Máàrk 9

1Yésù ɨ́ tànàgwà ŋgáb ɨnè: «Mɨ tanaɓa nyí àmɨɨr wááŋ á: nùb kù tɨŋtɨ̀ŋ nùb lè noò ɓaye bɨ dùnɨ jáŋ ɓwâ Mèín ɓa gònɨ ŋgáŋnɨ nɨ́ɨ́b lâs ya ɓe nyòmeè á.»

Ɓɨ̀m Yésùù cə́ndɨtɨ́

(Góòmɓwê Mt 17.1-13; Lk 9.28-36)

2Jíì tínmwi̧ cùr kɨ́ no, Yésù ɨ́ ɓégè Píyéèr, Jâk ɓe Jâŋ. Ŋgə́ ɨ́ gè ŋgáb ɓe kàm kù ya, ŋgáb yaá ɓè ŋgáb kɨ̀ ŋgáb. Ɓɨ̀m noò ɨ́ cə́ndɨ̀rê ŋgábè tíí. 3Ɗà júúb noò ɨ́ vùùɓə̀ə̀ɓà u̧ tóóm. Vuvuklé kɨ́ sàmàìn nò kù ɗɔ̀ɔ́b lè no se júk a vùklè u̧nèé nɨ ɗàà. 4Ŋgáb pə́cì na Èlî ɓe Mòyîs á bɨ sà̧nì ɓe Yésù. 5Kí á Píyéèr wei ɓɔ̧, ŋgə́ ɨ́ tànà Yésù: «Tá, á mîn nɨ́m dùná nɨ hò̧; nɨ́m á óŋnɨ njáŋnɨ̀b taarɨ́b, kɨ́ woò mwi̧, kɨ́ Mòyíìs mwi̧, kɨ́ Èlíì cè mwi̧.» 6Kí du Píyéèr yi nɨ́ ɗə̀ə̀ŋwá nɨ́m ŋgə́ yi fɨ́tɨ nyìnniì, ɓetí vùù ya bɨɓatɨ́ nɨ́ ŋgáb cei. 7Á ɓàk kù ya só ŋgáb ya, ɓàk kɨ́ no kúu kù ɨ́ tàhô̧ ɨnè: «Nò rè mwin ɗûnɨ́mí moò mɨ caré á, njɔ̧̀ moò lâs á ŋgə́ ya, óknáam ŋgə́!» 8Ɓè mu̧u̧, nɨ̀fuùb góomtee ɓo gə́nȩ̀ȩ́, ŋgáb nò kù pə́cɨ̀wá, jɔ̀sé ŋgáb, ɨ́ Yésù cè. 9Ŋgáb sócùnɨ ɓeè, á Yésù tànà ŋgáb: «Kpáb! Nyí nò kù àm nɨ́m nyí pə́ kɨ́ tànàwá há̧á̧ hȩ Mwin Nɨ̀rì ɓa sə̀ə̀mcùhó̧nɨ mvókín nɨ̀kwíbí.» 10Ŋgáb ɨ́ jə̀ŋɓàhâ ɓíì kɨ́ ɨ́dù ŋgáb ɨ́ yà nyì̧ì̧tèènɨ mvókín ŋgábè no ɨnè: «Kɨ́ ŋgə́ tace nɨ́: ‹Sə̀ə̀mcùhô̧ mvókín nɨ̀kwíbí› na rè, a tace ní?»

11Kí á ŋgáb fɔ́ Yésù: «Àm níì á nɨ̀gááŋ káàtàbì tace ɨnayâna Èlî ɨ́ ɓa nɨ́ gòyàyènɨ ru?» 12Yésù ɨ́ pììnà ŋgáb: «Á ɗúmèɓànɨ Èlî gòyàtɨ, àm ŋgə́ go nyààŋcùnɨ nɨ́ɨ́b lâs. Ɨ́dù àm níì á káàtà Mèèín taɓwéece Mwin Nɨ̀rì ɓa kwànɨ jábɨ́r cei, kùb a sàkkî ŋgə́ á? 13Àà, mɨ tànàyè nyí: Èlî ya gocií nɨ́, nɨ̀vɨ́tɨ̀b ɨ́ ndɨ̀ŋ ŋgə́ nɨ́ɨ́b ɓáŋhɨ́b lâs ŋgáb ɗúré, hȩ káàtà Mèèín yi taré.»

