Luk, echî 11

Nne a kí goré Obhasi nan?

(Mat 6.9-13; 7.7-11)

1Ofú bhə́t Jisos a kí goré Obhasi ka eji etat. A kpo to a man, nne yót ka atóbhá abhê se, “Ntûfâm, kpî êt ekpak e kí goré Obhasi noŋ Jon a kpíi atóbhá abhê.”

2Jisos a sə́re mân ábho se, “Ebhú o kí goré ên Obhasi chot ên sê,

‘Obhasi Ńsé, deê mbiŋ eya a fon ekpatə́m ejík.

Deê otúi obhâ ó bhá.

3Karê êt nji e kí di ka ofú ka ofú.

4Ri nsôn su obhí obhə́ré,

ka e kí ri nsôn e gyiná obhí mbí ane á yíma êt.

Ka kâm é gyé ka egaé.’ ”

5A bhâ sə́re mân ábho egan se, “Deê é kó sê nne owəné yót a fôn ntem. Étíŋanti atʉ́ é sî, a jak mbâ ntem ányo, a sûm yê njû. A góre yê se, ‘Ntem, ítəbhé, bho ə̂m édî 6ń jí káre njéné nnyo a bháe ə̂m. Kpe ejûm cháŋ ə̂m ka njû nji díím.’ 7Ó sum áno, kən ntem owa a táme se, ‘Ka kpó karé ə̂m oseŋe, ka ta ḿ bam njû ń nuŋi na abhon abhámé, eji n kí kpo ruí ngyím ń káre wâ kpe ejûm cháŋ.’ ”

A jéghe egan njí se, “O kí yim mân nan? 8Deê ń sə́ré ên mân bəre ntem nnyó á ro ruí ngyím noŋ ntem a karé wâ ejûm nji ó bhəbha, a ri a ruí ngyím nji ó kət o súmá, a karé wâ nji-nji o wóme.

9“Nâ é fap, mme ń sə́ré ên mân bəre: Bhə̂p, tîk o fôn! Nôt, tîk o tî! Sûm itə̂m, tîk á rə́bhe wâ! 10Ka kpe énê nnyo á bhəp, á kí karé yê; á not, a kí ti; á sum fə́ne itə̂m, á kí rəbhé yê.

11“Nnyón ńsé ka ekam ejə́né nnyo mmon owe a kí bhəp yê nsí, a kô a ri nnyô a káre yê? 12Nnyón ńsé nnyo mmon owe a kí bhəp yê eji-nkok, a kô a ri ényaŋkíŋ a káre yê? 13Ájoé ên, ka ane abhí, ó riŋi ên ekpak o kí karé ên iyîm ino mbâ abhon abhə́né, ó kere ên mân sê Ńsé owəné nnyo a ri ka ósô á bhó karé Ebhare Ntʉgantʉ owe mbâ ane mba á bhə́bhe yê a?”

Obhasi nâ a karê Jisos ikom, Besebup asík

(Mat 12.22-30; Mak 3.20-27)

14Ofú bhə́t nchí yót a ri áfo na Jisos. Nne nnyó a fôn ojê ochí ka ḿbə́ŋé. Jisos a yíghi yê ojê mbí, kən nne nnyó a róghe nchot echoróm. Ane mba á rî áfo, biji í kpô ábho kpe-eji. 15Etʉ̂ ane áfo á róghe echoróm sê, “A ri Satan nnyo é bhíŋa sê Besebup nâ á kará yê ikom áfi.”#Mat 9.34; 10.25. 16Mba tat á bhak á bhá gáe Jisos. Á bhə̂p yê sê a yim eriŋ nji é kí toŋe sê ikom ifê í dʉ̂ mbâ Obhasi.#Mat 12.38; 16.1; Mak 8.11.

17Jisos ngá a mə́ŋe ejûm nji ábho á fóne ka ḿbə́ŋé. A táme ábho se, “Kpe mbə́n otúi eték mbi ó kirí ka ngûm ka ngûm, ḿbâ á noghá na atem, ḿba á noghá na ḿbâ, otúi ábhi ó kí kət chichi. Kpe ndə́p-i-njû nnyə́n nnyi a kirî, á noghá na atem, ndə́p-i-njû ányi a kí chat. 18É fap fə́ne sê ájoé otúi Satan ó kirí ka ngûm ka ngûm, ó noghá na atem, ó kí gbo. Ń chorá nchot nnyí, ka o kí səre ên sê Besebup nâ a karê ə̂m ikom kən n kí yighí ane ojê ka ḿbə́ŋé. 19Ájoé ń yighá na ikom í Besebup, ane mba á tóbhe ên mân á kí yighí ojê na ikom énê? Yên ên mân ane mba á tóbha ên á tóŋe jáé sê ḿ bó yighí na ikom í Besebup. 20N kí yighí na ikom Obhasi. Kən ájoé ń yighá na ikom Obhasi, nâ məŋé ên mân sê otúi Obhasi ó jen ó si ên.

