Luk, echî 12

Jisos a tʉ̂ ane obhô ka otûŋ

(Mat 10.26-27)

1Ekam ane é chəme é ti é chiŋ ta etʉ̂ ane á roghe atem echemém. Jisos a kpíghi kpá mbâ atóbhá abhê a sə́re se, “Kó ên ebhú na yîs nnyi ane echəme Farasi á kágha ka brêt ábho. Yîs nnyí a ri ekpin áfúbhí.#Mat 16.6; Mak 8.15. 2Kpe jen nji é rî ka ekup, ofú bhə́t á rî á rə́bhe ńjə́ne. Kpe ejûm jə́t fə́ne nji é kí kət ka ebhə̂t cháŋ.#Mak 4.22; Luk 8.17. 3Áno mân, kpe jen nji nne á chot ka ejírim, á rî á yúk ńjə́ne ka ebhát. Nji nne a kubhî kəma-kəma, á kí gyimi a ri ka ósô njû kən á kugha ńjə́ne.”

Ó bhik efubhúm bhaghé énê?

(Mat 10.28-33; 12.32; 10.19-20)

4Jisos se, “Atem abhámé, n kí səre ên bəre o kâ fûp nne nnyo á yui wâ, ejûm etat á yimá na ékpoê cháŋ. 5Deê ń sə́ré ên nnyo o fonê ka efubhúm. Fup Obhasi nnyo á yui wâ, a fôn ikom mfi a kí tum wâ ka erəmta-ngûn. Ka etʉri, fup yê. 6To abhon í nnón árôn á kpôk abhon iyîm ábháe mba á rî ntí. Kən kpe fə́t, Obhasi á ka gyiní. 7Məŋê sê nnyʉ̂ echî eya, Obhasi a mə́ŋe mfan. Ka fôn efup, ka ó faŋ ó chiŋi abhon í nnón kpe á tíi nan.

8“N kí səre ên bəre nne kpe nnyón nnyo á səre ka nnyo imê ka ochî atem-ane se yê a ri nne omé, Mmon-i-ntem-nne tîk a yîm fə́ne ka ekpak áji ka ochî baénjel ka ósô. 9Kən nne nnyo á taŋé ə̂m ka ochî atem-ane, Mmon-i-ntem-nne eróŋ tîk a táŋe ntʉ́ghi nne ányo ka ochî baénjel.

10“Obhasi kə́n a rî nsôn a sû nchot i mbí kpe nnyə́n nnyi nne a chorê a kpê na Mmon-i-ntem-nne, kən nne á chot ejûm ebhí a kpê na Obhasi Ebhare Ntʉgantʉ, á bhó ri yê nsôn.#Mat 12.32; Mak 3.29.

11“Ebhú á ko ên á bhak ka esup ka óchâm Obhasi ka nték na kpe ka ochî atáŋá-eték na kpe ochî atúi-ofâm, ka káre ên biji oseŋe ka nji choróm na ekpak echoróm kən esup é nôp ên. 12Ka ebhú áji, Obhasi Ebhare Ntʉgantʉ tîk a sə́re ên ejûm echoróm.”#Mat 10.19-20; Mak 13.11; Luk 21.14-15.

Egan énə́mé nne-efaŋ yót

13Nne yót áfo a sə́re Jisos se, “Ńsé, sə́re mmon-i-nnyen omé a kirí iyîm ńsé owəré a kpóe a mághe, a karé ibhámé.”

14Jisos a táme yê se, “Ntem, mme m fonê ikom fan ń táŋ achot amə́né, na kpe ń kíri iyîm í ńsé owəné ń káre ên?”

15A bhâ sə́re mân ane áfo se, “Kó ên ebhú, nne a kâ yûŋ amə̂t a kí se efaŋ í ngun nâ é chíŋi obhô, ka ekpin í nne cháŋ ka efaŋ egboóm, kpe a fonê iyîm nan.”

16A sə́re ábho egan se, “Ofú bhə́t, nne efaŋ yót a ri mfá. A yîm ebhin ejê, édî é gbô njok. 17Nne nnyó a róghe ekérém se, ‘Ń ka fon ekpatə́m etəm nji n kí ki njok édî njí, n kí yim mân nan?’

18“A bhâ kére mân se, ‘Tîk m mə̂k ntəm nnyí m gbê nnyi a faŋê ofaŋ, n kaghá mân chénchén iyîm ibhámé é kpê na mbi m fʉî. 19Ń yim áno, n kí səre mân biji bəre mme nne ofa, ka tîk m fôn iyîm mbi í kí bhabhe ə̂m ka nyâ etî-etî. Tîk n kô mân ekpin ka tebhee, n dík, n gwók, n jóghá ekpin.’

