Exodo 17

Tubig hale sa Gapo

(Bil. 20:1-13)

1Naghale sa kalangtadan nin Sin an bilog na komunidad nin Israel sa paoroontok na paglakaw siring sa pagboot nin Kagurangnan. Nagkampo sinda sa Refidim, alagad mayo duman nin tubig na maiinom, 2kaya nagreklamo sinda ki Moises asin nagsabi, “Tawan mo kami nin tubig na iinomon.”

Nagsimbag sainda si Moises, “Tadaw ta nagrereklamo kamo? Tano ta binabalo nindo an Kagurangnan?”

3Alagad paha nang marahay an mga tawo asin padagos sa pagreklamo ki Moises. Olay ninda, “Tadaw ta ilinuwas mo kami sa Egipto? Tanganing gadanon kami sa paha sagkod an samong mga aki asin mga hayop?”

4Kaya namibi si Moises sa Kagurangnan, “Ano an gigibohon ko sa mga tawong ini? Haros boot na ninda akong gapoon.”

5Nagtaram an Kagurangnan ki Moises, “Ipag-iba mo an nagkapira sa mga lider nin Israel asin mag-enot kamo sa mga tawo. Darahon mo an sugkod na ipinakol mo sa Salog nin Nilo. 6Duman sa Bukid nin Sinai, matindog ako sa ibabaw nin sarong gapo sa atubangan nindo. Pakolon mo an gapo, asin maluwas duman an tubig na iinomon kan mga tawo.” Ginibo ini ni Moises sa atubangan kan mga lider nin Israel.

7An lugar nginaranan Massa asin Meriba,#17:7 MASSA…MERIBA: Sa Hebreyo an mga ngaran na ini nangangahulogan pagbalo asin pagreklamo. huli ta nagreklamo an mga Israelita, asin huli ta binalo ninda an Kagurangnan kan sinda magsabi, “Kaibahan ta daw an Kagurangnan o dai?”

An Gera Laban sa mga Amalekita

8Nag-abot sa Refidim an mga Amalekita asin sinalakay an mga Israelita. 9Sinabihan ni Moises si Josue, “Magpili ka nin mga lalaki asin labanan nindo an mga Amalekita. Sa aga, matindog ako sa ibabaw kan bulod na kapot an sugkod nin Dios.” 10Sinunod ni Josue an pagboot ni Moises asin linabanan niya an mga Amalekita mantang si Moises, si Aaron asin si Hur nagtukad sa bulod. 11Mantang nakaitaas an mga kamot ni Moises, nanggagana an mga Israelita, alagad kun nakaibaba an saiyang mga kamot, nanggagana an mga Amalekita. 12Kan tanglay na an mga kamot ni Moises, nagkua si Aaron asin si Hur nin sarong gapo na matutukawan ni Moises. Mag-ibong nindang itinaas an mga kamot ni Moises asin sinosteneran sagkod na magsolnop an aldaw. 13Huli kaini, nadaog ni Josue an mga Amalekita.

14Dangan nagtaram an Kagurangnan ki Moises, “Isurat mo an kapangganahan na ini tanganing dai malingawan. Sabihan mo si Josue na paparaon ko sa daga an mga Amalekita.” 15Nagpatindog nin altar si Moises asin inapod niya ining “An Kagurangnan iyo an sakong Bandera.” 16Nagsabi siya, “Itaas nindo an bandera nin Kagurangnan! Sagkod pa man lalabanan nin Kagurangnan an mga Amalekita!”

Currently Selected:

Exodo 17: MBBBIK92

Highlight

Copy