Matayo 24

Jeso Waamba Makani Aakuzonaunwa kwa Ŋanda ya Leza

1Inzho naakuya bweenda kuhwa muŋanda ya Leza, ba shiciiya bakwe bakamutondezha buzake bwa ŋanda ya Leza. 2Walo wakabaingula ati, “Sa mwashibona sheshi shoonse? Cini cini ndawaambila ati kwiina ibwe likashaala ezeulu alyeenzhiina. Oonse alakoolomonwa.”

Mapenzhi u Kupenzhewa

(Maako 13:3-13; Luka 21:7-19)

3Inzho Jeso naakakala alupili lwa masamu ama oliva, ba shiciiya bakwe bakashika kwakwe cakuliseseka bamubuzha ati, “Tushimwine, ndililiye sheshi shintu nishikaacitika? Ulimwi nciinzhi cikaaba citondezho cakwiza kwako u mamanino aciindi?” 4Jeso wakabaingula ati, “Amucenjele kwaamba muntu atakamucengi. 5Nkaambo banji banji balakeza mwizhina lyangu ukwaamba ati, ‘Ndime wezo Munanike,’ ulimwi balakasowa bantu banji banji. 6Mulakaakuteelela inkondo iimpuwo shankondo, shili kulaale pele mutakatiyi. Nkaambo sheshi shilyeelele kutaanguna kucitika mamanino kaatana kushika, 7cishi cilakalwa u cishi nina, aabo bwami u bwami nina. Kulakaba inzala u kuzungaana kwanshi umasena aandeene andeene. 8Shoonse shehi makancilo bulyo a mapenzhi ali ukoya mishika yamukaintu uuzanda kutumbuka.

9 # Mat 10:22 “Umwe balakamwaanga u kumunjizha mu mapenzhi u kuya kumuyaya. Mulakasulwa u bantu ba bakunze oonse ukaambo kangu. 10Muciindi ceco bantu banji banji balakaluleka lushomo lwabo. Muntu umwi uumwi ulakaaba u kusula mweenzhiina. 11Kulakashika bashinshimi babeshi banji banji, ulimwi balakasowa bantu banji banji. 12Inzho ukaambo kakuhula kwabubi, lufwuno lwa bantu banji banji lulakamana. 13#Mat 10:22Pele wezo ukaakakatila kushikila ku mamanino ulakafwutulwa. 14Ulimwi aza Makani Mabotu a bwami bwa Leza, alakakambaukwa inshi yoonse kwaamba bukabe bumboni ku mishobo yoonse. Ndilelyo mamanino aciindi naakaashika.

Mapenzhi Makando

(Maako 13:14-23; Luka 21:20-24)

15 # Dan 9:27; 11:31; 12:11 “Ubobo mwakacibona ‘Cisesemyo cisofwaazha,’ ceco ncaakaamba Danyele mushinshimi ati, ‘Cilizhimine abusena busalala’ wezo uubala Malembe ateelele. 16Babo bali mu Judiya balukancile ku mapili. 17#Lk 17:31Aze wezo uuli alululi ataseluka kwaamba akakushe shesho shili muŋanda yakwe. 18Uukayanwa ku muunda atakasowa ciindi cakupiluka kuŋanda kuya kubweza cibaci cakwe. 19Pele kulakaba mapenzhi ku bakaintu bamishi u babo bati bakaakunonsha ku mazuba azo! 20Amukombe kwaamba mutakalukanka muciindi camweto naa mu Sabata. 21#Dan 12:1; Cizu 7:14Nkaambo ku ciindi ceco kulakaba mapenzhi aatanabwenwe kuhwa kumalengelo anshi kushikila bwasunu, ulimwi takukabi aanji a kozhene aazo pe. 22Inzho azo mazuba kuti naatakafwiinshiwa, nikwatakaba naaba womwi muntu uuti naakafwutuka. Pele Leza ulakaafwiinsha mazuba azo ukaambo ka bantu mbaakasala.

23“Ku ciindi ceco, naa umwi akaambe ati, ‘Bona nguwezu Kilisito!’ Naa ati, ‘Nguwelya!’ Mutamushomi. 24Nkaambo kulakaba babeshi balyaamba ati, ‘Ndime Kilisito’ ulimwi kulakaba u bashinshimi babeshi! Balakacita shitondezho u shintu shizoosha, kwaamba cakaakukonzheka bakabasowe u babo mbaakasala. 25Amuteelele, ndamushimwinina limwi shintu sheshi kashitana kucitika. 26#Lk 17:23, 24Ulimwi kuti bantu bakamwaambile ati, ‘Amuteelele Kilisito uli mulukula,’ mutakayi. Kuti naa bakaambe ati, ‘Amubone nguwelya ulizubile kolya,’ mutakashomi. 27Bobo mbwakeeza Mwanaa Muntu, ulakeza ukoya lulabo mbululaba kuhwa kwiwe ukumweka kuya kushika kumbo. 28#Lk 17:37Koko kuli mutunta nkubakaabungana ba shikube.

