Luk, echî 6

Nchot ofú oyoá-biji

(Mat 12.1-8; Mak 2.23-28)

1Ka ofú oyoá-biji bhə́t, Jisos na atóbhá abhê á kí chiŋ ka ebhin nkʉi etat. Ágbán abhê á róghe ebhóŋóm nkʉi nnyi a ri ka ebhin áji á fiŋa á dik.#Otira 23.25. 2Etʉ̂ ane echəme Farasi á bhə̂p ábho sê, “Jen kən o kí yim ên ejûm nji ebhín Obhasi é gbʉ́i sê nne a kâ yîm ka ofú oyoá-biji noŋ égyé?”

3Kən Jisos a táme ábho se, “Nâ-ngá ó ka nok ên oyúk ejûm nji Debhit na ane abhê á yími ebhú njaé á yama ábho a?#1 Sam 21.1-6. 4A gyée ókʉ́rí achot Obhasi, a kə̂n édî nji á jóme á káre Obhasi, a kíri na ane abhê, á dî. To ebhín é fíi sê akará-agore Obhasi átíŋ nâ á dik ntʉ́ghi édî njí.#Mbín 24.9. 5Deê ń sə́ré ên mân bəre Mmon-i-ntem-nne a ri ntûfâm ofú oyoá-biji.”

Jisos a yîm nne nnyo á maŋá ékpoê-obhô a sôn

(Mat 12.9-14; Mak 3.1-6)

6Ka ofú oyoá-biji mbi tat, Jisos a gyê ka óchâm achot Obhasi a kpí achot. Nne yót a ri áfo nnyo obhô-orûm obhê ó kpo. 7Etʉ̂ atóŋá-ebhín na ane echəme Farasi á rî áfo, á kí wom kpe echî nchot nnyi á kí fi Jisos sê a yîm ejûm ebhí. Á kebha yê nyamḿ sê á yén ájoé tîk a yîm ane á sôn ka ofú oyoá-biji. 8Kən Jisos a ríŋi íkíkéré ábho, a bhîŋ nne ékpoê-obhô nnyó se, “Duî ngyím, fap bhák ngá mbá-ochî.” Nne nnyó a rúi ngyím a jak.

9Jisos a chôt mân na ane mbá se, “Deê mme ḿ bə́p ên kpá, ebhín ejə́ré é sə́re sê é yîm nan ka ofú oyoá-biji? É yîm ono kən obhí, é nyáŋé ekpin í nne kən é bhíbhí obhíbhí?”

10Nji a bhə́bhe ebhə̂p njí, a yûŋ amə̂t a kêp ane mbá chénchén a fáre. A kpíghi mân, a sə́re nne emaŋé nnyó se, “Nyabhê obhô obhâ.” A yîm fə́ne ekpak njí, obhô ó sôn. 11Kən é yâm ane echəme Farasi na atóŋá-ebhín mbá, é kpô. Á róghe ekubhúm ekpak ejûm nji ábho á kí yim na Jisos.

Jisos a sâŋ ágbán abhê ófó na ábháe

(Mat 10.1-4; Mak 3.13-19)

12Ka ebhú áji Jisos a jak agore ebhat agúí etat. A kə̂t ágo atʉ́ ndə́m a gorá Obhasi. 13Na ofú, a bhîŋ ane mba á tóbha yê á bhak mbâ eye. Nji á bháe, a sâŋ ábho ófó na ábháe, mba se nâ ágbán abhê. 14Ńgyê obhiŋ ágbán mbá ófó na ábháe: Simun nnyo Jisos a karê mbiŋ se Pita na mmon-i-nnyen owe Andru na Jems na Jon é kpê na Firip na Batromiyu. 15A sâŋ fə́ne Matiyu na Tomas na Jems nnyo mmon Afiyus na Simun nnyo á chóra sê kpe ekʉ̂ kə́n a kâm ka okot eték ejê. 16A sâŋ fə́ne Juda nnyo mmon i Jems na Juda Iskariyot nnyo a bhâ gúri yê.

Jisos a kí kpi a yimá ane á sóna

(Mat 4.23-25)

17Jisos a bhə̂t mân egúí njí na atóbhá abhê a bhâ kpúghi ane etî-etî mba á tóbha yê na etî-etî mba tat ka eji ńcherê. Mba tat mbá á dʉ̂ ebhat í Judiya ndə́m, etʉ̂ Jerusarem. Etʉ̂ á dʉ̂ fə́ne nték akpe aya nnyi Taya na Sidon. 18Á bháe sê á bhá yúk okpígha-ejûm obhê, sê fə́ne a yim ábho á son. Jisos a yîm mba ojê ó kára ábho oseŋe á sôn. 19Kpe énê mân a kí nok a kəmé Jisos, ka ikom mfi í fábha yê ka biji, nâ í yíma ane á sóna.