Yésù jukɨ́naá mwɨi kù nyéhè ɓáŋhîn só

(Góòmɓwê Mt 17.14-21; Lk 9.37-43a)

14Ɓwâ Yésù ɓe nɨ̀fuùb taarɨ́b kɨ́ yi ŋgóobso ɓe nɨ̀fuùb kù yi meré, ŋgáb ɨ́ pə́sò mɨ̀kwìn nɨ̀vɨ́tɨ̀bì ɓe nɨ̀gááŋ káàtàbì kɨrií ŋgáb, ndɨ̀ŋnɨ mɨ̀sə́ndɨ̀r ɓe ŋgáb. 15Pê nùb kɨ́ yi pə́ Yésùù, ŋgáb ɨ́ sɨ̀rɨ̀ɓà ŋgáb lâs, ŋgáb ɨ́ lùgàìn ŋgə́ nyìndɨ̀nɨ. 16Yésù ɨ́ fɔ̂ nɨ̀fuùb noò: «Nyíne ŋgáb ndáŋce ní ya?» 17Nɨ̀ŋgwá kù ɨ́ tàhó̧nà ŋgə́ mɨ̀kwìn kɨ́ no ɨnè: «Yée Tá tɔ̀hí, mɨ gewona wu mwin móò du ɓe nyéhè ɓáŋhîn sóò á, nyéhè kɨ́ á ndɨ̀ŋnɨ ŋgə́ nɨ ɓɔ̧ wòr. 18Yɨ́ lâs nyéhè kɨ́ bɨ ŋgéé, ŋgə́ á ŋgə́ ɗàá lòmsénɨ, káfə́ré á yà ŋgə́ ɓɔ̧ɔ̧ tóŋhó̧nɨ, ŋgə́ a ŋgáíce nyíín, síí ŋgéé á tàm cwa̧ta̧a̧. Mɨ tɨ yóŋtɨ́ nɨ̀fuùb woò ŋgáb jùkɨ́nà ŋgə́ nyéhè kɨ́, ɨ́ yɔ̂ nɨ́ ŋgáb.» 19Yésù ɨ́ tànà ŋgáb: «Kə́í! Ɨna nyí nùb ə́ə́m sumí ɗàwá rè. Há̧á̧ ɓwâ ŋge á mɨ ɓa dùgwà nɨ ɓe nyí? Mɨ ɓa nyí jíìgwànɨ há̧á̧ ɓwâ ŋge? Gèwònàná mɨ mwɨi kɨ́.» 20Á ŋgáb gèsònà Yésù mwɨi kɨ́. Pê nyéhè ɓáŋhîn ndè ya pə́ Yésùù, ŋgə́ ɨ́ mgbɨ́ktɨ̀lòmsê mwɨi kɨ́ ɗàá, mwɨi kɨ́ ɨ́ yà pɨ́ɨ̀ŋnɨ káfə́ré ɓɔ̧ɔ̧ torok torok. 21Yésù ɨ́ fɔ̂ tá mwɨi kíì ɨnè: «Yànɨ ɓwâ ŋge á nɨ́m kɨ́ du ŋgə́ ndɨ̀ŋnɨ?» Ŋgə́ ɨ́ pìhè: «Yàá ŋgéé mutíí á. 22Nyéhè kɨ́ á ŋgə́ njóklélɨ́ŋnɨ wa̧á̧, kɨ́ kù mvúúm, àm ŋgə́ a kûú. Duú sàmàìn wu ndɨŋ nɨ́m kù, yée, kpɔ́k nɨ́m!» 23Kí á Yésù tacuna ŋgə́ ɨnè: «Wu taá ɓè mɨ fɨ́tɨ ndɨ̀ŋnɨ nɨ́m kù na á à! Mɨ tànà wu, nò du ɓe ə́ə́m sumíì, á sàmàìn ŋgə́ ndɨŋ nɨ́ɨ́b lâs.» 24Ɓè mu̧u̧ tá mwɨi kíì ɨ́ tàhô̧ laŋtɨ̧ɨ̧́ ɨnè: «I̧i̧, mɨ ə́əmtɨ́! Ɨ́dù kpɔ́k mɨ ɓetí mɨ á ɓe gôsɨ́m ə́mní!»

