Luk, echî 14

Jisos a yîm mmaŋa-emaŋé yót a sôn

1Ka ofú oyoá-biji bhə́t, Jisos a jak se yê a jí di édî ka njû nne-echî ane echəme Farasi yót. Ane á rî áfo mba á kébha sê á yén kpe ejûm akôp jə́t na Jisos. 2Kən nne yót a ri áfo mbá-ochî nnyo á maŋá ónʉrî. Akát na abhô á nʉt. 3Jisos a bhə̂p atóŋá-ebhín mba á rî áfo na ane echəme Farasi se, “Nâ-ngá ebhín ejə́ré é kam sê é yîm nne a sôn ka ofú oyoá-biji kən é ká kam?”

4Ane mbá kpe ejûm á ká tame. Jisos a bhîŋ nne nnyó, a yîm yê a sôn, a tûm yê a kʉ́rá. 5A bhə̂p mân ábho se, “É kó sê nne owəné kpe yót a fôn kpe mmon, kpe mfoŋ, kən mmon nnyó a gbô ka ébhírí ayép ka ofú oyoá-biji. Nâ-ngá ó bhó yighí yê ka ngyím ányi ka a ri ofú oyoá-biji a?”#Mat 12.11. 6Kən ane mbá á ká məŋé nji á kí tame.

Kó biji ibhâ se kpe ejûm ó ka fáp

7Nji á rî ka eji édî njí, Jisos a yên ekpak etʉ̂ ane mba á bháe édî njí a kí nok á fôn ngûm ekumi nnyi ejík. A tâ mân ane chénchén etí se, 8“Ájoé nne á bhiŋ wâ se ó bhá erom ebháé ejê, ó bha, ka sáŋ eji eyúp kən o kúmi, ka ebhú tat á bhîŋ fə́ne nne etat nnyo a faŋê a chíŋi wâ.#Ngan 25.6-7. 9Mfone nnyo a bhiŋî ên ábháe chénchén a kə́ bha nná wâ osə́ré se ó rúi ngyím ó káre yê ekumi áji. Yên o kí maghé ó jí kúmi ńgô na eré na ísonê. 10É nóbhe sê á bhiŋ wâ erom áno, ó bha, wôm eji nji kpe é ká bhik, kumî. Mfone tîk a bhîŋ wâ se, ntem, bha kumî ka eji ejík. Ńji tîk é káre wâ ekpatə́m ejík ka ochî atem-ane fép mba á bháe erom áji. 11Kpe énê nnyo á ko biji se yê a fâŋ a chíŋi ochíŋ, á kí ko yê sê kpe ejûm á ka fáp. Kən nne nnyo á ko biji se yê á ka fáp ejûm, á kí ko yê sê yê nâ a faŋê a chíŋi ochíŋ.”#Mat 23.12; Luk 18.14.

12Jisos a sə́re mân mfone njû nnyó se, “O kí kpo yim erom, kpe na nchên kpe na egu, ka bhîŋ atem abhâ na abhon-í-nnyen abhâ na ane abhâ. O kâ bhiŋ akʉ́á-njû abhâ mba á fóne ntí. Echî é rî sê, ane mbá kpe é kə́re ofú bhə́t, á kí bhiŋ wâ áno eróŋ ka nji ábho erom, á fê wâ onobhá-eji obhâ. 13É nóbhe sê ó fon erom, deê ó tíbhí akpák na akímá-akát na abhə́né na atáná-amə̂t. 14Tîk ogyebhá-ḿbə́ŋé ó tôp wâ ka ane ntʉ́ghi mbá á ká fon kən á fé wâ. Ekəp ejâ é kí dʉ mbâ Obhasi ka ebhú anyen-ane a kí nyəmé ka ekʉ̂.”

Egan ekpatə́m erom

(Mat 22.1-10)

15Nne yót nnyo a ri ka eji édî njí a yûk nji Jisos a chorê, a chôt se, “Ogyebhá-ḿbə́ŋé tîk ó tî ó chîŋ na ane mba tîk á kúmi ka erom otúi Obhasi.”

16Jisos a táme se, “Ofú bhə́t, nne yót a kí yim ekpatə́m erom. A yâk ane etî-etî. 17Ebhú erom é kpó to é sí, a tûm ḿgbán owe se a jí səre ane se ebhú erom é si, á tʉri chénchén iyîm á ki.

