Exodo 14
14
An Pagbalyo sa Dagat na Pula
1Dangan nagtaram an Kagurangnan ki Moises, 2“Sabihan mo an mga Israelita na magbalik asin magkampo sa atubang kan Pi-hahirot, sa pagultanan kan Migdol asin kan Dagat na Pula, harani sa Baal-zefon. 3Maghohona an hade na nagkaralagalag an mga Israelita asin nagkaralaom sa kalangtadan. 4Papatagason ko an saiyang puso, kaya lalamagon niya kamo, alagad an kapangganahan ko saiya asin sa saiyang mga hukbo an matao sako nin kaomawan. Dangan maaaraman ninda na ako an Kagurangnan.” Sinunod kan mga Israelita an ipinagibo sainda.
5Kan masabihan an hade kan Egipto na nagdulag an mga Israelita, nagbago nin isip an hade, asin an saiyang mga opisyal. Nagsarabi sinda, “Ano ining ginibo ta? Pinabayaan tang makahale an mga Israelita asin ngunyan nawaraan logod kita nin mga oripon.” 6Ipinaandam kan hade an saiyang karwahe asin ipinag-iba an saiyang mga hukbo. 7Nagluwas siya kaiba an gabos niyang karwahe, kabilang an seis syentos na piling karwahe; an lambang saro kaini may lunad na opisyal. 8Pinatagas nin Kagurangnan an puso kan hade kaya linamag kaini an mga Israelita, na mapangganang#14:8 mapangganang; o na nasa pangataman nin Kagurangnan. nagharale. 9Linamag sinda kan mga hukbo, kan mga nakakabayo saka mga nakakarwaheng soldados nin Egipto asin inabotan sinda na nakakampo sa pangpang kan Dagat na Pula, harani sa Pi-hahirot asin Baal-zefon.
10Kan mahiling kan mga Israelita na harani na an hade saka an saiyang mga soldados, natakot sinda asin naghagad nin tabang sa Kagurangnan. 11Sinabihan ninda si Moises, “Mayo na daw nin mga lulubngan sa Egipto kaya dinara mo kami tanganing digdi sa kalangtadan magadan? Hilinga an ginibo mo sa pagluwasan mo samo sa Egipto! 12Bakong sinabihan mi na ika bago kita naghale na arog kaini an mangyayari? Sinabihan mi ika na dai mo kami pakiaraman asin na pabayaan mo kaming magpadagos sa paglingkod sa mga Egipcio. Mas marahay pang magin oripon kami ninda ki sa magadan digdi sa kalangtadan.”
13Nagsimbag si Moises, “Dai kamo matakot! Dai kamo maghiro! Hilingon nindo kun ano an gigibohon nin Kagurangnan tanganing iligtas kamo ngunyan; dai na nindo mahihiling an mga Egipciong iyan sagkod pa man. 14An Kagurangnan an makikipaglaban para sa saindo. Mayo kamong gigibohon maski ano man.”
15Nagtaram an Kagurangnan ki Moises, “Tano ta naghahagad ka sako nin tabang? Sabihan mo an mga tawo na magpadagos sa paglakaw. 16Iitaas mo an saimong sugkod asin unaton mo an saimong kamot sa tangod kan dagat. An tubig mababanga tanganing makalakaw sa mamarang daga an mga Israelita pasiring sa ibong kan dagat. 17Orog na papatagason ko an puso kan mga Egipcio kaya lalamagon ninda an mga Israelita, asin makakakua ako nin kaomawan huli kan sakong kapangganahan laban sa hade, sa saiyang mga hukbo asin sa saiyang mga nakakabayo saka mga nakakarwaheng soldados. 18Sa oras na madaog ko sinda, maaaraman kan mga Egipcio na ako an Kagurangnan.”
19An anghel nin Dios na nasa enotan kan hukbo nin Israel nagpahurihan. Nagpahurihan man an hariging panganoron sa mga Israelita dangan nag-ontok 20sa pagultanan ninda asin kan mga Egipcio. An panganoron nagtao nin kadikloman sa mga Egipcio, alagad nagtao nin liwanag sa mga Israelita. Kaya nag-agi an bilog na banggi na dai nagkaharanihan an duwang hukbo. 21Inunat ni Moises an saiyang kamot sa tangod kan dagat, asin pinabalik nin Kagurangnan an dagat sa paagi nin makosog na doros hale sa sirangan. Sa bilog na banggi naghoyop an doros asin an dagat nagin mamarang daga; nabanga an tubig. 22Nag-ibong sa dagat an mga Israelita na an linakawan iyo an mamarang daga na nasa pagultanan kan duwang lanob nin tubig. 23Linamag sinda kan mga nakakabayo asin mga nakakarwaheng Egipcio sagkod sa tahaw kan dagat. 24Kan maaga na, an mga Egipcio dinungaw nin Kagurangnan hale sa harigi nin kalayo asin nin panganoron dangan tinakot niya sinda. 25Kaya nakalubong an mga rweda kan saindang karwahe kaya nagin masakit an paglamag ninda. Nagsabi an mga Egipcio, “An Kagurangnan an nakikilaban para sa mga Israelita. Magharale na kita digdi!”
26Dangan nagtaram an Kagurangnan ki Moises, “Unata an saimong kamot sa tangod kan dagat tanganing matahoban kan tubig an mga Egipcio, an saindang mga karwahe asin an mga lunad kaiyan.” 27Kaya inunat ni Moises an saiyang kamot sa tangod kan dagat, asin pagkaaga nagbalik an tubig sa dating rarom. Naghingowang makadulag an mga Egipcio, alagad itinapok sinda nin Kagurangnan sa tahaw kan dagat. 28Nagbalik an tubig asin natahoban an gabos na karwahe, an mga nagpapadalagan kaiyan, sagkod an gabos na hukbo nin Egipto na naglamag kan mga Israelita sa dagat; mayong natada maski saro. 29Alagad nagbaralyo sa dagat an mga Israelita na an linakawan iyo an mamarang daga, na nasa pagultanan kan duwang lanob nin tubig.
30Kan aldaw na iyan, an banwaan nin Israel ilinigtas nin Kagurangnan sa mga Egipcio; nahiling ninda an mga gadan na Egipcio sa baybayon kan dagat. 31Nagkaigwa nin pagkatakot sa Kagurangnan an mga Israelita kan mahiling ninda an saiyang dakulang kapangyarihan kan daogon niya an mga Egipcio. Nagkaigwa sinda nin pagtubod sa Kagurangnan sagkod ki Moises na saiyang sorogoon.
Currently Selected:
Exodo 14: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
