Luk, echî 15

Mbúi eya nnyi a tân kən ó ti

(Mat 18.12-14)

1Ofú bhə́t abhə́bhá-ntí-echî na ane mba á bhó top ebhín ane Jus nono á bhak á bhá yúk okpígha-ejûm í Jisos.#Luk 5.29-30. 2Nji ane echəme Farasi na atóŋá-ebhín á róghe egəmə́m sê, “Nne nnyó a kâm na achâk ane mbá, ta a kí dighâ édî na ábho a?”

3Kən Jisos a tûp egan a káre ábho se, 4“É kó sê nne owəné yót a fôn nsam obhúi érôn. Mbúi yə́t a bhâ tân. Kə́n o yîm nan? O ri ó mághe mbi ngá ka eji édî o jak o jî wôm nnyi a táne áno ta o tî. 5Ájoé ó ti, o kí gyebhé ḿbə́ŋé o kə̂n mbúi nnyí ka afâŋ. 6O kí ko o bhák nnyi njû. Ó si njû, o kí chəmé atem na akʉ́á-njû o sə́re ábho se, ḿbə́ŋé a gyébhe wâ kpe-eji égyé, ka ó ti mbúi eya. Se deê á gyébhe ḿbə́ŋé na we.”

7Jisos a jak ochî se, “Ka ekpak njí jə́t, deê ń sə́ré ên bəre nji nyima-obhí yót á fôn nsôn ka biji ibhê a mághe obhí, ekpatə́m ogyebhá-ḿbə́ŋé ó kí joé ka ósô. Ó kí chiŋi mbi ó kí joé nji nsam anyen-ane énî na ane ekû na ánî mba á kéra sê á ká yim obhí kən á fôn nsôn ka biji ábho á mághe ḿbə́ne.”

Egan nji sê ntí ń tan

8Jisos se, “É kó fə́ne sê nne-nkáé yót a fôn ntí imê, abhon iyîm ófó, kən kpe jə́t é tân. Ó kere ên sê nne-nkáé nnyó a kí yim jen? Ka etʉri, nne-nkáé nnyó a kí nyoé ngûn a kô ofâk, a fâk njû nnyí nono, a nâ biji a wôm ntí imê ta a tî. 9Ebhú á ti, a kí bhiŋ atem na akʉ́á-njû abhê a sə́re se, yê a fôn ogyebhá-ḿbə́ŋé kpe-eji, ka a tî ntí imê. Se deê á gyébhe ḿbə́ŋé na yê. 10N kí səre ên bəre ka ekpak njí eróŋ, baénjel ka ósô á kí fon ogyebhá-ḿbə́ŋé ekpatə́m nji nyima-obhí yót á fon nsôn a yóŋe ḿbə́ŋé a mághe obhí obhê.”

Egan abhon-í-nnyen ábháe

11Jisos a kpô túp egan se, “Ofú bhə́t, nne yót a ri mfá na abhon abhê ábháe mba ane-arûm. 12Kən nnyo mmonche a sə́re ńsé se, ‘Ńsé, kirî ibhámé iyîm, karê ebhú jə́t, nji o ri nná mbít.’ Ńsé fə́ne a bhâ kíri iyîm mbí a káre abhon mbá.

13“Kpe mfín á ka sí áno, nnyo mmonche nnyó a gúri iyîm ibhê chénchén a kô ntí a mághe njû. A jak ka eték etat mbá nda, a jî gyê ekpin echâk-échâk edíím na ntí mmí. 14A dî ḿ mân.

“Ekpatə́m í njaé a bhâ gbô ka eték njí, kən mmon nnyó á ka kpó fon kpe ejûm ka obhô. 15A jak a jí yim etûm mbâ nne eték áji yót. Nne nnyó a kî yê se a bhábhé akûk amê ka ebhin. 16Mmon nnyó a kére se kpe édî nji á kí karé akûk á dí, tîk yê a dî, njaé a kâ yui yê. Kən kpe ejûm á ka yén a dí.

