SALMO 119
119
An Katogonan nin Kagurangnan
1Paladan an mga tawong an buhay mayo nin karatan,
na naglalakaw sosog sa katogonan nin Kagurangnan.
2Paladan an mga tawong nag-ootob kan saiyang mga kabotan,
na nagkukuyog sa saiya sa bilog nindang puso.
3Dai sinda naggigibo nin sala;
naglalakaw sinda sa mga dalan nin Kagurangnan.
4Itinao mo samo an saimong mga togon Kagurangnan,
asin pinagbotan na maimbod nyamong kuyogon iyan.
5Linalaom ko na magigin maimbod ako
sa pag-otob kan saimong mga katukdoan!
6Kaya ngapit dai ako mapapasopog,
huli ta inootob ko an gabos mong kabotan.
7Oomawon taka na may malinig na puso,
mantang inaadalan ko an matanos mong paghukom.
8Kukuyogon ko an saimong mga katogonan;
dai mo nanggad ako pagpabayaan!
Pagkuyog sa Katogonan nin Kagurangnan
9Ano an gigibohon nin sarong hoben na lalaki tanganing danay na malinig an saiyang dalan?
Sa paagi nin pagkuyog kan saimong mga katogonan.
10Sa bilog kong puso hinahanap taka;
dai man logod ako makasuhay sa saimong mga togon.
11Rinirimpos ko sa sakong puso an saimong tataramon,
tanganing dai ako magkasala tumang saimo.
12Inoomaw taka, O Kagurangnan;
tukdoan sako an saimong mga kabotan.
13Sa makosog na tingog sakong ipapahayag
an gabos mong togon.
14Ikinakaogma kong kuyogon an saimong mga kabotan,
orog pa ki sa gabos na yaman.
15Hohorophoropon ko an saimong mga togon;
iisip-isipon ko an saimong mga dalan.
16Ikinakaogma ko an saimong mga katogonan;
dai ko lilingawan an saimong mga kabotan.
Kaogmahan sa Katogonan nin Kagurangnan
17Magin marahay ka sako, na saimong sorogoon,
tanganing mabuhay ako asin magkuyog kan saimong tataramon.
18Buksan mo an sakong mga mata, tanganing mahiling ko
an mga makangangalas na katotoohan sa saimong katogonan.
19Halipot sana an buhay ko digdi sa kinaban;
hare sako pagtagoa an saimong mga kabotan.
20An sakong puso pano nin kapungawan
para sa saimong mga pagboot sa gabos na panahon.
21Saimong tinutuyaw an mga mapaabaw-abaw, mga isinumpa,
na naglalapas kan saimong mga pagboot.
22Halea sako an saindang mga pag-olog-olog saka pagtuyatuya,
huli ta inotob ko an saimong mga togon.
23Dawa magturuparan an mga prinsipe asin mag-orolay tumang sako,
aadalan ko an saimong mga katukdoan.
24Kaogmahan ko an saimong mga katukdoan;
sinda an sakong mga parahatol.
Determinasyon sa Pagkuyog kan Katogonan nin Kagurangnan
25Sa pagkadaog, natumba ako sa alpog;
pakosoga ako siring sa panuga mo.
26Kan ikinumpisal ko an sakong mga gibo, sinimbag mo ako;
tukdoan sako an saimong mga pagboot.
27Tabangi akong masabotan an saimong katogonan,
asin hohorophoropon ko an mga makangangalas mong gibo.
28Nagtatangis ako sa kamondoan;
pakosoga ako siring sa saimong panuga.
29Likayan ako sa salang dalan,
asin sa saimong pagkamaugayon tukdoe ako kan saimong katogonan.
30Pinili ko an dalan nin kaimbodan;
an saimong mga kabotan ibinugtak ko sa sakong atubang.
31Sinunod ko an saimong mga katukdoan, Kagurangnan;
hare ako pagbugtakan sa kasosopgan.
32Bulahos kong kukuyogon an saimong mga kabotan,
huli ta tatawan mo ako nin orog na kadonongan.
Pamibi Tanganing Makasabot
33Tukdoan sako, Kagurangnan, an kahulogan kan saimong mga katogonan,
asin ootobon ko iyan sagkod sa kataposan.
34Tawe ako nin pakasabot, tanganing maotob ko an saimong katogonan
asin maotob ko iyan sa bilog kong puso.
35Giboha akong makinuyog-kuyog sa saimong mga kabotan,
huli ta yaon diyan an sakong kaogmahan.
