Exodo 18
18
Dinalaw ni Jetro si Moises
1Nabaretaan ni Jetro, na panugangan ni Moises asin padi sa Midian, an mga ginibo nin Dios para ki Moises asin sa mga Israelita kan iluwas niya sinda sa Egipto. 2Si Jetro an nag-ataman ki Zippora kan ini papulion ni Moises sa Midian, 3kaiba an duwa nindang aki. An ngaran kan saro Gersom#18:3 GERSOM: Sa pandangog an ngaran na ini nakakaarog sa Hebreyong tataramon na dayuhan. (huli ta nagsabi si Moises, “Dayuhan ako sa ibang daga”), 4asin an ngaran kan saro Eliezer#18:4 ELIEZER: Sa pandangog an ngaran na ini nakakaarog sa Hebreyong tataramon na tinabangan ako nin Dios. (huli ta nagsabi siya, “Tinabangan ako kan Dios nin sakong ama, asin ilinigtas niya ako sa kagadanan sa kamot kan hade nin Egipto”). 5Ipinag-iba ni Jetro paduman ki Moises an agom asin an duwang aki kaini sa bukid nin Dios na pinagkampohan niya sa kalangtadan. 6Nagpatogon si Jetro ki Moises na sinda maabot, 7kaya sinabat siya kaini. Nagduko si Moises kan saiyang payo sa pagtaong galang sa saiyang panugangan dangan hinadokan niya ini. Nagkomustahan sinda dangan naglaog sa tolda ni Moises. 8Ibinareta ni Moises ki Jetro an gabos na ginibo nin Kagurangnan sa hade asin sa mga Egipcio tanganing iligtas an mga Israelita. Inistorya man niya an kapagalan na namatean ninda sa paglakaw asin kun paano sinda tinabangan nin Kagurangnan. 9Naogma si Jetro kan madangog an gabos na karahayan na ginibo nin Kagurangnan sa Israel, 10asin siya nagsabi, “Omawon an Kagurangnan na nagligtas saindo sa kamot kan hade asin kan mga Egipcio. 11Ngunyan aram ko na nanggad na siya orog ki sa ibang mga dios, huli ta ilinigtas niya an mga Israelita sa pang-aapi sainda kan mga Egipcio.” 12Dangan nagdolot si Jetro nin tinutong na atang asin nin iba pang mga dolot sa Dios. Nag-abot si Aaron kaiba an gabos na lider nin Israel tanganing sa kaibahan kan panugangan ni Moises magkarakan sinda sa atubang nin Dios.
An Pagpili nin mga Hukom
(Deut. 1:9-18)
13Kan sunod na aldaw, nagtukaw si Moises sa paghusay sa mga kaso kan mga tawo, asin napalibotan siya ninda magpoon aga sagkod banggi. 14Kan mahiling ni Jetro an gabos na ginigibo ni Moises para sa mga tawo, naghapot siya, “Ano ining ginigibo mo? Tadaw ta sinosolo mo an trabaho? Magpoon aga sagkod banggi, napapalibotan ka nin mga tawo sa pagkonsulta saimo.”
15Nagsimbag si Moises, “Kaipuhan na gibohon ko ini huli ta boot maaraman kan mga tawo an kabotan nin Dios. 16Kun may duwang tawo na igwang dai pinagkakaoyonan, minadolok sinda sako asin hinuhukoman ko kun siisay sa sainda an tama. Ipinapaliwanag ko sainda an mga pagboot asin mga togon nin Dios.”
17Dangan nagsabi si Jetro, “Sala an ginigibo mo. 18Mapagal iyan para sa saimo asin sa mga tawo. Magabat an trabahong iyan asin dai mo kayang gibohon na solo sana. 19Dangoga ining hatol ko asin ibahan ka logod nin Dios. Maninigo na ika an mag-atubang sa Dios asin magdara saiya kan mga problema kan mga tawo. 20Itukdo mo sa sainda an mga togon saka an mga pagboot nin Dios asin kun paano sinda dapat na mamuhay dangan kun ano an dapat nindang gibohon. 21Laen pa kaiyan, magpili ka nin mga tawong maninigo, may pagkatakot sa Dios, mapapaniwalaan asin dai masusuholan. Gibohon mo sindang pamayo nin mga rinibong tawo, ginatos, maningkwenta, asin manampolo. 22Sinda an maglilingkod bilang mga hukom kan mga tawo sa gabos na panahon. Dadarahon ninda saimo an masakit na mga kaso, alagad sinda na an bahalang maghukom kan mga masayon. Kaya magigin pasil na para saimo huli ta katabang mo sinda sa saimong trabaho. 23Kun gibohon mo iyan, siring sa pagboot nin Dios, dai ka mapapagal asin madali pang matatawan nin solusyon an arin man na problema kan mga tawo.”
24Sinunod ni Moises an hatol ni Jetro. 25Nagpili siya sa mga Israelita nin mga lalaking maninigo asin ginibo niya sindang pamayo nin mga rinibong tawo, ginatos, maningkwenta asin manampolo. 26Sinda an naglingkod bilang mga hukom kan mga tawo sa gabos na panahon. Dinara ninda ki Moises an masakit na mga kaso alagad sinda na an naghukom kan masayon.
27Dangan tinugotan ni Moises na magpuli na an saiyang panugangan sa sadiring banwa.
Currently Selected:
Exodo 18: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
