Matayo 6
6
Kuyohwa Bapenzhi
1“Amucenjele kwaamba mutalibonya bululami ku bantu camambonwa, nkaambo kuti mwacita bobo ati mwabula bulumbu kuli uswenu uli kwizeulu.
2“Ubobo ciindi nimupa shipo shaluse kubapenzhi mutafwibi impeta ukoya bashikuupaupa amenso mbubacita mu shikombelo shaba Juda u mikwakwa kwaamba batembaulwe ku bantu. Cini cini ndamwaambila ati babo bakabuyana kale bulumbu bwabo, 3pele umwe nimupa shipo shaluse itashi lyenu lya cimonsho litazhibi ncilicita lya cilyo, 4kwaamba shipo shenu shaluse shitabonwa ku bantu. Ubobo uswenu uubona shicitwa umasesece, ulakamupa bulumbu.
Mbumweelele Kukomba
(Luka 11:2-4)
5“Ulimwi nimukomba tamweelele kuba ukoya bashikuupaupa amenso pe, nkaambo balazandisha kukomba buzhimine mu shikombelo shaba Juda u mushooko shamikwakwa kwaamba babonwe ku bantu. Cini cini ndamushimwina ati babo batambula kale bulumbu. 6Pele umwe mwakanka kukomba amunjile muŋanda muliyalile mukombe kwa uswenu uulimo, ubobo uswenu ubona shicitwa umasesece, ulakamupa bulumbu.
7“Ulimwi nimukomba mutaakuhuzha shakwaamba ukoya mbubacita bakunze mubazunga ati balateelelwa ukaambo kamazwi manji manji. 8Umwe mutabi ukoya mbubabele nkaambo Uswenu ulishizhi kale nshimuzanda kamutana u kumukumbila. 9Inzho mbubolya mbumweelele kukomba,
“‘Ushesu uuli kwizeulu,
Nalilemekwe izhina lyako,
10Nabuzhize bwami bwako, nalucitwe luzando lwako,
Anshi ano umbona mbuli kwizeulu.
11Utupe bwasunu shakulya shesu.
12Utulekele milandu yesu,
umbona aswe mbutubalekelela bali milandu kulyuuswe.
13Utatweenzha mukutepaulwa,
Pele utuhune ku mubiyabi.’ #6:13 Ma baibele amwi alaya kumbele u kwaamba: “nkaambo bwami mbwako insana u bulemu, sikwense ushikwense.”
14 #
Mk 11:25, 26 “Nkaambo kuti kamubalekelela bamubishizha, uswenu uuli kwizeulu ulakamulecelela shibi nshimwakacita amwe. 15Pele kuti naa tamubalekelela bantu, aze uswenu takamulekelela shibi nshimwakacita.
Makani Aakuliimya kulya
16“Ulimwi mwaakuliimya kulya, mutaakuungumana ukoya bashimantumbwambwa mbubacita. Nkaambo balahunga mashu abo kwaamba woonse muntu ababone ati balaliimya kulya. Cini cini ndamwaambila ati babo bakabutambula kale bulumbu bwabo. 17Mwaliimya kulya amusambe kumenso, munane mafwuta umutwi, 18kwaamba bantu batazhibi ati mwaliimya kulya cita bulyo uswenu uzhi shoonse nguukazhiba. Ulimwi wezo uswenu ubona shicitwa mu masesece ulakamulumbula bweelele.
Lubono Kwizeulu
(Luka 12:33-34)
19 #
Jem 5:2, 3 “Mutaakulizobolela lubono anshi ano ngululiwa impezu u sence. U batewu ngubanjila u kwiba. 20Pele umwe amulizobolele lubono lwenu kwizeulu koko nkulutaliwa impezu u sence u batewu nkubatenjili u kwiba. 21Nkaambo koko kuli lubono lwako, ati u monzo wako nkuubele.
Mumuni wa Mubili
(Luka 11:34-36)
22“Menso ali ukoya mumuni wa mubili. Naa menso alabona kabotu, ati mubili wako woonse ulizwile mumuni, 23pele kuti asata, ati mubili wako woonse ulaba mu mushinze. Inzho kuti mumuni wako kooli mushinze, ati wezo mushinze ulazoosha!
Leza u Lubono
(Luka 16:13; 12:22-31)
24“Kwiina muntu ukonzha kusebezela bami bobile, nkaambo umwi ulamusula u kufwuna uumwi, naa ulashomeka kuli umwi ukusampaula uumwi. Tamukonzha kusebezela Leza u buhubi.
25“Ubobo mutalibilici ku makani a bumi bwenu kwaamba ati, no tulakalyaanzhi naa kunwa nikuba kusama. Sa bumi tabubaali ali shakusama? Naa mubili sa toobaali ashisani? 26Amubalange bazuni tabashangi nikuba kutebula kwaamba bazobole umatala, pele uswenu uuli kwizeulu ula beembela! Sa umwe tamubaali abazuni? 27Nguni akati kenu ukonzha kuzungila bumi bwakwe kwiita mukulibilika?
28“Nciinzhi ncimulibilika ku makani ashisani? Amwaalange malubaluba a mwisokwe mbwaakomena. Taasebezi nikuba kulipangila shakusama. 29#1 Bami 10:4-7; 2 Maka 9:3-6Pele ndamwaambila kwiina naaba mwami Solomoni umbulemu bwakwe naakakwata cikobelo cibotu ukoya aza malubaluba. 30Pele kuti naa Leza kakonzha kusamika bwizu bufwumbi bwasunu ngubuli uzona bwatentwa, sa takaamusamika cibaala? Anu nkaambonzhi umwe ncimwiina lushomo?
31“Ubobo mutalibilici ati no tulakalyaanzhi na ati tulakanwaanzhi nikuba kusamaanzhi. 32Nkaambo sheshi abo bakunze nshibakapula, amana Ushenu ulizhi ati sheshi shintu mulashizanda. 33Pele amutaangune kukapula bwami bwakwe ubululami bwakwe, kwamana shoonse shintu mulakapewa. 34Ubobo mutalibilici linji shazona nkaambo bwazona bulakalipakashizha bwini. Kufwumbwa buzuba bulikwete mapakasho ambubo bwini.”
Currently Selected:
Matayo 6: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.