Markus 12

Balndol remooɓe halluɓe

(Matta 21:33-46; Luka 20:9-19)

1Nden Yeesu fuɗɗi wolwango ɓe bee balndi. O wi'i: “Goɗɗo jubi ngesa inabooje, o howi ka, o waɗi ɓiɗɗirde inaboojam, o mahi suudu towndu ngam aynoowo ngesa. Nden o halfini ka remooɓe, o dilli jahaaŋgal#Esa 5:1-2.. 2Nde saa'i teɓugo inabooje waɗi, o neli jaggiiɗo maako haa remooɓe go ngam o jaɓana mo geɗal maako haa inabooje. 3Ammaa ɓe naŋngi jaggiiɗo oo, ɓe piyi mo, ɓe ndiiwi mo juŋngo sooko. 4Nden jawmu ngesa neli jaggiiɗo muuɗum feere. Kaŋko boo remooɓe naawni mo haa hoore, ɓe toski mo. 5Jawmu ngesa neli jaggiiɗo muuɗum feere fahin, ammaa ɓe mbari mo. Bana non ɓe mbaɗi ɗuuɗɓe, ɓe piyi woɗɓe, ɓe mbari woɗɓe boo. 6Luttani jawmu ngesa ɓiɗɗo gooto tan, giɗaaɗo maako. Haa ragare man o neli mo haa remooɓe go, o numi: Ɓe teddinan ɓiyam kam. 7Ammaa remooɓe ɓe'e carwootiri, ɓe mbi'i: Ndaa kaŋko tammi ronugo. Sey en mbara mo, nden en marta ndonŋgu maako. 8Nden ɓe naŋngi ɓiɗɗo go, ɓe mbari mo, ɓe ngudini mo yaasi ngesa.”

9Nden Yeesu tokki wi'ugo: “Ɗume jawmu ngesa waɗata? O waran, o halkan remooɓe go, o hokkan ngesa inabooje haa woɗɓe. 10Walaa seko on njaŋngi aaya ka'a:

Hayre nde mahooɓe ngudini,

laati hayre talkumoore ɓurnde saman.

11Jawmiraawo waɗi ɗum,

ɗum kaayeefi haa gite meeɗen#Jab 118:22-23..”

12Mawɓe Yahuudu'en ɗaɓɓi naŋngugo Yeesu, ngam ɓe anndi o wolwi balndol ngol dow maɓɓe. Ammaa ɓe kuli mooɓre, ngam maajum ɓe acci mo, ɓe ndilli.

Jomorgol ngam laamiiɗo

(Matta 22:15-22; Luka 20:20-26)

13Ɓe neli Farisa'en woɗɓe e yimɓe Hirudus haa Yeesu ngam naŋngugo mo nder ƴamol tuufnorgol. 14Ɓe ngari, ɓe mbi'i mo: “Moodibbo, min anndi walaa ko yaali ma bee goɗɗo, ngam a senndindirtaa yimɓe, ammaa a ɗon anndina laawol Allah bee gooŋga. Yeccu min, ɗum kaanduɗum hokkugo laamiiɗo Roma jomorgol na? Min ndokka na malla min calo hokkugo?” 15Nde Yeesu anndi naafikaare maɓɓe, o jaabi ɓe: “Koni on tuufani yam tuuforgol? Ngaddaneeɗam suleyre haa mi yi'a.” 16Ɓe ngaddani mo. Yeesu ƴami ɓe: “Suura moy e innde moy dow maare?” Ɓe njaabi mo: “Kaysara, laamiiɗo Roma jeyi.” 17Nden Yeesu wi'i ɓe: “Njoɓe Kaysara, ko haanani mo, ndokke Allah boo ko haanani mo.” Jaawaabu maako hayɗini ɓe masin.

Ƴamol dow ummitineeki maayɓe

(Matta 22:23-33; Luka 20:27-40)

18Saduki'en wi'anɓe maayɓe ummitittaako ngari haa Yeesu. Ɓe ƴami mo ƴamol ngo'ol#KN 23:8.: 19“Moodibbo, Muusa winndani en umroore nde'e: To goɗɗo maayi, acci debbo mo walaano ɓiŋngel, sey deerɗiiko te'a mo ngam haa ɓe keɓana maayɗo danygol#TT 25:5.. 20Woodino deerɗiraaɓe njoweeɗiɗo. Arano te'i debbo, maayi, accaay ɓikkoy. 21Ɗiɗaɓo te'i mo, maayi, kaŋko boo o accaay ɓikkoy, bana non boo tataɓo. 22Haa njoweeɗiɗo te'ɓe debbo oo fuu maayi, ɓe accaay ɓikkoy. Ɓaawo maɓɓe debbo boo maayi. 23Nyalaade ummitineeki, to maayɓe ummitake, debbo moy o laatanto caka maɓɓe kadi? Ngam ɓe njoweeɗiɗo fuu ɓe te'ino mo.”