Ogyebhá-ḿbə́ŋé na nsôn

(Mat 5.1-12)

20Jisos a yûŋ amə̂t a kêp ane mba á tóbha yê, a chôt se

“Deê ogyebhá-ḿbə́ŋé ó jóe na ên akpák,

ka otúi Obhasi a ri obhə́né.

21Deê ogyebhá-ḿbə́ŋé ó jóe na ên

mba mfá-mfá o kí kpo ên njaé,

tîk o dî ên o gyʉ́ri.

Deê ogyebhá-ḿbə́ŋé ó jóe na ên

mba mfá-mfá o kí rʉri ên ekʉ̂,

tîk o yóe ên amə̂ŋ.

22Deê ogyebhá-ḿbə́ŋé ó jóe na ên

nji ane á ko ên ka ebhan,

á jîŋ ên, á tû ên, á sə́ra sê ên a ri ane abhí,

ka obhô Mmon-i-ntem-nne.#1 Pita 4.14.

23“É fap na ên ka ekpak njí, deê ó bhə́n ên obhə́n na ogyebhá-ḿbə́ŋé, ka Obhasi a kî ên ekpatə́m ekəp ka ósô. Echî aŋ? Éməné, ane ábho á yími ekpak njí jə́t na akará-otîp Obhasi.#2 É fâp 36.16; Etûm 7.52.

24“Tîk é bhîp ên kpe-eji, ên ane-efaŋ,

ka mfá-mfá ó di ên ejə́né ekpin.

25Tîk é bhîp ên fə́ne kpe-eji,

ên ane mba ó fon ên mfá-mfá ó di ó gyʉri,

ka o ri ó kə́t ên njaé.

Tîk é bhîp ên kpe-eji,

ên mba mfá-mfá o kí yoé ên amə̂ŋ,

ka tîk é kət, o rʉ́ri ên ekʉ̂.

26Tîk é bhîp ên kpe-eji,

ên mba ngun á kí səre sê ó chiŋi ên obhô.

Nâ noŋ fə́ne ásé ábho mba éməné á sə́ra sê

akará-otîp mba baram ebhú áji á chiŋi obhô.”

E fonê ka etóŋóm okot mbâ ane-ebhan abhə́ré

(Mat 5.38-48; 7.12a)

27Jisos a bhâ chôt mân se, “N kí səre ên, ên mba ó yugha ên ə̂m, bəre kpe nne a bhanê ên obhan, tóŋé ên yê okot. Tóŋe ên onobhá-eji mbâ ane mba á ká wom sê á yén ên na amə̂t. 28Gorê ên sê Obhasi a karé enare mbâ ane mba á góra sê é bhíp ên. Gorê ên yê se a ri nsôn na ane mba á kára ên oseŋe. 29Nne á sum wâ nsâp ka okîk bhə́t, tóŋe mbi ngá yê a súm. Nne á tabhé nkʉ̂ eya, deê yê a kpéré a kô nkʉ̂ biji. 30Nne á bhəp wâ ejûm nji ó fon, karê yê. Nne á ko ejûm mbâ eya, ka bhə́p yê se a fé. 31Nâ yim ên na atem-ane ekpak o kí wom ábho á yîm na ên.#Mat 7.12.

32“Ájoé ó kot a ri nne nnyo a korê wâ, echî nji Obhasi a kí kpo karé wâ ekəp etat a ri jen? Kpe ayimá-obhí á kot ane mba á kóra ábho. 33Ó to fə́ne se ó tóŋé onobhá-eji a ri mbâ ane mba á tóŋa wâ onobhá-eji, echî nji Obhasi a kí karé wâ ekəp a ri jen? Kpe ayimá-obhí á kí toŋe onobhá-eji a ri mbâ ane mba á tóŋa ábho onobhá-eji. 34Ájoé se o kí bho ejûm a ri mbâ ane mba kə́n á fôn á fê wâ, echî nji Obhasi a kí kpo karé wâ ekəp a ri jen? Kpe ayimá-obhí á kí bho atem-ayimá-obhí sê á chə́bhe njəm á kó ekan-ékân noŋ á bhóe ábho. 35Ka fon ên ekpin áno. Deê ó kôt ên ane ebhan abhə́né. Tóŋe ên ábho onobhá-eji. Bho ên ábho kən o kâ kî ên amə̂t sê á fé ên. Ó yim ên ka ekpak njí, ekəp ejə́né ka Obhasi ósô tîk é faŋ, tîk o chə́bhe ên abhon abhê, ka yê a kí toŋe onobhá-eji mbâ ane mba kpe o yimî jen é bhó sui ábho kpe ejûm, na mbâ ayimá-ndibhí. 36Ri ên nsôn na atem, ekpak nji Ńsé owəré Obhasi á rik êt.”

