Ejagham - 1996 Edition (NT)

Ejagham New Testament © Bible Society of Nigeria and Bible Society of Cameroon, 1996.

Nji Jisos a manê esə́rə́m achot mmá fép mbâ ane mbá, a mághe a jak nnyi Kapanom. Ntûfâm ane-enok yót a fôn ḿgbán nnyo yê a korê kpe-eji. Ḿgbán nnyó a gbô emaŋé, ekʉ̂ é kət kpít. Nji nne nyúp nnyó a yúghi achot í Jisos, a tûm etʉ̂ ane-akúí eték se á jí bhîŋ yê a bhá yim ḿgbán owe a sôn. Nji á bhâ kpúghi Jisos, á góre na ḿbə́ŋé-a-ḿbə́ŋé sê, “Nne-ndûm nnyó a ri nnyo ó nyaŋa yê. A ri nne nnyo a fonê okot na ane abhə́ré kpe-eji. Ka biji ibhê, a gbê óchâm Obhasi a káre êt.”
Jisos a mághe a jak na ábho. Nji á kpíri njû, ntûfâm enok nnyó a tûm atem se á jí sə́re Jisos sê, “Ńsé, ó kâ káre biji ibhâ oseŋe. Ń ka bhik nnyo o kə́ bha ó bhá gyé njû amé. Ń kep biji bəre ń ka bhik nnyo n kí gyimi ka ochî obhâ, kən karê a ri ikom, ḿgbán omé tîk a sôn. Mme eróŋ a ri nne nnyo n di ka óséré ane. Ḿ fon ane-enok mba á rî fə́ne ka óséré obhámé. N kí səre nnyó bəre ‘Choŋ,’ a jak. M bîŋ ńnyô bəre ‘Bhák,’ a bhák. N kí səre ḿgbán nnyó bəre, ‘Yim njí,’ a yîm ńjə́ne.”
Nji Jisos a yúghi nchot nnyí, biji í mân yê kpe-eji. A kpíghi mbâ ekam ane mba á tobha yê a chôt se, “N kí səre ên bəre ń ka nok oyén ekpak í ḿbə́ŋé ekíím na Obhasi nnyí mbâ nne kpe yót ka eték Isrel ndə́m.” Ane mba á túmi nná á kpó to á chə́bhe njəm, á jî yên sê ḿgbán nnyó a sôn.

Ebhú é ká rap nji Jisos a yimî ḿgbán nnyó a sôn, a mághe a jak eték nji á bhíŋa sê Nayen. Ágbán abhê na ane etî-etî á tôp yê á jak. Á kpó to á sí ka echî-mbá eték áji, iróŋ ane í kən nne nnyo a kpóe í kí ji osə́m. Nne-ndûm nnyo a kpóe áno a ri átíŋ mbâ nnyen owe, nnyo a ri ka ekə́t. Ane eték áji etî-etî á kí top nne-nkáé nnyó. Nji Ńtâ Jisos a yéne nne-nkáé nnyó, nsôn a yîm yê kpe-eji. A sə́re yê se, “Ka kpó rʉri.”
A jak a jî kə́me nkop nnyi á kághe nne-ndûm nnyó, ane mba á kə́ne okə́n á gyími. Jisos a chôt mbâ nkə́bha-nsi nnyó se, “Nguŋi, duî ngyím, mme nâ n sə́re wâ.” Nkə́bha-nsi nnyó fə́ne a rúi ngyím a kúmi okumí, a róghe nchot echoróm. Jisos a káre mân yê mbâ nnyen owe.
Chénchén ane mba á rî áfo, á fôn efup. Á róghe nkat ekarám mbâ Obhasi, á chorá sê, “Ekpatə́m í nkara-otîp Obhasi a fâp ka ekam ejə́ré. Obhasi a bhâ ane abhê oyim á sém.”
Ejûm njí é jên é jábhe nték i Judiya ndə́m na chénchén ngûm nnyi a kpíri ebhat áji.