36Pakilinga an sakong puso sa saimong katogonan,
asin bakong sa kayamanan.
37Iharayo mo ako sa paghiling sa mga mayo nin halaga;
magin marahayon ka sako, siring sa saimong panuga.
38Otoba an saimong panuga sa sako, na saimong sorogoon—
an panuga na itinatao mo sa mga natatakot saimo.
39Ligtasan ako sa mga pagtuyatuya na sakong natatakotan;
huli ta marahay an saimong mga kabotan.
40Boot kong kuyogon an saimong mga kabotan;
sa saimong katanosan tawe ako nin buhay.
Pagsarig sa Katogonan nin Kagurangnan
41Pahilingan sako an danay mong pagkamoot, Kagurangnan,
asin ligtasan ako sosog sa saimong panuga.
42Dangan masisimbag ko an mga nagtutuyatuya sako
huli ta sa saimong tataramon nananarig ako.
43Tugote akong magtaram kan katotoohan sa gabos na panahon,
huli ta an sakong paglaom yaon sa saimong paghukom.
44Danay kong kukuyogon an saimong katogonan,
sa panahon na daing kataposan.
45Maglalakaw ako sa katalingkasan,
huli ta hinanap ko an saimong mga katukdoan.
46Ibabareta ko man sa mga hade an saimong mga kabotan,
asin dai ako mamumugtak sa kasopogan;
47huli ta naoogma ako sa saimong mga kabotan,
na sakong namomotan.
48Ginagalangan ko an saimong mga kabotan, na sakong namomotan;
hohorophoropon ko an saimong mga katukdoan.
Pagsarig sa Katogonan nin Kagurangnan
49Giromdoma an saimong panuga sa saimong sorogoon;
nagtao iyan sako nin paglaom.
50Iyan an karangahan ko sa sakong pagtios,
huli ta an saimong panuga nagtao sako nin buhay.
51Danay akong pinag-oolog-olog kan mga mapaabaw-abaw,
alagad dai ako minatalikod sa saimong katogonan.
52Kun nagigiromdoman ko an saimong paghukom kaidtong panahon,
nararanga ako, O Kagurangnan.
53Kun nahihiling ko an mga tampalasan na naglalapas kan saimong katogonan,
napapano ako nin kaanggotan.
54Sa sakong paglakaw digdi sa daga,
an saimong mga kabotan iyo an nagin sakong mga awit.
55Sa banggi, naroromdoman ko an saimong ngaran, Kagurangnan,
asin inootob ko an saimong katogonan.
56Nakakakua ako nin kaogmahan
sa pagkuyog kan saimong mga kabotan.
Debosyon sa Katogonan nin Kagurangnan
57Ika an sakong kahirasan, Kagurangnan;
nanunuga akong kukuyogon ko an gabos mong katogonan.
58Sa bilog kong puso ako nakikimaherak;
kaheraki ako sosog sa saimong panuga!
59Kun iniisip ko an sakong mga gawe,
nanunuga akong susunodon an saimong mga katukdoan.
60Naghihidali ako asin dai nag-aabala
sa pag-otob kan saimong mga kabotan.
61Maski nasisiod na ako kan mga pisi kan mga tampalasan,
dai ko nalilingawan an saimong katogonan.
62Sa kamatangaan nin banggi minabangon ako tanganing omawon ka,
huli kan saimong mga matanos na pagboot.
63Katood ako kan gabos na natatakot saimo,
kan mga nag-ootob kan saimong mga katogonan.
64 Kagurangnan, an kinaban pano kan danay mong pagkamoot;
tukdoe ako kan saimong mga pagboot.
An Halaga kan Katogonan nin Kagurangnan
65Pinapangagin mong marahay an saimong sorogoon,
Kagurangnan, sosog sa saimong tataramon.
66Tawe ako nin kadonongan asin pakasabot,
huli ta minasarig ako sa saimong mga pagboot.
67Ako nalagalag bago nagtios,
alagad ngunyan inootob ko na an saimong tataramon.
68Marahay ka asin naggigibo nin karahayan;
tukdoe ako kan saimong mga kabotan.
69Pinapakaraot ako kan mga mapaabaw-abaw,
alagad bilog kong puso na sinusunod an saimong mga katukdoan.
70An mga tawong ini mayo nin pakasabot,
alagad naoogma ako sa saimong katogonan.
71Marahay para sako na ako nagtios,
huli ta nakanood ako kan saimong mga kabotan.
72Orog na mahalaga sa sako an itinao mong katogonan
ki kan gabos na kwarta sa kinaban.
