Luka 9
9
Jeso Watuma bali Ikumi Ubatwesha Bobile
(Matayo 10:5-15; Maako 6:7-13)
1Jeso wakabeta ba shiciiya bakwe bali ikumi ubatwesha bobile. Wakabapa bwami iinsana shakukusha ba myoza miyabi u kuponya malwazhi. 2Amane wakabatuma kwaamba bakakambauke sha bwami bwa Leza u kuya buponya balwazhi 3Wakabashimwina ati, “Mutabwezi cintu niciba comwi mu mushinzo wenu. Mutabwezi musako niciba cikwama, niciba cakulya, naaba mali. Ulimwi mutabwezi shakusama shobile pe. 4Kufwumbwa muŋanda mubakaamutambula amukakale mo kushicila nimukaamuhwa mu munzhi wezo. 5#Inc 13:51#Lk 10:4-11Ulimwi kufwumbwa koko koonse nkubatakaamutambuli, mwakahwa mu munzhi wezo, mukapampumune lufwuko kumatende enu kwaamba cikabe cicenjezho nkubabele.” 6Ba shiciiya bakaya mu minzhi yoonse kuya bukambauka Makani Mabotu, u kuya buponya balwazhi mu masena oonse.
Helodi Wakapenga mu Monzo
(Matayo 14:1-12; Maako 6:14-29)
7 #
Mat 16:14; Mk 8:28; Lk 9:19 Inzho mwami Helodi, naakaateelela aza makani oonse akacitika, wakapenga mu monzo cini cini. Nkaambo bamwi bantu kabaamba ati, “Johani Mupapatizhi wabuka ku bafwu. 8Bamwi kabaamba ati, Elaija walibonya ulimwi. Pele bamwi kabaamba ati, umwi wa bashinshimi bakale kale wabuka ku bafwu.” 9Helodi wakaamba ati, “Ume Johani ndakamukosola mutwi, no wezu nguni ucita shintu sheshi nshinteelele?” Ubobo kazandisha kwaamba amubone Jeso.
Jeso Wasanina Bantu bali Shuulu Shosanwe
(Matayo 14:13-21; Maako 6:30-44; Johani 6:1-14)
10Nibakapiluka batumwa, bakamwaambila Jeso shoonse nshibakacita. Inzho Jeso wakaya kwaamba akaliibe u ba shiciiya bakwe kubusena buli afwaafwi u munzhi wa Betisaida. 11Bantu banji banji nibakezhiba nkwakakubele, bakamucilila. Inzho wakabatambula wakanka kubaambila makani a bwami bwa Leza. Ulimwi wakaponya babo boonse bakaakuzanda kwaamba abaponye. 12Izuba nilyaakuzanda kwibila, ba shiciiya bali ikumi ubatwesha bobile, bakeza kwa Jeso baamba ati, “Baambile bantu baye mu minzhi umumatungu ali afwaafwi, kwaamba baliyanine shakulya ukwakoona kaambo kono nkutubele nkukwisokwe.”
13Pele Jeso wakabaingula ati, “Noombape cakulya ndimwena umwe.” Balo bakaingula ati, “Uswe tulikwete bulyo shinkwa shosanwe utuswi tobile. Sa ulazanda tuye tukaule shinkwa shinji shinji nshibakezulila bantu boonse baba?” 14Nkaambo awo kaali balombwana bakaakutandila ku shuulu shili shosanwe.
Inzho Jeso wakabaambila ba shiciiya bakwe ati, “Amubakalice mutukamu twamakumi osanwe.”
15Bakacita bobo, bakabakalika bantu boonse. 16Ngoonaawo Jeso wakabweza shinkwa shesho shosanwe utuswi tobile, wakalyaalala kwizeulu washilonjezha, amane washikomauna. Wakabapa ba shiciiya bakwe kwaamba babaabanye bantu mutukamu. 17Boonse bantu bakalya bakekuta. Ba shiciiya bakabwezelela bufwefwelenga bakezuzha shinzuma shili ikumi ushitwesha shobile.
Pita Waamba ati Jeso Munanike waka Leza
(Matayo 16:13-19; Maako 8:27-29)
18Ciindi cimwi Jeso kali mwini ice ulakomba, ba shiciiya bakeza kwakwe. Wakababuzha ati, “No bantu balaamba ati ume ndime ni?”
19 #
Mat 14:1, 2; Mk 6:14, 15; Lk 9:7, 8 Abo bakamwiingula ati, “Bamwi balaamba ati ndiwe Johani Mupapatizhi. Bamwi balaamba ati ndiwe mushinshimi Elaija. Ulimwi bamwi balaamba ati uli umwi wabashinshimii bakale kale uwakabuka ku bafwu.”
