1 Bakolinto 6

Kubetekana Milandu Akati kaba Kilisito

1Kuti na umwi muntu akati kenu ulikwete kaambo umweenzhiina, no mbubuti mbwaakonzha kuya kubetekwa u bantu bakunze kuleka kubetekwa ku bantu ba Leza? 2Sa tamwizhi ati bashomeka mbu bakaabeteka bantu ba anshi? Inzho na kuti bantu ba anshi balakabetekwa amwe, sa tamukonzha koombolozha tukani tushoonto twamushobo wezu akati kenu? 3Sa tamwizhi ati tulakabeteka milandu yaba anjelo? No tulakacilwa buti kubeteka sha anshi ano? 4Kuti na mulikwete milandu ku shintu shili ukoya sheshi, no nkaamboonzhi ncimwiitolela ku babeteshi banyanshiwa mu mbungano yenu? 5Ndaamba bobo kwaamba ati muushe insoni. Sa nkukuti mulanshimwina ati kwiina muntu musongo naaba womwi akati kenu ukonzha kubeteka twaambo akati kabashomi? 6No kayi mbubuti mushomi mbwaabetesha wamushobonina ku bantu bankuta, ulimwi kunkuta yababo batali bashominina?

7Inzho calibonya kale kwaamba ati mwakacilishiwa nkaambo mulatola milandu yenu kuya mulabetekwa kunkuta. No nkaamboonzhi tamuhumina bulyo kubishizhiwa? No nkaamboonzhi tamuhumina kwibilwa? 8Pele mulabisha ukwibila bamwi, ulimwi sheshi mulashicita ukubashomi nokwenu.

9Sa tamwizhi ati basofweele tabakatambuli Bwami bwa Leza? Inzho mutalicengi pe! Kutali babo bulyo nibaba bahuule u bakomba baleza bapange ba shimamambe u balombwana batwalana u balombwana nokwabo, 10ubatewu, ubashaacihule mwangu, ubacakolwa, babeshi, nibaba bashikufwumpa. Kwiina wa babo ukaatambula bwami bwa kwizeulu bwa Leza. 11Bobo mbubakaakubele bamwi akati kenu. Pele umwe mwakasanzhiwa, ukusalazhiwa, ukululamikwa mwizhina lya Mwami Jeso Kilisito u Moza wa Leza wesu.

Mibili yenu Njaka Leza

12 # 1 Bako 10:23 Umwi muntu ulakonzha kwaamba ati, “Ume ndimuhuminye kucita shintu shoonse.” Pele tacaamba ati shintu shoonse shilikwete impindu. Shintu shoonse shihuminye kwangu. Pele nshikabi muzhice wacintu niciba comwi pe! 13“Ucakulya ncefwu, alyo ifwu ndyacakulya,” nikuba bobo Leza ulakazonauna shoonse shobile. Mubili tooli wamamambe, pele ngwakusebezha mulimo wa Mwami nkaambo Mwami ngumukamwini mubili. 14Nkaambo Leza wakabusha Mwami Jeso ku bafwu, aswe umbona ulakatubusha munsana shakwe. 15Sa tamwizhi ati mibili yenu nshizo sha mubili wa Kilisito? Sa ntole shizo sha mubili wa Kilisito ukushicita ati shiswaangane umubili wamuhuule? Bobo imbo pe! 16#Mata 2:24 Sa tamwizhi ati wezo uliswaanganya umuhuule, ati ulaba mubili womwi u wezo? Nkaambo umbona mbuli mbukulembelwe ati, “Babo bobile balakaba mubili womwi.” 17Pele wezo uliswaanganya u Mwami, ulaba Moza womwi u Mwami. 18Amuleke bumambe. Shibi shoonse nshaacita muntu, tashibisha mubili, pele shimamambe ulabishizha mubili wakwe mwini. 19#1 Bako 3:16; 2 Bako 6:16Sa tamwizhi ati mibili yenu iŋanda ya Moza Usalala uuli muli umwe ngumwakatambula kwa Leza? Ubobo tamuli nubeni pe, muli u Leza. 20Mwakaulwa umuulo mukando. Ubobo amusebezhe mibili yenu, ca bulemu bwaka Leza.

Currently Selected:

1 Bakolinto 6: ILL

Highlight

Copy