YOHANE 11
11
Yeso yám mu' mo nə vʉ̌
1Mu' mbɛ lə bɑ́wə, bɑ gɛ gho; mo bɔ lə bɑ Lazaro, yə Betanya, la' pɑ Maria pu fɑ e Marta. 2Pu gɔm Maria yə é lə́ lɑ mwɑ damnyəlamnyə nə jwɔ' Cyəpɔ, biŋ dɑ nə̀ŋ thə́ e nə shi' mkwə myə́ a. Fɑ e Lazaro nə lə́ bɑwə gǒ. 3Mfɑ pyə́ pyə pɑ jwǐ lə́ təm gɑ́ pu ghɔ gɔm bi Yeso gɑ: Cyəpɔ, mo yə o ŋkhuŋ e a wə gǒ.
4Yeso lə cwə́ tə ju' po'o gɔm gɑ: Gho bǎ tə gɔ miŋ m nə vʉ̌ pɑ́, pu gɔ cyə m nə́ yɔ ghu'tə̀ Si: A gɔ cyə m nə́ tə pu ghu'tə Mu Si.
5A lə nə pɑ̌ po'o Yeso pɑ́ ŋkhuŋ Marta pu fɑ e yə mjwǐ ba Lazaro. 6Tə́ ba tə pa' e lə zhyə̌ gɑ Lazaro wə go a, e lə pǐŋ shwə tsʉ' yə e lə́ bɑ nə a tyɛ'dzʉ tsɑ pʉ̌ə. 7Tə́ biŋ gɔm bi pɑkhʉ̌ pyə gɑ: Pɑ̀ pɑnyə Yudea. 8Pɑkhʉ̌ pyə lə ghɔm bi e gɑ: Rabi, a ka sak pa' pɑ Yudea kɑ bɑwə shəŋ nə lɑ mwɔ' nthamtə o a; o biŋ shəŋ nə pɑnyə wə́ lə́? 9Yeso pa' bi pu gɑ: Ta' tyɛ'dzʉ tə́ bɑ ǎ ghə mnàm shwɔppʉə mgham a lə? Mo pɑ́ giŋ dɔdzʉ̌ bɑ e tə́ gɔ cwɔ' kwə e pɑ, nə pa' e bɑwə jɔ ŋkha' yəŋ dzʉ̌. 10Da' gɑ́ mo pɑ giŋ mtsʉ' bɑ e gɔ cwɔ' kwə e nə́ pa' ŋkha' tə bɑ nə e pɑ.
11Yeso lə́ ghɔ́m mghɔm mɔ biŋ gɔm gɑ: So yɔk pɑ̀ Lazaro ti, da' gɑ́ gɑ̌ gɔ ghɔ yàm e. 12Pɑkhʉ̌ pyə ghɔm bi e gɑ: Cyəpɔ e pɑwə di bɑ e gɔ sɔ' vɔk. 13Yeso lə gɔm po'o bɑ gɔm vʉ́ Lazaro tə wap kwɛ yap gɑ́ e gɔm pɑ́ lwɔ̌k. 14Yeso ghɔm bi pu sɔsɔ̌ gɑ: Lazaro pfʉ́, 15tə ŋ bɑwə ŋwɛnyə nə po nə pa' ŋ kě tə pɑ tsʉ'u a, po'o gɑ a ghə po piŋ. Da' gɑ́ pɑ́ ghɔ bəŋ e. 16A lə pɑ̌ po'o, Tomasi, mo yə́ pu ŋkhe e gɑ́ Didimə a ghɔm bi pyə shɑ pɑkhʉ̌ gɑ: Pɑ ghɔ ba yɔk pɑ̀, po'o gɑ́ pɑ̀ a pú pəmtə́ pfʉ́.