20“Kən Obhasi a sə́re yê se, ‘Énə́mé nne! Ka atʉ́ mmá n kí ko ekpin ejâ. Iyîm ibhâ mân aŋ? Énê a kí fon?’ ”

21Jisos a sə́re mân ábho se, “Nne kpe nnyón nnyo á woma efaŋ í ngun, nji Obhasi asík, é kí fap na yê noŋ nne efaŋ nnyó.”

Kî ên ḿbə́ŋé sê Obhasi tîk a yîm

(Mat 6.25-34)

22Jisos a sə́re atóbhá abhê se, “Nâ echî n kí səre ên bəre nne a kâ káre biji oseŋe se n kí di jen ḿ kpîn, n kí kak jen? 23Ka ekpin é faŋ é chiŋi édî, biji í faŋ í chiŋi ḿfô. 24Kêp ên nnón, édî á bhó kpaŋ kən á fʉ̂. Á ká fon kpe ojû, kpe ntəm kən á kí édî ábho. A ri Obhasi nâ á gyek ábho. Ên, ka ane, ó faŋ ó chiŋi nnón. 25Ka oseŋe mbi ó kará ên áno biji, énê owəné nnyo ofú ekʉ̂ obhê ó si, a bhîk ekpeém ofú bhə́t? 26Ájoé ó ka bhik eyimím mmon ejûm noŋ nnyó, ó kará mân biji oseŋe jen?

27“Kêp ên mfem nnyi á kua ka ajé. Ntûm á bhó yim, ḿfô á bhó yim. Kən deê ń sə́ré ên bəre kpe Soromon, na njok efaŋ ejê, á ka fon ḿfô nnyi a nobhê a sî mfem nnyí.#1 Atúi 10.4-7; 2 É fâp 9.3-6. 28Obhasi nâ á sobhá ájé ka etə́m. Ájé mmá, égyé á rî mfá, ójô á kpo, á kak ngûn, á righi. Ájoé Obhasi a kí sobhé ájé ka ekpak njí, ó kere ên mân sê tîk á bhó sobhé ên a? Jen nji ó bhó ki ên ḿbə́ŋé sê Obhasi tîk a yîm noŋ a chorê? 29Ka kpó karé ên mân biji oseŋe sê o kí di ên jen, o kí gwo ên jen? 30Ane mba á ká ki ḿbə́ŋé na Obhasi nâ á fóna ntʉ́ghi íkíkéré mfí. Kən ên, Obhasi Ńsé owəné a mə́ŋe se o ri ên ka eket iyîm mbí. 31Nâ deê ó nót ên kpá otúi Obhasi, tîk yê a káre ên chénchén iyîm mbí.”

Efaŋ ejə́né é rî na Obhasi

(Mat 6.19-21)

32“Abhon okot abhámé, ó ka tí ên otí, kən ka fûp ên ka Obhasi a kôt ên otúi obhê ekarám. 33Gurî ên iyîm ibhə́né, karé ên ntí mbâ akpák. Deê ó fôn ên ebham í ntí nji é kí kət nkóŋ. Deê efaŋ ejə́né é jóe ka ngun Obhasi, eji nji é bhó manâ, ka kpe nnyágha-ejʉ̂ nnyo a kí jʉ cháŋ, oké ó bhó bhibhi. 34Yim ên mân ka ekpak njí, ka eji ejûm efaŋ ejâ é joé, ḿbə́ŋé eya á joá áfo eróŋ.”

Gyímí ên ibhábhé

35Jisos se, “Nne a sət éfô ejê nono, a nyoé ngûn imê a fi, a chik nji-nji é kə́ bha.#Mat 25.1-13. 36Tʉrî ên biji noŋ ágbán mba á kí chik ńsé ábho nnyo a jiî erom ebháé. Ebhú á bha a sûm njû, tîk á rə́bhe yê ebhú jə́t.#Mak 13.34-36. 37Ogyebhá-ḿbə́ŋé tîk ó jóe na ágbán ntʉ́ghi mbá kpe-eji nji ńsé ábho á chəbhé njəm á kpúghi ábho á rî mbít, á tʉri biji á chighá yê. Deê ń sə́ré ên bəre tîk ńsé ábho a sə̂t ejê éfô, a sə́re ábho á kúmi okumí yê ḿfoné a jíghi ábho édî. 38Ogyebhá-ḿbə́ŋé tîk ó jóe na ntʉ́ghi ágbán mbá ájoé ńsé ábho a bhâ kpe na étíŋanti, kpe a səbhê é chíŋi áno, kən a kpúghi ábho á tʉri biji. 39Məŋê ên sê á joé mfone njû a mə́ŋe ebhú nji nnyágha-ejʉ̂ a kə́ bha, tîk a kâ mbít á bhó kam kə́n se a gyé a wa njû eye. 40Deê fə́ne ó gyími ên ibhábhé, ka Mmon-i-ntem-nne tîk a bhák ka ebhú nji kpe echî ó ka kí ên sê tîk a bhák.”#Mat 24.43-44.