25Hȩ Yésù pə́ kùŋkùŋ nɨ̀vɨ́tɨ̀bì ɓáàwòniì, ŋgə́ ɨ́ wáàmndê nyéhè ɓáŋhîn kɨ́ ya, ŋgə́ a tace: «Nyéhè ɓáŋhîn ɗeinkɨ́ kùb ɓɔ̧ ɓe tó rè, éíkɨ́ɨm mwɨi lè só, wu cè wú ye mwi̧ ŋgéé só féíncùr!» 26Á nyéhè rè mgbɨ́ktɨkɨ́soɓa mutí, ɗà ŋgə́ ɨ́ fô̧ ɓe kɨ́ɨ́ŋ cúk, mutí ɨ́ kèrɨ̀ɓà ɗóóŋ hȩ fín. Nɨ̀vɨ́tɨ̀b ɨ́ yà tàtèènɨ: «Ŋgə́ kútɨ́.» 27Ɨ́dù Yésù ɨ́ ɗàmwû ŋgə́ còóm, ŋgə́ ɨ́ ə́ŋhȩ̀. 28Ɓwâ Yésù yi gɨcu yóò, ɓe nɨ̀fuùb noò á cè ŋgáb kɨ́ ŋgáb, ŋgáb ɨ́ fɔ̂ ŋgə́: «Àm níì á nyéhè kɨ́ tɨ yɔ́kce nɨ́ nɨ́m ŋgɨ́nnɨ?» 29Á ŋgə́ piina ŋgáb ɨnè: «Ɓe mɨ̀yú̧ ɗóò á kùb fɨ́tɨ bɨ́ ŋgɨ́ínɨ kúúŋ nyéhè kíì ru.»

Kɨ́ gwì bɨrɨ́bí, Yésù á tànɨ àm cwá ní ɓa kúnɨ Mèín a tì sə̀ə̀mcùhô̧ níì

(Góòmɓwê Mt 17.22-23; Lk 9.43b-45)

30Ə́rè ɓèé Yésù ɓe nɨ̀fuùb noò yaá ndóŋnɨ Gàlìlê. Yésù ya nɨ́ ɗúwa nò kù ɗə̀ə̀ŋtɨ, 31ɓetí ŋgə́ yaá tɔ̀ɔ̀nɨ nɨ̀fuùb noò, ŋgə́ a tace ɨnè: «Kùb naréé Mwin Nɨ̀rì nɨ̀vɨ́tɨ̀bì ŋgáré, ŋgáb ɓa ŋgə́ kwíìnɨ á, cùr cwá ŋgéé, jíì taarɨ́bí no, Mèín a tì sə̀ə̀mcùhô̧ ŋgə́.» 32Ɨ́dù nɨ̀fuùb ya bɨ́ njàb nyindí kíì ókwa, vùù yaá cè nɨ́ ŋgáb bìnɨ ŋgə́ fɔ́nɨ.

Na ma ɨ́ duce jíri?

(Góòmɓwê Mt 18.1-5; Lk 9.46-48a)

33Ɓwâ ŋgáb féín Kàpèrnàwúùm, lêé ŋgábè yóò á Yésù fɔ́ nɨ̀fuùb noò: «Nyí tɨ ndáŋkomce jȩ̀ȩ̀ ní ya?» 34Kí á ŋgáb ɨ́ dù bɨ́ néín; ɓetí jȩ̀ȩ̀, ŋgáb ya ndáŋkom ɗə̀ə̀ŋnɨ nò du jíri mvókín ŋgábè noò á. 35Hȩ Yésù dùrénɨ ɗàá, á ŋgə́ ɓéwo nɨ̀fuùb no cóóŋ ɨ́ bɨrɨ́b lè, ŋgə́ ɨ́ tànà ŋgáb: «Mvókín nyínè no, nò ɗú dùnɨ tíí, dù nò cáŋhɨ̀rí, ŋgə́ a éínà nùb lâs.» 36Á Yésù ɗamwo mutí kù gò ə́ə̀ŋnɨ ŋgábè tə̧ə̧́, ŋgə́ ɨ́ kùùkî mwɨi kɨ́, ŋgə́ ɨ́ tànà ŋgáb: 37«Nò gam mutí ti ɨnè ɓe ɨ́r moò rɨ, mɨ nɨ̀mɨr á ŋgə́ gam ndu, nò gamce mé, nɨ mɨ nɨ̀mɨr gàmɗóòwá, ŋgə́ gamɓwée nɨ nò tómwo mé á.»