24Yeesu jaabi ɓe: “On ɗon mboofa masin! Ngam on anndaa Defte Ceniiɗe, on anndaa boo baawɗe Allah. 25Ngam to maayɓe ummitake, walaa teegal fahin, ɓe laatoto bana malaa'ika'en haa asama. 26Ko laarani haala maayɓe e ummitineeki maɓɓe, on meeɗaay jaŋngugo ko winnda nder deftere Muusa dow haala wumre na? Ton Allah wi'i Muusa: Min woni Allah Ibrahiima e Allah Isiyaaku e Allah Yaakubu na#Gurt 3:6.! 27Allah o Allah yeeɗɓe, naa o Allah maayɓe. Ngam maajum on mboofi masin.”

Umroore ɓurnde mawnugo

(Matta 22:34-40; Luka 10:25-28)

28Gooto nder Moodiɓɓe tawreeta nani kujjootiral maɓɓe, o nani Yeesu jaabi Saduki'en booɗɗum, nden o ƴami mo: “Dow umrooje fuu, umroore ndeye ɓuri mawnugo?” 29Yeesu jaabi: “Ndaa umroore ɓurnde mawnugo: Onon Isra'iila'en, nane: Allah Jawmiraawo meeɗen, o gooto. 30Yiɗ Jawmiraawo, Allah maaɗa bee ɓernde ma fuu, bee yoŋki ma fuu, bee hakkiilo ma fuu e bee semmbe ma fuu#TT 6:4-5.. 31Ndaa umroore ɗiɗawre: Yiɗ keeddiɗɗiraawo maaɗa bana hoore maaɗa. Walaa umroore feere ɓuri ɗe'e.#FL 19:18.” 32Nden moodibbo tawreeta wi'i Yeesu: “Booɗɗum moodibbo. Ko a wi'i, ɗum gooŋga: Jawmiraawo Allah o gooto, walaa Allah feere, sey kaŋko tan#TT 4:35.. 33Sey koo moy fuu yiɗa Allah bee ɓernde e hakkiilo e semmbe mum fuu, sey o yiɗa keeddiɗɗiiko boo bana no o yiɗirta hoore maako. Ɗum ɓuri dokke dabbaaji gulaaɗi e lii'aaɗi fuu#Hos 6:6..” 34Yeesu nani o jaabi booɗɗum bee hikma, nden o wi'i mo: “A daayaaki laamu Allah.” Ɓaawo maajum koo moy huli ƴamugo mo ƴamɗe goɗɗe.

Almasiihu e Daawuda

(Matta 22:41-46; Luka 20:41-44)

35Nde Yeesu ɗon ekkitina nder haykaliiru, o waɗi ƴamol ngo'ol: “Noy moodiɓɓe mbi'rata Almasiihu woni ɓii Daawuda? 36Ngam Ruuhu Ceniiɗo ɗowi Daawuda, o wi'i bee hoore maako:

Jawmiraawo wolwani jawmam:

Jooɗa haa nyaamo am,

haa to mi wallini konne'en maaɗa les kosɗe ma.

37Daawuda bee hoore muuɗum ewni mo Jawmiraawo, kadi noy Almasiihu laatori ɓii Daawuda?” Mooɓre ɗuuɗnde heɗiti haala Yeesu bee seyo.

Yeesu reentini mooɓre dow moodiɓɓe tawreeta

(Matta 23:1-36; Luka 20:45-47)

38Ndaa ko o ɗon ekkitina koo moy: “Ndeente e moodiɓɓe tawreeta, yiɗɓe waancugo bee ngapaleeji juuɗɗi, ɓe ngiɗi yimɓe koofna ɓe haa luuɓe. 39Nder cuuɗi dewal Yahuudu'en, ɓe ngiɗi jooɗaago haa joole tedduɗe e to ɓe ewnake ɓe ngam nyaamdu boo ɓe ɗaɓɓitan joole camɗinaaɗe. 40Ɓe ɗon njaɓta marle rewɓe yurumɓe, ɓe ɗon njuutina do'aare ngam yimɓe ngi'a ɓe. Ɓe keɓan kiita naawka masin.”

Dokkal debbo jurumɗo

(Luka 21:1-4)

41Nden Yeesu jooɗi baŋnge baatirɗum ceede nder haykaliiru. O hakkilani yimɓe waatanɓe ceede nder baatirɗum ceede man. Riskuɓe ɗuuɗɓe ndokki ceede ɗuuɗɗe. 42Debbo jurumɗo talakaajo boo wari, waati aniini ɗiɗi, waato ceede seɗɗa non. 43Yeesu ewni pukara'en muuɗum, wi'i ɓe: “Gooŋga mi ɗon wi'a on, debbo jurumɗo talakaajo oo waati nder baatirɗum ceede ko ɓuri yimɓe woɗɓe fuu. 44Ngam kamɓe ɓe ndokki seɗɗa diga ɗuuɗeeŋga jawdi maɓɓe, ammaa debbo oo, koo nde o laafuɗo, o hokki ko o mari ngam nguure maako fuu.”

Currently Selected:

Markus 12: FBDC

Highlight

Copy