Ejagham - 1996 Edition (NT)

Ejagham New Testament © Bible Society of Nigeria and Bible Society of Cameroon, 1996.

Ka ofú oyoá-biji bhə́t, Jisos na atóbhá abhê á kí chiŋ ka ebhin nkʉi etat. Ágbán abhê á róghe ebhóŋóm nkʉi nnyi a ri ka ebhin áji á fiŋa á dik. Etʉ̂ ane echəme Farasi á bhə̂p ábho sê, “Jen kən o kí yim ên ejûm nji ebhín Obhasi é gbʉ́i sê nne a kâ yîm ka ofú oyoá-biji noŋ égyé?”
Kən Jisos a táme ábho se, “Nâ-ngá ó ka nok ên oyúk ejûm nji Debhit na ane abhê á yími ebhú njaé á yama ábho a? A gyée ókʉ́rí achot Obhasi, a kə̂n édî nji á jóme á káre Obhasi, a kíri na ane abhê, á dî. To ebhín é fíi sê akará-agore Obhasi átíŋ nâ á dik ntʉ́ghi édî njí. Deê ń sə́ré ên mân bəre Mmon-i-ntem-nne a ri ntûfâm ofú oyoá-biji.”


Ka ofú oyoá-biji mbi tat, Jisos a gyê ka óchâm achot Obhasi a kpí achot. Nne yót a ri áfo nnyo obhô-orûm obhê ó kpo. Etʉ̂ atóŋá-ebhín na ane echəme Farasi á rî áfo, á kí wom kpe echî nchot nnyi á kí fi Jisos sê a yîm ejûm ebhí. Á kebha yê nyamḿ sê á yén ájoé tîk a yîm ane á sôn ka ofú oyoá-biji. Kən Jisos a ríŋi íkíkéré ábho, a bhîŋ nne ékpoê-obhô nnyó se, “Duî ngyím, fap bhák ngá mbá-ochî.” Nne nnyó a rúi ngyím a jak.
Jisos a chôt mân na ane mbá se, “Deê mme ḿ bə́p ên kpá, ebhín ejə́ré é sə́re sê é yîm nan ka ofú oyoá-biji? É yîm ono kən obhí, é nyáŋé ekpin í nne kən é bhíbhí obhíbhí?”
Nji a bhə́bhe ebhə̂p njí, a yûŋ amə̂t a kêp ane mbá chénchén a fáre. A kpíghi mân, a sə́re nne emaŋé nnyó se, “Nyabhê obhô obhâ.” A yîm fə́ne ekpak njí, obhô ó sôn. Kən é yâm ane echəme Farasi na atóŋá-ebhín mbá, é kpô. Á róghe ekubhúm ekpak ejûm nji ábho á kí yim na Jisos.


Ka ebhú áji Jisos a jak agore ebhat agúí etat. A kə̂t ágo atʉ́ ndə́m a gorá Obhasi. Na ofú, a bhîŋ ane mba á tóbha yê á bhak mbâ eye. Nji á bháe, a sâŋ ábho ófó na ábháe, mba se nâ ágbán abhê. Ńgyê obhiŋ ágbán mbá ófó na ábháe: Simun nnyo Jisos a karê mbiŋ se Pita na mmon-i-nnyen owe Andru na Jems na Jon é kpê na Firip na Batromiyu. A sâŋ fə́ne Matiyu na Tomas na Jems nnyo mmon Afiyus na Simun nnyo á chóra sê kpe ekʉ̂ kə́n a kâm ka okot eték ejê. A sâŋ fə́ne Juda nnyo mmon i Jems na Juda Iskariyot nnyo a bhâ gúri yê.


Jisos a bhə̂t mân egúí njí na atóbhá abhê a bhâ kpúghi ane etî-etî mba á tóbha yê na etî-etî mba tat ka eji ńcherê. Mba tat mbá á dʉ̂ ebhat í Judiya ndə́m, etʉ̂ Jerusarem. Etʉ̂ á dʉ̂ fə́ne nték akpe aya nnyi Taya na Sidon. Á bháe sê á bhá yúk okpígha-ejûm obhê, sê fə́ne a yim ábho á son. Jisos a yîm mba ojê ó kára ábho oseŋe á sôn. Kpe énê mân a kí nok a kəmé Jisos, ka ikom mfi í fábha yê ka biji, nâ í yíma ane á sóna.