Ágbán í Jon á sə́re yê chénchén achot í Jisos. Jon a bhâ yíghi ane ábháe a tûm mbâ Ńtâ Jisos se á bhə́p yê sê, “Nâ-ngá we a ri nkúbhi nne nnyo á sə́ra nná se tîk a bhák, kən é wóm nnyo tat?”
Nji ane mbá á bháe mbâ Jisos, á sə́re yê sê, “Jon nnyo á fugha ane ayép nâ a túmi êt mbâ eya se é bhá bhə́p ájoé we a ri nne nnyo á sə́re sê tîk a bhák, kən e nyə́ne e kébhá mbá?”
Ka nkúbhi ebhú áji, Jisos a yîm mkpak ane bimaŋé etî-etî á sôn, a yíghi etʉ̂ ane ojê ka ḿbə́ŋé, a yîm atáná-amə̂t á yên mbá. A táme mân atóbhá Jon se, “Choŋ osə́ré ên Jon achot mma ó yen ên na mma ó yuk ên. Ó yen ên atáná-amə̂t, á yen mbá. Abhə́né, á rui ngyím. Amaŋá-ofunum, á son. Ayághá-atûŋ, á kí yuk mbá. Ane mba á kpóe, á chəbhe njəm ka ekpin. Akpák ane, á yuk otîp ogyebhá-ḿbə́ŋé Obhasi. Deê ogyebhá-ḿbə́ŋé ó jóe na nne nnyo á ka kéré se a ri ejûm ísonê nji á chəm na mme.”
Nji ágbán í Jon á jíi, Jisos a bhə̂p ekam ane nji é rî áfo na yê achot í Jon se, “Ebhú nji o maghê ên o jî kpúghi Jon ka etə́m, o kére ên sê tîk o yên ên jen? O kére ên sê o kí ji ó jí yén ên nne noŋ kpe ńjé egomé nnyi a kí neŋ a jak ngá a jak ńgô ka ekpak nji mfêp a kí nok a? Ée! O jiî oyén ên kpá jen? Nne nnyo a gúŋi nnyen oguŋi obhê a? Ée! Ane mba á kágha énoê oguŋi mbí á kúma ka ókʉ́rí atúi-ofâm, a dík ekpin eyúp. O jiî oyén ên kpá jen? Nkara-otîp Obhasi a? Nâ nji o jiî ên. Deê ń sə́ré ên mân bəre nnyo o jî yên ên a fâŋ a chíŋi nkara-otîp Obhasi. Nan? Ḿfa nâ nne nnyo á séŋe nná se Obhasi a chorê se,
‘Ńgyê, n kí tum ḿgbán omé a raŋ mbá,
kən ó bhá, a jí tʉrí ngûm a kí wâ.’ ”
Jisos a chôt mân se, “Deê ń sə́ré ên bəre nne nnyo á jíi ka ngun nnyí a fâŋ mbiŋ a sî Jon cháŋ, kən nne nnyo kə́n á kêp sê kpe ejûm á ka fáp ka otúi Obhasi a fâŋ mbiŋ a chíŋi Jon.”
Chénchén ane, é kpê na abhə́bhá-ntí-echî, á yûk nchot i Jisos nnyí. Nâ ane mba á kam sê Obhasi á yimá iyîm ka nnyen-i-mbá, ka á kâm Jon a fûk ábho ayép. Kən ane echəme Farasi na atóŋá-ebhín, á ká kam á yîm ejûm nji Obhasi a wóme, ka á ká kam Jon a fúk ábho ayép.
Jisos se, “N kí gaé abhon ebhú njí na jen? Ábho á rî nan? Á rî noŋ abhonche mba á kûn ka éré ogəm, ekam jə́t á kí kpoŋe na nji tat sê,
‘É kon nkôn ogyebhá-ḿbə́ŋé nnyi ebháé,
ó ka bhə́n ên.
É kon maná kpe okʉ́gane,
ekʉ̂ ó ka rí ên!’
Nji Jon nnyo á fugha ane ayép a bháe, a kák njaé noŋ ejík mbâ Obhasi, aməm á bhó gwo, o chə́bhe o chorá ên sê ojê nâ ó kára yê oseŋe. Kən mme, Mmon-i-ntem-nne, ḿ ba, n kí di n gwók, ó chəbhe ên o chorá sê, ‘Yên ndûm i ndígha-édî nnyó, mgbogha-aməm ejûm í nchane. Otem obhê, á yimá a ri na abhə́bhá-ntí-echî na ane abhí.’ Kən deê ń sə́ré ên bəre chénchén ane mba á kí tobhâ oməŋá-ejûm Obhasi á kí toŋâ jáé sê ḿbə́ne ó rî ka echî.”