Nnyen i ḿgbán a ri nnyón?

(Mat 24.45-51)

41Nji Jisos á chorá áno, Pita a bhə̂p yê se, “Ntûfâm, ó tubha nná egan njí o kará êt kən ane chénchén?”

42-43Ńtâ Jisos a táme se, “Énê mân nâ a ri nnyen i ḿgbán nnyo a fonê aron? A ri yê nnyo ńsé ábho a kî se a kép atem, a káre atem nnyi ábho nkiri édî nji ebhú é si. Ntʉ́ghi ḿgbán nnyó a kí fon ekpatə́m ogyebhá-ḿbə́ŋé ájoé ńsé á fap kən a chə́bhe njəm a bhâ kpúghi yê a yimá etûm ejê. 44Deê ń sə́ré ên bəre tîk ńsé nnyó a kâk iyîm ibhê chénchén ka obhô ḿgbán nnyó. 45Kən ájoé ḿgbán nnyó a kére se ńsé owe á bhó waghe obhá, a róghe atem mba ngá etəmə́m, ane-akáé na ane-arûm, a dík a wók a gbok aməm. 46Ńsé owe a kə́ bha ka ofú mbi yê á ka kí echî, kpe ebhú a kə́ bha fə́ne, á bhó məŋé. Á bha, a kí chaghe yê ochághé, a tûm yê a jí yen oseŋe na ane mba á ká ki ḿbə́ŋé na Obhasi.

47“Ḿgbán nnyo a məŋê ejûm nji ńsé owe á woma yê a yim kən á ka yim, ebhú ńsé á bha, a kí təm yê nnyen etəmə́m. 48Nnyo á ka məŋé ejûm nji ńsé a wóme yê a yim kən a yîm ejûm nji é bhíghi bhatəm, ebhú ńsé á bha, tîk a kpə́re yê ka bhatəm, kən á bhó ti. Ekpak á káre wâ ejûm nâ ekpak nji á kí bhəp fə́ne wâ. Á karé wâ é tî, tîk á bhə̂p wâ fə́ne é tî.”

Jisos a bhâ na achât

(Mat 10.34-36)

49Jisos se, “M báe áno ḿ bá kâk ngûn ka nsi bəre a rík. Kə́n n kôt kpe-eji bəre ngûn mmí ta ń doghe kən ń nyə́ne ń ká roghe. 50Ekpak ofúgha-ayép etat mbi á kí karé ə̂m, n kí chik na ekpatə́m í nsae bəre ebhú é sí é chíŋ babhap.#Mak 10.38. 51O kí kere ên tîk sê m báe na ekone ka ngun? Deê ń sə́ré ên bəre ń ka bhá na ekone, m báe na achât. 52É róghé ka égyé, ndə́p-i-njû ane árôn a kí chat, ásá ebhat jə́t, á bhó wom á yén mba ngá ábháe. Mba ábháe fə́ne á bhó wom á yén mba ásá. 53Tîk ńsé a kpóŋá na mmon nne-ndûm, mmon eróŋ a kpóŋá na ńsé. Tîk nnyen a kpóŋá na mmon nne-nkáé, mmon fə́ne a kpóŋá na nnyen. Nnyen tîk á foná obhúrá-echî na nkáé mmon, nkáé a foná na nnyen-i-ndûm.”#May 7.6.

Biriŋ í ngun

(Mat 16.2-3)

54Jisos a kpíghi mân a sə́re ane mba á rî áfo se, “Ebhú ó yen ên átʉ́k-í-ngurobhú á bhúi ebhat obhô-orûm, o kí məŋé ên ntə̂m yə́t sê mbúta tîk a nâ. A kí na fə́ne ka etʉri. 55Ebhú ó yuk mfêp a kí fək a bhák ebhat óséré, o kí məŋé ên sê ngûm tîk a fûp. A kí fup fə́ne ka etʉri. 56Ên ane áfúbhí! Kə́n o kêp ên ósô o kêp ên nsi, o sə́re ên ejûm nji é kí fap. Jen ó ka məŋé ên mân ekpak nji ngun ebhú njí a ri?”

Chəbhê njəm ka otem na nne ebhan owa

(Mat 5.25-26)

57Jisos se, “Jen nji ó bhó kere ên sê ejûm njí nâ é rî nono, deê ń yîm ńjə́ne. 58Ájoé ó yim nne ejûm a yâm ḿbə́ŋé a kí ko wâ a ji ka esup, nok ekpak nji nchot ányi a kí man kən kpe ó sí ên ágo. Á ko wâ a jak, tîk ntáŋa-esup a káre wâ mbâ anyaghá-orə́p, á kâk wâ ka ókúmí. 59N kí səre wâ bəre o kí ka ókúmí mbí ta o káre ngom eya a mân fép.”

Currently Selected:

Luk, echî 12: ETUNT

Highlight

Copy