Jisos a yûŋ amə̂t a kêp ane mba á tóbha yê, a chôt se
“Deê ogyebhá-ḿbə́ŋé ó jóe na ên akpák,
ka otúi Obhasi a ri obhə́né.
Deê ogyebhá-ḿbə́ŋé ó jóe na ên
mba mfá-mfá o kí kpo ên njaé,
tîk o dî ên o gyʉ́ri.
Deê ogyebhá-ḿbə́ŋé ó jóe na ên
mba mfá-mfá o kí rʉri ên ekʉ̂,
tîk o yóe ên amə̂ŋ.
Deê ogyebhá-ḿbə́ŋé ó jóe na ên
nji ane á ko ên ka ebhan,
á jîŋ ên, á tû ên, á sə́ra sê ên a ri ane abhí,
ka obhô Mmon-i-ntem-nne.
“É fap na ên ka ekpak njí, deê ó bhə́n ên obhə́n na ogyebhá-ḿbə́ŋé, ka Obhasi a kî ên ekpatə́m ekəp ka ósô. Echî aŋ? Éməné, ane ábho á yími ekpak njí jə́t na akará-otîp Obhasi.
“Tîk é bhîp ên kpe-eji, ên ane-efaŋ,
ka mfá-mfá ó di ên ejə́né ekpin.
Tîk é bhîp ên fə́ne kpe-eji,
ên ane mba ó fon ên mfá-mfá ó di ó gyʉri,
ka o ri ó kə́t ên njaé.
Tîk é bhîp ên kpe-eji,
ên mba mfá-mfá o kí yoé ên amə̂ŋ,
ka tîk é kət, o rʉ́ri ên ekʉ̂.
Tîk é bhîp ên kpe-eji,
ên mba ngun á kí səre sê ó chiŋi ên obhô.
Nâ noŋ fə́ne ásé ábho mba éməné á sə́ra sê
akará-otîp mba baram ebhú áji á chiŋi obhô.”


Jisos a bhâ chôt mân se, “N kí səre ên, ên mba ó yugha ên ə̂m, bəre kpe nne a bhanê ên obhan, tóŋé ên yê okot. Tóŋe ên onobhá-eji mbâ ane mba á ká wom sê á yén ên na amə̂t. Gorê ên sê Obhasi a karé enare mbâ ane mba á góra sê é bhíp ên. Gorê ên yê se a ri nsôn na ane mba á kára ên oseŋe. Nne á sum wâ nsâp ka okîk bhə́t, tóŋe mbi ngá yê a súm. Nne á tabhé nkʉ̂ eya, deê yê a kpéré a kô nkʉ̂ biji. Nne á bhəp wâ ejûm nji ó fon, karê yê. Nne á ko ejûm mbâ eya, ka bhə́p yê se a fé. Nâ yim ên na atem-ane ekpak o kí wom ábho á yîm na ên.
“Ájoé ó kot a ri nne nnyo a korê wâ, echî nji Obhasi a kí kpo karé wâ ekəp etat a ri jen? Kpe ayimá-obhí á kot ane mba á kóra ábho. Ó to fə́ne se ó tóŋé onobhá-eji a ri mbâ ane mba á tóŋa wâ onobhá-eji, echî nji Obhasi a kí karé wâ ekəp a ri jen? Kpe ayimá-obhí á kí toŋe onobhá-eji a ri mbâ ane mba á tóŋa ábho onobhá-eji. Ájoé se o kí bho ejûm a ri mbâ ane mba kə́n á fôn á fê wâ, echî nji Obhasi a kí kpo karé wâ ekəp a ri jen? Kpe ayimá-obhí á kí bho atem-ayimá-obhí sê á chə́bhe njəm á kó ekan-ékân noŋ á bhóe ábho. Ka fon ên ekpin áno. Deê ó kôt ên ane ebhan abhə́né. Tóŋe ên ábho onobhá-eji. Bho ên ábho kən o kâ kî ên amə̂t sê á fé ên. Ó yim ên ka ekpak njí, ekəp ejə́né ka Obhasi ósô tîk é faŋ, tîk o chə́bhe ên abhon abhê, ka yê a kí toŋe onobhá-eji mbâ ane mba kpe o yimî jen é bhó sui ábho kpe ejûm, na mbâ ayimá-ndibhí. Ri ên nsôn na atem, ekpak nji Ńsé owəré Obhasi á rik êt.”