20 #
Joh 6:68, 69 Jeso wakababuzha ati, “No umwe mulaamba ati ndime ni?” Pita wakaingula ati, “Ndiwe Munanike wa Leza.”#9:20: Munanike:cilaamba muci Giliki ngu Kilisito, muci Hibulu Mesaya
Jeso Waamba sha Mapenzhi u Lufwu Lwakwe
(Matayo 16:20-28; Maako 8:30-38; 9:1)
21Jeso wakabalailila ba shiciiya bakwe ati batashimwini muntu naaba womwi aza makani pe. 22Ulimwi wakaamba ati, “Mwanaa Muntu ulyeelele kupenga mu shintu shinji shinji ukukakwa ubakando, u bapaizhi bakando u balembi. Ulakayayiwa, pele buzuba bwatatu ulakabushiwa.”
23 #
Mat 10:38; Lk 14:27 Ngoonaawo Jeso wakabaambila boonse ati, “Na kuti muntu ulazanda kuncilila, aliimye, abweze ciciinkano cakwe mazuba oonse ukuncilila. 24#Mat 10:39; Lk 17:33; Joh 12:25Nkaambo kufwumbwa muntu uzanda kuzobola bumi bwakwe, ulakabusowa. Pele muntu usowa bumi bwakwe ukaambo kangu ulakabuyana. 25No muntu ulayana impinduunzhi, kuti wahuba inshi yoonse, amana wazhimininwa bumi bwakwe nikuba kubuzonauna? Kwiina pe! 26Ubobo, kufwumbwa muntu uusa insoni kukaambo kangu u makani angu, aze Mwana muntu ulakamuusila insoni akeza mu bulemu bwakwe, umubulemu bwa ushi u baanjelo basalala. 27Cini cini ndamushimwina ati nkubali bamwi ano batakaafwi kabatana kubona Bwami bwa Leza.”
Kusanduka kwa Mubili wa Jeso Alupili
(Matayo 17:1-8; Maako 9:2-8)
28Kwiite mazuba ali lusele kuhwa nakaamba aza makani, Jeso wakabweza Pita u Johani u Jemusi munina. Wakaya alupili kuya kukomba. 29Inzho naakaakucikomba, ciwa cakwe cakasanduka, ushakusama shakwe shakatuba buu! 30Ndilyona ndilyona kwakabulika balombwana bobile ba Mozesi u Elaija bakaakubandika u Jeso. 31Bakabonwa mu bulemu bwa kwizeulu balabandika u Jeso makani a lufwu lwakwe ndwaakaafwa ku Jelusalemu. 32Pita u beenzhiina kabali mutulo, pele nibakashinshimuka, bakabubona bulemu bwaka Jeso u balombwana babo bobile mbakaakuzhimine abo. 33Ciindi balombwana baba nibakaakuzanda kuya, Pita wakamwaambila Jeso ati, “Mwiiyi, cabota kwaamba tuli ano abusena! Tulazaka shifwutu shotatwe, cimwi cilaba cako, cimwi cibe caka Mozesi, cimwi cibe caka Elaija.” Pele Pita katacizhi ncakaakwaamba.
34Naakaakucaamba, ikumbi lyakeza kubahumba. Ba shiciiya bakatiya cini cini ikumbi nilyakabahumba. 35#Aiz 42:1; Mat 3:17; 12:18; Mk 1:11; Lk 3:22#2 Pita 1:17, 18Kwakwahwa izwi mwikumbi lyaamba ati, “Wezu ngu mwanangu nakufwunwa ngundakasala noomuteelele.”
36Limane kwaamba izwi, Jeso wakashaala mwini ice. Ba shiciiya bakaliinza wii! Kwiina muntu naaba womwi ngubakaambila aza makani aceco cakacitika ncibakabona.
Jeso Wamuponya Mweembezhi Uunjililwe Moza Mubiyabi
(Matayo 17:14-18; Maako 9:14-27)
37Mu buzuba bwakacilila, bakaseluka alupili. Inkamu inkando yakamuswaanganya Jeso. 38Ngoonaawo umwi mulombwana wakaakuli mukati munkamu wakoompolola ati, “Mwiiyi mufwile luse mwanangu ndakulomba nkaambo ngu mwanangu ice nana. 39Ulanjilwa moza mubiyabi mukali. Ulamulizha ulamucina anshi ukumuwizula ukumukusha injohwu ku mulomo. Ulamupenzha ukumucisa tamuleka pe. 40Ndakabalomba ba shiciiya bako kwaamba bookushe moza mubiyabi wezu pele bakakacilwa.”