17“A bhâ kúmi mân a kére nyamḿ se, ‘N kə́ bha okpó njaé mfá nji chénchén ágbán í ńsé omé á rî ńgô, á dik á bhumá etʉ̂ a? 18Tîk n chə́bhe njəm n jak mbâ ńsé omé n jî sə́re yê bəre, ‘Ńsé, ń yim obhí ka ochî Obhasi na ochî obhâ. 19Ń ka kpó bhik ó bhîŋ ə̂m se mmon owa, kən deê ó fî ə̂m noŋ ḿgbán owa.’ 20Mmon nnyó a bhâ yə̂p mân a kí chəbhé njəm ka eték í ńsé.

“Nji a jên a kí si eji ńsé, ńsé a yên yê ta ńgô noŋ á bhak. Nsôn a yîm yê kpe-eji na mmon owe. A bhéne a jî táme mmon owe ngaŋ, a kûp yê.

21“Kən mmon nnyó se, ‘Ńsé, ń yim obhí ka ochî Obhasi na ochî obhâ. Ń ka bhik nnyo á kí kpo bhiŋ sê mmon owa.’

22“Kən ńsé owe a bhîŋ ágbán abhê se, ‘Bhák ên babhap, kó ên nnyen oguŋi bhá kak ên mmon omé, o kâk ên yê mkpâk-indəré na iyîm-akát. 23Ó kak ên yê, choŋ owúbhí ên nnyen esə́n í mmon i mfoŋ, yúí ên, é fî erom. 24Echî é rî sê, mmon omé nnyó a chə́bhe bəre nne a kpóe okpó kən mfá-mfá a nyə́me, a tân kən mfá-mfá á ti yê.’ Nji á yími iyîm erom chénchén, erom njí fə́ne é róghe ndə́p.

25“Kən nji achot mmá á fábha áno, mmon-i-nnyen nnyo nne-nkúí a ri ka ebhin. Nji a kí kʉri, a sî kpít na njû, a yûk ejok, á kí bhən mbə̂n á kona nkôn. 26A bhîŋ ḿgbán yót a bhə̂p se, ‘Ágo jen égyé?’

27“Ḿgbán nnyó a sə́re yê se, ‘Mmon-i-nnyen owa nâ a chəbhê njəm a bhâ, kən ńsé owa a yúi nnyen esə́n í mmon i mfoŋ a fî erom, ka a chə́bhe njəm a bhâ, kpe ejûm é ká yim yê.’ 28É yâm mmon-i-nnyen nnyó é kpô, a táŋe njû egyéém. Kən ńsé a jak a jî góre yê se a bhá ka njû.

29“Mmon nnyó a sə́re yê se, ‘Ńgyê, ń kumi mfá na we ka nyâ na nyâ, n yimá etûm noŋ nsʉ́ŋ, kpe o chorê jen, n kâm, ḿ bó firi. Ó kare ə̂m jen, o nôk oyighí kpe mmon i mbúi o káre ə̂m se ḿ fî erom na atem abhámé a? 30Kən mmon owa nnyo a gúri iyîm ibhâ chénchén, a kô ntí a bhíbhi na ane-akáé ejen, égyé a chə́bhe njəm ó ji fi nnyen esə́n í mmon i mfoŋ ó yui ó kare yê.’

31“Kən ńsé a bhîŋ yê se, ‘Mmon omé, we nâ o ri mfá na mme chénchén ebhú. Iyîm chénchén mbi m fonê a ri ibhâ. 32E nóbhe mân sê é fî erom é gyébhe ḿbə́ŋé ka obhô mmon-i-nnyen owa nnyó. Echî é rî sê a ri bəre nne a kpóe okpó, kən mfá-mfá a chə́bhe njəm a nyə́me. A táne kpá otán, kən mfá-mfá á ti yê.’ ”

Currently Selected:

Luk, echî 15: ETUNT

Highlight

Copy