17Yeso lə nə ŋwak, jɔ Lazaro m nthʉ̌m sì, bɑ ě cwə́ sí tyɛ' pfʉə. 18Nə pa' nthə́ Betanya bɑ̀ kilo pʉə mkam nə Yerusalɛm. 19Pɑ Yudea tə́ jɔ̀m lə́ bɑ wap sɔ' ywə Marta pu Maria nə zhwyətə wap nə vʉ̌ fɑ́ yap. 20Marta lə nə yu' gɑ Yeso wə sɔ̌' gɔ məjyə jɔ e; da' gɑ Maria pɑ pɑ́ dyə bɑ ě cwəsi. 21Marta lə ghɔm bi Yeso gɑ: Cyəpɔ, o kɑ pé' e bɑ tsɔ'ɔ bɑ fɑ a kě tə pfʉ́. 22Tə́ ba cwəlɔ gɑ̌ zhyə́ gɑ́ bǎ kɑ lə́ yə o gɔ ló bi Si a, Si gɔ hɑ bu. 23Yeso ghɔm bi e gɑ: Fɑ o gɔ yam. 24Marta pa' bi e gɑ: Gɑ̌ zhyə́ gɑ́ e gɔ sɔ' yam nə tyɛ' nə yam nə vʉ̌ nə jʉɔjʉ̀m tyɛ'dzʉ. 25Yeso ghɔm bi é gɑ: Gɑ̌ bɑ nə yam nə vʉ̌, biŋ bɑ vɔk: Mo yə e piŋ a, é pfʉ́ ba pfʉ̀pfʉ̌ bɑ e gɔ vɔk; 26a mo yə e nəŋ bvɔk biŋ biŋ a lə nəŋ da' pfʉ́. Ǒ piŋ po' a? 27Marta pa' bi é gɑ: É m Cyəpɔ, gɑ̌ piŋ gɑ o bɑ Kristo, gɑ̌ piŋ gɑ o bɑ Mu Si Mo yə e sɔ' nthʉm dzʉ́ a.
28E lə ghɔm po'o dú gɔ ŋkhe fɑ e Maria shamtə́ bi e gɑ: Tá tsi' e bɑwə ŋkhe o. 29Maria lə nə yǔ' gúŋ dusi gɔ bəŋ e. 30A lə́ nə pɑ̌ po'o Yeso yɑ́ tə wuŋ ŋkho nthʉm la' bɔ; e lə jɑ́ pɑ tsʉ' yə pú Marta lə yu'tə nə a. 31Pɑ Yudea lə bɑ dyə, bɑwə jwyətə Maria. Wap lə́ nə yɔ pá' e gúŋ dusi nthəm a jap jʉ̀m é, bɑwə ŋkwɛ gɑ e gɔ m thəsì nə lɔ̀. 32Maria lə ŋwak tsʉ' yə Yeso lə́ bɑ nə a, shwə tə jɔ e, bvʉ nə mkwə myə́ gɔm bi e gɑ: Cyəpɔ, o kɑ pe' bɑ tsɔ'ɔ bɑ fɑ à kě tə̀ pfʉ́. 33Yeso lə́ nə yo pa' Maria pu a pɑ Yudea pyə wap lə́ bɑ jʉ̀m e a wə dɔ́ a, tʉm tsyə sə́ŋ, lam tsyə sɔ. 34E ghɔm gɑ: Pǒ yap é hɑ? Wap pa' bi e gɑ: Cyəpɔ, sɔ' jɔ́. 35A pɑ́ po'o Yeso lɔ̀. 36Pɑ Yudea lə bɑ́ gɔm gɑ: Po yɔ́ pa' e kɑ ŋkhuŋ e. 37Da' gɑ shɑ̀ pɔ cəcɑ̌ pu ghɔm gɑ: Mo yə e lə ghyɛ' mnyə fʉ̀ a, e kě tə kú' nə kɔ̀ gɑ Lazaro kɑ pfʉ.
38A pɑ po'o tʉm Yeso kwi' səŋ, e ghɔ thəsì; thəsì bɔ lə́ bɑ túŋ ghú gwɔ̀', bɑ pu lɑ mú' gwɔ' nə pfɔptə shwə é. 39Yeso ghɔm gɑ: Po cʉ́ɔ gwɔ' yə̌ŋ. Marta, fɑ npfə́ ghɔm bi e gɑ: Cyəpɔ, e gɔ tsə́ pɑwə lam, nə pa' a cwəlɔ tyɛ' pfʉə. 40Tə́ Yeso ghɔm bi e gɑ: Ŋ khě tə ghɔm bu gɑ́ o piŋ, bɑ o gɔ yɔ ghu'tə Si lə́?