Kwiza kwa Mwanaa Muntu

(Maako 13:24-27; Luka 21:25-28)

29 # Aiz 13:10; Jow 2:10, 31; 3:15; Cizu 6:12; Aiz 13:10; Eze 32:7; Jow 2:10; 3:15; Aiz 34:4; Cizu 6:13 “Ndilyona-ndilyona akamana mapenzhi a mazuba azo, izuba lilakabola, awo mwezhi tookamunika, asho intongwezhi shilakaloka kuhwa kwizeulu, iinsana sha kwizeulu shilakazungaana. 30#Dan 7:13; Zaka 12:10-14; Cizu 1:7Inzho kulakalibonya citondezho ca Mwanaa Muntu mwizeulu, ubobo mishobo yoonse yaanshi ilakalila ulimwi balakoombona Mwanaa Muntu uleza ezeulu amakumbi iinsana u bulemu bukando. 31Ulimwi ulakatuma baanjelo bakwe u kulila kukando kwapeta, kwaamba beze kubunganya bantu mbaakalisalila kuhwa kuluya lumwi lwanshi kuya kushika kuluya lumwi.

Ciiyo ce Samu lya Mukuzu

(Maako 13:28-31; Luka 21:29-33)

32“Amwiiye ciiyo kuhwa kwisamu lya mukuzu. Mwalibona lyashuuka mwazhiba ati mainza ali afwaafwi. 33Umbona bobo amwe mwakashibona sheshi shintu mukezhibe ati Mwanaa Muntu uli afwaafwi ulimwi uli amulyango. 34Cini cini ndamwaambila ati, izhalani leli tabakamaninina kufwa mpaka shintu sheshi shoonse shikacitike. 35Izeulu iinshi shilakaloba pele mazwi angu taakamana.

Kwiina Uubwizhi Buzuba u Ciindi

(Maako 13:32-37; Luka 17:26-30, 34-36)

36“Pele kwiina uubwizhi buzuba niciba ciindi naaba womwi. Nibaba baanjelo ba kwizeulu, naaba Mwana, cita bulyo Taata ice nguuzhi. 37#Mata 6:5-8Umbona mbucakaakubele ku mazuba a Nowa, ukwiza kwa Mwanaa Muntu mbukukaaba. 38Nkaambo ku mazuba a Nowa meenzhi kaatana kupaya, bantu bakaakulya u kunwa u kutwala u kutwazhiwa, mpaka mu buzuba Nowa naakanjila mu bwato. 39#Mata 7:6-24Kwiina ncibakaakwizhi kushikila meenzhi naakabalobya boonse. Umbona bobo mbukukaaba ukwiza kwa Mwanaa Muntu. 40Ku ciindi ceco bantu bobile balakayanwa mu muunda balalima, umwi ulakatolwa umwi ulakashaala. 41Bakaintu bobile balakaakuzhiya antoomwi pele umwi ulakatolwa umwi ulakashaala.

42“Ubobo amucenjele, nkaambo tamubwizhi buzuba Mwami wenu naakaazhiza. 43#Lk 12:39, 40Inzho amuzhibe aza, kuti mukamwini iŋanda naakaakwizhi buzuba mutewu mbwaazhiza, naakakala ukulindila kwaamba mutewu atanjili. 44Ubobo amwe mulyeelele kulibambila, nkaambo Mwanaa Muntu ulakeza muciindi ncimutamuzeezela.

Bashomi naa Ubatashomi

(Luka 12:41-48)

45“Nguuliye musebezhi musongo uushomeka? Nguwezo wakabikwa kwa shimatwangaakwe kwaamba alange basebezhinina, kwaamba aakubapa shakulya muciindi ceelele. 46Walongelwa wezo musebezhi uufwumbi ati azhoka shimatwanga wakwe wamuyana ulasebeza. 47Cini cini ndamwaambila ati, shimatwangaakwe ulakamubika kwaamba abe nguulanga lubono lwakwe loonse. 48Pele musebezhi mubiyabi ulaamba ati, ‘Shimalelo wangu wamuka,’ 49amana wakanka kuuma basebezhinina, ukulya u kunwa u bacakolwa. 50Shimatwanga wamusebezhi wezo ulakeza mu buzuba mbwaatamuzeezela aciindi ncaatezhi. 51Ulakamupa cisubulo, ukumusowela koko kuyanwa bashikuupaupa amenso. Kwalo koko bantu nkubakaalila u kuluma inkwino.”

Currently Selected:

Matayo 24: ILL

Highlight

Copy