21“Ebhú mgban á fi ḿkpurûk enok eye chénchén a gyími a kí bhabhe njû eye, kpe ejûm í njû ejê jə́t nji é kí fak echî cháŋ. 22Kən ebhú fə́ne ntem-mgban nnyo a sonê a chíŋi yê, á yəm yê enok, a kô érûm, a kí tabhé ḿkpurûk enok nnyí chénchén nnyi nne nnyó a yuŋî nná ḿbə́ŋé a kî, a jʉ̂ iyîm í njû chénchén a kíri na atem.

23“Nne kpe nnyón nnyo cháŋ njəm amé, a ri nne ebhan omé. Nne nnyo á ka kak ə̂m obhô é chúi, a ri nne achât.”#Mak 9.40.

Ebhú á bhim ojê, kən ó chə́bhe njəm ó bhak

(Mat 12.43-45)

24Jisos se, “Ebhú ojê ó maghé nne, ó kí kət ó bhuŋa ka óráné-ngun, ó woma eji ekâ. Ájoé ó ká yen, ó kí ta biji etí se, tîk yê a chə́bhe njəm ka njû eye nnyi a maghê. 25Ojê mbí ó chəbhé njəm, ó yên njû nnyí, á tʉri á fak. 26Ó kí chəbhé njəm ó jî kô atem anígisá mba á bhíbhi á chíŋi yê ḿfoné, á bhâ kúmi ka njû nnyí. Ojê mbí chénchén ó roghe ekumúm ka ḿbə́ŋé nne nnyó yót, é kí bhip mân na yê é chíŋi ndaŋa-mbá.”

Mfoné-mfoné ogyebhá-ḿbə́ŋé

27Nji Jisos a túbhi egan njí, nne-nkáé yót ka ekam áji a kûk káŋ káŋ káŋ se, “Nnyen nnyo a jíi wâ, a yábhe wâ, a fôn ekpatə́m ogyebhá-ḿbə́ŋé mbi ó fáŋe ó chiŋ ochíŋ.”

28Jisos a táme se, “A ri nne nnyo á yuk eyum Obhasi, a yîm noŋ a yúghi nâ a fonê ogyebhá-ḿbə́ŋé mbi ó fáŋe ó chîŋ ochíŋ.”

Sê Jisos a tóŋé eriŋ

(Mat 12.38-42)

29Nji ane á kí sui osúí á kpek, Jisos se, “Abhon ebhú njí á ti obhí á chiŋ! Á kí bhəp sê á tóŋé ábho eriŋ Obhasi, kən kpe jə́t á bhó toŋe é ká chiŋi nji Jona.#Mat 16.4; Mak 8.12. 30Ofú ábhi Jona a gyími noŋ eriŋ mbâ ane eték í Ninefa. Mmon-i-ntem-nne fə́ne a kí gyimi noŋ eriŋ mbâ eyəné.#Jona 3.4. 31Ka ofú ngun etáŋám, ntûfâm i nne-nkáé nnyo a dʉ óséré, tîk a gyími a sə́re se ó gbo ên. Echî aŋ? Yê a jenê a síghi ngun ofaré, a bhá yuk okpígha-ejûm í Soromon. Kən deê ń sə́ré ên bəre nne nnyo a faŋê a chíŋi Soromon a ri mfá.#1 Atúi 10.1-10; 2 É fâp 9.1-12. 32Ka ofú ngun etáŋám, ane Ninefa á kí gyimi á sə́re sê ó gbo ên. Echî aŋ? Ebhú á yúghi okpígha-ejûm í Jona, á mághe obhí ábho. Kən deê mân ń sə́ré ên bəre nne a ri mfá nnyo a faŋê a chíŋi Jona.”#Jona 3.5.

Nji é kí karé biji ebhát a ri jen?

(Mat 5.15; 6.22-23)

33Jisos a kpô túp egan se, “Kpe nne cháŋ nnyo a kí nyoé ńtʉ́ríkáŋ a kî ka ebhə̂t, na kpe ebhú tat a kô ejûm a bhúi. Á kik ka echî ébhúní nne a kí gye njû a yên ebhát.#Mat 5.15; Mak 4.21; Luk 8.16. 34Amə̂t amə́né á rî noŋ eyâŋ nji é tóŋa biji ibhə́né mbá. Ájoé amə̂t amə́né á rî nono, biji ndə́m fə́ne í kí fon ebhát. Kən á ro joé, biji eróŋ í kí joé ka ejírim. 35Nâ kó ên mân ebhú, ebhát ejə́né é kâ jóe ejírim. 36Ájoé mân ebhát é rî ka biji ibhâ ndə́m, eji ejírim cháŋ, biji ibhâ í sui na ebhát noŋ ngûn ḿ bara wâ ka njû.”