An Katanosan kan Katogonan nin Kagurangnan
73Linalang mo ako asin iniingatan;
tawe ako nin pakasabot, tanganing manodan ko an saimong mga kabotan.
74Maoogma an mga natatakot saimo kun mahiling ninda ako,
huli ta minasarig ako sa saimong panuga.
75Aram kong matanos an saimong mga hatol, Kagurangnan,
asin sa kaimbodan ako saimong pinadusahan.
76Rangahon logod ako kan danay mong pagkamoot,
sosog sa saimong panuga sa saimong sorogoon.
77Maherak ka sako, tanganing ako mabuhay;
huli ta an saimong katogonan iyo an sakong kaogmahan.
78Magkasoropog logod an mga mapaabaw-abaw huli ta pinakaraot ninda ako;
alagad para sako, hohorophoropon ko an saimong mga katukdoan.
79Magdorolok logod sako an mga natatakot saimo,
tanganing manodan ninda an saimong mga kabotan.
80Logod bulahos kong kuyogon an saimong mga kabotan,
tanganing dai ako mamugtak sa kasopogan!
Pamibi Tanganing Iligtas
81Nanluluya na an sakong kalag sa kahahalat kan saimong kaligtasan;
naglalaom ako sa saimong tataramon.
82Nanlalabog na an sakong mga mata sa kahahalat para sa saimong ipinanuga,
mantang naghahapot ako, “Nuarin mo ako rarangahon?”
83Nagin arog ako sa itinapok na anit na lalagan nin arak;
alagad dai ko nalingawan an saimong mga kabotan.
84Sagkod nuarin ako maghahalat?
Nuarin mo papadusahan an mga nagpapasakit sako?
85Mga mapaabaw-abaw nagkurutkot nin mga kalot para sako,
mga tawong dai nagkukuyog kan saimong katogonan.
86An saimong mga kabotan gabos masasarigan;
nagbabalobagi an mga tawo tumang sako—tabangan mo ako!
87Haros magagadan na ninda ako,
alagad dai ko pinabayaan an saimong mga kabotan.
88Sa danay mong pagkamoot tugote akong mabuhay,
tanganing makuyog ko an saimong mga katogonan.
Pagtubod sa Katogonan nin Kagurangnan
89An saimong tataramon, Kagurangnan,
nagdadanay sagkod lamang sa kalangitan.
90An saimong kaimbodan nagdadanay sa gabos na henerasyon;
ipinamugtak mo an kinaban sa saiyang lugar, asin diyan iyan nagdadanay.
91Nagdadanay sagkod ngunyan an gabos na bagay huli kan saimong kabotan;
huli ta sorogoon mo an mga iyan.
92Kun dai ko nagin kaogmahan an saimong katogonan,
gadan na kuta ako huli kan sakong kasakitan.
93Dai ko nanggad lilingawan an saimong mga katukdoan,
huli ta sa paagi kaiyan tinawan mo ako nin buhay.
94Sadiri mo ako, ligtasan ako!
Huli ta hinanap ko an saimong mga kabotan.
95Naghihipa an mga tampalasan tanganing gadanon ako,
alagad naghohorophorop ako kan saimong mga katogonan.
96Nasabotan kong an gabos igwa nin kasagkoran;
alagad mahiwas nin marahay an saimong kabotan.
Pagkamoot sa Katogonan nin Kagurangnan
97Namomotan kong gayo an saimong katogonan!
Iyan an sakong pinaghohorophorop sa bilog na aldaw.
98Pinapangagin akong mas madonong kan saimong mga togon ki sa mga kaiwal ko,
huli ta iyan danay na kaibahan ko.
99Orog akong may pakasabot ki sa gabos kong maestro,
huli ta an saimong mga katukdoan an sakong hinohorophorop.
100Orog akong nakakasabot ki sa mga gurang,
huli ta kinukuyog ko an saimong mga kabotan.
101An lambang maraot na gawe sakong linilikayan,
tanganing maotob ko an saimong tataramon.
102Dai ko pinapabayaan an saimong mga katukdoan,
huli ta ika an nagtukdo sako.
103Mahamis na gayo an saimong mga katukdoan—
orog na mahamis ki sa dugos sa sakong ngoso!
104Nakakakua ako nin kadonongan sa saimong mga togon,
kaya an lambang maraot na gawe sakong kinaoongisan.
Liwanag hale sa Katogonan nin Kagurangnan
105Ilaw para sa mga bitis ko an saimong tataramon,
asin sarong liwanag para sa sakong agihan.
