Luka 8

Rewɓe wonduɓe bee Yeesu

1-2Ɓaawo maajum Yeesu yiiloyi berniiji e gure fuu, o waazini habaru laamu Allah. Pukara'en sappo e ɗiɗo ɗon bee maako non boo rewɓe woɗɓe yamɗitinaaɓe e ruuhuuji kalluɗi e nyawuji fuu ɗon ngondi bee maako. Kamɓe ngoni: Mariyama bi'eteeɗo Mariyama mo wuro Magdala mo ginnaaji joweeɗiɗi ngurtuno haa muuɗum 3e Yowanna, debbo Cuja, kaliifaajo dow saare laamiiɗo Hirudus e Suzan e rewɓe woɗɓe ɗuuɗɓe, wallooɓe worɓe go bee jawdi muuɗum'en#Mat 27:55-56; Mk 15:40-41; Lk 23:49..

Balndol aawoowo

(Matta 13:1-9; Markus 4:1-9)

4Yimɓe ɗuuɗɓe diga gure feere feere ngari, mooɓti haa Yeesu. Nden o wolwani ɓe balndol ngo'ol: 5“Demoowo yehi ngesa ngam saakoygo. Nde o ɗon saaka, aawdi ngoɗndi soli sera laawol. Yimɓe njaaɓi ndi, colli boo cuɓti ndi fuu. 6Aawdi ngoɗndi boo soli haa pellel kaa'e. Ndi fuɗi, aawre man yoori law, ngam peewol ŋakkani nde. 7Fahin aawdi ngoɗndi soli caka gi'e, ɗum fuu ɗum fuɗi, ammaa gi'e ɓiɗɗi aawre man. 8Ammaa ngoɗndi boo soli haa lesdi mboondi. Aawre fuɗi, mawni, waɗi cammeeje: Gawel fuu rimi teemerre teemerre.” Nde Yeesu timmini wolwugo, o wi'i bee sawtu: “Marɗo noppi ngam nanugo fuu, nana!”

Daliila balndi

(Matta 13:10-17; Markus 4:10-12)

9Pukara'en Yeesu ƴami mo ko balndol ngo'ol yiɗi wi'go. 10O jaabi: “Haa mooɗon ɗum hokkaama anndugo sirriiji laamu Allah, ammaa haa yimɓe feere sey bee balndi.

Ngam haa ɓe ndaara, ammaa ɓe ngi'ataa,

ɓe nana, ammaa ɓe paamataa#Esa 6:9-10. .”

Yeesu faamtini balndol aawoowo

(Matta 13:18-23; Markus 4:13-20)

11“Ndaa ko balndol ngo'ol yiɗi wi'go: Aawdi ɗum wolde Allah. 12Woɗɓe feere nanndi bee sera laawol haa aawdi soli. Ɗum nananɓe, nden Iblisa wara wifta bolle man nder ɓerɗe maɓɓe, ngam taa ɓe nuɗɗina, ɓe kisa. 13Woɗɓe boo nanndi bee pellel kaa'e, ɗum nananɓe wolde, ɓe njaɓa nde bee seyo. Ammaa nde walaa ɗaɗi nder maɓɓe, ɓe nuɗɗina ngam wakkati seɗɗa. To jarribeeki wari, ɓe njoofa. 14Aawdi colndi caka gi'e boo, nanndi bee nananɓe wolde. Ammaa ɓe acca laruuraaji, yiɗugo risku e belɗum duniyaaru ɓiɗɗa wolde go, nde waɗataa nafuuda. 15Aawdi colndi nder lesdi mboondi, ɗum nananɓe wolde, ɓe njogo nde bee ɓerɗe laaɓɗe, booɗɗe, ɓe mbaɗa nafuuda daliila tiinaare maɓɓe.”

Balndol pittirla

(Markus 4:21-25)

16Walaa jamnanɗo pittirla ngam jo'ingo nga les bokoti malla les leeso. Ammaa o jo'inan nga dow jo'inirɗum pittirla, ngam haa nga yaynana nastanɓe fuu#Mat 5:15; Lk 11:33.. 17Ngam walaa cuuɗiiɗum ɗum waŋgintaake, walaa sirriijum boo ɗum anndataake nder laaɓɗum#Mat 10:26; Lk 12:2..