41Ngoonaawo Jeso wakaamba ati, “Akaka umwe nubantu bazumu mitwi, umutashomi. Ndakala amwe ciindi cilamfwu buti?” No ndamupengela ciindi cili buti? Mulete kono mwanako.
42Mweembezhi wezo nakaakwiza kwa Jeso, moza mubiyabi wakamunjila, wamucinina anshi wakanka kusansa. Inzho Jeso wakoolemanina moza mubiyabi, wamuponya mweembezhi ukumupilusha kwa ushi.
43Bantu boonse shakabazoosha sheshi insana inkando sha Leza shakuponya.
Jeso Waamba sha Lufwu Lwake Ulimwi
(Matayo 17:22-23; Maako 9:30-32)
Bantu nibakaakucizhinjilwe ku shintu sheshi shakacitika, Jeso wakabaambila ba shiciiya bakwe ati, 44“Amwaateeleleshe mazwi azo ngunzanda kumwaambila! Mwanaa Muntu ulakaabwa kumatashi a bantu.” 45Pele bantu bayina nibakezhiba ncakaakwaamba. Nkaambo kaasesekelwe kwaamba batateelelesha. Ubobo bakatiya kumubuzha.
No Nguni Mukando?
(Matayo 18:1-5; Maako 9:33-37)
46 #
Lk 22:24
Kwakaba kukazhanya akati ka bashiciiya ba Jeso mukaambo kakuti nguni mukando akati kabo. 47Pele Jeso wakeezhiba mizeezo yaakuli mu myonzo yabo. Wakaleta kana wakazhimika afwaafwi, 48#Mat 10:40; Lk 10:16; Joh 13:20amane wakabaambila ati, “Kufwumbwa muntu utambula kana kaka mwizhina lyangu, ati ndime ngwaatambula. Ulimwi aze untambula, ati wamutambula Taata wakantuma. Wezo ngumutelaicila ati wiina mbwaabele akati kenu, ngu mukando.”
Ngumutalwi aze ati mulyaaze
(Maako 9:38-40)
49Inzho Johani wakaamba ati, “Mwami, twakabona muntu umwi ulakusha myoza mibiyabi mwizhina lyako, pele twakamukasha kaambo takucilila ukoya mbutukucilila uswe.”
50Pele Jeso wakamwaambila Johani ati, “Mutamukasha, kaambo wezo ngumutalwi aze ati mulyaaze.”
Basamaliya Bakaka Kumutambula Jeso
51Inzho nicakashika afwaafwi ciindi ca kwaamba Jeso atolwe kwizeulu, wakakanka kukanza kuya ku Jelusalemu. 52Wakatuma banshinkombe bamwi kwaamba baye kumbele lyakwe, bakaya kunjila mu munzhi wa Samaliya kwaamba bamululamikile shintu shoonse. 53Pele bantu ba mu munzhi wezo bayina nibakamutambula Jeso, kaambo bakazhiba ati ulaya ku Jelusalemu. 54#2 Bami 1:9-16Inzho ba shiciiya bakwe ba Jemusi u Johani nibakabona bobo, bakamwaambila Jeso ati, “Mwami, sa ulazanda toompolole mulilo kuhwa kwizeulu kuzonaula bantu baba?”
55Jeso wakacebuka wabalemanina ba shiciiya. 56Ngoonaawo bakaitilila baya mu munzhi unji.
Bantu Beelele Kucilila Jeso
(Matayo 8:19-22)
57Nibakaakuya bweenda munzhila, muntu umwi wakamwaambila Jeso ati, “Ndakucilila kufwumbwa nkuukaya.”
58Pele Jeso wakamwaambila ati, “Ba mwaaba balikwete mena, bazuni balikwete shitaanto, pele Mwanaa Muntu wiina aakoona pe.”
59Jeso wakamwaambila muntu umwi ati, “Ncilila.”
Pele muntu wezo wakaamba ati, “Mwami, ndaakuzanda ati ntaangune nje ku munzhi nkazhike taata.”
60Pele Jeso wakamwiingula ati, “Baleke bafwu bazhike bafwu nokwabo. Uwe koya ukakambauke makani a bwami bwa Leza.”
61 #
1 Bami 19:20
Ulimwi umwi muntu wakaamba ati, “Ndakucilila Mwami, pele ntaangune nje nkalaye bakwesu.”
62Jeso wakamwaambila ati, “Kwiina muntu ucita ati, akanka kulima iiyamba ulalanga munshi uyelele bwami bwa Leza.”
Currently Selected:
Luka 9: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.
