Luka 9

Yeesu neli pukara'en sappo e ɗiɗo

(Matta 10:5-15; Markus 6:7-13)

1Yeesu mooɓti pukara'en sappo e ɗiɗo, o hokki ɓe semmbe e baawɗe riiwugo ruuhuuji coɓɗi e yamɗitingo nyawuji. 2O neli ɓe waazingo laamu Allah e hurgugo nyawɓe. 3O wi'i ɓe: “Taa koo'e koo ɗume ngam jahaaŋgal, koo sawru malla booro, koo nyaamdu malla ceede. Koo moy, taa jogo limce ɗiɗi boo. 4Saare nde ɓe mbeerni on fuu, njooɗe ton haa to on ndilli. 5To yimɓe cali jaɓɓaago on haa wuro, ngurte wuro man, piɗɗe collaaje kosɗe mooɗon, ɗum laato seedamku dow maɓɓe#KN 13:51; Lk 10:4-11..” 6Ɓe ndilli, ɓe njehi gure feere feere, ɓe ngaazini kubaruwol ceynoowol e ɓe njamɗitini nyawɓe koo toy.

Saklere Hirudus

(Matta 14:1-12; Markus 6:14-29)

7Hirudus, ardiiɗo lesdi nde nani ko laati fuu, o sakli masin. Ngam woɗɓe mbi'i: “Yuhanna ummitake diga caka maayɓe.” 8Woɗɓe boo mbi'i: “Eliya waŋgi.” Fahin woɗɓe mbi'i: “Gooto haa annabi'en ɓooyma ummitake#Mat 16:14; Mk 8:28; Lk 9:19..” 9Ammaa Hirudus wi'i: “Mi ta'i hoore Yuhanna. Goɗɗo moy nananmi ɓe mbi'anta kuuje bana ɗe'e?” O annini yi'ugo mo.

Nyaamnuki ujine njowo

(Matta 14:13-21; Markus 6:30-44; Yuhanna 6:1-14)

10Nelaaɓe ngarti, ɓe ngecci Yeesu ko ɓe mbaɗi fuu. O hoosi ɓe feere maɓɓe, ɓe ummi, ɓe ndilli wuro wi'eteeŋgo Baytisayda. 11Ammaa nde yimɓe nani ɗum, ɓe tokki mo. Yeesu jaɓɓi ɓe, o wolwani ɓe habaru laamu Allah, o yamɗitini marɓe haaje yamɗitineego boo.

12Nde naaŋge ɓadake mutugo, pukara'en sappo e ɗiɗo go ɓaditi mo, mbi'i mo: “Wi' yimɓe ɓe ndilla haa gure e kawyeeji, ngam ɓe keɓa ko nyaame e weerde, ngam haa ladde ngonɗen.” 13Yeesu wi'i ɓe: “Ndokke ɓe ko ɓe nyaama, onon bee ko'e mooɗon.” Ammaa ɓe njaabi: “Min ngoodi sey tamseeje jowi e liɗɗi ɗiɗi tan. Sonaa to a yiɗi min njaha, min coodana yimɓe ɓe'e fuu nyaamdu kam.” 14Limgal yimɓe man dillani ujine njowo. Yeesu wi'i pukara'en muuɗum: “Njo'ine ɓe cappanɗe njowo cappanɗe njowo.” 15Ɓe mbaɗi bana non, ɓe njo'ini ɓe fuu. 16Yeesu hoo'i tamseeje jowi e liɗɗi ɗiɗi go, o tijji dow, o yetti Allah ngam man, o yewi ɗum, nden o hokki pukara'en ngam ɓe cenndana yimɓe. 17Ɓe fuu ɓe nyaami, ɓe kaari, ɓe mooɓti luttuɗum tamseeje, ɗum hebbini cilaaje sappo e ɗiɗi.

Piyer waŋgini Yeesu woni Almasiihu

(Matta 16:13-19; Markus 8:27-29)

18Nyannde feere Yeesu ɗon waɗa do'a feere muuɗum. Pukara'en ɗon ngondi bee maako. O ƴami ɓe: “Mooɓe ɗon mbi'a min mi moy?” 19Ɓe njaabi: “Woɗɓe ɗon mbi'a an woni Yuhanna baɗoowo baptisma, woɗɓe ɗon mbi'a: Eliya, fahin woɗɓe boo ɗon mbi'a a gooto annabi'en ɓooyma mo ummiti diga maayde#Mat 14:1-2; Mk 6:14-15; Lk 9:7-8..” 20O ƴami ɓe: “Onon boo, on ɗon mbi'a mi moy?” Piyer jaabi: “An woni Almasiihu mo Allah#Yuh 6:68-69..”

