Baloma 6

Kufwa Kushibi u Bumi mwa Kilisito

1No ninzho tulaamba acani? Sa tuukucili mu shibi kwaamba luse lwa Leza luhule? 2Bobo imbo pe! No mbuti uswe utwakafwa ku cibi mbutukonzha kwaamba tuukucipona mucibi? 3Sa tamwizhi ati uswe toonse nitwakapapatizwa mwa Jeso Kilisito, twakapapatizwa mu lufwu lwakwe? 4#Bako 2:12Ubobo twakazhikwa antoomwi u Jeso kwiita mulupapatizo lwa lufwu, kwaamba ati mbubona Kilisito mbwaakabushiwa ku bafwu u bulemu bwa ushi, aswe tweende mu bumi bupiya. 5Nkaambo na kuti twaswaangana antoomwi u Jeso Kilisito mu lufwu lwakwe, Umbona bobo tulakaswaangana mukubuka ku bafwu umbona mbwaakabuka. 6Tulizhi ati buntu bwesu bukulukulu bwakakankaminwa antoomwi u Jeso ciindi naakakankaminwa aciciinkano, kwaamba ati mubili wa cibi ubule insana ali uswe. 7Nkaambo kufwumbwa kuti muntu wafwa, ati waangululwa ku cibi. 8Pele na twakafwa u Kilisito, tulashoma ati aswe tulakapona aze. 9Tulizhi ati Kilisito mbwaakabushiwa ku bafwu, takafwi linji pe. Lufwu talumweendelezha linji. 10Nkaambo lufwu ndwaakafwa, wakafwa ku cibi ciindi comwi bulyo, pele bumi mbwaapona ulaponena kwa Leza. 11Mbubona bobo amwe mulyeelele kutelaika ati muli bafwu ku cibi, ulimwi mulikwete bumi mwa Leza kwiita mwa Kilisito Jeso. 12Inzho mutahuminya cibi ati cimusololele ukweendelezha mibili yenu ifwa, ulimwi mutacilila shisushi sha mubili. 13Mutaaba linji shizo shenu ukoya shisebezho shamilimo mibiyabi ya cibi, pele amulyaabe mbuli bantu bakahwa mu lufwu kuya mu bumi, mube shizo sha bululami kwa Leza. 14Nkaambo tamweelele kuhuminya cibi kwaamba cimweendelezhe, nkaambo tamweendelezhewa u Mulawo, bumi bwenu buleendelezhewa u luse lwa Leza.

Bazhice ba Bululami

15Anu twaambe acani? Sa, tucite cibi nkaambo kakuti bumi bwesu tabweendelezhewa u Mulawo, buleendelezhewa u luse lwa Leza? Imbo bobo pe! 16Sa tamwizhi ati na mwalyaaba kuba bazhice kuli umwi, mulaba bazhice ba wezo ngumuteelela? Mulakonzha kuba bazhice ba wezo ngumuteelela, nikuba ku cibi citola ku lufwu, naa bazhice ba kuteela, calo citola ku bululami. 17Pele Leza naalumbwe cini cini nkaambo mwakaakuli bazhice ba cibi, pele mazuba ano, muteelela ca monzo womwi kunjiisho nshibakamuyiisha. 18Inzho mbumwakahunwa ku cibi, mwaba bazhice ba bululami. 19Ndamupa cikozhano ca shintu shicitika nkaambo kabuntu bwenu bulengushi. Mwakaaba shizo shenu kwaamba shibe mubuzhice bwa shintu shisofweele u kutacilila malailile, shalo shitola kukutacilila malailile kubaala. Inzho amwaabe shizo shenu kwaamba shibe mubuzhice bwa kubululami butola kubusalazhi. 20Nkaambo nimwakaakuli bazhice ba shibi, kamutazandika kuba balulami. 21No mbubotuunzhi mbumwakayana nimwakaakucita shintu sheshi shimuyazha insoni mazuba ano? Mamanino a shintu shesi ndufwu. 22Pele ninzho mwakalubulwa kuhwa ku cibi ukuba bazhice baka Leza. Mulikwete bulumbu bwenu butola kubusalazhi, ubobo mamanino enu mbumi butamana. 23Nkaambo bulumbu bwa cibi ndufwu, pele cipo ca Leza mbumi butamana kwiita mwa Jeso Kilisito Mwami wesu.

Currently Selected:

Baloma 6: ILL

Highlight

Copy