18“Kakkilane no nanroton. Ngam marɗo huunde, ɓe ɓesdanan mo, ammaa mo maraay koo ɗume, ɓe koocan koo peetum ɗum o tammi marugo#Mat 25:29; Lk 19:26..”

Deerɗiraaɓe Yeesu e daada mum

(Matta 12:46-50; Markus 3:31-35)

19Daada Yeesu e deerɗiraaɓe muuɗum ngari, tawi mo, ammaa ɓe keɓaay yottaago mo ngam ɗuuɗal yimɓe. 20Ɓe mbi'i mo: “Daada maaɗa e deerɗiraaɓe maaɗa ɗon yaasi, ɓe ngiɗi laarugo ma.” 21Ammaa o jaabi: “Daada am e deerɗiraaɓe am ngoni nananɓe wolde Allah, ɗowtano nde.”

Yeesu de'itini henndu

(Matta 8:23-27; Markus 4:35-41)

22Nyannde feere Yeesu nasti koommbowal bee pukara'en muuɗum, o wi'i ɓe: “En eero gaɗa weendu.” Ɓe ndilli. 23Nde ɓe ɗon eero bee koommbowal#8:23 Koommbowal malla laanawal., Yeesu ɗaani. Law henndu ummi dow ndiyam, koommbowal ɗonno heewa ndiyam, ɓe ɗon yeeso joote.

24Pukara'en ɓaditi mo, ɓe pindini mo bee wi'go: “Jaagorɗo, jaagorɗo, en ɗon kalka!” Yeesu fini, o telɓani henndu e ƴuuge ndiyam, ɗum de'iti. De'ere mawnde waɗi.

25Yeesu wi'i pukara'en: “Toy nuɗɗinki mooɗon kadi?” Ammaa ɓe kultori, ɓe kayɗini, ɓe mbi'i: “Ɗum moyjo, umranɗo koo henndu e ƴuuge ndiyam, ɗum ɗowtano mo?”

Jamɗitinki marɗo ruuhuuji coɓɗi ɗuuɗɗi

(Matta 8:28-34; Markus 5:1-20)

26Ɓe njotti haa lesdi Geraseni'en gaɗa weendu Galiili. 27Nde Yeesu wurti koommbowal, goɗɗo wuro man wari, fotti bee maako. Goɗɗo oo mari ruuhuuji coɓɗi ɗuuɗɗi nder maako. Duuri o ɓornataako limce, o jooɗataako haa saare, sey haa genaale. 28Nde o yi'i Yeesu, o wooki, o do'i kommbi Yeesu, o wolwi bee sawtu: “Ɗume ngiɗɗa haa am, Yeesu, Ɓiɗɗo Allah Ɓaŋiiɗo? Mi tori ma, taa torram!” 29Ngam Yeesu ɗonno umra ruuhuwol coɓŋgol wurto haa maako. Ngol ɗonno naŋnga mo nde ɗuuɗɗum, ɓe ɗonno kaɓɓa kosɗe e juuɗe maako bee callalluuji e ge'elle ngam aynugo mo, ammaa o ɗonno ta'a ɗum. Ngol ɗonno yahra mo nder ladde. 30Yeesu ƴami mo: “Noy innde ma?” O jaabi: “Innde am Mooɓre”, ngam ruuhuuji ɗuuɗɗi nasti haa maako. 31Ɗi tori Yeesu taa o riiwa ɗi, taa o yahra ɗi haa ngaska lugguka.

32Woodi tokkere gaduuji haa ton, ɗon dura dow towndiire. Ruuhuuji go tori Yeesu, o acca ɗi nasta gaduuji man. O duŋani ɗi. 33Nden ruuhuuji coɓɗi ngurti haa gorko go, ɗi nasti gaduuji. Gaduuji man fuu caamni, do'i diga dow fomoonde townde nder weendu, kalki ton.