Nò du nɨ́ ɓi̧í̧ ɓe nɨ́m ɗàwáá du nɨ nò nɨ́mè á

(Góòmɓwê Lk 9; 49-50)

38Jâŋ ɨ́ tànà Yésù ɨnè: «Tá, nɨ́m tɨ péé nɨ̀ŋgwá kù ŋgɨ́ínɨ nɨ̀wàtɨ̀b ɓe ɓêé ɨ́r woò, nɨ́m ɨ́ ɗû ŋgə́ kààŋnɨ, ɓetí ŋgə́ nɨ nò nɨ́mè kpánéné sé.» 39Ɨ́dù Yésù ɨ́ pììnà ŋgə́ ɨnè: «Nyí nɨ ŋgə́ kàŋhɨ̀r, ɓetí nò ndɨŋ nɨ́ɨ́b sɨ̀sɨ̀rí ɓe ɓêé ɨ́r moò rɨ, sàmàìn nyinɓáaŋkwacɨ ɓe ɨ́r moò ɓè mu̧u̧ ɗàà. 40Ɓetí nò du nɨ́ ɓi̧í̧ ɓe nɨ́m ɗàwáá du nɨ nò nɨ́mè á. 41Mɨ tanaɓa nyí àmɨɨr wááŋ á, u̧ á nò kwá na nyí tob mvúmí mwi̧ àm nyí du nùb ók ɓe Krístùù, nò kɨ́ tɨ̀ nɨ sam lɔ̧̂, ŋgə́ ɓa kwànɨ lɔ̀ɔ́ nóò á.»

Cum duɓa nɨ ɓáŋhîn á

(Góòmɓwê Mt 18.6-9; Lk 17.1-2)

42«Nò kwá njóoré nɨ̀mwi̧ mvókín mucutɨ́b ə́mne mɨ rèè cumí, á nyɔ̧ɔ̧́ péín nò kíì kùb kóllébɨ̂ŋ ŋgə́ jùm kàm kù ya, kùb a lèèrê ŋgə́ mɨ̀kwehɨ̀rí. 43Wu ɨ́ pê ŋgáár woò á wu gèrénɨ cumí, téínkɨ́ɨm ŋgə́, á nyɔ̧ɔ̧́ wu lə́bɨ̂ŋ Haam Mèèín no ɓe ŋgáár mwi̧, ɨ́ ndôŋ kɨ́ kùb ɓa wu lèèrénɨ ɓe ŋgárɨ̀b woò bɨrɨ́b lâs wa̧á̧, wa du lɨ̂mnɨ ɗàwáá noò. [ 44Yɨ́ kɨ́, ‹soŋnɨb du tàŋnɨ síhé bɨ kúnɨ ɗàà, wa kɨ́ nɨ lɨ̂mcénɨ lɨ́mîn ɗàà.›] 45Wu ɨ́ pê guur woò á wu gèrénɨ cumí, téínkɨ́ɨm ŋgə́, á nyɔ̧ɔ̧́ wu lə́bɨ̂ŋ Haam Mèèín no guur mwi̧, ɨ́ ndôŋ kɨ́ kùb ɓa wu lèèrénɨ ɓe gurub woò bɨrɨ́b lâs wa̧á̧, wa du lɨ̂mnɨ ɗàwáá noò. 46[Yɨ́ kɨ́ ‹soŋnɨb taŋ síhé bɨ kúnɨ ɗàà, wa kɨ́ nɨ lɨ̂mcénɨ lɨ́mîn ɗàà.›] 47Wu ɨ́ pê íí woò á wu gèrénɨ cumí, mvéehó̧kɨ́ɨm ŋgə́, á nyɔ̧ɔ̧́ wu lə́bɨ̂ŋ Haam Mèèín no ɓe íí mwi̧, ɨ́ ndôŋ kɨ́ kùb ɓa wu lèèrénɨ ɓe íí woò bɨrɨ́b lâs wa̧á̧, 48wa du lɨ̂mnɨ ɗàwáá, ɓe yá ‹soŋnɨb taŋ síhé du kúnɨ ɗàwáá.› 49Mèín ɓa sàtɨ̀nɨ nɨ̀vɨ́tè mwi̧í̧ mwi̧ ɓe wa á.

50«Mbeè duɓa nɨ́m nyɔ̧ɔ̧́ á, ɨ́dù ɗɨ́ɗóme ŋgéé ɨ́ cɔ̧̂, ɨna á kùb fɨ́tɨ ndɨ̀ŋnɨ ŋgə́ a ɗómcù? Dunáam ɓe ɗɨ́m nyɔ̧ɔ̧́ hȩ mbeè duɓwée nɨ́m nyɔ̧né, nyí a dùɓwê ɓe kúu mwi̧.»

Currently Selected:

Máàrk 9: NTV

Highlight

Copy