Matayo 15

Injiisho shabashaakale

(Maako 7:1-13)

1Ngoonaawo ba Falisi u balembi bakeza kwa Jeso kuhwa ku Jelusalemu bamubuzha ati, 2“Nkaamboonzhi ba shiciiya bako ncibatacitili shakayiisha ba shaakale? Nkaambo tabasamba kumatashi kabatana kulya.” 3Wakabaingula ati, “No umwe ncinzhi ncimusotokela milawo ya Leza, ukaambo kakuzanda kucilila bulyo injiisho shenu? 4#Kul 20:12; Ciz 5:16; Kul 21:17; Bale 20:9Inta kayi Leza wakalailila ati, ‘Lemeka uso u banoko,’ ulimwi ‘Kufwumbwa wezo usampaula ushi u baina ulyeelele kafwa.’ 5Pele umwe mulaamba ati, naa muntu wamwaambila ushi naa baina ati, ‘Shesho nshindaakuzanda kumuyohwa ndashipa Leza, teelele kulemeka ushi pe.’ 6Ubobo ukaambo kanjiisho shenu mwaliubausha izwi lya Leza. 7Umwe nubashikuupaupa amenso!” Aizaya wakashinshima meni meni nakaamba ati,

8 # Aiz 29:13 “‘Baba bantu balandemeka u milomo yabo,

pele myonzo yabo ili kulaale ame.

9Tacibayohwa kunkomba,

kaambo balayiisha milawo ya bantu ukoya milawo ya Leza!’ ”

Shintu Shisofwaazha Muntu

(Maako 7:14-23; Luka 6:39)

10Ngoonaawo Jeso wakaboompolola bantu u kubaambila ati, “Amupupulale muteeleleshe! 11Tacili ciya mwifwu cisofwaazha muntu pe, pele cihwa mukanwa ncicisofwaazha muntu.” 12Ba shiciiya bakeza kwakwe bamwaambila ati, “Sa alo ulizhi ati alya makani abacima ba Falisi?” 13Jeso wakaingula ati, “Kufwumbwa cishango ncaatakashanga Taata uli kwizeulu cilakazhulwa. 14#Lk 6:39Amubaleke bulyo! Mboofwu balasololela boofwu, pele kuti moofwu wasololela moofwu nina balawila mwilindi boonse.” 15Pita wakamwaambila ati, “Tupandululile kaka kaambyo ncikaamba.” 16Jeso wakaamba ati, “Eena amwe muciina luzhibo? 17Sa tamwizhi ati ceco cinjila mukanwa cilaita mwifwu mpaka caya kuhwa ansengwe. 18#Mat 12:34Pele ceco cihwa mukanwa ncicisofwaazha muntu, nkaambo cilahwa mu monzo. 19Nkaambo mu monzo mumuhwa mizeezo mibiyabi, buyazhi, bumambe, butewu, bukamboni bwakubeya u buhwizhi. 20Sheshi nshishi musofwaazha muntu, pele kulya butasambile kumatashi tacimusofwaazha muntu pe.”

Lushomo lwa Mukaintu waku Kenaani

(Maako 7:24-30)

21Inzho Jeso akuhwe bulyo koko wakaya kushishi sha Taya u Sidoni. 22Inzho kwakamuzhila mukaintu waku Kenani. Wakapozomoka ati, “Mfwila luse u mwana Devidi, mwanangu mushimbi wanjilwa moza mubiyabi.” 23Pele Jeso wiina naakamutaba niliba izwi lyomwi. Ngoonaawo ba shiciiya bakeza kwakwe bamwaambila ati, “Mutande wezu mukaintu watusabila.” 24Jeso wakaingula ati, “Ndakatumwa bulyo kumbelele inzhimini sha ŋanda ya Izilaili.” 25Pele mukaintu wakaswena kufwukamina waamba ati, “Mwami njohwa.”

26Jeso wakaamba ati, “Tacili cibotu kunanga bana cakulya u kucisowela babwa.”

27Walo mukaintu wakaingula ati, “Ee mbwaabele, pele abo babwa balabwezelela bufwefwelenga buloka kwitebulu lyabashimalelo babo.”

28Jeso wakaingula ati, “Uwe uli mukaintu wa lushomo lukando, acibe umbona mbuuzanda.” Ubobo mwanakwe wakapona aciindi ncicona ceco.

Jeso Waponya Bantu Banji Banji

29Jeso wakakuhwa koko wakaya waita ku lwaatele lwa Galilaya. Wakaliza alupili wakakala. 30Makamu makamu a bantu akashika kwakwe, akaletelela u balema u bapuutile u boofwu u bashicintaamba ubamwi banji banji. Bakabakalika kumbali kwa Jeso ubobo wakabaponya. 31Bantu bakazhingwa cini cini nibakabona ati bashicintaamba bakaamba u balema bakeenda u boofwu bakabona u bapuutile bakapona. Ngoonaawo bakamutembaula Leza wa Izilaili.

Jeso Waba Sanina bali Shuulu Shone

(Maako 8:1-10)

32Ngoonaawo Jeso wakabeta ba shiciiya bakwe waamba ati, “Banjetezha baba bantu, kaambo twaakuli abo kwa mazuba otatwe cakubula uncibalya pe. Pele nshizanda kubaambila ati baye bwiina ncibalile, balawizuka munzhila.” 33Ba shiciiya bakamubuzha ati, “No tushiyane kwi shakulya shinji shinji mono mulukula shakuti bantu bakute?” 34Jeso wakababuzha ati, “No mulikwete shinkwa shongaye?” Bakaingula ati, “Tulikwete bulyo shili ciloba utuswi tushoonto.” 35Wakaambila makamu makamu abantu ati akale anshi. 36Wakabweza shinkwa shili ciloba utuswi, amane kulumba wakashikomauna wabapa ba shiciiya kwaamba babaabanye bantu. Bakacita mbubona mbubakalaililwa. 37Boonse bantu bakalya ukukuta, ba shiciiya bakabwezelela intundu shili ciloba shabufwefwelenga bwakashaala. 38Balombwana bakalya kabali shuulu shili shone kutabala bakaintu u bana. 39Bantu nibakamana kuya, Jeso wakanjila mu bwato wakaya ku cishi caku Magadani.

Currently Selected:

Matayo 15: ILL

Highlight

Copy