Popular Bible Verses from Baloma 6

Share

Nkaambo bulumbu bwa cibi ndufwu, pele cipo ca Leza mbumi butamana kwiita mwa Jeso Kilisito Mwami wesu.

Nkaambo tamweelele kuhuminya cibi kwaamba cimweendelezhe, nkaambo tamweendelezhewa u Mulawo, bumi bwenu buleendelezhewa u luse lwa Leza.

Ubobo twakazhikwa antoomwi u Jeso kwiita mulupapatizo lwa lufwu, kwaamba ati mbubona Kilisito mbwaakabushiwa ku bafwu u bulemu bwa ushi, aswe tweende mu bumi bupiya.

Mutaaba linji shizo shenu ukoya shisebezho shamilimo mibiyabi ya cibi, pele amulyaabe mbuli bantu bakahwa mu lufwu kuya mu bumi, mube shizo sha bululami kwa Leza.

Tulizhi ati buntu bwesu bukulukulu bwakakankaminwa antoomwi u Jeso ciindi naakakankaminwa aciciinkano, kwaamba ati mubili wa cibi ubule insana ali uswe.

Mbubona bobo amwe mulyeelele kutelaika ati muli bafwu ku cibi, ulimwi mulikwete bumi mwa Leza kwiita mwa Kilisito Jeso.

No ninzho tulaamba acani? Sa tuukucili mu shibi kwaamba luse lwa Leza luhule? Bobo imbo pe! No mbuti uswe utwakafwa ku cibi mbutukonzha kwaamba tuukucipona mucibi?

Sa tamwizhi ati na mwalyaaba kuba bazhice kuli umwi, mulaba bazhice ba wezo ngumuteelela? Mulakonzha kuba bazhice ba wezo ngumuteelela, nikuba ku cibi citola ku lufwu, naa bazhice ba kuteela, calo citola ku bululami.

Pele Leza naalumbwe cini cini nkaambo mwakaakuli bazhice ba cibi, pele mazuba ano, muteelela ca monzo womwi kunjiisho nshibakamuyiisha. Inzho mbumwakahunwa ku cibi, mwaba bazhice ba bululami.