34Nde durooɓe gaduuji ngi'i ko waɗi, ɓe ndoggi, ɓe anndini haala man nder wuro e haa kawyeeji. 35Yimɓe ngurti haa ɓe ndaara ko waɗi. Ɓe ngari haa Yeesu, ɓe tawi gorko mo ruuhuuji coɓɗi ngurtuno e mum go, ɗon jooɗi kommbi maako, o ɗon ɓorni, o ɗon bee hakkiilo. Ɓe kultori. 36Yi'ɓe ko waɗi ngecci ɓe no ginnaaɗo yamɗitiri. 37Geraseni'en nder lesdi man fuu tori Yeesu o wurto lesdi maɓɓe, ngam ɓe kultori masin. Yeesu nasti koommbowal, o dilli. 38Goɗɗo mo ruuhuuji coɓɗi ngurti haa mum go, tori Yeesu yerdo o wonda bee maako. Yeesu lorni mo, wi'i mo: 39“Hootu saare ma, yeccu ko Allah waɗani ma fuu!” O dilli, o yecci yimɓe wuro fuu ko Yeesu waɗani mo.

Jamɗitinki ɓiŋngel Jayrus deyel e debbo meemɗo limce Yeesu

(Matta 9:18-26; Markus 5:21-43)

40Nde Yeesu wartoyi, yimɓe ɗuuɗɓe njaɓɓi mo, ngam ɓe fuu ɓe ɗonno ndeena mo. 41Nden goɗɗo bi'eteeɗo Jayrus, ardiiɗo suudu dewal Yahuudu'en wari haa Yeesu, do'i yeeso maako, tori mo o yaha saare muuɗum, 42ngam o woodi ɓiŋngel deyel, bajjel, mo duuɓi sappo e ɗiɗi, ɓadake maayugo.

Nde Yeesu ɗon yaha ton, yimɓe ɓiɗɗi mo. 43Woodi boo debbo feere ton. Duuɓi sappo e ɗiɗi o nyawɗo nyawu ilol ƴiiƴam. O majjini jawdi maako fuu haa hurgooɓe, ammaa walaa mo waawi yamɗitingo mo. 44O ɓaditi Yeesu haa ɓaawo, o meemi gawargal limce maako. Law nii ilol ƴiiƴam maako go dari. 45Yeesu ƴami: “Moy meemi yam?” Koo moy fuu wi'i: “Naa min.” Piyer wi'i: “Jaagorɗo, ɗum taariiɓe ma ɓiɗɗata ma.” 46Ammaa Yeesu wi'i: “Woodi mo meemi yam, ngam mi maati baawɗe ngurti haa am.” 47Nde debbo yi'i o waawataa suuɗaago, o wari, o ɗon diwna, o do'i yeeso maako, o limti caka yimɓe fuu daliila ka o meemri Yeesu e boo no o yamɗitiri wakkati man. 48Nden Yeesu wi'i: “Ɓiŋngel am, nuɗɗinki maaɗa yamɗitini ma, yah jam!”

49Diga Yeesu timminaay wolwugo tawon, goɗɗo mo saare Jayrus wari, wi'i mo: “Ɓiŋngel ma maayi, taa ɓillu jaagorɗo.” 50Ammaa nde Yeesu nani ɗum, o wi'i Jayrus: “Taa hul, nuɗɗin tan, o yeeɗitan.” 51Nde o yotti haa saare, o duŋanaaki koo moy nastida bee maako, sey Piyer, Yuhanna e Yaakuba e baaba bee daada ɓiŋngel. 52Yimɓe fuu ɗonno mboya, ɗonno ngooyna ngam ɓiŋngel go. Yeesu wi'i ɓe: “Taa mboye, ngel maayaay, ammaa ngel ɗon ɗaani non.” 53Ɓe njanci mo ngam ɓe anndi ɓiŋngel maayi. 54Ammaa Yeesu naŋngi juŋngo maagel, o wi'i bee sawtu: “Ɓiŋngel, fin!” 55Yoŋki maagel wartani ngel, ngel ummi law nder wakkati man nden e Yeesu umri ɓe ndokka ngel ko ngel nyaama. 56Saaro'en ɓiŋngel kayɗini, ammaa Yeesu wi'i, taa ɓe mbi'a koo moy ko laati.

Currently Selected:

Luka 8: FBDC

Highlight

Copy