Nne echəme Farasi yót nnyo á kamá se Simun a bhîŋ Jisos se á jí dí édî ka njû eye. Jisos a jak a jî kúmi ka eji édî a tə́ne akát. Nne-nkáé ejen yót nnyo a ri ka eték áji a yûk se Jisos a kí di édî ka njû nne echəme Farasi nnyó. A kə̂n otʉ akʉ́ mma á fóne énoê egyʉ, a jak ka njû nnyí. A jî gyími mbâ Jisos a kíi akát, a rʉ́rá, obhə́bhe ó təbhá Jisos ka akát. A kô mân nnyʉ̂ echî eye a fóná obhə́bhe mbí ka akát í Jisos. A kpo to a fón, a fî akát amê na okot a kô mân akʉ́ mmá a fûk ka ḿmáne.
Nji nne echəme Farasi nnyó a yéne noŋ nne-nkáé nnyó á yimá, a chôt ka ḿbə́ŋé eye se, “Ebhú sê nne nnyó a ri nkara-otîp Obhasi ka etʉri, kə́n a mə́ŋe se nne-nkáé nnyo á kəmá yê nná, a fonê ekpatə́m ekpin ebhí.”
Kən Jisos a bhîŋ yê se, “Simun, ḿ fon ejûm nji n kí səre wâ.”
Simun a kâm se, “Ńsé, sə́ré ə̂m.”
Jisos a tûp mân ka egan se, “Ka ebhú jə́t, ane ábháe á fî mbogha-ane ntí yót arə́m. Yót a fî nne nnyó ntâk i ntí érôn, nnyo tat ebhat í ntâk. Kpe nne ábho nnyo a fonê ntí mmí a fé cháŋ, nne nnyó a kpére a tô se á kə́t na ntí ámi.”
Jisos a bhə̂p mân Simun se, “Ka ane mbá ábháe, ó kere se nnyón kə́n a kôt nne nnyo a bhoê ábho ntí a chíŋi ochíŋ?”
Simun a táme se, “A ri nnyo a fiî arə́m á tî.”
Jisos a kâm se a mə́ŋe otámé.
A kpíghi mân a kêp nne-nkáé nnyó a sə́re Simun se, “Ó yen nne-nkáé nnyó a? M báe ka njû eya, ó ka karé ə̂m ayép mme ń sû akát, kən yê a sû akát amámé na obhə́bhe obhê, a fôn na nnyʉ̂ echî eye. Ó ka kúp ə̂m na okot, kən nne-nkáé nnyó a nyə́ne a fik akát amê na okot mbôp m báe mfá. Kpe akʉ́ mma se ó kot njéné, ó ka chómé ə̂m ka echî, kən nne-nkáé nnyó a kô akʉ́ mma á fóne énoê egyʉ a chóme ə̂m ka akát. Deê ń sə́ré wâ mân bəre ekpatə́m okot mbi nne-nkáé nnyó a tóŋe, ó tóŋe jáé sê Obhasi a rî nsôn a sû njok obhí obhê. Nne nnyo á yim mkpât obhí á rî nsôn á sû ḿbə́ne, á bhó toŋe ekpatə́m okot.”
A sə́re mân nne-nkáé nnyó se, “Ń di nsôn ń su obhí obhâ.”
Kən ane mba ngá mba á rî áfo ka eji édî njí á róghe echoróm ábho-ábhô sê, “Énê nná kpá títí nnyo a kí səre se yê a rî nsôn, a sû obhí nne?”
Jisos a chôt mbâ nne-nkáé nnyó se, “Ḿbə́ŋé nnyi o kíi na Obhasi a yîm wâ ó sem ka obhí. Choŋ kʉ́ri mân, deê Obhasi a joé na we.”

Listen to Luk, echî 7