Yeesu waŋgini haala maayde muuɗum e ummitineeki muuɗum

(Matta 16:20-28; Markus 8:31—9:1)

21Yeesu umri ɓe bee caatal ngam taa ɓe mbi'a ɗum koo moy. 22O ɓesdi wi'ugo: “Haani Ɓii-neɗɗo yara bone ɗuuɗɗum, ndotti'en e mawɓe liman'en e moodiɓɓe tawreeta ngudina mo. Ɓe mbaran mo, ammaa nyalaade tataɓre ɓaawoɗon, o ummititto.” 23O wi'i yimɓe fuu fahin: “To goɗɗo yiɗi tokkaago yam, sey o acca muuyo maako, o roondo gaafaaŋgal maako nyalaade fuu e o tokko yam#Mat 10:38; Lk 14:27.. 24Ngam koo moy yiɗi hisnugo yoŋki muuɗum, majjinan ki. Ammaa mo majjini yoŋki mum ngam am, hisnan ki#Mat 10:39; Lk 17:33; Yuh 12:25.. 25Ɗume ɗum nafata goɗɗo to o heɓi duniyaaru fuu ammaa o majjini yoŋki maako malla o halki hoore maako? 26To goɗɗo semti yam e bolle am, Ɓii-neɗɗo semtan mo yaake o warata nder tedduŋgal maako e nder ngal Baabiraawo maako e nder ngal malaa'ika'en seniiɓe. 27Gooŋga mbi'an mi on, woɗɓe caka wonɓe ɗo jonta maayataa sey to ɓe ngi'i laamu Allah.”

Gayliteeki Yeesu

(Matta 17:1-8; Markus 9:2-8)

28Balɗe joweetati ɓaawo o wolwi bolle ɗe'e, Yeesu hoosi Piyer e Yuhanna e Yaakuba, o wa'i hooseere ngam waɗugo do'a. 29Nde o ɗon do'o, yeeso maako sannji, limce maako ndanwi tal, ɗelki. 30Ɗon nii, worɓe ɗiɗo ɗon ngeewtida bee maako: Ɗum Muusa e Eliya. 31Ɓe mbaŋgi nder tedduŋgal, ɓe mbolwi dow dilluki e dow no maayde maako laatorto haa Urusaliima. 32Piyer e wonduɓe bee maako ɗoyɗi teddani ɓe, ammaa ɓe pini, ɓe ngi'i tedduŋgal Yeesu e worɓe ɗiɗo wonduɓe bee muuɗum. 33Nde yimɓe ɗiɗo go ɗon ceeda bee Yeesu, Piyer wi'i mo: “Jaagorɗo, ɗum booɗɗum en njooɗo haa ɗo! Ngaɗen bukkaaji tati, wooru ngam maaɗa, wooru ngam Muusa e wooru boo ngam Eliya!” O anndaano ko o wi'ata. 34Nde o ɗon wolwa ɗum, ruuldere wari, suddi ɓe. Pukara'en kultori nde ɓe ngi'i ɓe nasti ruuldere. 35Sawtu wurti ruuldere go, wi'i: “Oo woni Ɓiɗɗo am cuɓaaɗo, nanane mo#2 Pi 1:17-18.#Esa 42:1; Mat 3:17; 12:18; Mk 1:11; Lk 3:22.!” 36Nde sawtu go wolwi, ɓe ngi'aay goɗɗo feere, sey Yeesu tan. Pukara'en njeeɗi, ɓe mbolwanaay koo moy saa'i man ko ɓe ngi'i.

Jamɗitinki ɓiŋngel marŋgel ginnawol

(Matta 17:14-18; Markus 9:14-27)

37Nde ɓe njippi hooseere jaŋngo man, mooɓre ɗuuɗnde wari, fotti bee Yeesu. 38Goɗɗo hooli nder mooɓre go, wi'i: “Moodibbo, mi tori ma, laar ɓiŋngel am gorgel, ngel bajjel! 39Wakkati feere ruuhuwol ɗon naŋnga ngel, law ngel wooka, ngol ɗon dimmba ngel bee semmbe, waɗa ngel nguufo haa hunnduko, ngol ɗon torra ngel. Ɗon saɗa seɗɗa haa ngol acca ɓiŋngel nge'el, sey to ngol tampini ngel masin. 40Mi tori pukara'en ma ɓe ndiiwa ngol, ammaa ɓe mbaawaay.” 41Yeesu jaabi: “Hey yimɓe sooya nuɗɗinki'en, wonniiɓe! Haa ndey tokkotoomi wondugo bee mooɗon e munyango on? Waddu ɓiŋngel ma haa ɗo!” 42Nde ngel ɗon wara, ruuhuwol do'i ngel, dimmbi ngel bee semmbe. Ammaa Yeesu telɓani ruuhuwol coɓŋgol ngo'ol, yamɗitini ɓiŋngel go, hokkiti ngel baaba maagel. 43Ɓe fuu ɓe kayɗini ngam daliila maŋngu Allah.