Jisos se, “Nne a kâ bhíbhi ntem esup, Obhasi fə́ne á bhó bhibhi yê. Ó ro bhibhi ntem, Obhasi tîk á bhó bhibhi wâ eróŋ. Ntem á yim wâ obhí, ri yê nsôn gyinî. Obhasi tîk a ri wâ nsôn eróŋ a sû obhí obhâ. Kirî nji o fonê karê ntem, Obhasi tîk a fê wâ, o kí fon o jéghe ojeghé. É kí sui ta é fugha noŋ kpe nne a kóe nkon a kak ka ntâk kən á kak a nyíŋi, á kak a nyíŋi, a nyerá. Echî aŋ? Ekpak o gaê o káre ntem, nâ noŋ Obhasi a kí gaé fə́ne a káre wâ.”
Nji Jisos a chorê achot mmá chénchén, a tûp mân egan se, “Ntána-amə̂t á bhó tʉ ntem-ntána-amə̂t mbá. Á tʉ, ábho ábháe chénchén á kí gbo ka ébhírí. Mmon-i-nwet kpe yót nnyo a kí məŋé a chíŋi ntóŋá-tóŋá cháŋ. Ebhú á kpi a mân kən a kí si ńgyímí nne nnyo a tóŋe yê.
“Nan kən o kí kep ńtép nnyi a ri ka eyə̂t í ntem, ó bhó məŋé se nnyi a ri ka ejâ a ri nkoghe? O kí yim nan ó sə́re ntem se á tóŋé eyə̂t ó yíghi yê ńtép nji nkoghe a ri ka ejâ eyə̂t? Ane áfúbhí! Yighî ên kpá nkoghe nnyi a ri ên ka amə̂t kən ó yén ên mbá nono ó yíghi ńtép nnyi a ri ka amə̂t atem.”


Jisos se, “Nnyen étí é rî ka biji, é bhó karé nkap nnyi bhí, nji bhí fə́ne é bhó karé nkap nnyi no. O kí riŋí kpe njə́n étí ka nkap eye. Nne á bhó bhoŋ mbaŋ ka étí ajoŋe. Nne á bhó bhoŋ ńchít ka éfáŋá-mfá. Achot ano mma á súi nnyen i nne ka ḿbə́ŋé nâ nnyen íkíkéré í kí fap, í bhak fə́ne na onono. Achot abhí fə́ne mma á súi nne mbí ka ḿbə́ŋé nâ íkíkéré ibhí í kí fap, í bhak fə́ne na ndibhí. Echî aŋ? Nji é kí fap nne ka nnyo nâ nji é rî yê ka ḿbə́ŋé.”


Jisos se, “Ó bhiŋá ên ə̂m jen sê, ntûfâm, ntûfâm, nji ó bhó yim ên ejûm nji ń səre ên bəre ó yîm? Nne kpe nnyón nnyo a bháe mbâ amé a yûk ejûm nji n chorê, a yîm ka ekpak nji a yúghi, ńgyê ekpak nji ntʉ́ghi nne nnyó a ri. Ntʉ́ghi nne ányo a ri noŋ nne nnyo ebhú a kí gbe njû, a sə̂m kpá ngûm nnyi ábhághé-ojû á kí chiŋ, kən a kô atáé a réne. Ebhú mbúta a bháe, aya a gyê, a fə̂ŋ, a sûm njû nnyí, kən kpe ejûm é ká yim. Kən nne nnyo a kí yuk esə́re ejámé á bhó top ka eyimím, a ri ekan-ékân noŋ nne nnyo kən a gbe njû, á ka sə́m ngûm nnyi ábhághé-ojû á kí chiŋ a réné atáé. Ebhú mbúta a bháe, aya a gyê, a fə̂ŋ, a sûm njû, njû a gbô ntə̂m yə́t, a jóghe a mân oman.”

Listen to Luk, echî 6