Nne a məŋé ekpak nji a kí taŋ nchot i ntem

(Mat 7.1-5)

37Jisos se, “Nne a kâ bhíbhi ntem esup, Obhasi fə́ne á bhó bhibhi yê. Ó ro bhibhi ntem, Obhasi tîk á bhó bhibhi wâ eróŋ. Ntem á yim wâ obhí, ri yê nsôn gyinî. Obhasi tîk a ri wâ nsôn eróŋ a sû obhí obhâ. 38Kirî nji o fonê karê ntem, Obhasi tîk a fê wâ, o kí fon o jéghe ojeghé. É kí sui ta é fugha noŋ kpe nne a kóe nkon a kak ka ntâk kən á kak a nyíŋi, á kak a nyíŋi, a nyerá. Echî aŋ? Ekpak o gaê o káre ntem, nâ noŋ Obhasi a kí gaé fə́ne a káre wâ.”

39Nji Jisos a chorê achot mmá chénchén, a tûp mân egan se, “Ntána-amə̂t á bhó tʉ ntem-ntána-amə̂t mbá. Á tʉ, ábho ábháe chénchén á kí gbo ka ébhírí.#Mat 15.14. 40Mmon-i-nwet kpe yót nnyo a kí məŋé a chíŋi ntóŋá-tóŋá cháŋ. Ebhú á kpi a mân kən a kí si ńgyímí nne nnyo a tóŋe yê.#Mat 10.24-25; Jon 13.16; 15.20.

41“Nan kən o kí kep ńtép nnyi a ri ka eyə̂t í ntem, ó bhó məŋé se nnyi a ri ka ejâ a ri nkoghe? 42O kí yim nan ó sə́re ntem se á tóŋé eyə̂t ó yíghi yê ńtép nji nkoghe a ri ka ejâ eyə̂t? Ane áfúbhí! Yighî ên kpá nkoghe nnyi a ri ên ka amə̂t kən ó yén ên mbá nono ó yíghi ńtép nnyi a ri ka amə̂t atem.”

Étí na nkap eye

(Mat 7.15-20; 12.33-35)

43Jisos se, “Nnyen étí é rî ka biji, é bhó karé nkap nnyi bhí, nji bhí fə́ne é bhó karé nkap nnyi no. 44O kí riŋí kpe njə́n étí ka nkap eye. Nne á bhó bhoŋ mbaŋ ka étí ajoŋe. Nne á bhó bhoŋ ńchít ka éfáŋá-mfá.#Mat 12.33. 45Achot ano mma á súi nnyen i nne ka ḿbə́ŋé nâ nnyen íkíkéré í kí fap, í bhak fə́ne na onono. Achot abhí fə́ne mma á súi nne mbí ka ḿbə́ŋé nâ íkíkéré ibhí í kí fap, í bhak fə́ne na ndibhí. Echî aŋ? Nji é kí fap nne ka nnyo nâ nji é rî yê ka ḿbə́ŋé.”#Mat 12.34.

Agbeghá-ojû ábháe

(Mat 7.24-27)

46Jisos se, “Ó bhiŋá ên ə̂m jen sê, ntûfâm, ntûfâm, nji ó bhó yim ên ejûm nji ń səre ên bəre ó yîm? 47Nne kpe nnyón nnyo a bháe mbâ amé a yûk ejûm nji n chorê, a yîm ka ekpak nji a yúghi, ńgyê ekpak nji ntʉ́ghi nne nnyó a ri. 48Ntʉ́ghi nne ányo a ri noŋ nne nnyo ebhú a kí gbe njû, a sə̂m kpá ngûm nnyi ábhághé-ojû á kí chiŋ, kən a kô atáé a réne. Ebhú mbúta a bháe, aya a gyê, a fə̂ŋ, a sûm njû nnyí, kən kpe ejûm é ká yim. 49Kən nne nnyo a kí yuk esə́re ejámé á bhó top ka eyimím, a ri ekan-ékân noŋ nne nnyo kən a gbe njû, á ka sə́m ngûm nnyi ábhághé-ojû á kí chiŋ a réné atáé. Ebhú mbúta a bháe, aya a gyê, a fə̂ŋ, a sûm njû, njû a gbô ntə̂m yə́t, a jóghe a mân oman.”

Currently Selected:

Luk, echî 6: ETUNT

Highlight

Copy