Yeesu waŋgini haala maayde muuɗum e ummitineeki muuɗum ɗiɗawre

(Matta 17:22-23; Markus 9:30-32)

Nde koo moy hayɗini dow ko Yeesu waɗi fuu, o wi'i pukara'en maako: 44“Keɗite booɗɗum ko mbi'anmi on jonta: Ɓe ndokkan Ɓii-neɗɗo haa juuɗe yimɓe.” 45Ammaa pukara'en paamaay maana maaka, ka laati cuuɗiika haa maɓɓe ngam taa ɓe paama. Ɓe kuli boo ƴamugo mo dow maajum.

Moy ɓurdi maŋngu?

(Matta 18:1-5; Markus 9:33-37)

46Nden pukara'en puɗɗi ƴamƴamtirgo moy laatoto mawɗo caka maɓɓe#Lk 22:24.. 47Ammaa nde Yeesu anndi dow ɗume ɓe ɗon ƴamƴamtindira, o hoo'i ɓiŋngel pamarel, o darni ngel kommbi maako, 48o wi'i ɓe: “Koo moy jaɓi ɓiŋngel pamarel ngel ngam innde am, min o jaɓi. Koo moy jaɓi yam boo, jaɓi nelɗo yam. Ngam ɓurduɗo famɗugo caka mooɗon fuu, kaŋko woni mawɗo#Mat 10:40; Lk 10:16; Yuh 13:20..”

Mo honnaaki on, ɗon bee mooɗon

(Markus 9:38-40)

49Yuhanna wi'i: “Jaagorɗo, min ngi'i goɗɗo ɗon riiwra ginnaaji bee innde ma. Min ngiɗno haɗugo mo, ngam o tokkaaki ma bee amin.” 50Yeesu jaabi mo: “Taa kaɗe mo, ngam koo moy mo honnaaki on, ɗon bee mooɗon.”

Yimɓe Samariya cali jaɓɓaago Yeesu

51Nde wakkati dilluki maako haa asama ɓadake, o waɗi anniya timmuka yahugo Urusaliima. 52O neli nelaaɓe yeeso maako. Ɓe ndilli, ɓe nasti wuro Samariya'en ngam taaskanango mo weerde. 53Ammaa wonɓe nder wuro ngo njaɓɓaaki mo, ngam o ɗon tiiti yahugo Urusaliima. 54Nde Yaakuba e Yuhanna ngi'i ɗum, ɓe mbi'i: “Jawmiraawo, a yiɗi min ewno yiite jippo diga asama, wulda ɓe na#2 Laam 1:9-16.?” 55Ammaa Yeesu yeesiti, feli ɓe. 56Nden ɓe ndilli wuro woɗŋgo.

Yiɗɓe tokkaago Yeesu

(Matta 8:19-22)

57Nde ɓe ɗon dow laawol, goɗɗo wi'i mo: “Mi tokkete koo toy njahata fuu.” 58Yeesu jaabi mo: “Doldolɗe ngoodi gasɗe, colli boo ngoodi caɓɓe, ammaa Ɓii-neɗɗo walaa haa wallina hoore mum.” 59O wi'i goɗɗo feere: “Tokkam!” Goɗɗo man wi'i mo: “Duŋanam mi yaha, mi uwoya baaba am tawon.” 60Ammaa Yeesu wi'i mo: “Accu maayɓe uwa maayɓe muuɗum'en, ammaa an, yah waazin laamu Allah.” 61Goɗɗo feere boo wi'i mo: “Mi tokkete, yaa Jawmiraawo, ammaa duŋanam mi jaɓɓito yimɓe saare am tawon#1 Laam 19:20..” 62Yeesu wi'i mo: “Koo moy wallini juŋngo dow baaneewo ga'i, nden laari ɓaawo, walaa nafuuda ngam laamu Allah.”

Currently Selected:

Luka 9: FBDC

Highlight

Copy