18“Ḿgbán nnyó a kpo to a jí bhiŋ ane, kpe énê a chə́bhe a sə́rá afoghe. Nnyo ndaŋa-mbá se, ‘Mme, n kí ji ń jí kép ebhin ejámé nji n namê. Ítəbhé, sə́re ńsé owa a kâ kére.’ 19Enyeré se, ‘N namê mfoŋ ófó, n kí ji ogaé kpá ń yén etûm nji kə́n ó yîm. Ítəbhé, sə́re ńsé owa se a kâ kére.’ 20Nnyo tat mân se, ‘Choŋ osə́ré ńsé owa se ń kok áno nkáé okó, tîk ḿ bó maghé yê ḿ bá.’

21“Ḿgbán nnyó a chə́bhe njəm a bhâ sə́re ńsé ekpak ane mbá fép á chóre. É yâm ńsé é kpô. A sə́re yê se, ‘Chəbhê njəm babhap, gyê kpe mmə́n mfúk eték, kó akpák na akímá-akát na abhə́né na atáná-amə̂t á bhá ə̂m erom.’

22“Ḿgbán nnyó a jak a bhák, a sə́re ńsé se, ‘Ń ji yim nji o chorê, kən erom é nyə́ne é ká tʉrí osúí.’

23“Ńsé se, ‘Choŋ ka obhá na ka mbin, kó ane á bhá erom é súí. 24Deê ń sə́ré ên chénchén bəre ka ane mba n yaghê nná kən á ká bha, kpe yót á bhó yuŋi kpe ejûm ka erom njí.’ ”

E kí maghé jen ka ejoóm ntóbhá Jisos?

(Mat 10.37-38)

25Ane etî-etî á kí jen á jak na Jisos. A kpíghi a sə́re ábho se, 26“Nne kpe nnyón nnyo se yê a kí top ə̂m, a ri a kó ə̂m ḿ fâŋ yê ka ḿbə́ŋé ń chíŋí ńsé owe na nnyen na nkáé na abhon na abhon-í-nnyen é kpê na biji ibhê yê ḿfoné. Áno asík, á bhó bhik ə̂m etóbhóm.#Mat 10.37. 27Nne nnyo á ka wóm a kə́n achî-achot, kpe é rî nji ekʉ̂, ka obhô á tobha ə̂m, á ka bhik ejoóm nne omé.#Mat 10.38; 16.24; Mak 8.34; Luk 9.23.

28“Kən nne a gbe enyóŋ, a kí kumí kpá a kére mfan i ntí nnyi a kí bhibhi kən é mân, a kâ bhâ oróghé, ntí ḿ mân, enyóŋ é ká man. 29Nne nnyo á ka yim íkíkéré mfí, á ro məŋé a kí roghe njû, ntí ḿ mân, á bhó jeghé. Ane á kpo yen, á chəbhe á yoá yê 30sê, nne nnyó a róghe enyóŋ egbeém mfá kən ntí á ka fon a jeghé.

31“É kó sê ntûfâm yót a fôn ane-enok ntem-esam esam na ejûm (10,000). A yə̂p se yê a kí ji enok na ntem-ntûfâm nnyo á bhak na ane-enok mba á chíŋi abhê ntə̂m kpe ébháe. Nnyo ane abhê á ká ti nná, a ri a kumí kpá a kére ájoé yê a sôn a bhîk nji a kí ji enok njí. 32Ájoé á kere a yên se yê á ka bhik, a kí tum ágbán á jí sə́ré ntûfâm nnyo ngá nji ebhú é nyə́ne, se á bhá yîm ekone, nchot a man.”

33Jisos a jéghe mân se, “Ka ekpak njí jə́t, nne owəné nnyo á ka taŋé efaŋ ejê chénchén, á bhó bhik ejoóm nne omé.”

Egan akâŋ mma ogyep cháŋ

(Mat 5.13; Mak 9.50)

34Jisos se, “Akâŋ á gyebhá, kən ájoé ogyep akâŋ ó man, ekpak nji á kí yim ḿmáne á kpó gyebhé cháŋ. 35Ntʉ́ghi akâŋ áma á ká kpo nop kpe ka jen, kpe noŋ átép mma o kí kak se nsi a nop édî. Nne á kəna ntʉ́ghi akâŋ mmá a bhûm ka etə́m. Nne mân nnyo a fonê atûŋ mma á yugha mbá, deê a yúk.”

Currently Selected:

Luk, echî 14: ETUNT

Highlight

Copy