ' jɔ é gɔm bi é gɑ: O piŋ Mu mo a? 36Mo bɔ pa' bi Yeso gɑ: Mu mo bɔ bɑ̀ wɑ Cyəpɔ tə́ biŋ e? 37Yeso ghɔm bi e gɑ: A bɑ ǒ yɔ e. A bɑ mo yə e bɑwə gɔmnwə bu a. 38Mo bɔ ghɔm gɑ: Gɑ̌ piŋ m Cyəpɔ, e lə́ ghɔm po'o biŋ ŋkham mkwi'tə dzə é. 39Yeso piŋ gɔm bi e gɑ: Ŋ də́ sɔ' m nthʉm dzʉ́ nə fyɛ', po'o gɑ́ mfʉ̀ yɔ tsʉ', a pɑ yɔ tsʉ' zhi mfʉ̀. 40Pɑ Farisai pyə pu a pu lə bɑ a, lə́ nə yu' mghɔm bɔ gɔm bi Yeso gɑ: Pɑ́ tyɛ' ba wɔk yɔk bɑ pɑ mfʉ̀ a? 41Yeso ghɔm bi pu gɑ: Po la' pe' bɑ mfʉ̀ bɑ mhɔ tə̌ nə po pɑ̀. Da' gɑ́ po bɑwə cwəlɔ gɔm gɑ pyə wə jɔ tsʉ' a cyə m po'o, mhɔ mɔ́ wuŋ nə po.

Currently Selected:

YOHANE 9: NTGomala

Highlight

Copy