Mairk 4

Tha parable o tha fairmer skailin seed

1-2Yinst mair Jesus begun lairnin fowk alang tha loch shore. A wile thrang o fowk haed gethert roon aboot hïm, sae he got ïntae a bóat that wus oot on tha wattèr. He sut doon an toul tha yins on tha shore a hale wheen o thïngs bi parables. Amang thaim wus thïs yin. 3“Lïsten here [noo]! Thair wus thïs fairmer went oot tae saa seed. 4Whan he wus scattèrin tha seed, some drapt doon alang tha pad an tha burds flew doon an peckt ït up. 5An some fell on roakie grun whar thair wusnae much clye. It sprung up quïck, becas tha clye wus shalla, 6but as shune as ït brairdit an tha sin cum oot, tha plants wus scorcht, an the' deed aff acause the' haed nae ruits. 7Ither seed faad doon amang thoarns, an tha thoarns sprung up, tuk ower an chokt ït. Sae thair wus nae yiel. 8But a lock drapt on tae guid grun. It daen weel an gien a guid hairst: thurtie, sïxtie or a hunnèr times mair.” 9An Jesus saed, “Let hïm that haes ears ïn hïs heid tak tent!”

10An whan he wus on hïs ain, some o tha fowk that wus alang wi tha Twal axt hïm aboot hïs parables. 11“Tha saicret o tha Kïngdom o God haes bin gien tae ye,” saed Jesus, “but tae thaim that's ootside tha Kïngdom, A taak ïn parables; 12sae that ‘The' micht aye be lukkin, but niver see, an aye lïstenin, yit niver unnèrstan; less the' micht turn an [thair sïns] be forgien.’ ”

13An Jesus saed, “If ye dïnnae unnèrstan thïs parable, hoo ir ye gaun tae unnèrstan aa tha rest? 14Tha bodie that scattèrt tha seed wus sowin tha wurd o God. 15Then some fowk ïs laik tha seed that faad doon nixt tha pad. As shune as the' hear tha wurd, alang cums Satan an taks ït oot o thair hairts. 16An ït's jist tha same wi tha seed that fell on tha staney grun. The' hear tha wurd an richt awa tak ït ïn wi a gled hairt. 17But the' hae nae ruit sae the' cannae houl on tae ït whan haird times an trouble cums acause o God's wurd, an sae the' jist gie up. 18An thair's ither fowk akin tae tha seed that wus sowed amang tha thoarns. 19The'r aye worryin, rinnin eftèr money an hung'rin fer thïngs the' hinnae got. An sae thair's nae crap, fer tha wurd haesnae a chaunce tae growe. 20Ither fowk ïs laik tha seed sowed on guid grun. The' hear tha wurd, tak ït tae thair hairts, an ït gies a guid yiel: thurtie, sïxtie an a hunnèr times mair.”

Tha parable o tha lamp

21An Jesus saed tae thaim, “Wud ye iver thïnk o brïngin ïn a lamp an pittin ït unnèr a boul or tha bed? Na. Ye wud pit ït up on a stan. 22Fer thair's naethin hïd that'll no be brocht oot ïntae tha licht, an thair's nae saicret that'll no be brocht oot ïntae tha apen. 23Let hïm that haes ears ïn hïs heid tak tent!” 24An he saed tae thaim, “Mine hoo yis lïsten. Fer tha misure yis gie wull be tha misure yis get. Ay, an ït'll be even mair. 25Fer hïm that haes plentie wull be gien mair. An hïm that haes lïttle, even whut he haes wull be tuk awa frae hïm.”

Tha parable o tha growein seed

26An Jesus saed, “Tha Kïngdom o God ïs jist laik thïs. Tha fairmer scattèrs seed on tha grun.” 27“Day an nicht, nae mettèr ïf he's up an aboot or sleepin, tha seed sprouts up an growes, tha mair he daesnae unnèrstan whut maks ït growe. 28Tha seed growes ïn tha clye ïtsel, furst tha braird shows, then tha staaks, an then tha heids cums on tha tap o tha staaks. 29Then whan tha crap ïs ripe, tha fairmer taks tha heuk tae ït, fer hairvest time ïs cum.”

Tha parable o tha mustèrt seed

30An agane he saed, “Whut d'ye thïnk tha Kïngdom o God ïs laik? Noo, whut storie cud A tell that wud pit ït ower tae ye? 31It ïs laik a wee bït mustèrt seed plantit ïn tha grun, tha weeest seed o aa. 32But whan ït growes, ït gets bïgger an bïgger, tae ït's tha bïggest plant ïn tha gairden, wi a spreed o brenches tha burds can roost unnèr, ïn oot o tha sin.” 33An Jesus toul a hale wheen o parables laik these tae tha fowk, tae halp thaim unnèrstan. 34He niver saed ocht tae thaim wi'oot uisin parables. But whan hïm an hïs follaers wur on thair ain, he toul thaim whut ït aa mained.

Tha stoarm on tha loch

35Whan evenin cum roon, he saed tae hïs follaers, “C'mon an we'll gang ower tae tha ither side o tha loch”. 36Whaniver tha thrang wus sent hame, Jesus wus aareadie ïn tha bóat, sae the' stairtit oot alang wi some ither wee bóats fer tha faur side. 37Aa at yinst, a bïg wun ris up. Thair wus a pooerfu stoarm an tha waves wus batin ower tha side o tha bóat tae ït wus near fu o wattèr. 38Jesus wus sleepin ïn tha bak o tha bóat, on a pïlla. Hïs follaers ris hïm yellin, “Maistèr, dae ye no care ïf we aa droon?” 39Up he got, he chackt tha wun an he saed tae tha waves, “Be quait! Lown doon!”. Then tha wun drapt an ït wus aa peace an quaitness. 40An Jesus saed tae thaim, “Hoo cum yis ir sae feart? Hae ye nae faith yit?” Eftèr aa thïs, 41the' wur hairt-scarred an saed tae yin anither, “Whut kine o a man ïs thïs? Even tha wun an tha waves daes as he bïds thaim!”

Currently Selected:

Mairk 4: USNT

Highlight

Copy