106Ootobon ko an sakong banal na panuga
na kukuyogon an saimong matanos na mga katukdoan.
107Makuri nanggad an sakong pagtios, Kagurangnan;
papagdanaya akong buhay sosog sa saimong tataramon.
108Akoa an sakong mga dolot nin pag-omaw, Kagurangnan,
asin tukdoe ako kan saimong mga kabotan.
109Danay na nasa pag-alaman an sakong buhay,
alagad dai ko nalilingawan an saimong katogonan.
110Nagbugtak nin mga siod para sako an mga tawong maraot,
alagad dai ko linalapas an saimong mga kabotan.
111An saimong mga togon iyo an sakong pamana sagkod lamang;
iyan an kaogmahan kan sakong puso.
112Idinudusay ko an sakong puso sa pagkuyog kan saimong mga katogonan
sagkod sa aldaw nin sakong pagkagadan.
Kaligtasan sa Katogonan nin Kagurangnan
113Naoongis ako sa mga tawong bakong maimbod saimo,
alagad an saimong katogonan namomotan ko.
114Ika an sakong pailihan asin kalasag;
minalaom ako sa saimong tataramon.
115Humarayo kamo sa sako, mga paragibo nin maraot,
tanganing maotob ko an mga katogonan nin sakong Dios.
116Pangatamanon mo ako sosog sa saimong panuga tanganing ako mabuhay;
dai man logod ako mapasopog sa sakong paglaom!
117Ingati ako tanganing magin ligtas,
asin danay kong papahalagahan an saimong mga kabotan.
118Isinisikwal mo an gabos na minalapas kan saimong mga katogonan;
an saindang pandadaya mayong kamugtakan.
119An gabos na maraot na tawo sa daga ibinibilang mong basura;
kaya namomotan ko an saimong mga katukdoan.
120Nagtatakig an sakong laman sa takot saimo;
natatakot ako sa saimong paghukom.
Pagkuyog sa Katogonan nin Kagurangnan
121Ginibo ko an matanos asin an marahay;
hare ako pagbayae sa sakong mga kaiwal!
122Manuga kang tatabangan mo an saimong sorogoon;
hare pagtugot na apihon ako kan mga mapaabaw-abaw na tawo!
123Nanlalabog na an sakong mga mata sa kahahalat kan saimong kaligtasan,
asin kan kaotoban kan saimong matanos na panuga.
124Giboha sa sako sosog sa danay mong pagkamoot,
asin tukdoan sako an saimong mga kabotan.
125Sorogoon mo ako; tawe ako nin pakasabot,
tanganing maaraman ko an saimong mga katukdoan.
126Panahon na tanganing maghiro ka, Kagurangnan,
huli ta linalapas nin mga tawo an saimong katogonan.
127Namomotan ko an saimong mga kabotan orog pa ki sa bulawan,
orog pa ki sa purong bulawan.
128Kaya sinusunod ko an gabos mong katukdoan;
naoongis ako sa gabos na salang dalan.
Pagmawot sa Pagkuyog kan Katogonan nin Kagurangnan
129Makangangalas an saimong mga katukdoan;
kaya kinukuyog ko iyan sa bilog kong puso.
130An paliwanag kan saimong mga tataramon minatao nin liwanag;
nagdadara iyan nin kadonongan sa mga mangmang.
131Buka an ngoso, ako naghahalhal
sa sakong pagmawot para sa saimong mga kabotan.
132Hilinga ako asin kaheraki
siring kan saimong ginigibo sa mga namomoot saimo.
133Siring sa saimong panuga, likayan ako sa pagkapadungkal;
hare ako pagpadaogan sa karatan.
134Tubosa ako sa mga nang-aapi sako,
tanganing makuyog ko an saimong mga pagboot.
135Paliwanaga an lalawogon mo sa saimong sorogoon,
asin tukdoe ako kan saimong mga katogonan.
136An sakong mga luha nagbubulos siring sa sarong salog
huli ta dai nagkukuyog an mga tawo kan saimong katogonan.
An Hustisya kan Katogonan nin Kagurangnan
137 Kagurangnan, ika matanos,
asin an saimong mga katogonan matanos.
138An itinatao mong mga pagsusundon matanos
asin mayong kinikilingan.
139An sakong kaanggotan naglalaad siring sa kalayo,
huli ta linilingawan nin sakong mga kaiwal an saimong mga tataramon.
140Nabalo nang gayo an saimong panuga,
asin namomotan iyan kan saimong sorogoon.