Jisos a chôt a bhíbhi ane echəme Farasi na atóŋá-ebhín

(Mat 23.1-36; Mak 12.38-40)

37Nji Jisos a manê nná nchot nnyí, nne echəme Farasi yót a bhîŋ yê se a bhá di édî ka njû eye. Jisos a jak a sî njû á kúmi á dí édî njí. 38Biji í kpô nne echəme Farasi nnyó nji a yéne se nne bəre Jisos a kí di édî á ka su abhô ka ekpak ebhín ábho é fíi.

39Kən Ńtâ Jisos a sə́re yê se, “Ên, ane echəme Farasi, ó suk ên njəm i nkuni na okpere, kən etím é sui na iyîm amoe na obhí chénchén. 40Ánə́mé ane! Obhasi nnyo a yimî njəm asík a yimî fə́ne etím a? 41Nâ karê ên mân nji díím nji é rî ka okpere mbí na nkuni mbâ akpák, tîk é yîm ên o kâ fôn akôp ka ochî Obhasi.

42“Tîk é bhîp ên kpe-eji, ên ane echəme Farasi! O kí ko ên ńnyóré na óyók é kpê na chénchén ajé isú amə́né, o kíri ên ngûm ófó, ó káre ên jə́t mbâ Obhasi noŋ ebhín é fíi, kən o mághe ên nnyen ekpin, na kpe etóŋóm okot mbâ Obhasi. Fiî ên bibhín mbí chénchén, o kâ mághe ên fə́ne mbi ngá eyimím.#Mbín 27.30.

43“Tîk é bhîp ên kpe-eji, ên ane echəme Farasi! O korê ên ekumúm ka ngûm ekumi nnyi ejík ka óchâm Obhasi, o korá ên sê ane á káre ên ejík ka ndûm éré. 44Tîk é bhîp ên kpe-eji, ka o ri ên noŋ oyəm mbi ó ká fon eriŋ, nne a kí chem a chîŋ á bhó məŋé se a ri ejûm akôp.”

45A kpô jeghé nchot eye, ntóŋa-ebhín yót a bhə̂p yê se, “Ńsé, ó məŋe se o kí tu êt fə́ne a?”

46Jisos a táme fə́ne ka egan se, “Tîk é bhîp ên fə́ne, ên atóŋá-ebhín, ka o kí chəmâ ên ane nchóé nnyi á nyəme okə́n, ên áfoné ó bhó gaé ên kpe egaám sê ó kə́n. 47Tîk é bhîp ên kpe-eji, atóŋá-ebhín, ka o kí gbe ên ánoê ayəm sê ó jíghí ên akará-otîp Obhasi mba ásé abhə́né ngá nâ á yúi. 48Nâ é fap sê ó kam ên sê ejûm nji ásé abhə́né á yími é nop. Ka ábho á yui oyúí, kən ên ó gbe ayəm. 49A ri ka obhô mbí nâ Obhasi ka oməŋá-ejûm obhê a toê se, tîk yê a tûm ábho akará-otîp na ágbán, kən tîk á yúi etʉ̂, á káre mba tat ekpatə́m oseŋe. 50Tîk Obhasi a kpə́re mân abhon ebhú njí ka eyúúm nji á yúi akará-otîp abhê ta ka eróghá-ndə́p í ngun ta é si égyé. 51É róghé ka Abel kpát ta é sî Sakariya nnyo á yúi ka etím ókʉ́rí achot Obhasi, ka étíŋanti eji ekəp etúbhúm na njû ekumi Obhasi. N kí səre ên ka etʉri bəre Obhasi tîk a kpə́re abhon ebhú njí nnyen ekpərə́m ka obhô akará-otîp mbá chénchén.#Eróghá 4.8; 2 É fâp 24.20-21.

52“Tîk é bhîp ên kpe-eji, ên atóŋá-ebhín, ka ên nâ o fiî erəbhé mbá mfoné nchot Obhasi eməŋə́m. Ên áfoné, ó bhó kam ên na ńnyə́ne, o kí gbʉi ên fə́ne ane etat á kâ kâm.”

53Nji Jisos a maghê eji njí, ane echəme Farasi na atóŋá-ebhín á chími yê á kâk ka ḿbə́ŋé, á chə́bhe á gbəná yê na bibhə̂p. 54Á koná yê sê a gbo ka nnyo, á fî yê.

Currently Selected:

Luk, echî 11: ETUNT

Highlight

Copy