41Pu lə́ cʉ̌ɔ gwɔ'. Yeso piŋ bʉ' mnyə myə́ gɔm gɑ: Ta gɑ̌ gho'tə ó nə pa' ǒ yu' a lə. 42Gɑ̌ zhyə́ gɑ o ji ju' a guŋ mcwə awɛ, da' gɑ́ gɑ̌ gɔm po'o shyə m nə vəŋ pɔ̀ pɔ̌ pyə wap bə́ŋ m̀ a, po'o gɑ wap piŋ gɑ́ a bɑ ǒ təm a! 43E lə́ ghɔm po'o shwé tə thə́ gɑ: Lazaro, tə́m! 44Mo yə e lə́ bɑ ě pfʉ́ a tə̌m, bɑ pu kwɑ́ mkwə̀ myə́ pu a bu myə́, biŋ dɑ dzə́ sam sə́ e. Yeso ghɔm bi pɔmnəŋ gɑ: Po kyɛ' e, nthak e nəŋ e ghɔ.
Pú tɛnwə̀ nə́ Yeso
(Mt 26.1-5; Mk 14.1-2; Lk 22.1-2)
45Bo'gwyə pɑ Yudea pyə wap lə sɔ' bəŋ Maria biŋ jɔ ywə yə Yeso lə ghə a lə piŋ é. 46Da' gɑ́ pyəshɑ́ ghɔ jɔ́ pɑ Farisai siŋ wap ywə yə Yeso gə a. 47Mkamsi gwyəgwyə pu a pɑ Farisai lə ko cu'tə gɔm gɑ: Pɑ̌ gə kɑ? Bɛ yə̌ŋ wə gə mtiŋ msya yɔ̌m. 48Pɑ̀ tak é nəŋ e nə gɔ dzə̀ po'o bɑ guŋ pɔ awɛ gɔ piŋ e, pɑ Roma ko nə́, sɔ' sa'tə tsʉ' dɔlɔ̌ yɔk pɑ̀ ba guŋ yɔk pɑ̀. 49Mu' mo cəcɑ̌ pú, Kaifa yə e lə́ bɑ tádyə mkamsi gǔ' bɔ a ghɔm gɑ: Po tə wə jú' sɔmywə pɑ́. 50Po lə piŋ bɑwə sɛ ba m gɑ́ dzə bi po gɑ́ ta' mo pfʉ́ nə thə́ pɔmnəŋ, po'o gɑ́ gùŋ kɑ simnyə̀ awɛ a? 51Mghɔm bɔ myə e lə ghɔm a lá tə́ bɑ myə́ pɑ́. Da' gɑ́ pa' e lə bɑ tadyə mkamsi gǔ' bɔ a, e lə gɔm pɑ ghɔm Si gɑ a lə́ bɑwə shəŋ gɑ́ Yeso pfʉ́ nə thə́ guŋ, 52ba tə da' nə thə́ guŋ pɑ, ba m nə nə́ shu'tə́ po Si pyə wap bɑ wap sɛ dzʉ́ dzʉ̌ a nthʉm nthamtə. 53A tyɛ'dzʉ bɔ tə́ wap lə́ nyə̌ŋ gɑ wap gɔ zhwə é. 54Tə fɑ po' Yeso nə yə ghə́ŋ lə na' nə́ŋtə nə pɑ ŋkhəka cəcɑ̌ pɑ Yudea sɔsɔ̌; e lə təm gɔ m̀ ghə̌ŋ ghakgo, m nthʉ̌m tisuŋ Efraim pu a pɑkhʉ pyə́ pɑ́ shwə́ wə́.
55A lə́ nə pɑ̌ po'o Paska pɑ Yudea pɑwə sɔ̌'. Bo'gwyə pɔ lə wuŋ yə mu' jʉ̀m dzʉ̌ fɑ go bʉɔ gɔ Yerusalɛm nə nə lɔnyə nɑ tsap. 56Wap lə bɑwə shəŋ Yeso, biŋ bɑ Dyə Si tsʉ' yə wap lə bɑ nə a bɑ gɔm cəcɑ̌ pú gɑ: Pǒ sɛ gɑ kɑ̀? E tə́ gɔ sɔ' nə Paska pɑ̀. 57A lə́ bɑ mkamsi gwyəgwyə ba pɑ Farisai hɑ mco' gɑ: Bǎ wɑlə́ yə ě zhyə́ tsʉ' yə e nə́ a la'tə́, pu ghɔ gəm é.
Currently Selected:
YOHANE 11: NTGomala
Highlight
Share
Copy
Want to have your highlights saved across all your devices? Sign up or sign in
Nouveau Testament Ghomala © Bible Society of Cameroon, 2002.
