Exodo 15

An Awit ni Moises

1Dangan si Moises asin an mga Israelita nagkanta kaining awit sa Kagurangnan:

“An Kagurangnan sakong aawitan huli ta dakulang panggana saiyang nakamtan;

mga kabayo asin mga lunad man itinapok niya sa kadagatan.

2An Kagurangnan an sakong kosog asin awit,

siya an sakong kaligtasan;

siya an sakong Dios, kaya sakong oomawon;

Dios nin sakong ama, kaya sakong papalangkawon.

3An Kagurangnan sarong paralaban;

Kagurangnan an saiyang ngaran.

4“Mga karwahe asin hukbo nin Egipto sa dagat saiyang itinapok;

mga piling opisyal gabos, sa Dagat na Pula nagkaralamos.

5Tinahoban sinda kan dagat na hararom;

siring sa gapo, tolos sindang nag-irarom.

6“An too mong kamot, O Kagurangnan, makangingirhat sa kosog;

an mga kaiwal rinoronot kan too mong kamot.

7Mga kaiwal dinaog kan saimong dakulang kapangyarihan;

garo dagaming sinulo kan saimong kaanggotan.

8Hinoyopan mo an dagat asin an tubig uminitaas,

tuminindog na garo lanob;

asin an kairaroman tuminagas.

9Nagsabi an kaiwal, ‘Lalamagon ko sinda asin dadakopon;

saindang kayamanan sakong babangaon; gabos na magustohan sakong kukuahon

asin sa bagsik kan espada gabos sasamsamon.’

10Alagad sa saro mong hinangos, O Kagurangnan, an mga Egipcio nalamos,

siring sa timga na nag-irarom tolos.

11“Kagurangnan, siisay sa mga dios an arog saimo?

An arog saimo na makangangalas an kabanalan?

Mga milagro asin gibo mong ngangalasan, siisay an makakaarog kaiyan?

12Saimong inunat an too mong kamot,

asin an mga kaiwal hinalon kan daga.

13Maimbod sa panuga, nangenot ka sa mga tawong saimong ilinigtas;

sinda inantabayan mo kan saimong kosog pasiring sa saimong banal na daga.

14Nakadangog an mga banwaan asin tinarakigan;

mga Filisteo makuring takot an namatean.

15Mga lider nin Edom napano nin katakotan;

makokosog na lalaki sa Moab pinagtarakigan;

nawaraan nin isog gabos na taga Canaan.

16Pakahiling kan saimong kosog, O Kagurangnan,

takot asin takig sinda inabotan,

siring sa gapo dai sinda nakahiro

sagkod na makaagi an saimong banwaan,

mga tawong ilinigtas mo sa kaoripnan.

17Dinara mo sinda asin itinanom sa sadiri mong bukid,

an lugar, O Kagurangnan,

na pinili mo bilang saimong erokan,

an Templo na saimong hinaman.

18Ika, O Kagurangnan, an maghahade sagkod nuarin pa man.”

An Awit ni Miriam

19An mga Israelita nagbalyo sa dagat na an linakawan iyo an mamarang daga. Alagad kan lamagon sinda sagkod sa dagat kan mga nakakabayo asin mga nakakarwaheng Egipcio, ibinalik nin Kagurangnan sa dating rarom an tubig asin natahoban sinda.

20Si Miriam, an propetang tugang ni Aaron, nagkua kan saiyang tamborin, dangan nagsurunod saiya an gabos na kababaehan na nagtutugtog kan saindang mga tamborin asin nagsasayaw. 21Kinantahan sinda ni Miriam:

“Mag-awit kamo sa Kagurangnan huli ta saiyang nakamtan mamurawayon na kapangganahan.

Mga kabayo asin mga lunad man, itinapok niya sa kadagatan.”

An Mapait na Tubig

22Sa pangengenot ni Moises, naghale an mga tawo sa Dagat na Pula asin nagpasiring sa kalangtadan nin Sur. Tolong aldaw na sindang nagralakaw, alagad mayo sindang nakuang tubig. 23Dangan nakaabot sinda sa Mara, alagad dai ninda nainom an tubig duman huli ta mapait, kaya Mara#15:23 MARA: Sa Hebreyo, an ngaran na ini nangangahulogan “mapait.” an ngaran kan lugar. 24Nagreklamo ki Moises an mga Israelita, “Ano an samong iinomon?” 25Kaya namibi sa Kagurangnan si Moises, asin ipinahiling saiya nin Kagurangnan an sarong kaputol na kahoy. Kinua ini ni Moises dangan itinapok sa tubig asin nahale an pait kan tubig.

Sa lugar na idto itinao sainda nin Kagurangnan an mga pagboot na saindang pagkukuyogon asin duman sinda pinagbalo. 26Nagtaram siya, “Kun bilog na puso nindo akong susunodon huli kan paggibo nin matanos asin huli sa pag-otob kan sakong mga togon saka mga pagboot, dai ko kamo papadusahan kan arin man sa mga kahelangan na ipinadara ko sa mga Egipcio. Ako, an Kagurangnan an saindong parabolong.”

27Dangan nakaabot sinda sa Elim, saen igwa nin doseng burabod asin setentang poon nin palma. Duman sinda nagkampo sa kataed kan mga tubig.

Currently Selected:

Exodo 15: MBBBIK92

Highlight

Copy