141Mayo ako nin halaga asin isinikwal,
alagad dai ko linilingawan an saimong mga katukdoan.
142Mayo nin kasagkoran an saimong katanosan,
asin totoo an saimong katogonan.
143Minaabot sako an kasakitan asin kahandalan,
alagad an saimong mga pagboot iyo an sakong kaogmahan.
144Danay na matanos an saimong mga katukdoan;
tawe ako nin pakasabot tanganing ako mabuhay.
Pamibi Tanganing Iligtas
145Sa bilog kong puso minaapod ako saimo; simbaga ako, Kagurangnan, asin kukuyogon ko an saimong mga pagboot!
146Minaagrangay ako saimo;
ligtasan ako, asin ootobon ko an saimong mga katogonan.
147Bago mag-alagaag an kaagahon, minaagrangay ako saimo;
naglalaom ako sa saimong panuga.
148Magdamlag akong dai nagkakatorog,
tanganing mahorophorop an saimong mga katukdoan.
149Sa danay mong pagkamoot, dangoga an sakong tingog, Kagurangnan;
sa saimong pagkamatanos ligtasan an sakong buhay!
150Naghaharani an mga naglalamag sako,
mga tawong harayo sa saimong katogonan.
151Alagad ika, Kagurangnan, harani,
asin totoo an gabos mong katogonan.
152Haloy ko nang naaraman sa saimong katukdoan
na iyan pinapadanay mo sagkod lamang.
Agrangay Tanganing Tabangan
153Hilinga an sakong pagtios, asin ligtasan ako,
huli ta dai ko nalilingawan an saimong katogonan.
154Suroga ako asin tubosa;
tawe ako nin buhay sosog sa saimong panuga.
155Harayo sa mga maraot an kaligtasan,
huli ta dai ninda hinahanap an saimong mga katogonan.
156Dakula an saimong pagkaherak, Kagurangnan;
tawe ako nin buhay sosog sa saimong katanosan.
157Kadakul an naglalamag sako asin an sakong kaiwal,
alagad dai ako minasuhay sa saimong katogonan.
158Nababaldi ako kun nahihiling ko an mga mayong pagtubod,
huli ta dai ninda inootob an saimong mga pagboot.
159Hilinga kun gurano an pagkamoot ko sa saimong mga katukdoan.
Ligtasan an sakong buhay sosog sa danay mong pagkamoot.
160Katotoohan iyo an puso kan saimong katogonan;
an lambang matanos mong paghukom mayo nin kataposan.
Pagkamoot sa Katogonan nin Kagurangnan
161Mayong dahelan na linalamag ako nin mga prinsipe,
alagad ginagalangan ko an saimong mga tataramon.
162Naoogma ako sa saimong tataramon,
siring sa tawong nakakakua nin dakulang kayamanan.
163Ikinakaongis asin ikinababaldi ko an kaputikan,
alagad namomotan ko an saimong katogonan.
164Inoomaw taka pitong beses sa sarong aldaw
huli kan saimong matanos na mga paghukom.
165Dakulang katoninongan an nakakamtan kan mga namomoot sa saimong katogonan;
mayo nin makakapasingkog sa sainda.
166Linalaom ko an saimong kaligtasan, Kagurangnan,
asin ginigibo ko an saimong mga katogonan.
167Kinukuyog ko an saimong mga katukdoan,
asin bilog na puso kong namomotan.
168Kinukuyog ko an saimong mga kabotan asin katukdoan;
huli ta an gabos kong gibo nasa saimong atubang.
Pamibi Tanganing Tabangan
169Makaabot logod saimo an sakong inagrangay, Kagurangnan!
Tawe ako nin pakasabot sosog sa saimong panuga!
170Makaabot logod an sakong pamibi sa saimong atubang;
ligtasan ako sosog sa saimong panuga!
171Danay takang oomawon,
huli ta tinutukdoan mo ako kan saimong mga katogonan.
172Aawiton ko an saimong tataramon,
huli ta matanos an saimong mga katogonan.
173Magin andam logod an saimong kamot sa pagtabang sako,
huli ta pinili ko an mga pagboot mo.
174Minamawot ko an saimong kaligtasan, Kagurangnan,
asin an saimong katogonan iyo an sakong kaogmahan.
175Tugote akong mabuhay, tanganing maomaw taka;
tabangan logod ako kan saimong mga katukdoan.
176Nalagalag ako siring sa sarong nawawarang karnero;
hanapa an saimong sorogoon,
huli ta dai ko nalilingawan an saimong katogonan.
Currently Selected:
SALMO 119: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992