Matayo 14

Lufwu lwa Johani Mupapatizhi

(Maako 6:14; Luka 9:7-9)

1Ku ciindi ceco Helodi mweendelezhi wacipanzha cimwi ca Galilaya, wakaateelela makani aka Jeso. 2Wakaambila batwanga bakwe ati, “Ambweni Johani Mupapatizhi wabuka ku bafwu, nciceco ncaakwete insana shakucita maleele aza.” 3#Lk 3:19, 20Nkaambo Helodi wakamukwata Johani wamwaanga u kumubika muntolongo. Wakacita bobo ukaambo ka mulamwaakwe munina Helodiyasi waakuli muka Filipo. 4#Bale 18:16; 20:21Nkaambo Johani wakamwaambila ati, “Tacihuminyiwa kwaamba utwale Helodiyasi muka munyoko pe.” 5Ulimwi nikuba ati Helodi kakwete muzeezo wakuti amuyaye Johani, wakatiya bantu nkaambo bakaakwizhi ati Johani mushinshimi.

6Inzho buzuba bwa kusekelela kuzhalwa kwa Helodi nikwakashika, mwanakwe Helodiyasi mushimbi wakabazhanina bantu cakuti Helodi wakabotelwa, 7wakamushomezha cakupinga ati, “Ndakupa kufwumbwa ceco ncuukakumbila!” 8Baina naakamwaambila ncaayelele kukumbila wakamushimwina ati koya ukamwaambile ati, “Mpa mutwi waka Johani momu mu mutiba.” 9Mwami Helodi wakausa cini cini, pele ukaambo kakuti wakapinga bantu boonse kabateelele, wakalailila ati wezu mushimbi apewe ncaakakumbila. 10Ulimwi wakalailila ati Johani akosolwe mutwi muntolongo. 11Ubobo mutwi wakaletwa mu mutiba kumushimbi wezo, amane wootola kwa baina. 12Ngoonaawo ba shiciiya baka Johani bakeza boobweza mutunta baya kuuzhika bamane bapiluka beza kumushimwina Jeso.

Jeso Wasanina Bantu bali Shuulu Shosanwe

(Maako 6:30-44; Luka 9:10-17; Johani 6:1-14)

13Jeso ateelele bobo, wakakuhwa koko wanjila mu bwato kwaamba aye kubusena buliibile. Pele bantu nibakateelela ati Jeso wakuhwa, bakeenda anshi bamucilila koko nkwaakaya. 14Alanduke bulyo, wakaabona makamu makamu abantu, wakabafwila inkumbu u kubaponya balwazhi mbubakaleta. 15Kalitana kwibila izuba ba shiciiya bakwe bakamwaambila ati, “Kukalashiya ulimwi mono mu mwisokwe, baambile bantu baye mu minzhi bakalyuulile shakulya.” 16Jeso wakaamba ati, “Tabeelele kuya, umwe lwenu amubape cakulya!” 17Balo bakaingula ati, “Uswe tulikwete bulyo shinkwa shosanwe iinswi shobile.” 18Jeso wakaingula ati, “Amushilete kono.” 19Amane wabalailila boonse bantu kwaamba bakale anshi abwizu. Inzho wakabweza shinkwa shosanwe iinswi shobile walyaalala walumba kwa Leza. Amane washikomauna wabapa ba shiciiya kwaamba babaabanye bantu. 20Boonse bakalya cakukuta. Ba shiciiya bakabwezelela bufwefwelenga, bakazuzha iintundu shili ikumi u shitwesha shobile. 21Mweelwe wabalombwana bakalya kooshika ku shuulu shosanwe kutabala bakaintu u bana.

Jeso Weenda Ameenzhi

(Maako 6:45-52; Johani 6:15-21)

22Amane Jeso wakabalailila ati banjile mu bwato basolole baye kumutala umwi wezhiba, walo washaala ulaambila u bantu kwaamba bapiluke. 23Bantu nibakamana kuya, wakaliza alupili ice waya kukomba ciindi ca mangolezha. 24Ku ciindi ceco bwato kabusakene kuhwa kunkomwe, bulaya butonkwa u mauya nkaambo muuwo wakaakuunga. 25Inzho alya aaselukila inkuku, wakeza nkubakaakubele uleza bweenda ameenzhi. 26Nibakamubona bakatiya cabulowe ukukwiila bakaamba ati, “Ngu sikazwa!” 27Ngoonaawo Jeso wakabaambila ati, “Amukalike shamba, ndime. Mutatiyi.” 28Inzho Pita wakaamba ati, “U mwami kuti naa ndiwe cini cini, ŋambila ame nyende ameenzhi.” 29Wakaingula ati, “Kweza.” Ubobo Pita wakahwa mu bwato weenda ameenzhi weza kwa Jeso. 30Pele naakaabona muuwo waunjisha, wakatiya ngoonaawo wakanka kwibila mu meenzhi walila ati, “Mwami nhuna!” 31Ndilyona Jeso wakamukwata wamwita ati, “Umuntu wa lushomo lushoonto, nkaambonzhi nciwazuluzha?” 32Ngoonaawo boonse bakanjila mu bwato u muuwo wakaliinza. 33Ubobo ba shiciiya bakaakuli mu bwato bakamukomba u kwaamba ati, “Ncini cini uli Mwanaa Leza!”

Jeso Waponya Balwazhi ku Genesaleti

(Maako 6:53-56)

34Inzho nibakalanduka izhiba bakashika ku cishi ca Genesaleti. 35Bantu bakoko nibakazhiba ati Jeso washika bakatuma myoompoompo kumasena oonse akaakubazhingulucile. Ubobo balwazhi boonse bakaletwa. 36Bakamukumbila ati abahuminye balwazhi kwaamba bakumye kumoombe wacisani cakwe kwaamba bapone, inzho boonse bakacita bobo bakapona.

Currently Selected:

Matayo 14: ILL

Highlight

Copy